Versículos Bíblicos Populares relacionados a Suku-saakị 1

Compartilhar

Anịtẹso Tamụnọ nwẹnị ḅẹẹ, “Mịọkụ wa tomi tẹmẹ ḅa; ịn wa sime-ḅara sime tẹ wa kịka ḅa. Ịn kụrọ kọn tọrụ-minji ḅẹ inji mẹ na, So-tọrụ ḅẹ afeni ma na, opu anama ma na, kpongbo mẹmgba na, ḅẹẹye-ḅẹẹye tẹ kiri mẹ ọgọnọ ikiriarị ye goyegoye pịrị ḅa.” Anie ḅụ Tamụnọ amịna ḅụụ ḍiki tomi tẹmẹm. Ò sime-ḅara mie ò ḍiki tomi tẹmẹ ḅara; owiḅọ na ẹrẹḅọ na ọ̀ nwẹn tẹmẹm.

Tẹ Tamụnọ nwẹnị ịn boma, tẹ ịn ḅẹẹ, “Ó loloo tẹ kamaa, tẹ kiri mẹ ḅụ ḅin tẹ anị ó suku-ḅio sime, tẹ tọrụ-minji ḅẹ inji ma na, So-tọrụ ḅẹ afeni ma na, kiri mẹ ọgọnọ ḍumo tẹ mẹnjịarị ye goyegoye ḅụụ kụrọ nyana tẹ ḅẹrẹtọn.”

Suku-saakị ḅụ Tamụnọ So ma na Kiri mẹ na tẹmẹ sakị

kiri mẹ gbọrụ ọrụtọn ḅara sọ sime-a, tẹ gberie-sọ ofori ḅara kẹ koro-simem. Kanakana mie pokolotẹ abajị mẹ gbaịn-koro wararị, tẹ Tamụnọ Tẹmẹ ḅe minji mẹ ọgọnọ mẹnjị-mẹnjị saḅarị.

Tẹ Tamụnọ nwẹnị ḅẹẹ, “Yee bele paka,” tẹ bele nwẹnị paka.

Tamụnọ nwẹnị ye goyegoye tẹ ọ̀ mịẹ tẹ ye mẹ ẹrị, tẹ arị kpọma iḅi lamam. Ḅoḅiri ḅọrọm tẹ dede ḅom, anie sonio aḍin karama ene mẹ.

Tamụnọ nwẹnị ẹrị mịnẹ bele mẹ iḅim; tẹ ọ̀ nwẹnị kanakana mẹ ḅụ bele mẹ puu-ḅelema.

Tẹ Tamụnọ nwẹnị pịkị ḅẹẹ, “Ḍikii, sịnmgbọlị sụarị sin goyegoye tẹ bebe kiri mẹmgba ọgọnọ so-pakarị ye na, sịnmgbọlị ḅio ḅụ simearị sịnmgbọlụ sụarị sịn goyegoye na à kẹ fị-fị fịye sọma ọ́ pịrị tẹẹ.

Tamụnọ nwẹnị bele mẹ sịn Eneḅaka, tẹ nwẹnị Ḍin kẹ kanakana mẹ sịn. Ḅoḅiri ḅo ḅọrọm tẹ dede ḅom, anie tarị ene mẹ.

Anịtẹso Tamụnọ nwẹnị ḅẹẹ, “Yee finjitẹ ambịlalị kịka wararị gberere anga paka, tẹ minji mẹ kẹ maa apakịrị ḍie, tẹ minji mẹ ḅẹ gbọrụ pakịrị ḅelema osi pakịrị mẹ ḅụ.”

Anịsakị arị fịye sọ piri-ḅio-ḅẹ nama goyegoye na, So-tọrụ fiin-arị feni goyegoye na, kiri mẹ ọgọnọ ikiriarị ye goyegoye na, ḅẹẹye-ḅẹẹye tẹ ḍumo ọwụ nyana ye goyegoye arị eleleinda tọrụ sụa sịn goyegoye kẹ fị-fị fịye sọma pịrị tẹẹ.” Tẹ anị ọkọ simem.

