Yemba - 2017 CABTAL (NT) Non Drama

Yemba - 2017 CABTAL (NT) Drama

Á lɛ ánɛ meleʼé mɛ́t, Yɛɛ́so á gɔ́ á Mía Ŋgyā Ndém nzíʼnɛ epuɔ, ńnɔŋ ntswīi ŋke mbɔŋ Ndém. Wɔ nɔŋ‑epɔʼ epi melʉɛ, ŋ́ghʉ̄ wɔ kɛ́ʼte‑mbé Ndém, mbɔɔ mekém alāʼ, é tɔ́kne á yí. Ńzɛ́tte á yí ŋ́gɛ: «O ghʉɛ ejʉɔ ntií menu páʼa, awɔ́ á tswi ī? Awɔ́ á yáa á wú mete, tɛ́ o lɔ̄kɔ ŋghʉ̄ɛ ɛ́? Shúŋ á wék. » Yɛɛ́so á pwɛt ŋ́gɛ: «Meŋ a zéŋ ezɛ́tte á wɛ́ azá á taʼ anu. Pɛ elɛ eshúŋ á gá: Jáaŋ a le gē enoʼ epuɔ á ntshi péʼe, mbɔ Ndém mé tswi, kɛ epuɔ menɔŋ ŋ̄?» Pɔ́ sap á tsetsɛlɛ pɔ́p ŋ́gɛ: «Ḿpɛ pwɛtɛ ŋ́gɛ: “Ndém mé le tswīī”, mbɔ a a túŋte á yímpɛ gɛ: “Tɛ pɛ pīiŋ te ŋke Jáaŋ véŋ melaʼ akɔ̄?” Ḿbīŋ mbwɛ̄t ŋ́gɛ: “Epuɔ menɔŋ mé le tswīī”, mbɔ alāʼ á lɔk metɔ́ etémte á yímpɛ, ézwhí. Melaʼ mīi, alāʼ á le kuʼté azɔ́p á légɛ, Jáaŋ a lɛ á kwaʼ ntswi‑ŋke Ndém. » Ńdɛ mbwɛ̄t azɔ́p ŋ́gɛ: «Pek ka zhɛ́ ajʉʼ zīi, mete é le fhó éwú, tɛ́ Jáaŋ á lɔk nnōʼ epuɔ á ntshi ɛ́. » Yɛɛ́so á tsɔ́ʼ ŋ́gɛ: «Mbɔɔ meŋ azá, meŋ gɔ le shúŋ á wɛ́ ajʉʼ zīi, mete é fhɔ́ɔ éwú, tɛ́ meŋ ndɔ̄kɔ ŋghʉ̄ɛ emuɔ menu ú. »


