Yemba - 2017 CABTAL (NT) Non Drama

Yemba - 2017 CABTAL (NT) Drama

Wɔ sáʼ‑ŋgɔŋ mɛ́t é lé épúp, ńdū á esī metsem, ńdɔ̄k á Yɛɛ́so ŋgʉ̄ɔ mé mvhɔ Pilat, á ŋgɔpna Lóma. Ńzī á lecɔp á yí ŋ́gɛ: «Pek é jʉ́ɔ tɛ ndé ŋ́gɛ, ŋiŋ wuɔ, a á si mmāʼa atāk á alāʼ, ńtɔ̄ʼɔ ŋ́gɛ, ndɛ́ʼ mɛ́ zéŋ mmāʼ ncup á mbū ŋwɛ́t ŋgɔŋ Lóma, ńzéŋ nnɔŋ ndʉ́ɛ́ ŋ́gɛ, yí mé efɔ, á Nzaʼ‑Ŋkhʉ yīi, Ndém a le laʼnē á mbū pek. »
Pilat á zɛ́tte á yí ŋ́gɛ: «Wu mé efɔ epuɔ Yúda a?» Yɛɛ́so á pwɛt ŋ́gɛ: «Á tó á nchu wu. » Pilat á lɛ ndé á mbū wɔ nɔŋ‑epɔʼ epi melʉɛ, pɔ́ alāʼ zīi á lɛ éwú ŋ́gɛ: «Meŋ ka jʉ́ɔ anu zīi, ŋiŋ wuɔ a á fa á. » Pɔ́ piŋ ntswīʼne ŋŋíŋ ŋīŋ ŋ́gɛ: «A á si ŋkʉ́ʼnɛ ndɔ̄kɔ anu zīi a zíʼnɛ, éswītɛ epuɔ ŋ́gɛ, pɔ́ eták ejʉʼ. A ke zī á Ŋgaliléa, ḿbú ntɔ́kte á ŋgɔŋ epuɔ Yúda ntsem, a ayi a á lɔk eshʉ̄ʼ tɛ ŋkó ega la. »

Pilat a lɛ njúʼ épúp, ńzɛ́tte ŋ́gɛ: «Yɛɛ́so a á ŋiŋ Ŋgaliléa lɛ́?» Mɛ́ véŋ, á tó á yí ŋgyá á mbū Efɔ Elōde, melaʼ mīi, yí mé lɛɛ́ esáʼa aziɛ́ apak ŋgɔŋ. Ŋ́gē egɔ́ épúp, mbɔ a ke shʉ̄ʼ á Yelósalɛm ánɛ meleʼé mɛ́t. Efɔ Elōde á kó ndɛ̄ ŋgē ejʉ́ɔ á Yɛɛ́so, ḿbú ŋkák tɛʼ melaʼ mīi, a gɛ nzī njúʼɔ, mɛ́ ghítɛ menu ánɛ yí tɛʼ, a nɔŋ ntsáa á lejʉ̄ɔ á yí, ŋ́gɛ, kɛ a gɔ eghʉ̄ʉ mmɔʼ ŋkʉʼne anu á mvhɔ yí lɛ́ɛ. Ńzɛ́tte á Yɛɛ́so menu tɛ é zá tɛʼ, á pú te pwɛ̄ɛt. Á nɔŋ ŋŋāka á yí épúp, wɔ nɔŋ‑epɔʼ epi melʉɛ pɔ́ wɔ kɛ́ʼte‑mbé Ndém, é tshíte éwú, ńnɔŋ ntswīʼnɛ ntshíɛ menu á athū Yɛɛ́so tɛʼ. Elōde pɔ́ wɔ maʼ ncu pí, é piŋ nzī á lezɔte á Yɛɛ́so, ŋ́ŋɛ̄ne á yí, ḿbɛ́ nzhó lefɔ mmāʼ ánɛ yí, ńtó ŋ́gɛ, mɛ́ ezéŋ ndɔ̄k á yí ŋgʉɔ ŋgyá á mbū Pilat. Á le gē egɔ́ épúp, Elōde pɔ́ Pilat é gɔ́ megaŋ mbo, á piŋ efhó eleʼé mɛ́t, pɔ́ yí é cʉ́ʼ mesoó.


