Jenesis 7
7
Kon Atuh
1Eme Laban Kindrei tiye i ta Nowa, eme iy anya eh, “Ado mari ka ndron; jo badeh anyolom ou le badeh ado bolo munyak dah, ou amwekes kandriyen mwasin. 2Ou kuhi ndro taloh katin haka mwasin ta asun ta salom, ari mwan hawe ari badih, ma ou kuhi ari ari katin haka ndra-in, mwan ma badih ndra-in ta salom. 3Ou ale kuhi ndro taloh sirih, ari mwan ari badih. Ou an hamon ta bohok, tasah oro sirih ma katin haka randrah doh randrah doh kameh ado ma kameh adeu nah ja ado bwele-e munyak. 4Ya len ndro taloh ano kameh jo kameh edeu ur undruk winiya len ma ben hanoh (40) ta adi iri mulin mari jo mene mwesekei.” 5Eme Nowa badeh mwesekei lakou mari Kindrei tiye.
6Nowa badeh jaha tan asahan ndro hawa (600) eh, badeh kon munyak atuh. 7Eme ya iy hawe udun, ma nadun oro hawe udu oro an ndron, tasah kon kameh atuh ai, 8-9ma hawe ari mwan ari badih katin haka ma iri sirih ndra-in ma mwasin badeh an ndron hawe Nowa, i le buku Kindrei ndratiye. 10Ano len ndro taloh ano badeh kon atuh.
11Eme len Nowa jaha tan asahan ndro hawa (600), eme, len ronoh ndro taloh na bun la-uh; badeh gwa udu baha munyak eme loken, ma kandrah asak. 12Ano badeh ur eme andri winiya len ma ben hanoh. 13Ya eme na len doh badeh Nowa hawe udun ma nadu uru mwan ma taloh hawe udu nadun oro badeh a ndron ai, 14ma hawe iri katin haka ndriliu ma ndriliu bwe, tinan ma bwisik ma saba sirih ale, ya iri ndrateheyan labai. 15-16Ari mwan ari badih katin haka mulin badeh a ndron hawe Nowa, i buku none Kindrei ndratiye. Ano Nowa oro a bolon badeh, Kindrei le sulu-i kou ili.
17Eme ur undruk udu bolo len hanoh nane eme ma ndron badeh telebek. 18Gwa eme loken labai, eme badeh ma ndron ateheh bwele-e gwa. 19Eme uluw eme loken labai eme badeh mandrei lawe-en sakalawi mandrei mari badeh atuh. 20Eme gwa eme loken, eme loken badeh nyahan ta aliy asahan taloh ranah udu ta mandrei nane iu i loken. 21Eme iri mulin mari badu munyak badeh amak, iri sirih eneh, iri katin haka eneh ma ndramak awas badeh amak ai. 22Iri lakou mari mulin ado munyak badeh amak le ai. 23Laban Kindrei badeh idi iri mulin mari ado munyak badeh amak ma lau awas ma katin haka ma sirih badeh amak. Iri mulin le ado badeh, Nowa le hawe iri mulin rayah nane a ndron hawen. 24Gwa badeh bala se andri bwe winiya len rinek lomonoh (150).
Atualmente Selecionado:
Jenesis 7: lidNTpo
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2001, Wycliffe Bible Translators, Inc. All rights reserved.
