Ann Bokwakwarin 2
2
1On etai God safam a tafanam a sawar ta ta amonai sen on engon ifouren isawar. 2Ra nimtereban bairuinai God bobo engon tutufin ifofouren on i sawaren, on mes on ra nimtereban bairuin bobo engon tutufin emon on i yarir. 3Ato God on ra nimtereban bairuin imomoginai ato iyamai ra kakafaiin imatar, yabin On bobo engon tutufin ifofouren on isawaren weie on emon i yarir.
Adam A Eve
4Atonio on safam a tafanam mamaba imamatar on an dudur.
On an werai BADA God safam a tafanam ifourai, 5on nan on men wengar a wayo tani motobai ikubou igai mes, yabin BADA God on usan men iyamai tafanamai iyar a men orot tani nan imama on motobai ittar itab. 6Baise sareu motob emon igai ato motob tefan engon inunubai.
7BADA God on motob an fofou emon on orot#2.7 Hebrew dura orot on sau (adam) mat dura an tatamin turin ekokofan sau on motob (adamah;) mat on wab min Adam (Gen 2.20 nan wonitai.) ifourai, weie yawas an yabat on aburunai ibabain ato orot inat yawasin imatar.
8Namon BADA God on Eden au wera matan emon nan masau ibofefes, ato orot ibimatarai on nan iyein. 9BADA God on wengar magis magis a wengar uwas aam auris obis anbabaton on nan ifouren sikubobouis sigai. On masau basunai on yawas an wengar on nan itatawar. A wengar tani ato sagob initem menan on yawas obin a yawas komasin on mat nan itatawar.
10Sareu masau ibinunubai on Eden emon isusur, on nan on ikuseb sareu matas bat simatar. 11Sareu ainauin wabin on Pishon, on Havilah tafanam amonai yai ebikibubuai, on nan on agim gold sen. 12On tafanam an agim gold on obin, wengar kerin yanden ninibin a agim an baiyan gagamin wabin onix on mat nan sen. 13Sareu bairuin wabin on Gihon, on Cush tafanam amonai yai ebikibubuai, 14Sareu baitonin wabin on Tigris, on Asshur au wera matan na yai.
15BADA God on orot ibo Eden Masauai nan iyein masau ittar itab a itkaifarai mes. 16Ato BADA God on orot dura wawaninai iyawur iyau, “Om on wengar uwas atonio masauai on engon unam; 17baise om men wengar ato sagob initem menan on obin a komasin on uwan unan mes. Om on wengar uwan unanin on arimon totor wat unarab.”
18BADA God iyau, “Men iyobin arimon orot ekesin mom inama inmasisibu. Yau arimon on orot an baibaisotin turan anfourai inibaisin.” 19On mes BADA God on motob ibo ato on emon bobaitu tutuenis a tefan an kiwiu engon tutufin ifouren, ato iboen inat orot aurin iteit wabis itites mes. Ato orot mamaba bobaitu kakaita kakaita ibiwabis min on nanaba seyoyores. 20On mes orot on gogabur an bobaitu, tefan an kiwiu a motob an bobaitu tutuenis engon iwabis. Baise Adam an baibaisotin turan on men igaturai on.
21On mes BADA God orot iyamai nousin ifot bag iyen bubur. Ato on nana iyen bubur ato God on orot sesebin rarik tani iboseir ato anefanin on korofin ibo iyafotai. 22Namon BADA God on orot sesebin rarik emon jever ifourai ato ibo inat orot aurin.
23Ato orot iyau, “Ensairen! Ari weie nin on yau tou au rarik a yau tou au biou turin. On arimon aniwabai, ‘Jever,’ yabin God on yau au rarik emon imatarai.”
24On yabinai orot arimon ayon taman inikirires ato inan jever rus sinikaita ato osi rus arimon sinnat usin kaitamom sinmatar.
25Orot awan jever rus on keremomotis, baise osi men sibomamai on.
Atualmente Selecionado:
Ann Bokwakwarin 2: ubr
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc. All rights reserved.
