Mateo 16

Is Kebpen-ahà te Singyal

(Mateo 16:1-4; Marcos 8:11-13; Lucas 12:54-56)

1Duen menge Perisiyu wey Sedusiyu he midhendiyà te ki Jesus su egezamen dan sikandin. Umba mid-insaan dan, ke sikandan te, “Ipeehè key te singyal he tuus he sug̵ù ka te Megbevayà.” 2Iyan, midtavak si Jesus te, “Emun edsanlep en is andew ne ebpemurawag, egkag̵i kew te, ‘Meupiya is timpu keeselem.’ 3Ne ke egkepawà ne ebpemurawag ne zuen kivel, egkag̵i kew zaan te, ‘Edrendeng guntaan.’ Egketuusan niw is uzan tenged te g̵apun, iyan, kenè niw ves egketuusan is ed-ul-ulahan guntaan te Megbevayà. 4Sikiyu is menge etew g̵untaan, utew kew mezaat; wazè en diyà te g̵ehinawa niw is kebmahala te Megbevayà! Maan is ed-ehè kew te singyal? Iyan dà singyal he ibpaahà keniyu is iring duen te singyal he neulaula zuen te tipehuna he si Jonas.” Ne zutun mid-ewaan din sikandan.

5Ne midlayun dutun te ranew is menge sumusundan ni Jesus, ne wazè dan mekeuwit te supas su nelipatan dan. 6Hein nekerapas dan en, duen sempità he impezineg kandan ni Jesus. Ke sikandin te, “Andam kew wey niw melikayi is tapey te menge Perisiyu wey Sedusiyu.” 7Ne wazè dan mesavut he kenà iyan is tapey te supas egkeg̵iyen din, ne mibpelelelag̵è dan te, “Iyan ingkeg̵iya zin kayi su wazè kiw mekeuwit te supas.” 8Ne nesavut ni Jesus is egkeg̵iyen dan ne ke sikandin te, “Maan is egkesamuk kew te wazè kew mekeuwit te supas? Utew meluya is kedtuu niw! 9Wazè bes meketag̵ù diyà te isip niw he kenè ta igkesamuk is supas? Wazè niw ves metenuzi kes mibeelan ku hein mibpenevìtevì ku kes menge supas wey mekekaan sikan is lelima he libu he menge maama? Wazè niw ves daan metenuzi sikan is menge vinevey he nengepenù te midhimes niw he nengesamè dan? 10Ne wazè bes daan diyà te isip niw kes pitu he vuuk he supas he impekaan ku zuen te heepat he libu he menge maama, wey sikan is menge vinevey he nehimes niw? 11Maan is wazè niw mesavut he kenà supas is egkeg̵iyen ku? Andam kew wey kew mekelikey te tapey te menge Perisiyu wey Sedusiyu.” 12Ne human mesavut te menge sumusundan din haazà he kenà iyan ebpelikayan din kandan is idtapey te supas, kekenà, iyan is ibpenurù te menge Perisiyu wey Sedusiyu.

Is Migkag̵i ni Pedro Mehitenged ki Jesus

(Mateo 16:13-20; Marcos 8:27-30; Lucas 9:18-21)