Mɛ́ lɔk á yí ŋgʉ̄ɔ tɛ ŋkó éwú, Pilat á cúʼte wɔ nɔŋ‑epɔʼ epi melʉɛ pɔ́ mekém mbɔɔ alāʼ. Ńdé ŋ́gɛ: «Pɛ é ge elɔk á ŋiŋ wuɔ, éshʉʼ á mvhɔ meŋ, ńdé ŋ́gɛ, a á si ntáktɛ alāʼ. Meŋ á tshí á mvhɔ pɛ, ŋ́ŋāk á yí, meŋ te jʉ́ɔ anu zīi, pɛ lʉ́ɛ́ ŋ́gɛ, a á fa á. Tɛ mbɔɔ Efɔ Elōde a zeéŋ ka mefa mí jʉ́ɔ ɔ́, melaʼ épúp tɛ́, a á piŋne á yí ŋgyá mé meŋ, té záʼ ntsaŋ zi. Meŋ ndɔkɔ ndʉ́ɛ́ ŋ́gɛ, ŋiŋ wuɔ a ka fā tɛ ŋgɔ́ yīi, mɛ́ gɔ elɛ̄ɛ nzwhí á yí zwhí ɛ́. Púp, meŋ a tswi mɛ́ elɔ̄k ntɛ̄, ńtswá á yí á mbɔŋɔ́, ńtshī á yí nnéŋ, a egʉ̄ɔ. »
[Á lɛɛ́ ŋgɔ́ɔ afʉʼ lekāk Páska páʼ ajʉɔ lāa, Pilat á pɔ́ŋte á lefōk taʼ ŋgaŋ atʉɛ́ yīi, alāʼ á zɛ́tte.] Alāʼ á lɛ mbú ndéŋ ŋguŋ ŋ́gɛ: «Mɛ́ epú ntséŋte á ŋiŋ wuɔ, éfók á Balabas ŋgyá á mbū pek. » Balabas mɛ́t a lɛ á ŋgyā atʉɛ́, melaʼ mīi a le māʼ á tákté á tésɔŋ, mbɔɔ páʼ a le zwhí á ŋiŋ.
Pilat á júʼ épúp, ńzéŋ eshúŋne á mbū pɔ́p, melaʼ mīi a le nɔ̄ŋ efaʼa á letshi á Yɛɛ́so nnéŋ, tɛ́ alāʼ á tswiʼne ndéŋ ŋguŋ ndé ŋ́gɛ: «Mɛ́ ekwɛ̄te á yí ánɛ mbaŋne paŋné, mɛ́ eké ŋkwɛ̄te á yí kwɛte. »
Pilat á shúŋne ánɛ ŋgʉɔ ntɛ́t, ńzɛ́tte ŋ́gɛ: «Kwaʼ anu tepɔŋ zīi, ŋiŋ wuɔ a á ghʉ, a á si ŋgɔ́ áa akɔ̄? Meŋ ka jʉ́ɔ tsɔ amɔ̄ʼ anu zīi, a á fa, tɛ ŋgɔ́ eyi, mɛ́ gɔ ezwhí á yí zwhí ɛ́. Meŋ a tswii mɛ́ elɔ̄k ntɛ̄, ńtswá á yí, ḿbiŋ ntshī á yí nnéŋ. » Alāʼ á pú ntswīʼne ŋŋíŋ ŋīŋ, ńnɔŋ ndéŋɛ ŋguŋ ndʉ́ɛ́ ŋ́gɛ: «Mɛ́ eké ŋkwɛ̄te á yí kwɛte. » Á pú ntsyā á Pilat. Á lɛ mvéŋ, ńzáʼ ntsaŋ páʼ pɔ́ é si ŋkɔ̄ŋɔ, ńtshī á ŋiŋ yīi, pɔ́ é si nzɛ́ttɛ nnéŋ. Á ŋiŋ yīi, mɛ́ le néŋ á yí á atʉɛ́ melaʼ mīi, á le takté ejʉʼ, ńzéŋ nzwhí á ŋiŋ. Ḿbiŋ ncʉ́ʼ mɛ́ ghʉ ánɛ Yɛɛ́so, páʼ alāʼ á si ŋkɔ̄ŋɔ.


