Mat 8
8
Zozii ya kokobhebhlanyɔ bhlo jabha
(Mak 1.40-45; Luk 5.12-14)
1Daa Zozii 'wlʋ 'lɛ 'kikea 'wlu 'nyɩ ɔ kwli 'lɛ na, ncaabhutukpa yɔɔ gɩlɩ. 2Kokobhebhlanyɔ bhlo yɔɔ cɩmɛ, ɔ yɔɔ ‑deliin ‑kukoonkplii sasla 'nyɩ ɔ yɔɔ 'cla lebhe: «‑Kwlenyɔ, ‑n ‑ka ‑wa na, ‑n cɩɩn jabha.» 3Zozii ya sɔɔn ‑glɔ, ɔ yɔɔ cɩkla 'nyɩ ɔ ya 'cla lebhe: «N ‑wa, 'maa jabha!» 'Kplookʋ, kokobhea yɔɔ cɩwlʋ. 4Na, Zozii yɔɔ 'cla lebhe: «‑Naa solua wɔlɩ ‑naa nclɔɔ bhlogbɩɩ, ‑ma mʋ ‑n pala ‑ncɩ ‑teyiyinyɔa ɩya ‑n ‑sa lɩɩa Moyizi 'clalɩ 'lɛ na ɩya ma 'ka dɩpɩa ‑danʋfʋɛ lili lebhe ‑n ya ‑zaagbʋsa jabha.»
'Soja ‑gwlɩɩ ‑ngbi to bhlo 'la pɔɔtɛtɛ
(Luk 7.1-10; Zan 4.46-54)
5Daa Zozii ‑kʋa 'lɛ Kapɛnayumʋdua nɩkplaan bleda na, 'soja ‑gwlɩɩn ‑ngbi to bhlo yɔɔ cɩmɛ, ɔ ya zɩzla 6'nyɩ ɔ yɔɔ 'cla lebhe: «‑Kwlenyɔ, 'na lobhoco ‑pʋʋ 'yɛpɩ 'sleen, ɔ ya bhubhu 'nyɩ 'kwlɩ 'kadɩ bhɩɔ.» 7Zozii yɔɔ 'cla lebhe: «‑Amʋ, n cɩ mʋ, n cɩɔ jabha bha?» 8‑Ma 'soja ‑gwlɩɩ ‑ngbi toa yɔɔ 'cla lebhe: «‑Kwlenyɔ, n 'ta 'kʋŋwa lebhe ‑n ble n 'bhisleen. ‑Ma nyɩtɛ wɔɔkle bhlogbɩɩ ‑tɛɛ ɩya 'na lobhocoa 'ka jabha. 9Sa ‑amʋ titi, n ‑kʋ 'na 'kʋklʋʋnpʋnyaa 'la ‑kwlelie ‑zɔn 'nyɩ ‑amʋ ‑ma n ‑kwle 'lɛ 'soja. N 'cla bhlo lebhe: Mʋ, 'nyɩ ɔ mʋ, n cla ‑anɔ bhlo lebhe: Ci, 'nyɩ ɔ ci. 'Nyɩ n cla 'na lobhoco lebhe: Nʋ ‑sa, 'nyɩ ɔ nʋ sɛɛ.»
10Daa Zozii 'nuo 'lɛ neen na, nikpoo yɔɔ sla 'nyɩ ɔ ya maa ‑ɔ gɩlɩa 'mɔɔ 'lɛ na, 'cla lebhe: «N solu anyɩ, ɩ ‑glɩ ‑nʋawlɛ: Izlayɛlɩbhlɩa* 'kʋ, n 'ta ka ‑azla ‑sa 'la pɔɔtɛtɛ nclɔɔ ‑ylɛylɛ nɩkplaan 'lɩlɩ. 11‑Awlɛ, n cla anyɩ lebhe daa ncaabhutukpa cɩ 'ka daa ‑tɛtɛa 'wlʋlʋ ɩya maya Ablaamʋ, Izakɩ ɩya Zakɔpʋ 'ka 'lɛ ‑laagɔɔn 'la Nyɩbhɛlɩdua* nɩkplaan, 'tlɔnblɩ 'kʋ dabhlo lili na, 12ma cɩ 'ka Nyɩbhɛlɩdua 'la ‑ajaalinyaa ‑jlukuun 'la 'tutua nɩkplaan 'pa, gbazɩa ma tu 'lɛ 'nʋgbʋ 'nyɩ ma li 'lɛ ‑glaa slo na.» 13Na, Zozii ya 'soja ‑gwlɩɩ ‑ngbi toa 'cla lebhe: «Cɔlɔ ‑n 'bhisleen ɩya ɩmɩa ‑n 'clalɩ 'lɛ na, 'naa ‑naa pɔɔtɛtɛa ‑glalɩɩ 'kʋ.» 'Nyɩ 'dɛ 'la 'ŋwacɩa bhlogbɩɩ 'kʋ, lobhocoa ya jabha.