Tamụnọ nwẹnị ḅẹẹ, “Yee tọnwa bele pakama aị So-tọrụ mẹ ḅụ paka, mịẹtẹ arị eneḅaka mẹ ḅụ ḍin mẹ puu-ḅelema ḅẹ ḅara; yee arị elekima sọ tẹ sakị-sakị na, ene-ene na, kụra-kụra na ḍie-pakama

Tamụnọ nwẹnị ḅẹẹ, “Yee kiri mẹ kịrị-kịrị so-pakarị aị pakama — sịn amẹẹ na, osuka na, ịnyịnya na, sịnmgbọlị sụarị aị na, sịnmgbọlụ tẹ arị ḅio arị pembema sịnmgbọlụ pakamarị opu asịn na, ọrụ ye ọrụ ye amịna pembema ye pakamaa.” Tẹ anị ọkọ simem.

Tẹ Tamụnọ So-tọrụ mẹ mịẹm tẹ minji mẹ tẹ So-tọrụ mẹ suku-ḅio sime ye mẹ minji mẹ tẹ So-tọrụ mẹ ọgọnọ sime ye mẹ ḅụ ḍiemam tẹ anị ọkọ simem.

Kiri mẹ nwẹnị kịrị-kịrị so-pakarị aị pakama-ḅo, sịnmgbọlị sụa tẹ amịna pembema asịn pakama ḅarị aị na, sịnmgbọlụ tẹ arị ḅio arị pembema sịnmgbọlụ pakamarị asịnmgbọlị sụarị opu asịn na, ọrụ ye ọrụ ye amịna pembema ye pakama-ḅom. Tamụnọ nwẹnị ẹrị mịnẹ anị iḅim.

Mie ḅụ Tamụnọ maa opu bele pakama aị ma tẹmẹm — ịrụa mẹ tẹ eneḅaka ḅụ ḅịyarị ye mẹ na pịkị akalụ mẹ tẹ ḍin ḅụ ḅịyarị ye mẹ na; ọ̀ pịkị lolia ma sọ tẹmẹm.

Anịtẹso Tamụnọ nwẹnị ḅẹẹ, “Yee So-tọrụ mẹ suku-ḅio simearị minji mẹ kobiri ḅo gbọrụ anga ḅụ sime, tẹ yee samụnọtẹ kpongbo paka.” Tẹ anị ọkọ simem. Tamụnọ nwẹnị samụnọtẹ kpongbo mẹ sịn “Kiri,” tẹ ò minji mẹ tẹ kobiri ḅo gbọrụ anga sime ye mẹ sịnm “Tọrụ”. Tamụnọ nwẹnị ẹrị mịnẹ anị iḅim.

Tẹ Tamụnọ nwẹnị ịn boma tẹ ḅẹẹ “Ọmịnị iyii, tẹ lolo kamaa, tẹ tọrụ ma ḅio ḅẹ minji ma ḅio ḅin, anịsakị yee feni amẹẹ ma kiri mẹ ọgọnọ pịkị iyi tẹ lolo kama”

Tẹ Tamụnọ nwẹnị ḅẹẹ, “Yee kiri mẹ ḍumo wararị kịrị-kịrị anama tẹ jen-jen iyiarị aị pakama-ḅo: opu anama na, furo kẹ ikiriarị anama na, piri-ḅio angarị aị na.” Tẹ anị ọkọ simem.

Anịtẹso Tamụnọ nwẹnị ḅẹẹ, “Yee minji mẹ anị ḅio ogbo-ogbo ḅụ ḍumo wararị aị pakama-ḅo ḅinma, anịsakị yee feni kịrị-kịrị So-tọrụ ḅụ kiri mẹ ọgọnọ-jụ ḅụ fiin saḅa.”

Tamụnọ nwẹnị tọrụ-kịrịkịrị piri-ḅio-ḅẹ anama ma na, warị-ḅio ḅẹ anama ma na, kpongbo ọgọnọ simetẹ ikiriarị anama mamgba na tẹmẹ. Tẹ Tamụnọ nwẹnị ẹrị mịnẹ arị iḅim.