13Midhendiyà ensi Jesus te inged he uvey te inged he Sisarya Pilipus. Ne hein nekeuma zan en dutun, mid-insaan din is menge sumusundan din te, “Siak is Kakey te Menusiyà, hentei e kun sumalà te ked-isipa kediey te menge etew?” 14Ne midtavak dan te, “Is duma, ne iyan ke kun si Juan Megbebewtismu he nevanhew. Ne is duma, ke sikandan te, iyan ka si Elias. Ne egkag̵i is duma pa te si Jeremias ka, ne emun kenà, ne sevaha ka zuen te ebpemeneuven dengan te Megbevayà.” 15Ne ke si Jesus te, “Ne sikiyu zaan, hentei e man sumalà te ked-isipa niw kediey?” 16Ne zutun midtavak si Simon Pedro te, “Iyan ka sikan is mibpilì te Megbevayà he ibpahadì din te menusiyà; iyan ka sikan is Anak te wazè din kemetayen he Megbevayà.” 17Ne migkag̵i si Jesus te, “Simon, anak ni Juan, midtuvazan ka te Megbevayà su wazè nu metueni heini pinaag̵i te etew, kekenà, impinted kenikew te Amey ku he ziyà te langit. 18Ne tenged kayi egeraran ku sikew ki Pedro, he ke và dà egkeg̵iya, batu. Ne iring te vatu is edtukuzan ku te iglisya ku, he ke và dà egkeg̵iya, is menge etew he edtuu kediey. Ne minsan is gehem te kemetayen, ne kenà ebpekezaag kandan. 19Ne idsarig ku kenikew is kebayàbayà emun edhadì is Megbevayà he ziyà te langit. Ne kinahanglan he is idawey nu zini te kelibutan, indawey en he zaan te Megbevayà he ziyà te langit; ne is idtug̵ut nu zini te tanà, intug̵ut en he zaan te Megbevayà he ziyà te langit.” 20Ne zutun mibpeketelteleenan ni Jesus is menge sumusundan din he kenè dan tudtula ziyà te minsan hentei he iyan sikandin sikan is mibpilì te Megbevayà he ibpahadì.

Is Kebpesevuta ni Jesus te Kemetayen Din

(Mateo 16:21-28; Marcos 8:31–9:1; Lucas 9:22-27)

21Ne puun dutun impesavut din te menge sumusundan din is imbanglis kandin. Ke sikandin te, “Kinahanglan he edhendiyà a te Hiruselim ne utew merasey is ed-ul-ulahan kedì te menge ebmeg̵urangen te menge Hudiyu, menge punuan he memumuhat wey menge menunudlù te kesug̵uan. Edhimetayan e zan ne seled te tetelu he andew zutun, egkevanhew a.” 22Ne zutun insivey sikandin ni Pedro, ne ke si Pedro te, “He Nengazen, berakat he kenà tumana te Megbevayà heini is migkag̵i nu.” 23Ne midsinaru si Jesus diyà te ki Pedro is egkag̵i te, “Sikew is ed-iring ki Setanas, awè ka zini te kediey. Egkesanggen a kenikew su wazà diyà te isip nu is egkesuatan te Megbevayà, kekenà, iyan diyà te isip nu is egkesuatan te etew!”

24Ne zutun migkag̵i si Jesus diyà te menge sumusundan din te, “Ke zuen egkesuat he edsundan kedì, kinahanglan he iawè din diyà te isip din is kandin he egkesuatan he menge ulaula, ne tianga zin is krus din, he ke và dà egkeg̵iya, kinahanglan he edtumanen din is menge sug̵ù ku minsan ke iyan ibpatey zin. Ne human ebpekesunud kedì. 25Su ke zuen etew he egkenug̵unan din is untung din, ebpatey g̵ihapun. Iyan, ke zuen etew he edsunud kedì, minsan ke ibpatey zin pa, id-ulì te Megbevayà diyà te kandin is untung din ne kenè en sikandin ebpatey te wazà pidtemanan. 26Minsan ke maangken pa te etew is tivuuk he kelibutan, wazà pulus diyà te kandin ke kenà sikandin egkeveg̵ayan te untung he wazà pidtemanan, su wazà minsan hengkey he azen he igkeliwè din wey zin maangken is untung he wazà pidtemanan. 27Su Siak is Kakey te Menusiyà, imbanglis kedì he mekelikù a keuzemà he edumahan te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà. Ne zutun edsuhulan ku is langun he menge etew sumalà is mid-ulaula te uman sevaha. 28Kenè niw heini lipati he zuen menge zuma tew kayi he kenà ebpatey taman te egkeehè e zan is Kakey te Menusiyà he ebpekeuma su edhadì.”

Atualmente Selecionado:

Mateo 16: mbbNT

Destaque

Copiar