Zozii ya Pɩɛlɩ 'wʋtlɔ ɩya guzenya jabha
(Mak 1.29-34; Luk 4.38-41)
14Zozii ya Pɩɛlɩ 'bhisleen mʋ, ɔ ya Pɩɛlɩ 'wʋtlɔ 'lɩ, wɔtlɩ bhlaa 'mɔɔ nyɩ ɔ pʋa. 15Ɔ yɔɔ cɩkla 'nyɩ wɔtlɩa yɔɔ 'ciinwlʋ. Na, ɔ ya 'kʋbho 'nyɩ ɔ yɔɔ lobholɩɛ bhɔ.
16'Ylʋ mʋ 'lɛ na, ma yɔɔ 'wugwinyinyinya ‑bhutukpa ‑la. Ɔ ya nyɩtɛ, ɔ ya 'wugwi ‑nyinyia 'tli 'nyɩ ɔ ya guzenyaa 'fɩan jabha. 17'Lɩka ‑sa Laagɔnekʋnyɩtɛnyɔ* Izayii 'la niwɔlɩa ‑glalɩ 'lɛ 'kʋ:
Ɔ ya ‑anyɩ ala 'kwlɩbhɩɛa kʋ ‑sa
'nyɩ ɔ ya 'lɛ ‑ala 'bhlabhlagua 'la ‑tobhua ‑slo.
Zozii 'la gɩlɩlɩɛ 'la cɩa wɔlɩ
(Luk 9.57-60)
18Zozii 'lɩ 'lɛ lebhe ‑alawlee ‑didioa 'mɔɔ na, ɔ ya ɔla gɩlɩnyaa* 'cla lebhe ma 'tɔ 'nyi. 19‑Jlɩmaazienyɔ* bhlo yɔɔ cɩmɛ 'nyɩ ɔ yɔɔ 'cla lebhe: «Canyɔ, daa ‑tɛtɛa ‑n ‑cɩ ka 'lɛ mʋ na, n cɩɔ gɩlɩ.» 20Zozii yɔɔ 'cla lebhe: «‑Daazlii ‑ka 'bhukwi 'nyɩ ‑laagɔɔn 'la libhlia ‑ka 'lɛ ‑palɩ. ‑Ma Nclɔɔa 'Cʋa* 'ta ɔla 'wlua 'la zʋlʋda ‑ka.» 21Gɩlɩnyaa nɩkplaan bhlo yɔɔ 'cla lebhe: «‑Kwlenyɔ, 'nyɩɩn ‑jioli ɩya n 'ka mʋ, n 'ka n to zizie 'fɩɔn.» 22‑Ma Zozii yɔɔ 'cla lebhe: «Gɩlɩɩn ɩya ‑n 'talɩ 'kua 'cin ɩya ɩ zizie ɩla 'kua.»
