Matthieu 2
2
Baw-nyangerge ɗɔyi ngonn ke kide
1Jésu nga, ndɔ ke d’oje’n kêm ɓee-bò ke Bethléhem ɓeekon ke le Juda. E kêm ɓal’n ke ngar Hérode ee’n njèkonɓee ɓeekon ke le Juda. An! baw-nyangerge in-in gugu loo tee’t le kàde, ei reei kêm ɓee-bò’t ke Jérusalem. 2Ei deji edi nè:
– Ké ngar le Juipge ke d’oje’n ngɔr nè nga è loo ke ra’t wa? Tede jè j’an kɔnyon le’n loo tee’t le kade gugu nú á jè ree le ɗɔi’n.
3Loo ke ngar Hérode se dooge malang ke kêm ɓee-bò ke Jérusalem ooi tà nè nga titeke bè ɓaa, tà ige de sêl. 4E ɓar maw njékuje nyan-mesege se njéndang magtubge le kosdooge ɔse nja de nan’t deje de kade edii loo koje Krist. 5Dé tel d’ile’n dè’t d’ede nè:
– Krist nga d’oje’n kêm ɓee ke Bethléhem ɓeekon ke le Juda. Njèribe-dè-tà ke tà Nube’t karé ndang tà nè nga titeke bè kêm magtub’t kété ede nè:
6«I Bethléhem, ɓeekon le Juda nga,
ɓee-bòge ke ɓeekon’t le Juda nga, d’a kur dèi ndan lé,
tede ngar ke njèkul kosdooge le’m ke ei Juipge nga à in rai’t.»
7Hérode ade dé ɓar baw-nyangerge se go ngein deje de kade edii ndɔ tee le kɔnyon nè nga get-get. 8Go’t gugu è ule baw-nyangerge nè nga kêm ɓee ke Bethléhem ede nè:
– Awi i deji tà ke ɔje dè ngonn ke kide nè nga get-get ooi. Loo ke sei ingei ɓá ɓaa, i reei edi man kade man kuwe m’aw m’ɗɔi’n tɔ.
9Loo ke d’oo tà le ngar Hérode bè ɓaa, d’ɔte d’aw. Nè kɔnyon ke kété d’an’n loo tee’t le kàde nga ɔr non de sár aw nda dè loo ke ngonn ke kide nè tò tutu. 10Loo ke baw-nyangerge an-in kɔnyon nè nga ɓaa, kêm de agenan kɔt-kɔt. 11Loo ke d’aw kêm kei d’an ngonn ke kide nè se kon’n Marie ɓaa, d’ɔse keje de nang non ngonn ke kide’t nè nga dé ɗɔi’n a tɔ. Go’t gugu, dé tee se nar-ɔr se nyan ke ete sununn titeke katchatcha a, se nyan karé ke ri’n nè myrrhe kêm sanduge le de d’uwe’n se’n noje. 12Nube ede de se nin le kade dé tel ree ra Hérode’t gugu lé. E á d’unn rebe ke rang dé tel d’aw ɓeekon’t le de.
Joseph an-in se Jésu aw se’n ɓeekon ke Egypte’t
13Loo ke baw-nyangerge ɔti awi ɓá ɓaa, an! doo ke danran le Kuwe-ɓee tee hɔi ke ra Joseph’t se ni ede’n ede nè:
– Ɔse nang in, unn ngonn ke kide nè nga se kon’n an-in se de aw se de ɓeekon ke Egypte. I ndi tutu nú sár kade man kuwe m’edi ɓita i tel i ree ɓai tede Hérode sang le tɔl ngonn ke kide nè nga.
14Joseph ɔse nang in ke loon’t nè, unn ngonn ke kide nè nga se kon’n an-in se de ndɔɔ aw se de kêm ɓeekon ke Egypte. 15E ndi tutu nú sár ade Hérode weii’n. Titeke bè á tà ke ndɔ ke kété Kuwe-ɓee ade njèribe-dè-tà ke tann’t tam ede nè: «M’ɓar ngonn’m kade unde loo tee kêm ɓeekon ke Egypte’t kɔke» aw’n loon’t deĵ.
Hérode ade dé tɔl ngannge kabak
16Loo ke Hérode an titeke baw-nyangerge ulei mbe dènn’t ɓaa, wong ase’n nák. E ule ade dé tɔl ngannge ke dingem malang ke rai ɓal joo se njé ke ɓal de ase joo lé ɓai a tɔ. Se go kurloo ke baw-nyangerge ɔji Hérode nga, è ade d’unn gir tɔl ngannge ke dingem kêm ɓee ke Bethléhem sár d’ɔse’n ngei ninn ɓeekon le’n bere mbak. 17E á tà ke Jérémie njèribe-dè-tà ke tà Nube’t tam kété ede nè:
18«Non se wuwi ɓar jiki kêm ɓee ke Rama.
E Rachel á non tede ngannenge ke gotoi.
E ndige le kade doo karé bè géa gɔr’n lé.»
Tà nè nga aw loon’t deĵ.
Joseph in ɓeekon ke Egypte tel aw Nazareth gugu
19Loo ke Hérode wei ɓá ɓaa, doo ke danran le Kuwe-ɓee tee hɔi ke ra Joseph’t ede’n se ni kêm ɓeekon ke Egypte ede’n ede nè:
20– In dɔ, unn ngonn ke kide nè se kon’n, i tel aw se de kêm ɓeekon ke Israel gugu tede njé ke sangi le tɔli ngonn ke kide nè nga weii ɓá ta.
21Joseph ɔse nang in unn ngonn ke kide nè nga se kon’n tel aw se de kêm ɓeekon ke Israel. 22Nè loo ke Joseph oo titeke Archélaus ngonn le Hérode on ɓee ɓeekon’t ke Judée gute bɔn’t ɓaa, è ɓel tel kaw ndi tutu. Se go tà ke Nube ede’n se ni kété nga, Joseph ɔr ra’n aw ndi kêm ɓeekon ke Galilée. 23E aw ndi kêm ngonn ɓee karé ke ri’n nè Nazareth tede kade tàge ke njéribe-dè-tà ke tà Nube’t tami kété mari aw’n loon’t deĵ. Ei tami edi nè: «E nè nga d’a ɓar’n doo ke Nazareth.»
Atualmente selecionado:
Matthieu 2: GUL04
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Magtub Mann-ra ke Kige ©Alliance Biblique du Tchad, 2004