Gênesis 12

Deusũ Abrão katushũ nitxinikiaki, na hãtxarã

1Hanushũ betsatiã Senhor Deusũ Abrão yunukĩ yuikĩ: “Mĩ mae anua kaĩkaĩkĩ minabu shunũbaĩkĩ pashkabaĩwẽ. Mĩ mai henekĩ mĩ epã enabu henekĩ mĩ epã hiweri henebaĩwẽ, hari mĩ hiweshanai anu ẽ mia uĩmashanai anu kakinã. 2Miwẽ taeshũ minabus pawakĩ nawa shukua betsa itxapa kushipa wakĩ ẽ tari hatu hiwemashanaii. Pepawakĩ duawakĩ ẽ mia merabewapakeshanaii, mĩ kena hatu unãma akeakekinã. Miãri mĩ hatu pepawariashanaii. 3Hanushũ tsuãra mia pepawaya ẽ haturi pepawashanaii. Hakia tsuãra mia txakabuwakĩ yupuwaya hatu kupikĩ ẽtseri ẽ hatu mia yupushũkubaĩshanaii, manakukinã. Ha inũ, miwẽ taeshũ nawa betsa betsapa mai hirabi anu shukua hiwebaunabu dasibi ẽ hatu pepawariashanaii”, aka

4-5Deusũ yuia nĩkatã 75 ano haya Abrão Harã anua kaĩkaini kakĩ hawẽ aĩ Sarai iyui inũ hawẽ betsã bake Ló iyui inũ hawẽ tsumabu mirima ibu wakĩ binishũ hawẽ hamapai tibi hatu bumai Harã anua Canaãkiri usha itxapakũkaini bui 6atimas mai pakea betsa Canaã anu hikitã sulkiri bui Siquém maewã anu hikitã Moré hi shukua mapua dapishũ hanushũ yushibu kẽwãmisbu dapi hiwetushiyunibukiaki, hanu Canaã nawaburi habias maewã anu hiweriabu anurã. 7Senhor Deusũ Abrão nitxiã kashiã yuikĩ: “Na mai pakea hirabi minabu pakubainaibu ibu wamakĩ ẽ hatu inanũbariaii”, aka ma hanu ana haki nukuawẽ taeshũ Abrão Senhor Deus kẽwanũ, iwanã, mishki txi tapu wakĩ mishki itxawakĩ maspu watã hanu txiwẽ kuakĩ txashuwã bake bene pepa teshteshũ himi haba watã hanushũ menukĩ keyukĩ Senhor Deus kẽwanikiaki. 8Hanua bari huaikiri kai mati betsanu mati betsa Betel inũ Ai mae betsa namakis hatũ bitxi tari hiwe nitxĩshinabũ hanushũ Abrão ana Senhor Deus kẽwanũ ishũ mishki ana mãtxĩkĩ itxawatã Senhor Deusũ kenawẽ ana kushipa yukakĩ kẽwãrianikiaki. 9Hanua hawẽ inapã piti basi benai sulkiri unãshubira bui hanu eskarabes hiweabu anu bua ketanibukiaki.

Abrão Egito anu ka hiweyunikiaki, na hãtxarã

10Hanua ui ana ikamakẽ basi ana beneama Canaã anu hanu hiwea anu piti yamakẽ Abrão enabu bunihairaibũ Egito anuabu piti haya nĩkatã Egito anushũ piyutanũ ika Abrão hatu iyui 11Egito mai pakea anu nukui kai kemakĩ Abrão hawẽ aĩ Sarai yuikĩ: “Uiã, mĩ aĩbu hawẽruahairaki. 12Egito nawabũ mia uĩkĩ ea tenãtã mia bitã mia besti hiwematirubuki. 13Haskakẽ hatu yuikĩ: ‘Ẽ puiki’, akĩ hatu ea yuishũshãwẽ, hau ea tenãyamanũbunã. Mĩ hatu haska wa ea duawashãkanikiki, ea deteamarã”, abaini

14hanua atimas Egito anu hikishĩkẽ Egito nawabũ yuikĩ: “Aĩbu hawẽruaki”, ikaibũ Abrão yuishina keska wakĩ Sarai hatu yuikĩ: “Ẽ puiki”, hatu wa 15Egito nawabu shanẽ ibu beshmas betsa betsapã Sarai uĩkĩ hatũ shanẽ ibuhaira Faraó yuikĩ: “Hebreu nawa aĩbu hawẽruahairaki. Shanẽ ibu Faraónẽ hau binũwẽ”, iwanã, shanẽ ibuhaira Faraónẽ hiwe anu iweshunabu

16haska wabaĩkĩ bimabu Saraiwẽ taeshũ Faraónẽ Abrão duawakĩ txashuwã inũ, ina awa inũ, jumento inũ, camelo inũ, aĩbu dayarubu escrava inũ, huni dayarubu escravo inãnikiaki. 17Hakia Saraiwẽ taeshũ Egito nawa shanẽ ibuhaira inũ hawenabus Senhor Deusũ isĩ txakabu paepa hatu tenemaya shanẽ ibuhaira Faraó hatu yukabaũkĩ Sarai hawẽ aĩkiri tapĩtã 18-19Abrão hatu kenama hua yukakĩ: “Mĩ ea haska wai? Haskakĩ mĩ ea yuiama itushimamẽ, mĩ aĩkirirã? ‘Ẽ puiki’, mĩ ea wa ẽ hiwe anu ea iweshunimabuki. Haskai mĩ txanitxakaimamẽ? Uĩwẽ. Mĩ aĩki. Ana bitã iyui nenua kariwe”, atã 20haki sinatakĩ hawẽ mekenikabu yunua Egito anua Abrão hawẽ aĩ inũ, hawenabu inũ, hawẽ tsumabu inũ, dasibi inaĩmaya nitxinibukiaki.

Atualmente Selecionado:

Gênesis 12: cbsBR

Destaque

Copiar