Mateusi 9
9
Jesu omokatu etãmã nomãrãkuwai mã'ẽ remẽwarà
(Maku 2.1-12; Rukasi 5.17-26)
1Ãmẽ Jesu opo mijẽ yarà pupe ojivy oo wekoawerà kyty, Kapanão taa kyty. 2Ãmẽ a'e pè ovãe kupa remẽ, kwaima'e kõ mõ ojimorypa mõ omovy eru, Jesu tomokatu. Noatai mã'ẽ a'e, etãmã nomãrãkuwai mã'ẽ. Ikea pupeve omovy eru kupa. Ãmẽ Jesu omã'ẽ eruarà kõ rè remẽ,
– Aje, aã kõ “aje” e'i ekasia pè mãe kõ tè, e'i oupe.
Ãmẽ e'i etãmã nomãrãkuwai mã'ẽ pè:
– Ejimokasi ikenẽ, era'yry, e'i. Neaiwererà aitypypyipaoka newyi ky'y, e'i.
3Ãmẽ jakatu kwaima'e kõ mõ a'e pè tui, tãmõ Moisesi remikusiwarerà rè poromo'e mãe kõ mõ. A'e kõ kee e'i ojipy'amogeta:
– Janejare'e rõmõ'ĩte oitypypyipaoka kuwa janeaiwererà janewyi. Ajawyi nivoi aepo e'i remẽ. Janejare'e werõarõ tè ãwĩ aepo javo rõmõ, e'i tite kupa.
4Ajamã'ẽ Jesu okuwapa a'evo ojipy'amogeta kupa remẽ. Ajawyi e'i ijupe kõ:
– Aepo pejẽ sõ pejipy'amogeta ai ere! e'i Jesu.
5E'i jẽ Jesu:
– Mã a'e mã'ẽ rè põ “aje ywete” pejẽ kuwa ije? “Aitypypyipaoka neaiwererà newyi”, a'e mã'ẽ rè kuwa põ? “Epõ'ã eata ekwa”, a'e mã'ẽ rè põ “aje ywete” pejẽ kuwa? Mã rè põ? e'i.
6E'i jẽ Jesu ijupe kõ:
– Aje ywete yva pe wyi tè ajo ajimojane ike pepytery pè. Ajawyi eayvukasiay teãmã aiko. Age'e aã amokatutà eayvukasia rupi. Pemã'ẽ ere remẽ, kee pejẽ kuwa: “Aje ywete janeaiwererà oitypypyipaokatà janewyi”, pejẽ kuwa, e'i.
Ajaire noatai mã'ẽ pè e'i:
– Epõ'ã nekea tererojivy eraa neretã gyty, e'i ijupe.
7Ameve kwaima'e opõ'ã wata katu ky'y. Ojivy oo wetã gyty ky'y. 8Ãmẽ aty wasu kõ ojimonyi tesõ ee omãjã. Omomojy wete Janejare'e imoe'e kupa.
– Haa! Janejare'e kasia rupi poromokatu ipi! e'i kupa.
“Ejo erupi”, e'i Jesu Mateusi pè remẽwarà
(Maku 2.13-17; Rukasi 5.27-32)
9Aja paire Jesu ojisyry oo a'e pe wyi. Ãmẽ oo iko remẽ kwaima'e mõ wesa, Mateusi eu erà pè mã'ẽ.#9.9 A'e tè aã kareta okusiwa. Revi eu teve Mateusi pè. Tekoua repy moatyarà mõ a'e.#9.9 Karakuri opyy jane kõ wyi imoaty Romã pewarà jõvijã wasu pè mã'ẽ. Pee reme pè wapy oposiko upa ipi. Ãmẽ Jesu e'i ijupe:
– Ejo erupi eremimo'earà rõmõ, e'i.
“Hoõ” e'i. Ameve opõ'ã oo Jesu rupi. Awyje jẽ oo upi.
10Ãmẽ ajaire Mateusi weraa Jesu wetã gyty tojimi'u opyri, emimo'earà kõ reve. Ãmẽ ijaty jane kõ ve oike etã mè wapy ipyri kõ. Kejõ. Mateusi vo tekoua repy moatyarà kõ. Pariseu kõ remisa tare'ã kõ tè a'e kõ. Ãmõ kõ ve, emisa tare'ã kõ ve a'e pè tui.#9.10 A'e kõ pè ywesõ Pariseu kõ “nivoi mãe kõ” e'i. Mokopejõ Jesu kõ pyri wapy ojimi'u kupa upa.