Yɛɛ́so á lé épúp, ḿbɛ́te ashuŋne lepúʼ jʉɔ á mbū alāʼ, ŋ́gɛ: «Mmɔʼ ŋiŋ a lɛ éwú, ŋ́kʉɔ́ʼ ŋkāʼ yí, ḿbhī methʉ́ lɛzɛŋ éwú. Ńtsékne á mbū wɔ kɛ́‑ntá athʉ́ mɛ́t ndɔk ncūŋte meluʼ, ŋ́gɛ ajū mīi á shʉʼ ntó éwú, pɔ́ a pɔ́p e egāp. Ńtsékne épúp, ńdɛ ŋgʉ̄ɔ mé atō, ékó éwú ézi enáŋ. Afʉʼ á lekāp ntá athʉ́ mɛ́t, á shʉʼ ŋkūʼ, á tó mmɔʼ ŋkwa zi á mbū wɔ cuŋte‑meluʼ pwɔ̄ ŋ́gɛ, a egʉ̄ɔ ntswí azí akim ánɛ ajū mīi, á ke tó á ŋkāʼ. Pɔ́ kó ntswá á yí, ńjūŋ á yí, á gʉɔ mbū ŋŋiké. Á kó nzéŋ ntó mmɔʼ ŋgaŋ afaʼ yi, pɔ́ kó nzéŋ ńtswá á yí, ḿmāʼ esē á athū yí, ńjūŋ á yí, á gʉɔ mbū ŋŋiké. Á zéŋ ntó mbáte tɛ́t, pɔ́ kó ŋgɔ̄ á yí, ńtswá á yí tɛ nnéŋ meféŋ ánɛ yí, éfhó á ŋkāʼ efók á yí. Ŋgaŋ ŋkāʼ á kó ndé ŋ́gɛ: «Meŋ a ghʉ páʼ lā? Kwaʼ méŋ ga, tɛ́ meŋ a tó á yí, mɔ́ wuɔ mɛ́t, meŋ kɔɔ̄ŋ á yí tɛʼ, ŋ́gɔ́ amɔ̄ʼ, pɔ́ kó ŋghʉ̄ mekuʼ mí. » Mɔ́ mɛ́t á gʉɔ, epuɔ pwɔ̄ é kó ŋgē ejʉ́ɔ á yí, ńdé á tsetsɛlɛ pɔ́p ŋ́gɛ: «Ŋiŋ yīi a a fú ejhʉ́ ŋgyā, a wuɔ yīi, a á shʉʼ la. Ḿpɛ ezwhí á yí, ńjhʉ́ ŋkāʼ. » Ńdé épúp, éfhó á ŋkāʼ eshūŋne á yí, ńdɔk ntó, ŋ́gʉ̄ɔ nzwhí.
Yɛɛ́so á pɛ́te páʼa, ḿbiŋ nzɛ́tte ŋ́gɛ: «Á páʼa, ŋgaŋ ŋkāʼ a shʉʼ ŋghʉ̄ páʼ lā, á mbū epuɔ puɔ mɛ́t é? A a shʉʼ egʉɔ egɔte epuɔ puɔ mɛ́t, ézwhíte á wɔ́p, étswí ŋkāʼ yí, étsékne á mbū epuɔ mendɛʼɛ. »
Alāʼ á júʼ épúp tɛ ndé ŋ́gɛ: «Ndɛ́ʼ ntií anu páʼa, é zi ndáʼ ŋghʉ̄. » Yɛɛ́so á tshí menēk ánɛ pɔ́p, ńzɛ́tte á wɔ́p ŋ́gɛ: «Tɛ anu zīi mɛ́ le tí á ntē aŋwaʼne Ndém lā, á páʼā, ńdɔkɔ ŋ́gɛ akɔ̄? Mɛ́ le tí ŋ́gɛ:
Tɔ́ yīi mepɔɔ‑ŋgyā,
é le kʉŋtē ŋgwáʼ,
ewiɛ́ mé le shʉ̄ʼ ncʉ́ʼ
á tɔ́ lezhō ŋgyā.
Pɛ ezhɛ́ á légɛ, ŋiŋ a ŋémɛ ánɛ tɔ́ wuɔ mɛ́t, mbɔ a a pú epwɔ́ʼte. Tɔ́ wuɔ mɛ́t á pīŋ ŋgwhʉ̄ ánɛ ŋiŋ, á pú ŋkīne á yí. »


Yɛɛ́so á pɛ́te ashuŋne lepúʼ jʉɔ mɛ́t, wɔ kɛ́ʼte‑mbé Ndém pɔ́ a wɔ nɔŋ‑epɔʼ epi melʉɛ, é yiŋ, ńzhɛ́ á légɛ, a lɔkɔ ŋkēknɛ á wɔ́p, ńcʉ́ʼɛ efāʼa eshhʉ̄ á legɔ á yí, efʉʼ mɛ́t efʉʼ mɛ́t, ḿbiŋ mbɔ́k menēk alāʼ, ńtshī á yí nnéŋ. Ńdɛ nzī á lepīpne yí, ńtó epuɔ pīi é ge eshʉʼ á mbū yí, égɔ́ páʼ epuɔ membɔŋ lā, élɔk ashuŋne emɔ̄ á yí, ŋ́gɛ a té á eshúŋnɛ, éfāte, mɛ́ egɔ̄ á yí, ŋ́gyá á mbū wɔ sáʼ‑alāʼ.
Epuɔ mɛ́t é lɛ ŋgʉ̄ɔ, ŋ́kó ndé á mbū Yɛɛ́so ŋ́gɛ: «Ńziʼnɛ, pek zhɛɛ́ á légɛ, akɔ̄ lɛ́ zīi o ó si eshúŋɔ, ńdɔkɔ ntékɛ epuɔ lɛ́, á gɔ́ áa ndeŋ ndeŋ. O te epuɔ tɛ̄ʼte, o ó si ntswīi epuɔ á kwaʼ mɛnzhɛ yīi, Ndém a á si ŋkɔ̄ŋɔ ŋ́gɛ, mɛ́ ezīŋ éwú. Lɛ eshúŋ á wék, lepé tsímpɛ é veéŋ ŋ́gɛ, ḿpɛ emāʼ ncup á mbū ŋwɛ́t ŋgɔŋ Lóma, kɛ ŋgáŋ ŋ́?» Yɛɛ́so á gɔ leghi tsɔ́p, ńdé á mbū pɔ́p ŋ́gɛ: «Pɛ efāʼ apak ŋkāp, ńdɔk eshʉ̄ʼ. » Mɛ́ faʼ ndɔ̄k eshʉ̄ʼ. Á zɛ́tte ŋ́gɛ: «Athū ŋiŋ zīi á éwú la, á azi awɔ́?» Pɔ́ tsɔ́ʼ ŋ́gɛ: «Á azi ŋwɛ́t ŋgɔŋ Lóma. » «Lezēŋ é gɔ́ etsi awɔ́?» Pɔ́ gɛ: «É zéŋ ŋgɔ́ etsí. » Yɛɛ́so á lɛ ndé ŋ́gɛ: «Á gɔ́ épúp, ajū mīi á azi ŋwɛ́t ŋgɔŋ Lóma, pɛ eyá á mbū yí. A zīi á azi Ndém, pɛ eyá á mbū Ndém. » Pɔ́ tapne, ndɛ mbú ndáŋte. Pɔ́ té kūʼ á letsia ánɛ ashuŋne Yɛɛ́so, ŋ́ghʉ̄ á fate á mvhɔ alāʼ á.


