Gênesis 9
9
Deus Noébe yubakai eskanikiaki, na hãtxarã
1Deusũ Noé inũ hawẽ bakebu duawakĩ yuikĩ eska wanikiaki. “Bake itxapa bawai ana pai mai anu ana iake iakebaũshãkãwẽ, hiwebaunirã”, iwanã ana yuikĩ: 2-3“Yuinaka pitibu inũ pitibuma matuki datei dakenũbarikanikiki. Peiyabu nuyaibu inũ, maĩ mapuabu inũ, henẽ hiweaburã, ha yuinaka dasibi ẽ matu ibu wamaii, dasibi matũ piti wakinã. Ha dukũ yunu besti ẽ matu inãniki, mã pinunã. Hanua ikis yuinakari inũ yunu ẽ matu inaiĩ, matũ pitirã, ha pi mã hiwepakeshanũbunã. 4Eska besti ẽ matu nemaii. Yuinaka nami himi kauanama piyamashãkãwẽ. Hamẽ himinã, yura hiwemamiswẽ taeshũ nami hawẽ himiyabi piyamashãkãwẽ. 5-6Earã, ẽ Deus ẽ yushĩ itsa keska wakĩ yurabu ẽ matu damiwaniwẽ taea tsuara pubẽkĩ yura kasmai yuinakapã yura betsa tenãkenã, manakukĩ huni betsãri hau ea tenãshũshanũwẽ. Habũ matu tenãbu unãkĩ hakimama ẽ hatu unãti wakubaĩshanaii”, itã 7ana hatu yuikĩ: “Hakia matu hiwekinã, bake itxapa bawakĩ ana itxai pakũkaĩkĩ mai hirabi matakĩ ibu wapashãkãwẽ”, iwanã,
8-9Noé inũ hawẽ bakebu ana yuikĩ: “Matu inũ habia matuwẽ pakubaĩshanaibu txanima ẽ matu yubaii, hawa matu parãma matu henetima wakinã. Nĩkakãwẽ. 10Pitibu inũ pitibuma yuinaka habube ẽ matu yubariaii. Na mã habu pashaima ẽ dasibi matu yubaii, matube shashu nunuti anua kaĩshinabuberã. 11Haska dasibi matu inũ habu yubakĩ maiwẽ hiweabu dasibi henewẽ ẽ ana matu tenãma ishanai ẽ yubakaii. Haska ẽ akima keska wakĩ mai anu hiweabu henewẽ ẽ yamawaima keska wakĩ ana habiawẽri ẽ ana akama ishanaii.
12-13Nawã bai tapĩkĩ ẽ yubaka unãti wakĩ ẽ nai anu sĩtãpakekĩ ẽ kaĩmapakeshanaii. Haskawẽ taeshũ mai anu hiwebaunabu dasibibũ uĩkĩ: ‘Nuku yubaniwẽ taeshũ henewẽ Deusũ nuku ana tenãkĩ keyuama ishanikiki’, ikĩ shinãpaketirubuki. 14-15Haska biamawakĩ nai kuĩwẽ ẽ mai atximaya nai anua butui nawã bai sĩtãpakeaya ẽ matu inũ yuinakabube yubakani hakimama ẽ shinãkubaĩshanaii. ‘Henewẽ hiweabu dasibi ẽ ana tenãkĩ keyuamaki’, ashũ 16nawã bai sĩtã tapĩshũ uĩkĩ mai anu yurabu inũ yuinaka hiweabu dasibi ẽ hatu yubani hakimama ẽ shinãkubaĩshanaii. 17Nawã bai sĩtã ẽ hatu pakeshunaya mai anu hiweabũ ẽ hatuki yubakani uĩkĩ yurabũ ea shinãkubaĩshãkanikiki”, haskai Deus Noébe yubakai hãtxanikiaki.
Noé inũ hawẽ bakebu hiwei eskanibukiaki, na hãtxarã
18Noẽ huni bakebu Sem inũ, Cam inũ, Jafé shashu nunuti anua kaĩmabu txipu Camnẽ huni bake bawaima kaiã kenakĩ: “Canaãki”, anikiaki. 19Noẽ huni bake dabe inũ besti mai anu pakũkaini ana itxai iake iakekubainibukiaki.
20Hanua nunuti anua kaĩbiranimashũ Noẽ bai wakĩ taewashũ uva tatxa banaimashũ 21hawẽ vinho buspuai aka paehaira hawẽ tari hiwe merã tariuma usha dakakẽ 22Canaãnẽ epa Cam hikikaĩ hawẽ epa Noé tariuma paeã usha daka uĩtã kaĩkirã kashe wakĩ hawẽ betsa dabe hatu yuia 23Sem inũ Jafé hawẽ dakukuti bitãshũ hune uiãma hamauri besukaĩ hatũ epa tariuma daka yabutã kaĩbiranabũ 24Noé paeã bestẽtã bepe ikai hawẽ bake mashkũ kashewashu yuiabu tapĩtã 25hawẽ baba yupukĩ yuikĩ:
“Canaã inũ hawẽ bababu duawama itxakawakĩ
hatunabũ hatũ dayanika hawẽ escravo hatu wakubaĩshãkanikiki, dayamakinã”,
akĩ hatu yuinikiaki. 26Hanushũ ana betsa yuikĩ:
“Ẽ mekenika Senhor Deusũ
hau Sem inũ hawẽ bababu ikubainaibu
hau hatu duawakubaĩshanũwẽ.
Ha inũ, Canaãnẽ bababurã,
hau hawẽ dayaru escravo ikubaĩshanũbũwẽ,
Sem dayashunirã.
27Haska inũ, Deusũ hatu pa waya
Jafé bababũ Semnẽ bababu hatu mebĩtã
hatũ mae hau ibu washanũbũwẽ,
Canaãnẽ bababu hatu escravo wariakinã”,
akĩ Noẽ hatu yuinikiaki.
28Noé 600 ano hayakẽ henẽ mai hirabi atxima netsunikẽ ana 350 ano Noé hiwea 29hanua 950 ano haya Noé mawanikiaki.
Atualmente Selecionado:
Gênesis 9: cbsBR
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