11Ãmẽ Pariseu kõ mõ omã'ẽ Jesu rè a'evo remẽ. [A'e kõ ojimõarõ amãtejẽ ee iko.] Ajawyi opota imoteitete kupa. Ajawyi kee e'i Jesu remimo'earà kõ mõ pè kupa:
– Nivoi mãe kõ pytery pè tẽ tesõ penõvijã ojimi'u upa. Tekoua repy moatyarà kõ reve tẽ tesõ! e'i kupa. [“Aje, mira katu tesõ Jesu remẽ, nojimory'ãi kuwa eeve kõ mijã”, jaa tè aepo e'i kupa.]#Ruk. 15.1-2
12-13Ajamã'ẽ Jesu wenupa aepo jaa. Ajawyi e'i ijupe kõ, Pariseu kõ pè:
– Emã'ẽ! Poropõanõgarà rè tè ajimosã'ãgatà. Imãrãne'ãgwerà kõ nojipõanõokai poropõanõgarà pè ipi. Itekorã mãe kõ tè ojipõanõoka ipi. Ãwitõ poropõanõgarà uu itekorã mãe omokatu, ãwĩvo 'ejẽ ije ajo pepõ'õ mè. Nivoi mãe kõ rè tè ajo aposiko, tojimosĩoka waiwererà reitypypyipaoka Janejare'e pè kupa ky'y. A'e rapijarà tè ije. Ajawyi, “Ivo tè aiko”, e'i tite oupe mã'ẽ rè rõwã ajo. Nivoi mãe kõ rè tè ajo. Peja'a Janejare'e ayvukwerà rè, kee e'i maekwerà rè: “Eupe temime'ẽ ywesõ rõwã apota. Poroporijauesaa ywesõ apota”, e'i maekwerà rè. Aepo jaa rè tapejimotekokuwa, manyvo jaa tè, e'i Jesu Pariseu kõ pè.#Mat. 12.7; Ose. 6.6
Nojimi'ui rupi Janejare'e pè poregeta mã'ẽ rewarà
(Maku 2.18-20; Rukasi 5.33-35)
14Ãmõ 'ary pè Juwão poromojãmorĩ mã'ẽ remimo'earà kõ oo Jesu kyty. Kee e'i ijupe kupa:
– Kee oro'e ore ipi. Janejare'e pè oroporegeta remẽ, norojimi'ui rã'ĩ tesõ, e'i kupa.#9.14 Ekoa kõ tè a'evo ekoi kupa ipi. Pariseu kõ teve a'evo ekoi. Nojimi'ui rã'ĩ tesõ iko kupa ipi. Ajamã'ẽ neremimo'earà kõ na'evoi ekoi. Ojimi'u te'ĩte kupa ipi. Manyvore põ ãwĩvo ekoi kupa? e'i kupa.
15Ãmẽ Jesu e'i ijupe kõ:
– Erekwatà mã'ẽ rè tè ajimosã'ãgatà pemotekokuwa rõmõ. Ãwitõ erekwatà mã'ẽ mõ ojirekotà remẽ, ojimorypa kõ okwai rã'ĩ imuu tojimi'u eeve. Oryvay ojeeve ãmẽ kupa. Ikatu kuwa põkõ jirekoa pè ijãgyo kupa, erekwatà mã'ẽ eeve kõ jẽ ekoi remẽ? Ãnĩ! Nikatu'ãi kuwa. Taory jẽ kupa. Ojireko paire erekwatà mã'ẽ ojisyrytà oo. Ãmẽ tè ijimorypa kõ opoi kuwa ja'umã'ẽ wyi ky'y, wãgyo rõmõ. Ãmẽ tè nojimi'ui rã'ĩ tesõ kuwa iko kupa ky'y. [Ãwĩvo tary ve eremimo'earà kõ. Ereko e'ãma mẽ tè ijãgyo kuwa kupa. Ãmẽ tè nojimi'u'ãi rã'ĩ kupa ky'y,] e'i Jesu ijupe kõ.
Tekoua pyaukwerà rewarà
(Maku 2.21-22; Rukasi 5.36-39)
16E'i jẽ Jesu:
– Kamisa jukwerà rè tè poromosã'ãgatà ky'y. Kamisa jukwerà okekeipa remẽ, nijamokarapeta'ãi kamisa pyau pẽgwerà ijukwerà reve ipi. A'evo remẽ ywesõ okekeipa jẽ kuwa jakusu remẽ. [Ãwĩvo ve erekoa rupi peiko remẽ, penãmõi kõ rekoa rupi napeiko'ãi kuwa ky'y, nojisu'ui rewarà mõ, e'i.]
