Gênesis 14
14
Hawẽ berẽ Ló atxibaĩshinabu Abrão mebikinãtanikiaki, na hãtxarã
1-2Na habiatianã, Sinar nawa shanẽ ibu Anrafel inũ, Elasar nawa shanẽ ibu Arioque inũ, Elão nawa shanẽ ibu Quedorlaomer inũ, Goim nawa shanẽ ibu Tidal hatũ piayabube hatuki dasitã sinatakĩ Sodoma nawa shanẽ ibu Bera inũ, Gomorra nawa shanẽ ibu Birsa inũ, Admá nawa shanẽ ibu Sinabe inũ, Zeboim nawa shanẽ ibu Semeber inũ, Bela mae hawẽ kena betsa Zoarã, shanẽ ibu tibi hatũ piayabubetã hatu detei bekĩ 3Sidim napãpa anua hawẽ kena Mar de Sal, nukũ hãtxawẽ Ianẽwã Batapa, dapi ha 5 shanẽ ibubu hatũ piayabube itxashũ mananibukiaki. 4Quedorlaomer 12 ano ka shanẽ ibukĩ dasibi hatu tsuma wanishũ ana bari betsatiã hatu itxakawaya ana shanẽ ibu wakatsi ikama ana duawabuma 5-6ana bari bestitxai ka Quedorlaomer inũ shanẽ ibu betsa 3 hatunabubetã shinãtã nawa betsa betsapabu detenamekĩ 5 mae maemakĩ detetã ha tibi hatu tsuma wanibukiaki. Astarote-Carnaim anu kashũ Refain nawa tsuma watã Hã mae anu kashũ Zuz nawa tsuma watã Savé-Quiriataim mae anuri kashũ Emin nawa tsuma watã Seir Mati anu kashũ Horeu nawa tsuma wakĩ detekĩ hatu txibãbaini Parã anu hari tsua hiweabuma anu dapikea 7hari txĩtũtani bekĩ Quedorlaomer inũ habũ merabewaibu En-Mispate hawẽ kena betsa Cades anu hikitã tsuara Amaleque nawabuki nukutã hatu dete keyutã Hazazom-Tamar mai pakea anushũ tsuara Amorreu nawabukiri nukutã haturi dete keyunibukiaki.
8-9Hanushũ 5 mae shanẽ ibubũ hatũ piayabubetã Sodoma nawa shanẽ ibu inũ, Gomorra nawa shanẽ ibu inũ, Admá nawa shanẽ ibu inũ, Zeboim nawa shanẽ ibu inũ, Zoar anu hiwea Bela nawa shanẽ ibu merabenamekĩ detekĩ hatu nemakatsis iki napãpa Sidim anu itxashũ manaibũ hanua Quedorlaomer inũ, Tidal inũ, Anrafel inũ, Arioque besubukuã mapuabu habu 4 shanẽ ibũ maerã, Elão inũ, Goim inũ, Sinar inũ, Elasarã, habu hatũ piayabube bei detenamenibukiaki. 10Hanua Sidim mae anu hanu napãpa ha meribi bui txashka shãtu ewapa itxapa hayanikiaki. Hanua detenamekĩ hatu maemabu Sodoma nawa inũ Gomorra nawa shanẽ ibu ha dabe uinũ ika kushibaini ha shanẽ ibu dabe pashai ha kini ha meribi bui txashka shãtuki pukua mawaibũ shanẽ ibu betsabu mati anuari ni merã pashai irurianibukiaki. 11Habũ hatu detekĩ maemashu Sodoma inũ Gomorra mae anu hikitã hatunabu betsa atxitã hatũ mabu pepa inũ hatũ piti biãtã 12Abrão betsã bake Ló hawenabube hiwea hatu atxiriatã hawẽ mabu inũ hawẽ inabuya hatu buanibukiaki. 13Hanua Manre Amorreu nawa shanẽ ibu hawẽ mae Manre ni shukua merã hiwea Manre inũ hawẽ betsabu Escol inũ Anerã, Abrão hatũ haibuwẽ taea hanua huni bestitxai hune pasha hushũ haska detenamebaĩshinabu Abrão Hebreu nawa yuinikiaki. 14Hanua haska Ló atxiriabaĩshinabu Abrão banabima nĩkatã Abrão hawẽ tsumabũ bake pawaimabu hawenabu keska detenamenikabu hatuki txiti ikaĩ mebikinãtanũ ishũ hau habũ merabewanũ 318 hunibu hatu itxawatã hawẽ haibuaiburi Amorreu nawa detenamenikabu habu dikabi itxawariatã Ló ibukĩ hatũ tae tanabaini bukĩ Dã mae anua hune hatu betxitã 15hanua meshu merã hatu binushũ kushibirã hanu maniabu anu hikishũ hatu deteaibũ datepaepai hatiri betsabu kushibainaibu hatu txibãbaĩkĩ detekubaĩkĩ Hobá mae Damasco mae ewapa besuuri nortekiri hatu txibãkubaĩkĩ henetani 16Abrão hunibũ hatu putamatã Ló mabu inũ hawenabu aĩbu inũ huni iyushinabu hatu mebĩkinãtã hanushũ mae dabetunari hatũ mabu inũ hawenabu mebikinãtã ana hatu iwẽnibukiaki.
Melquisedeque Abrão duawakĩ pekiri yuinikiaki, na hãtxarã
17Quedorlaomer inũ shanẽ ibu betsabu dete keyutãni Abrão ana txĩtũkiranaya Sodoma nawa shanẽ ibu kai Savé napãpa anu hawẽ kena Shanẽ Ibũ Napãpa hanu Abrãoki nukua 18Salém shanẽ ibu Melquisedeque Deus dasibi binu keyuabe hawenabu hãtxashunika hari hawẽ tsumabu kariakĩ misi inũ uva vinho bushũ Abrão inũ hawẽ haibuaibu hatu pimatã 19Abrão Melquisedeque pepawakĩ yuikĩ:
“Deus dasibi binu keyua hiwea nai inũ mai hirabi damiwanitũ
hau mia duawakĩ pepawakubainũwẽ.
20Deus kushipahaira dasibi binuatũ miki sinataibu
mĩ hatu maemanũ mia binumakĩ merabewashina
ha besti kẽhairawanãwẽ”,
aka Abrão mabu mebikinãshina Melquisedeque inãnũ, iwanã, mabu betsa betsapa husia décima parte Melquisedeque hamẽ inãkuiã binikiaki. 21-24Hanushũ Sodoma nawa shanẽ ibũ Abrão yuikĩ:
—Mabu dasibirã, minaski. Hanua yuraburã, habu besti ea inãwẽ— aka Abrão kemakĩ:
—Haskamaki. Deus kayabitũ nai inũ mai hirabi damiwani ma ẽ habe yubakakĩ: “Hatũ mabu ẽ biamaki”, ẽ ishiãki. Hanushũ mĩ hawara ẽ mia biãyamawẽ taeshũ mĩ ekiri yuikĩ: “Abrão ẽ mabuwãyã wayamaki”, iwanã, mĩ hatu ekiri yuitiruki. Ẽ mia nemaii. Maburã, ẽ bikatsi ikamaki— iwanã, yuikĩ: —Hawara enabũ ma piabu inũ ẽ haibuaibũ ebetã deteshinabu hatũ manakuti hau habũ binũbũwẽ, Aner inũ, Escol inũ, Manrenã, habunarã— anikiaki.
Atualmente Selecionado:
Gênesis 14: cbsBR
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