Zozii ya ‑bubo ‑dʋdʋ 'kʋ ‑la
(Mak 4.35-41; Luk 8.23-25)
23Zozii ya gɔlʋa nɩkplaan 'tɔ 'nyɩ ɔla gɩlɩnyaa* yɔɔ 'kʋgɩ. 24Na, ‑Bubo 'kadie ya 'nyia 'kʋtaan 'ma 'nyɩ 'nyigaagbɩa 'matɩa le ɩ 'kaa gɔlʋa 'kʋmlaa. ‑Ma, Zozii, ɔmɔ ɔ ŋɔmʋa. 25Gɩlɩnyaa yɔɔ cɩmɛ, ma yɔɔ galɔ 'nyɩ ma yɔɔ 'cla lebhe: «‑Kwlenyɔ, ci ‑anyɩ 'kʋ, ‑ma ka ‑a ku 'lɛo!» 26Ɔ ya maa 'cla lebhe: «'Lɩsaa 'la gbʋ ŋanɔ bhlaa 'lɛ ‑sa anyɩ bha? Ala pɔɔtɛtɛa 'ta 'ghli!» 'Nyɩ ɔ ya 'nylugo, ɔ ya ‑buboa ɩya gea 'wlugaalɩ 'nyɩ daa ‑tɛtɛa ya 'cɩɩplɩ. 27Na, nikpoo ya maa 'fɩan sla 'nyɩ ma claa lebhe: «Ncaasaa nclɔɔ ‑naa ‑glɩa 'lɛ 'nyɩ ‑bubo ɩya ge 'titio nyɩɔ 'lɛ 'klʋ bha?»
Zozii ya 'Wugwinyinyinya ‑mɔsɔ jabha
(Mak 5.1-20; Luk 8.26-39)
28Daa Zozii 'tɔ 'lɛ 'nyia 'nyɩ ɔ ŋeni 'lɛ Gadaghlenɩɛnnyaa 'la 'bhlɩa 'kʋ na, 'wugwinyinyinya ‑mɔsɔ ya lesikpaa nɩkplaan 'wlʋlʋ 'nyɩ ma yɔɔ 'bɩɩncili. Mala danyunoa 'la gbʋ, nclɔɔ ‑ylɛylɛ mino 'taanɩa 'dɛ 'la ‑gugwiea 'kʋ 'plɩlɩlɩɛ. 29Na, 'wugwi ‑nyinyia ya nɩkplaangalɩɛ bhɔ 'nyɩ ɩ claa lebhe: «Laagɔ 'la 'Cʋ, wɔɔsaa ‑ɔ ‑kʋa 'lɛ ‑a ‑yɔɔsɔ ‑gbaaglɩɩn bha? Ka ‑n ci 'lɛ ‑da le ‑n ka ‑anyɩ gbaylɩ ‑sa 'fɩɔn ɩya clɩɩa ‑ɩ ‑zʋɔ 'lɛ na, 'ka ŋeni bha?»
30Bhuzikpa 'kadie ‑kʋa 'dɛ 'la ‑dɩklea 'nyɩ a lia. 31Na, 'wugwi ‑nyinyia ya Zozii bhibhie 'nyɩ ɩ yɔɔ 'cla lebhe: «Gbazɩ ‑n ‑ka ‑anyɩ 'tli na, 'maa falɩ ‑anyɩ bhuzikpaa nɩkplaan.» 32Ɔ yɩɩ 'cla lebhe: «A mʋ!» Ɩ ya ‑zɔnwlʋ 'nyɩ ɩ ya bhuzia nɩkplaan slo. 'Nyɩ bhuzikpaa ‑tɛtɛa ya 'kikea 'wlu 'wlʋ, a ya 'nyia nɩkplaan 'kɔsɔ 'nyɩ a ya 'kʋmla.
33Na, bhuzia 'la kpanyaa ya 'gu, ma ya duku mʋ 'nyɩ ma ya ɩmɩa ‑tɛtɛa ɩya 'wugwinyinyinyaa ‑mɔsɔa 'la wɔlɩa 'dɩkʋsalɩ. 34'Nyɩ 'dunyaa ‑tɛtɛa ya ‑zɔnwlʋ 'nyɩ ma ya Zozii 'bɩɩnmʋnʋ. Daa ma 'lɩɔ 'lɛ ‑jaa na, ma yɔɔ 'wlusla le ɔ 'wlʋ mala 'bhlɩa 'kʋ!
Atualmente selecionado:
Mat 8: NTLD13
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Dida New Testament © Bible Society of Côte d'Ivoire, 2013.