17Aepo jaa pè kee e'i jẽ Jesu:
– Ãmõ, ava jẽ rõwã uvary pyaukwerà oinõ ena jukwerà pupe ipi.#9.17 Teima pirerà sikãgwerà pupe oinõ kupa ipi. A'e pupe sõ oinõ tite remẽ, okekeipa 'ejẽtà tè ena ovu remẽ. Osururupatà uvary ãmẽ. Ajawyi uvary pyaukwerà ena pyaukwerà pupe tè jainõ ipi. Ãmẽ tè nimanyvoi ovu remẽ. Nokekei'ãi ãmẽ, e'i. [Ena jukwerà vo 'ejẽ tãmõ kõ rekoawerà. Eayvu pyaukwerà tè ena pyau mã'ẽ vo 'ejẽ ky'y. A'e rupi peiko kuwa, e'i.]
Jõvijã mõ ojiporijauesaoka Jesu pè remẽwarà
(Maku 5.21-24; Rukasi 8.40-42)
18Ãmẽ oporegeta jẽ aepo rè upa remẽ, jõvijã mõ uu Jesu pyri. Janejare'e ayvu rè jimo'ea retã rõvijã mõ a'e. A'e uu ojimoenãpa'ã Jesu rovake ojiporijauesaoka ijupe.
– Erajyry ja'y kõjatãi okãjã age'e ywete. Ejo kuise'ẽ ejipy ee imokatu, topoera mijẽ opõ'ã! e'i tuu Jesu pè.
19“Hoõ” e'i Jesu. Opõ'ã oo tuu rupi, wemimo'earà kõ reve. [Oo iko remẽ, aty wasu ojimokyrytyty tesõ oo.]
Jesu wãivĩ wyypu mã'ẽ omokatu remẽwarà
(Maku 5.25-34; Rukasi 8.43-48)
20Ãmẽ jakatu aty wasu pytery pè sikaepo wãivĩ mõ itekorã ywete mã'ẽ ekoi. A'e wãivĩ wyypu mã'ẽ tè. 12 kwaray remẽ nopi'ãi 'ete wyy iwyi iko mã'ẽ. A'e opota ojimokatuoka Jesu pè. [Ajamã'ẽ ojinõsĩ tè rewarà mõ nojikuwai tè uu.] Jesu apekwerà kyty wyi tè uu ijyru poko retoapy rè ojipy. 21Kee e'i wãivĩ oupe:
– Jesu yru poko retoapy rè sõ ajipy remẽ, ekatupatà ky'y, e'i oupe.
22Ajamã'ẽ Jesu a'evoa okuwa jẽ. Ajawyi ojirova omãjã ee.
– Ejimokasi jẽ ere, mãsĩ, e'i Jesu ijupe. “Emokatu kuwa ãwĩ”, ere nepy'a pè. Ajawyi nekatupa ky'y, e'i.
Ameve py'awarà mõ opi wyy iwyi ky'y. Ikatupa ky'y.
Jesu omomoera tajyry remẽwarà
(Maku 5.35-43; Rukasi 8.49-56)
23Ãmẽ Jesu oo jẽ a'e kwaima'e retã gyty, ojiporijauesaoka Jesu pè mã'ẽ retã gyty. A'e pè ovãema kupa remẽ, oike tetã wyry pè kupa. Ãmẽ atyry a'e pè tui. Ja'y kõjatãi kãjãa wãpirõ wasu kupa upa. Oja'o ee kupa upa. Ãmõgwerà jimi'a oopy upa, jakãjã remẽ jaopy ipi mã'ẽ.#9.23 Ekoa teãmã a'evo ekoi kupa. 24A'e kõ pè Jesu e'i:
– Pejivy peo! Nokãjãi ja'y kõjatãi, e'i. Oke tè upa, e'i ijupe kõ.#9.24 Nomowasu'ãi Jesu imomoeraa wyi aepo e'i.
Aepo e'i remẽ, oojai kõrijõ Jesu ayvu kupa.
25Ajamã'ẽ Jesu omoẽma jẽ aty wasu kõ ikatu pè imono. Ajaire oo tajyry reãgwerà kyty. Opopyy eãgwerà. Ameve opoerapa opõ'ã ky'y. 26A'evoa ojenu jenu tesõ a'e taa rupi okwa.
Jesu naeapyoi mãe kõ omokatu remẽwarà
27Ajaire Jesu oo jẽ iko remẽ, naeapyoi mãe kõ mõ oo upi. Mõrijõ ekoi kupa. A'e kõ wapukai ojiporijauesaoka Jesu pè kupa. Kee e'i kupa:
– Tãmõ Tavi Jeapyrerà e'eay!#9.27 “Janejare'e Remimuurerà” jaa tè Tavi Jeapyrerà e'eay pè. e'i kupa. Oreporijauesa rejupa! e'i wapukai kupa.