Emɔ̄ʼ epuɔ Sadúsia é shʉʼ azɔ́p, ŋ́gɔ́ nnɔ epuɔ pīi, pɔ́ gɛ ndʉ́ɛ́ ŋ́gɛ, mɛ́ té fú ezím ánɛ lewhʉ̄ ɛ́, ńzɛ́tte á Yɛɛ́so ŋ́gɛ: «Ńziʼnɛ, Mɔɔ́sɛ a le tí lepé ŋgyá á mbū pímpɛ ŋ́gɛ, ŋiŋ a wiɛ á nzwí yi, ŋ́kwhʉ́ té wɛ á mɔ́, ntsiʼnzem yi á cʉ́ʼ esōk á mpfók, ńzhí ewɔŋkhʉ̄, ńdɔk mbwɛ̄t ŋgyā ŋgik yi mɛ́t. Á épúp tɛ́, epɔ̄ ŋiŋ epi mbaŋa, é lɛ éwú esambīa, ŋgaŋ mvhɔ á lá ŋgyā, éshʉʼ ŋkwhʉ́ té mɔ́. Páte á cʉ́ʼ esōk á mpfók, éshʉʼ nzéŋ ŋ́kwhʉ́ té mɔ́. Mbáte ntɛ́t pɔ́ mvuʼ, é láʼ ncʉ́ʼ nzéŋ ésōk á ntswi mpfók wɔ̄, tɛ ndáʼ ŋkó ánɛ mbáte esambīa, ŋ́gē ekwhʉ́, ŋiŋ a te á mɔ́ wɛ. Á shʉʼ ŋgē emakne, mpfók á pú ŋkwhʉ́ azí. Páʼ epuɔ puɔ esambīa, é le pú ŋgɔ́ melō menzwí wuɔ lā, a láʼ aleʼé zīi mɛ́ zímɛ ánɛ lewhʉ̄, menzwí wuɔ mɛ́t, a egɔ́ eyi awɔ́ á nnɔ pɔ́p é?»
Yɛɛ́so á pwɛt á mbū pɔ́p ŋ́gɛ: «Mbaŋa pɔ́ a wɔnzwí é ndo esī atsetsáʼ ega, ńdáa ŋgyā. Táʼ, wɔnzwí pɔ́ a mbaŋa zīi, Ndém a á jʉɔ ŋ́gɛ pɔ́ é kuʼ, pɔ́ e shʉʼ ezím ánɛ lewhʉ̄, ékó ánɛ ŋgɔŋ eswhī, alaá‑ŋgyā á le éwú ú. A gɔ́ épúp melaʼ mīi, pɔ́ é si ŋgɔ́ páʼ mecɔʼ Ndém lā, pɔ́ té shʉʼɛ nzɛ́t ŋgɔ̄ á ŋkwhʉ́ ɛ́. Páʼ Ndém a á ghʉ pɔ́ zím ánɛ lewhʉ̄ lā, pɔ́ é si ŋgɔ́ epɔ̄ pí tɛ ntsékne. Éshʉ̄ʼ ánɛ lezīm ánɛ lewhʉ̄, mbɔ Mɔɔ́sɛ yí méŋwɛ̄t a le ghité á ntē aŋwaʼne yí, ájʉʼ zīi a á éwú mbɛ́tɛ anu athʉ́ zīi, alē mmók á lɛ éwú lā. Á ánɛ ajʉʼ aŋwaʼne mɛ́t, á tɔ́ŋ á Ndém lɛ, Ndém Ablaham, ŋgɔ́ á Ndém Izak, ńzéŋ ŋgɔ́ á Ndém Yakɔ́p. A lɛɛ́ ntɔ́ŋɔ épúp, mbɔ epuɔ mɛ́t é lē ŋkwhʉ́te. Táʼ, páʼ Ndém a te si ŋgɔ́ á Ndém mepfhō ɔ́, ŋ́gɔ́ áa Ndém epuɔ mete lā, epuɔ mɛ́t é zɛɛ́t nte, melaʼ mīi epuɔ metsem é mvhɔ Ndém, ŋ́gɔ́ nte. »
Yɛɛ́so a le pwɛ̄t épúp, emɔ̄ʼ wɔ kɛ́ʼte‑mbé Ndém é lé ŋ́gɛ: «Ńziʼnɛ, o ó tsɔ́ʼ á mbɔŋɔ́ tɛʼ. » Á zhɔ páʼa, ŋiŋ a te zéŋ ŋkūʼ á lelɔk amɔ̄ʼ anu, ḿmɔ̄ á yí í.