Emɔ̄ʼ wɔ maʼ‑ncu é lɔk á Yɛɛ́so ntsé á mɛnzhɛ, ńzīŋ tɛ mbōte mmɔʼ ŋiŋ Silɛ̄ne, lezēŋ tsí é gɔ́ lɛ Simɔŋ, á nɔŋ efhɔ́ɔ mé ŋkāʼ, pɔ́ gɔ á yí, ńdɔ̄k mbʉʼ ŋgyá á mbaŋne paŋné Yɛɛ́so á mbū yí, ŋ́gɛ á epīʼ, ńdɔ̄k ŋgɔ́ á nzem yí.
Pɔ́ nɔŋ ŋgʉ̄ɔ, nnɔ epuɔ alāʼ é gɔ́ á nzem tɛ nzá, wɔnzwí é gɔ́ éwú, ńnɔŋ nzīŋɛ ndāa ánɛ ntií zīi, Yɛɛ́so a á si ndɔ̄kɔ njʉ́ɔ ŋgʉɔ̄ʼ épúp. Yɛɛ́so á ziŋ tɛ mbēkne nnɛ̄t, ńdé á mbū pɔ́p ŋ́gɛ: «Mezwí epuɔ Yelósalɛm, ndɛ́ʼ pɛ ezéŋ ndā melaʼ má, pɛ elā ánɛ athū zɛ́, mbɔɔ ánɛ athū epɔ̄ pɛ́. Pɛ ezhɛ́ á légɛ, meleʼé alāʼ é si eshʉ̄ʼɛ mīi, mɛ́ e lé gɛ: “Meŋkíŋ wɔnzwí, é meshhʉ̄ mbɔŋ. É wɔnzwí pīi pɔ́ la ezhí ɛ́, mbɔ pɔ́ la pú nnɔ́ŋne á mɔ́ ɔ́.” A shʉʼ afʉʼ mɛ́t, epú egɔ́ gɔ́ɔ, tɛ mɛ́ enɔŋ ntsáa ŋ́gɛ: “Ŋkʉŋɛ́ é láʼa eswia eswɛ́t á wék é.” Ńnɔŋ ntsáa ŋ́gɛ: “Mekwɛ̄t é láʼa esóʼo ŋ́kápte á wék é.” Étsáa épúp melaʼ mīi, mɛ́ ghʉɛ páʼa ánɛ athʉ́ eswī, mbɔ a shʉʼ ekó ánɛ athʉ́ nzoóo, égɔ́ lɛ akɔ̄?»

