Texte de la Bible: Gulei © Alliance Biblique du Tchad, 2004 Enregistrement du Nouveau Testament Gulei ℗ 2008 Hosanna

Gulei - 2004 Edition (NT) Drama

Magtub Mann-ra ke Kige ©Alliance Biblique du Tchad, 2004

Loo ke Jésu an kosdoo-bulege bè ɓaa, è al dè mbal’t dɔ. Loo ke è ndi nang ɓá ɓaa, njékuwe-girnge reei rann’t. E unn gir ndó de nyan ede nè:


– Njé ke geri kêm de’t titeke ei njéndooge nga, ra de à nel de
tede konɓee ke danran è le de!
Njé ke ndii se kumndoo yo nga, ra de à nel de
tede Nube à gɔl kêm de ɓai!
Njé ke awi lom-lom nga, ra de à nel de
tede Nube à ade de Konɓee ke danran ke nyan-ndube le de!
Njé ke ngur nyanra ke se dè naje’n ra de pênn-pênn
asenan se kunde mann éké ɓo ke ra de nga,
ra de à nel de tede kêm de à ndann ɓai!
Njé ke an-in kumndoo le made dege nga, ra de à nel de
tede Nube à an kumtondoo le de tɔ!
Njé ke nganrankêm de unju nyang-nyang nga, ra de à nel de
tede d’a d’an Nube se kum de ndan-ndan!
Njé ke d’ade made dege ingei kêmlom nga, ra de à nel de
tede è dé kuwe á d’a ɓar de ngann Nubege!
Njé ke dé ra kum de ndoo tede nyanra de ke dè se naje’n nga,
ra de à nel de tede è de kuwe á Konɓee ke danran è le de!
Loo ke dooge à taji sei a, a rai kum si ndoo a, a teti tàge ke majelé gai-gai kundei tà si’t tede k’ee ke sei njékuwe-girmge nga ɓaa, adi ra si nel sei. I rai ranel a, ali ra si se kêmnda káng tede nyan kuge dè ji si è ngain dɔ danran. Njéribe-dè-tàge ke tà Nube’t ke kété non si’t nga géa, ndɔ ke dé ra kum de ndoo titeke dé ra’n kum si ndoo bè tɔ.


Sei sei kate le dooge ke dè nang nè. Ke nè á kate ke don tel bɔlɔs ɓaa, ké ri á d’a ra’n kade tel don gugu wa? Nyan ke le ra’n ke rang goto, nè d’a kunn kum nata kade dooge njiyei dè’t.
Sei sei lookar le dooge ke dè nang nè. Ɓee-bò ke tò dè mbal’t dɔ nga asekum ɓɔyɔ ra’n lé. Doo unde por tu lampe’t tede le sebe debe dè’t lé. Nè à naan tà kagenn’t dɔ kade unju ade njé ke kêm kei malang an-in loo. Sei géa, maje kade nyan-ndogó le si ndogó tàkum dooge’t tede kade an-in nyanra maje le si ɓaa, ilei riɓar dè Bɔ si ke ndi danrán.

Maje kade i giri kêm si’t edi nè m’ree le tuju gute-ndu ke mari éké magtubge ke njéribe-dè-tàge ke tà Nube’t ndangi nga lé. Man m’ree le tuju gute-ndu ke mari se tàge ke njéribe-dè-tàge ke tà Nube’t ndangi nga lé, nè m’ree le kade maji ɔri njêt. Kerɔte kuwe, man m’ede sei ndàt, nyange ke ndêin-ndêin ke dé ndang kêm magtub gute-ndu ke mari’t nga, karé bè géa à goto lé sár kade danran se dè nang à gotoi pa ɓita. E ke altà tà ndukunn’t karé dann ndukunnge ke ndêin-ndêin nè a, ndó dooge le kade rai titeke bè a tɔ nga ɓaa, d’a d’an’n ke ngonn ke ndêin bè dum madennge malang kêm Konɓee ke danrán. Nè nanan ke an dè ndukunnge nè nga sêw-sêw a, ndó dooge kade rai titeke bè tɔ ɓaa, d’a d’an’n ke doo ke bò kêm Konɓee ke danrán. Kerɔte kuwe,man m’ede sei ndàt, ke nè á nyanra si ke se dè naje’n dum dè le njéndang-magtubge se pharisienge lé ɓaa, sei a kilei nja si kêm Konɓee ke danrán nga ndan lé.

