Bagri

“चोकस रेओ। जे थे लोग कोई आच्छा काम दूसरां लोगां नै दिखाण खातर करो तो पिता परमेसर थानै कोई फळ कोनी दैय। जद थे लोगां नै दान दैयो तो बिंगो रोळो ना मचाओ जिंया चलाक लोग सतसंग घरां में अर गळियां में केवंता फिरै। मैं थानै केऊं कै जे ऐ लोग इंया करैगा तो बानै इंगो फळ मिल चुक्यो। पण जद तूं एक हात ऊं दान दैय तो तेरै दूसरै हात नै ठा ना लागणो चईयै। तूं झिको दान गुफ्त में दियो है तो तेरो पिता परमेसर झिको गुफ्त में देखै बो तनै फळ देवैगो।


जद तूं पराथना करै तो चलाक लोगां तरियां ना करी क्यूंकै बां लोगां नै सड़का गै मोड़ा पर खड़या होगे पराथना करणी आच्छी लागै। मैं थानै साची केऊं बे लोग आपगो फळ पेलां ई ले चुक्या है। पण जद तूं पराथना करै तो बंद कोठड़ी में करी। जद तेरो पिता झिको दिखै कोनी बो तनै लुकगे देखैगो तो इंगो फळ तनै देवैगो। जद थे पराथना करो तो गेर यहुदी लोगां गी तरियां जादा ना बोलो क्यूंकै बे लोग इंया सोचै है कै म्हारै बोळै बोलण ऊं म्हारी पराथना सुण लेसी। ईंखातर थे बांगै बरगा ना बणो। थारो पिता थारै मांगणूं पेलां ई जाणै है थानै के चईयै? ईंखातर इंया पराथना करे करो, हे पिता परमेसर तूं झिको सुरग में रेवै है थारो नाम पवितर मानिजै। थारो राज आवै जिंया थारी इच्छा सुरग में पूरी होवै बिंया धरती पर बी होवै। आज गै दिन गी रोटी म्हानै दे। अर जिंया म्हे म्हारै दुसमणां नै माफ करां हां बिंया तूं बी म्हानै माफ कर। म्हानै परीक्सा में ना लेई अर बुराई ऊं बचाई। अर झिका थारै पर अपराध करै अर थे बां लोगां नै माफ करोगा तो थारो पिता थानै बी माफ करैगो। जे थे लोगां नै ना माफ करया तो पिता परमेसर थानै बी कोनी माफ करैगो।

जद तूं बरत राखै तो चलाक लोगां तरियां मूं लटकागे ना बेठी क्यूंकै बे दूसरै लोगां नै ओ दिखाणो चावै कै म्हारो आज बरत है। मैं थानै साची केऊं कै बानै इंगो फळ पेलां ई मिल चुक्यो है। जद तूं बरत राखै तो देखण आळा नै जिंया तूं रोटी खाण आळै टेम दिखै बिंया दीखणो चईयै। झिकै ऊं लोगां नै ओ ठा ना लागैगो इंगो बरत है। झिको पिता थानै गुप्त देखै बो थानै फळ दैयगो।


आप खातर धरती पर धन भेळो ना कर। क्यूंकै अठै इनै कीड़ा अर जंगाळ लागज्यैगो अर चोर बी ले जा सकै। सुरग में धन भेळो कर। बठै ना कोई कीड़ा ना कोई जंगाळ अर ना चोर चोरी कर सकै। अर याद राखो जठै थारो धन हो'सी बठै थारो मन बी लागग्यो रेसी।


सरीर गो दीयो तो आंख है। जे तेरी आंख ठीक है तो तेरो सारो सरीर ई चानणै में रेवैगो। जे तेरी आंख बुरी हो'ज्यै तो तेरो सारो सरीर अंधेरै में हो जावैगो। ईंखातर झिको चानणो तेरै मा है बो जे अंधेरो होज्यै तो तूं आप अंधेरै में रेवैगो।
कोई आदमी एक सागै दो मालिकां गी सेवा कोनी कर सकै। क्यूंकै बो एक ऊं प्रेम अर दूसरै ऊं बैर राखसी। थे परमेसर अर धन दोनां गी एक सागै सेवा कोनी कर सको।


मैं थानै केऊं खाण पीण गी चिंता छोड दैयो। आपगै सरीर खातर कपड़ा गी चिंता छोड दैयो। थारो जीवन रोटी अर सरीर गै कपड़ा ऊं भोत मेंगो है। आं आकास गै उडण आळै पंछियां नै देखो झिका ना तो बीजै अर ना बाडै अर ना भेळो करै। पण फेर ई परमेसर बांगो पेट भरै है। थे तो आऊं भोत जादा किमती हो। थारै मू कोई हिस्यो है कै झिको चिंता कर'गे आपगै जीवन गो एक पल बी बधा सकै। अर थे आपगै गाबा गी क्यामी सोचो। खेतां गै फूलां गै बारै में सोचो, बे किता सुणा होवै। बे ना कोई काम करै अर ना कोई कपड़ा बणावै। मैं थानै केऊं कै आपगै राज पाट में राजा सुलेमान बी बां फूलां बरगो कोनी बण सक्यो। ईंखातर झिका खेतां गा फूल आज है, दिनगै बे आग में बाळिजैगा। परमेसर आं फूलां नै इता सुणा बणावै तो थे झिका कमजोर बिस्वासी हो थानै बो आऊं सुणा गाबा क्यूं कोनी पीरासी? ईंखातर चिंता कर'गे ओ ना केओ के खास्यां अर के पीस्यां अर के पेरस्यां? संसार गा लोग आं चिजां गै लारै भाजै पण सुरग में रेण आळो पिता परमेसर जाणै है थानै आं चिजां गी लोड़ है। थे सारा ऊं पेलां परमेसर गै राज अर बिंगी धारमिकता गी खोज करोगा तो ऐ सारी चिजां थानै मिलज्यैगी। तड़कै गी चिंता ना करो क्यूंकै काल गो दिन आपगी चिंता आप ई कर लेवैगो। हर एक दिन गी आपगी आपणी ब्यादि होवै।”

Ouça मत्ती 6