Pɔ́ le gē elɔk á Yɛɛ́so egʉɔ, ŋ́gwɛ̄ epuɔ tepɔŋ mémpīa pīi, pɔ́ e kó ezwhí á wɔ́p a pɔ́p. Ŋ́gʉ̄ɔ tɛ ŋkó ánɛ mmɔʼ ajʉʼ, mɛ́ tɔ́ŋ lɛ, Akwɛ́ Athū, wɔ maʼ‑ncu mɛ́t é kwɛte á Yɛɛ́so éwú, ánɛ mbaŋne paŋné, ńzéŋ ŋkwɛ̄te epuɔ tepɔŋ pwɔ̄ mémpīa, ánɛ epɔ́p membaŋne paŋné, mmɔʼ ŋgaŋ á gɔ́ á ŋkɔʼɔ́ apū ete Yɛɛ́so, eyi mmɔʼ á gɔ́ á ŋkɔʼɔ́ apū tswioɛ yí. [Yɛɛ́so á lɛ nnáŋ tɛ ndé ŋ́gɛ: «Mɔ́ʼɔ, lekne mefa mɔ́p melaʼ mīi, pɔ́ ka zhɛ́ ajū mīi, pɔ́ ghʉɛ ɛ́. »]
Epuɔ mɛ́t é ge egapte menzhó Yɛɛ́so, ńdɔ̄k nzikɛ́. Alāʼ á le tshí nnɔŋ ńjʉ́ɔ páʼ mɛ́ kwɛtɛ á Yɛɛ́so. Mekém alāʼ é gɔ́ azɔ́p á si nnɔ̄ŋ nzɔ̄tɛ á yí, ńdʉ́ɛ́ ŋ́gɛ: «A lɛɛ́ ŋkʉ́ʼnɛ ntswíi epuɔ á mbū lewhʉ̄. A le ŋké ŋgɔ́ á Nzaʼ‑Ŋkhʉ yīi, Ndém a le laʼnēē, á ŋiŋ yīi Ndém a le tsɔ́ʼē, á tswí athū zí tsetsɔŋɔ á mbū lewhʉ̄ mɛ́t. »
Wɔ maʼ‑ncu mɛ́t é zéŋ nzwī á yí azɔ́p, ńtshóte nnɛ̄t mé lezēŋ tsí, ŋ́gyá á yí akiɛ́‑meluʼ. Ńdé ŋ́gɛ: «O le ké ŋgɔ́ á efɔ epuɔ Yúda, o tswí athū jú á mbū lewhʉ̄ wu méŋwɛ̄t. »
Mɛ́ le tí akɛtte mblɛ́ á athʉ́, ánɛ mbaŋne paŋné Yɛɛ́so, ńdé ŋ́gɛ: «Ŋiŋ wuɔ a á páʼa, ŋ́gɔ́ á efɔ epuɔ Yúda. »
Mmɔʼ ŋiŋ tepɔŋ yīi, mɛ́ é ŋkwɛ̄te á wɔ́p a Yɛɛ́so, á zɔte á yí ndé ŋ́gɛ: «Wu mé té Nzaʼ‑Ŋkhʉ ɛ́ kɛ? Tswí athū jú, ŋ́kó ntswí azék lɔ. »
Eyi mmɔʼ ŋgaŋ á júʼ épúp, ŋ́kāk á yí ŋ́gɛ: «O te si mbɔ́kɔ á Ndém ɛ́ lɛ́? Wu yīi, pɛ yí jʉ́ɔ á taʼ ŋgʉɔ̄ʼ e? Pɔkɔ kwhʉ́ɛ páʼa, ńzhɛ́ɛ. Á gɔ́ apiŋ menu mɔ́kɔ mīi, pɔkɔ gɔ efʉ̄ʼtɛ. Ŋ́gɔ́ mé yí, mbɔ a la amɔ̄ʼ anu fā á. » Á kak á yí épúp, ḿbiŋ eswíŋte ŋ́gɛ: «Yɛɛ́so, lɛ eshʉ̄ʼ ŋkímte á gá afʉʼ zīi, o sáʼa lefɔ cú. »
Yɛɛ́so á pwɛt á mbū yí ŋ́gɛ: «Kwaʼ anuúnē, meŋ shúŋɔ á wú ŋ́gɛ, Ɔ́ɔ ayáʼa, pɔkɔ mé egɔ́ á alāʼ lekāk, á mvhɔ Ndém. »