Sei ooi titeke d’ede kàsige ke kété mari d’ede nè: «I a tɔl doo lé. Nanan ke tɔl doo ɓaa, d’a gangtà dènn’t.» Nè man m’ede sei, nanan ke ra wong se ngokon’n ɓaa, d’a gangtà dènn’t. Nanan ke tam se ngokon’n ede nè: «I mbe» ɓaa, d’a d’aw se’n loo gangtà’t ke bò. Nanan ke tam se ngokon’n ede nè: «Kêmi tɔ kuju tà lé» ɓaa, a inge ndutɔr lé sár nè kure nyanra’n à ɔde kum’n labi-labi. Ke nè á i aw se nyan-noje lei le kade dè ɗinger loo nyankuje-mese’t á ke loon’t nè kêmi olé dè nyan ke ngokoin aw’n sei se tà ɓaa, inye nyan-noje lei dè ɗinger loo nyankuje-mese’t, i tel aw inge ngokoin umi nan’t pa ɓita i ree unn nyan-noje lei ade ɓai.
Ute rai kalang um nan’t se njèkɔse sei tà loo ke sei se’n i nain rebe ɓai. Nè bainléa à aw sei non njègangtà’t, njègangtà à ulei ji paja’t le’n kade aw sei ilei dangai’t njing. Kerɔte kuwe, man m’edi ndàt, ke nè á paja le’n aw sei ilei dangai’t ɓá ɓaa, a uge kure nè nga ndát-ndát kade sisi karé géa à nain dèi’t lé, ɓita a i tee dangai’t ɓai.

Sei ooi titeke dé tam kété mari d’ede nè: «I a tò se dinye ke rang lé.» Nè man m’ede sei, nanan ke an dinye ke rang á ndinge’n ɓaa, nganrankêm’n tò se’n ɓá ta. Ke nè á kumi ke kon ade i ra kaiya ɓaa, uwe’n ɔr’n ile’n piring kɔke. Kade balkum rai karé udu è soo’t dum kile danrai bere mbak dann loo ke tur’t ke kure nyanrai à ɔde kumi tutu labi-labi. Ke nè á jikoin ade i ra kaiya ɓaa, i tuge’n i gang’n ile’n piring kɔke. Kade balkum rai karé udu è soo’t dum kade d’ile danrai bere mbak dann loo ke tur ke kure nyanrai à ɔde kumi tutu labi-labi.


Kété mari dé tam d’ede nè: «Ke nè á doo karé mbate neen’n ɓaa, maje kade ade’n magtub mbate nan jinn’t. Nè man m’ede sei ndàt, nanan ke mbate neen’n tede nyan ke rang lé nè tede tà le tò se nan ke kaiya’t ɓaa, è ile’n dè sang dingemge ke rang’t. Nanan ke taa dinye ke dé mbate’n ɓaa, tà kaiya uwe dè’n.

Taɓai sei ooi titeke d’ede kàsige kété mari d’ede nè: «I a kinye go mann-ra lei nga lé, nè nyan ke i unn ndui ade Kuwe-ɓee dè’t nga, a i ra nyan’n kuwe.» Nè man m’ede sei ndàt, ubi ra si ndan lé. Ubi ra si se nyan karé ke danrán lé, tede danran nga è kutu-ngar le Nube. Ubi ra si se nyan karé dè nang nè lé, tede ɓeekon nè nga, è nyan kum-nja le Nube. Ubi ra si se ri ɓee-bò ke Jérusalem lé, tede è ɓee le Ngar ke bòi. Ubu rai se dam dèi lé, tede i asekum kade bin dèi karé tel nda éké tel ndul lé. Ke nè á tà le si è oiyo ɓaa, è oiyo. Ke nè á tà le si è ḿ-m̀ ɓaa, i tami go karé edi nè ḿ-m̀. Tà ke rang ke i tami ilei dè made’t nga in ra njèkêmyêr’t.


Sei ooi titeke dé tam kété mari d’ede nè: «Kum karé kum gute kum karé’t, gɔge karé kum gute gɔge karé’t.» Man m’ede sei ndàt, doo ke ndige ra se si majelé nga, ilei rɔ adii lé. Loo ke doo karé unde mbɔri ke kon ɓaa, i tur è ke karé rang ade’n unde tɔ. Ke nè á doo karé ndige sêki tede taa’n kubu lei ke kêm made’t ɓaa, ɔr kubu lei ke bòi yul ade’n dè’t. Ke nè á doo karé unde tɔg dèi’t le kade aw se’n kurloo karé ɓaa, aw se’n kurloo joo. Doo ke deji nyan ɓaa ade’n. Nanan ke ndige tunei nyan ɓaa, i tur gidi ade’n lé.


Sei ooi titeke dé tam kété mari d’ede nè: «I a tár doo-madi nè njèban lei ɓaa, i a kɔr’n njêt.» Nè man m’ede sei ndàt, i tári njébange le si a, ɔji tà se Nube tede njé ke ɔri sei kororoi a tɔ. Ke nè á i rai titeke bè ɓaa, a teli k’ei ngann Bɔ si Nube ke ndi danrán kuwe. E ade kàde le’n ube dè njé ra nyan majelége se njé ra nyan majege’t a tɔ. E ade ndi ede dè njé ra nyan se dè najennge se dè njé ra nyan se dè naje’n lége a tɔ. Ke nè á i tári njé ke tári sei tá ɓaa, ké nyan-kuge dè ji ke ra a ingei wa? Ké njétaa tirge kuwe géa dé ra titeke bè tɔ lé wa? Ke nè á i rai lapya ngakon sige kuwe se kar de bere ɓaa, ké è nyan ke deri á sei rai wa? Dooge ke geri Nube lé géa rai titeke bè tɔ lé wa? I maji ɔri njêt titeke Bɔ si ke ndi danran ee’n njè maje kɔr njêt nga tɔ.

Ouça Matthieu 5