Oo jẽ Jesu rupi kupa, aepo javo, ajaate tetã mõ pè ovãe kupa. 28Ãmẽ Jesu oike tetã wyry pè remẽ, a'e kõ ve oike ipyri. Weka jẽ wea mokatua kupa. Ãmẽ e'i Jesu ijupe kõ:
– Manyvo pejẽ põ ije? “Aje, janerea omokatu kuwa”, pejẽ põ ije? e'i.
– Õ'õ, aepo oro'e ene, jõvijã! e'i kupa.
29Ameve Jesu ojipy ea kõ rè. E'i jẽ ijupe kõ:
– “Aje” pejẽ ekasia pè rewarà mõ, poroeamokatutà awi, e'i.
30Ameve eapyopa kupa ky'y. Ãmẽ Jesu oporegeta wayvukasi rõmõ ijupe kõ, naeapyoi maekwerà kõ pè.
– Penea mokatua ikõ tapemome'u e'ã erokwa rã'ĩ nẽ, e'i epe ijupe kõ.
31Ojivy jẽ oo kupa. Ajamã'ẽ omome'ujẽ wea mokatuawerà erokwa kupa. Ãmẽ ywesõ Jesu kasia ojenu jenu a'e yvy rupi okwa.
Jesu noporegetai mã'ẽ omokatu remẽwarà
32A'evo paire Jesu kõ oo jẽ iko. Ãmẽ jane kõ mõ uu mijẽ ipyri kwaima'e mõ reru ikoty. Ãjãg nomomoregetaokari mã'ẽ mõ a'e. 33Ãmẽ Jesu omoẽ ãjãg imoisyry imono iwyi wayvukasia rupi. Ameve kwaima'e oporegeta ky'y. Ãmẽ aty wasu a'evoa rè omã'ẽ remẽ, omoãgyo kõ tesõ.
– Haa! Nijamã'ẽi ãwĩvoa rè ike rupi, Isaeu kõ yvy rupi ipi mijã! e'i kupa. Janeremikuwa e'ã rè age'e tè katu jamã'ẽ ky'y, e'i kupa. [Ikatuay wete si Jesu! e'i kupa.]
34Ajamã'ẽ Pariseu kõ mõ kee e'i:
– Ãjãgai rõvijã kasia rupi tè ãjãg kõ omoẽ moẽ jane kõ wyi iko! e'i ywe'e tite kupa.#Mat. 10.25; 12.24; Mak. 3.22; Ruk. 11.15
Jesu poroporijauesa remẽwarà
35Ãmẽ aja paire Jesu oo jẽ Juteu rena kõ rupi iko. Janejare'e ayvu rè jimo'ea retã kõ rupi poromo'e iko. Janejare'e ayvu e'eay omojenu jenu. “Age'e sõsi Janejare'e ojikuwatà penõvijã ywete rõmõ penereko”, e'i imojenu erokwa. Itekorã mãe kõ omokatu teve, pirujẽ ãwisõ iteetejẽ mã'ẽ.#Mat. 4.23; Mak. 1.39; Ruk. 4.44 36Aty wasu kõ rè omã'ẽ remẽ, oporijauesa kõ, notekokuwai Janejare'e ayvu rè kupa rewarà mõ. Ipy'a pirai kupa. Temimotare'ã vo ekoi kupa. Ãwitõ kaneiru jarà nuvei remẽ, ojimomorijauvay kaneiru kõ ipi, a'evo ekoi kupa.#9.36 Naikoi imotekokuwaare'e kõ rewarà mõ a'evo ekoi kupa. Ajawyi weka eka sõ tite omotekokuwaare'e rã kupa. Emogeta teve Mak. 6.34
37-38Ãmẽ e'i Jesu wemimo'earà kõ pè:
– Ãwitõ aresity ipopa remẽ, age'e pupe tè japypo'o kuwa mijã. Ajamã'ẽ pe'ĩpe'ĩ tè oposikotà ee mãe kõ noy'ãi kooporà ee kõ. Ãwĩvo ve mõa'ãrõwã Janejare'e posikoa jane kõ põ'õ mè. Pe'ĩpe'ĩ tè oposikotà Janejare'e ayvu mojenua rè iko kupa. Ajame peporegeta Penõvijã ywete pè tomuu oposikotà mãe kõ, a'evo ve koo rè oposikotà mãe kõ jaokwaità koo jarà kõ pè ipi, a'e pejẽ, e'i.#Ruk. 10.2
Atualmente Selecionado:
Mateusi 9: oymNT
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2013, Wycliffe Bible Translators, Inc. All rights reserved.