Á shʉʼ ŋgɔ́ ánɛ azō táŋ‑azokó, nu á lɛ mbí, nzém é pú eséŋ á ntē alāʼ, tɛ ndáʼ ntshí menu ntɛ́t mbwɛɛ́t‑njhʉ̄. Lezēk nu é pú mbí epúp, nzhó zīi mɛ́ le lɔ̄k esáne ntē Mía Ŋgyā Ndém, é lɛ mbú efhó á ŋkɔŋ, ésīa nnɛ̄t tɛ ntshí á ntsēŋ. Yɛɛ́so á gaʼte mé ŋghi teté, ndé ŋ́gɛ: «Mɔ́ʼɔ, meŋ á yá agega zá á mbū wu. » Ńdé épúp, ńdɛ ŋkwhʉ́.
Tɛŋgyā wɔ lʉɔ́ʼ‑ncu yīi, a lɛ ajʉʼ mɛ́t, á jʉ́ɔ ajū mīi á tɔ́k, ŋ́gūʼte á Ndém, ńdé ŋ́gɛ: «Anuúnē ŋ́gɛ, ŋiŋ wuɔ a kaá nzi efā amɔ̄ʼ anu ú. »
Nnɔ alāʼ yīi é le ná eshʉʼ á njʉ́ɔ ecʉɔ lemaŋ, é ge epiŋ nzem mé tésɔŋ, ńzém mbū, ńziŋɛ mmēkɛ. Mesoó Yɛɛ́so tɛ mmī, tɛ ntshí wɔnzwí pīi é ke fhó á Ŋgaliléa, ńtsé nzem yí, e le tshí á tɛ nzem, tɛ́ njʉ́ɔ emuɔ menu mɛ́t á letɔ̄k.


Mmɔʼ ŋiŋ a lɛ á Yelósalɛm afʉʼ mɛ́t, lezēŋ tsí é gɔ́ lɛ Yosɛ́p, ŋ́gɔ́ á ŋiŋ Alimaté, émɔʼ tésɔŋ epuɔ Yúda. Ŋ́gɔ́ á ŋiŋ ndeŋ ndeŋ, ńjúʼ nchu Ndém, ḿbiŋ nnáŋ, ńnɔŋ nzwíʼtɛ afʉʼ zīi, Ndém a gɔ eshʉʼ esáʼ ŋgɔŋ. A lɛ azí mmɔʼ ŋkém yīi, a sáʼa alāʼ. Táʼ, a lɛ te véŋ anu zīi, emɔ̄ʼ mekém é le gɛ, mɛ́ eghʉ̄ ánɛ Yɛɛ́so ó. Ŋiŋ wuɔ mɛ́t á gʉɔ njʉ́ɔ á Pilat, ńdɔ́ apfhō Yɛɛ́so á mbū yí, ŋ́gɔ̄ á ntúŋɔ. Ńdɛ ŋgʉ̄ɔ efhó ánɛ mbaŋne paŋné esóʼne, ńdɔ̄k mmɔʼ ntií mɛkúkú nzémte, ŋ́gʉɔ nnɔ̄ŋ á ntē mmɔʼ lesi tsīi, mɛ́ le gʉɔ́p á mbe mía tɔ́, mbɔ mɛ́ la á ŋiŋ éwú nnéŋ ɛ́. Á néŋɛ épúp aleʼé aswite, á nɔŋ ŋgɔ̄ ezi eseéŋ‑njhʉ̄.
Wɔnzwí mɛ́t pīi, é le tsé á nzem Yɛɛ́so tɛ efhó á Ŋgaliléa lā, é zhɛne á Yosɛ́p tɛ njʉ́ɔ lesi, ńzéŋ njʉ́ɔ ajʉʼ zīi mɛ́ é féŋ apfhō éwú. Ńdɛ esɛ̄t nnɛ̄t mé tésɔŋ, ńcūŋte mevɛ̄t mīi, é lemteé azík mbɔŋ, émi mɛ́ lɔkɔ ntswɛ́tɛ á mpfhō, mbɔɔ alamńda.
Aleʼé aswite á kuʼ, pɔ́ zwite, páʼ lepé tsɔ́p é si nnɔŋ nzɛ́ttɛ.

Ouvir Lúkási 23