Genesis 4
4
Kain nug Abel qe mauhom
1Adam wau ele aa dad dimittim anam daaya, aa oiyya Ewa nug oo ele daye, geha nug Kain menuom. Menua, nug aum. “Yawe Nug da ehaniɗe, da nid danab imu aomi,” awa aum. 2Kain awom dimppa amu, Adam, Ewa ele aa baula oiyya, Ewa nug Kain amag Abel menue ukke, Abel nug awag ele okkai meya, Abel nug doɗ gumattak uɗat heehe, Kain nug dad hak uɗat heum.
3Kain, Abel ele aa anam heeh ukke, dimppa deɗ laa Kain nug dattanu ee awa uɗia mana, Yawe mettom, 4amge Abel nug nuhig doɗ sipsip, meeme ele nalkad ⌊dawai⌋ tatamnu laala ittalkad awa uɗia mana, Yawe mettom. Aa anam heeh amu, Yawe nug Abelnu, nuhig mana mettak elenu ena anttom, 5amge Kainnu, nuhig mana mettak elenu amu, Yawe Nug ena ii antte, Kain nug oo huana nauhe, nug iɗu ele nauha, tigugɗe dayom.
6Kain nug anam doya oiyeye, Yawe nug amegppa aum. “Aɗinu na oot nauhe, iɗun ele nauha, tigugɗe oittem? 7Na kobol ena heppe, da ool nahipnu ena daakku. Amge na kobol ena ii heppe, hipunin na tonitteb nauhkkut, amge anam am aib. Na hipunin tabappe noaɗ!” awa aum.
8Nug anam aum, amge geha Kain nug Abel amegppa aum. “I dad okkaippa noɗu!” awa aum. Anam a amu, aa goya oiyya, Kain nug ban ha, amag Abel makkuɗe mauhom. 9Mauhe amu, Yawe Nug Kain amegppa aum. “Na amap Abel adeppa daatte?” awa oɗ mettom. Oɗ mette amu, Kain nug aum. “Eetai, da ii doottem. Da haen oh Abel gume daakkulnu daattemte?” 10Nug anam awa a amu, Yawe Nug aum. “Na kobol aɗi heme? Doye! Na amap Abel nug tiig wanppa ne, amu baag da daulppa danab baag bia doottem 11amunu, na hemenu, na eheɗ laa awaknu anak waappa daan, na Abel tiig gokkaɗe, wan imu ooppa noum ele, na wan imu uun gokkut. 12Aria, haen na dad uɗat hekkut amu, keeke oh ena ii bemana. Laa ele, na aben laippuppaib ii daamna. Na qati qati oikkut,” awa aum. 13Yawe Nug anam a amu, Kain nug Yawe amegppa aum. “Bu mettak na gemu meɗattem am okkainab, da bu amu maokkulnu elele iitta. 14Gemu na da wan imuppanu, na noompanu lamiɗttem amunu, da haen oh aben laippuppaib ii daapa; qati qati oikkul. Danab laa da aniɗa, nug duul ob mauhkkul,” awa aum. 15Kain anam a amu, Yawe Nug aum. “Iitta! Kain nuhig bu mettak am nakok okkai, amge danab laa nug Kain qeeb mauhkku amu, nuhig bu mettak am okkainab,” awa aum. Anam awowa amu, Yawe Nug danab laa Kain antta, qemanu Kainppa at meum. 16Anam daye, Kain nug Yawe toppanu aha ukka, wan laa onig Nod, amuppa ukka oiyom. Nod nug Idennu kaɗag uɗitteppanu dayom.
17Kain wau ele oiyya, nug wau oo ele daya, nug nid laa onig Enok menuom. Menuom, haen amuppa Kain nug aab okkai kala haaha, nug nid onig Enok amu awa, aab okkai onig ataɗom. 18Dimppa Enok nug nid awa, onig Irat ataɗom. Irat bekka Mehuyael. Mehuyael bekka am Metusael. Metusael bekka am onig Lamek.
19Lamek nug ah aɗit onilah Adah, Silah ele diiatom. 20Diiata amu, nug Adah ele oiyya, Adah nug Jabal menue, nug danab peh lakka daanna, doɗ gumadtteb ele mamelag daatte. 21Nug amag amu onig Jubal, nug danab harp, dumuttum eleppa musik hetteb ele mamelag daatte. 22Aria, Lamek nug wau laa Silah ele oiyya, nug ele nid aɗit menuatom. Nid danab amu onig Tubalkein, amu nug keeke bras, aian eleppa hattom. Nug appinag am onig Namah. 23Anam daanna amu, Lamek nug wauuɗ amelahppa aum.
“Adah, Silah ele, aa nai dahil doyeɗ!
Ao, ah aɗit, aa da, Lamek, aa ah dahilaɗ daattep amu, aa nai dahil doyeɗ!
Aɗinu? Danab bau da oiɗa guittak meɗom amunu, da nug makkuɗi mauhom.
Ao, nid bau laa guittak da meɗom amunu, da nug makkuɗi mauhom.
24Danab laa nug Kain makkuɗeb mauhkku amu, nug bu mettak okkainab aokku.
Ge am anam, amge danab laa da oiɗeb amu, nug guittak okkai, huanaknab aokku.”
Lamek nug anam awa aum.
25Aria, Adam wau ele aa baula oiyya, Ewa nug nid danab baula menuom. Menua, nug aum. “Kain nug Abel makkuɗe mauhom amunu, Kayak Nug nid laa Abel abenab aokkunu meɗom,” awa aum. Nug anam aum amunu, nug onig Set ataɗom. 26Set bekka amu Enos. Nuhig haenppa danab ag tamanina daanna, Yawe onigppa ekkulagnu digmeppig.
Atualmente selecionado:
Genesis 4: NB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2022, Wycliffe Bible Translators, Inc. All rights reserved.