Yɛɛ́so á náŋ tɛ nzɛ́tte á wɔ́p ŋ́gɛ: «Pɛ kʉʼneé ndé ŋ́gɛ, Nzaʼ‑Ŋkhʉ á ntɔ̄ŋ apuʼ, a á méŋ Efɔ Ndavít péʼe, á ziŋ lɛ akɔ̄? Pɛ é si nzhɛ́ɛ azɛ́ páʼ Efɔ Ndavít yí méŋwɛ̄t, a le lé á ntē aŋwaʼne azɔp ntshi ŋ́gɛ:
Atsyapuɔ Ndém a á lé á mbū mɔʼɔ́ ga ŋ́gɛ,
Shʉʼɛ nnáŋ ánɛ
ŋkɔʼɔ́ apū ete gá.
Púp, meŋ eghʉ̄, megaŋ mbo pú,
e eshʉʼ nnɔ̄ŋte á mvhɔ wu,
o etshíte mekhu mú ánɛ pɔ́p.
Ndavít a á ega ntɔ́ŋɔ á Nzaʼ‑Ŋkhʉ lɛ, mɔʼɔ́ yi, púp, Nzaʼ‑Ŋkhʉ mɛ́t a gɔ egaá, ńzéŋ ŋgɔ́ á méŋ yi ī?»


Epuɔ é le nɔ̄ŋ nzwíʼtɛ ashuŋne Yɛɛ́so, á pekne nnɛ̄t ndé á mbū nnɔ yí ŋ́gɛ: «Pɛ epá á lefʉʼne wɔ kɛ́ʼte‑mbé Ndém, pɔ́ kɔɔ̄ŋ á wɔ́p á lemaʼ mesisia menzhó, ńdɔk ŋkʉ́ʼne á nnɔ alāʼ, ŋ́gɛ mɛ́ elɔ̄k mekuʼ, ńtsāʼte á wɔ́p. Ŋ́kɔ̄ŋ á wɔ́p á lekō á ntē ŋgyā aswiŋte, ŋ́kāŋ ajʉʼ zɔ́p á mvhɔ. Ŋ́gʉ̄ɔ lekāk, ŋ́kāŋ ajʉʼ mekuʼ. Pɔ́p puɔ mé si nzéŋɛ ŋkʉ́ʼnɛ mbɔ̄pɔ mepfók wɔnzwí, ŋ́kúu etsō tsɔ́p, ḿbiŋɛ ŋghʉ̄ɛ mesisia meswiŋte, ńdɔkɔ mbɔ̄pɔ menēk epuɔ. Ndém a a ké eláʼ etswá á wɔ́p á mía ŋgʉɔ athʉ́ lepé.

Ouça Lúkási 20