Génesis 31
31
Labánpita Jacob qeshpishqan
1Saypitami Jacob wiyarqan Labánpa surinkuna washanta rimar nikäyashqanta: <<Jacobqa papäninsipa kaqta duëñu tukurmi rïcuyash>>.
2Saynöpis Jacob tantiyarqan suedrun Labánpis paypita jukaqyash purir nawpata kashqannönasu kashqanta. 3Saypitami Jacobta Tayta Dios nirqan: <<Papäniki y aylluykikuna täyashqanman kutikuy. Qamwanmi imaypis kaykäshaq>>.
4Tayta Dios sayno niptinmi Raqueltawan Leata Jacob qayasirqan misikuykashqan jirkaman. 5Paykuna chaykuyaptinmi nirqan: <<Papäniki noqapita jukaqyash puriykashqantami tantiyashkä. Sayno kaptinpis papänï yärakushqan Dios manami kachaykamashsu. 6Musyayashqaykinöpis papänikita lapan voluntänïwanmi arupashkä. 7Sayno arupaykaptïpis pay engañamashqami. Aska kutimi arushqäpita arreglamänanpaq parlayashqänöqa pägamashsu. Sayno ruraykämaptinpis Tayta Dios yanapämashqami. 8Saymi <arupämashqaykipita kanan shaqsha shaqshala uyshakunawanmi pägashayki> nimaptinqa lapan malwakunapis shaqsha shaqshala yuriyaq. Saynöpis <shuyu kaq yuriqkunawanmi pägashayki> nimaptinqa lapan malwakunapis shuyula yuriyaq. 9Saynöpami papänikipa uyshankunata Tayta Dios noqatana qoykamash.
10<<Uywakuna malwakuyänan wisanmi sueñuynïcho rikashkä shuyu chïvukuna, shaqsha shaqsha chïvukuna y yuraqyuq chïvukuna cabrakunata malwaykäyaqta. 11Say sueñuynïchömi Tayta Diospa angilnin <¡Jacob!> nir qayamarqan. Qayamaptinmi <¿imalataq, Taytay?> nirqä.
12<<Saymi Diospa angilnin nimarqan: <Noqa rikaykämi Labán imano nakasishushqaykitapis. Saymi kamakäsishkä lapan yayankuna shuyula, shaqsha shaqshala y yuraqyuqla kayänanpaq. Sayta rikar shumaq tantiyakuy. 13Noqami kaykä shamuykaptiki Bet-elcho yuripaq Dios. Saychömi rumita jawiykur aceitita winapar sirvimänaykipaq promitimarqayki.#Gén. 28.18-22. Kananqa yurishqayki Canaánman kutikuy> >>.
14Sayno niptinmi Raquelwan Lea niyarqan: <<Noqakunata papänï ima herenciatapis manami rakipäyämanqasu. 15Saynöpis jäpatano rikayämashpanmi rantikayämash. Noqakuna rayku arupashqaykitapis mana rakipäyämaypami ushakurkush. 16Papänïpa uyshankunata Tayta Dios makikiman churamushqanqa noqansipawan wamransikunapami kaykan. Kanan Tayta Dios nishushqaykinöla lapantapis ruray>>.
17-18Saymi Jacob kamarikurqan papänin Isaac tashqan Canaánman kutikunanpaq. Lapan imaykanta chaqnakurmi#31.17-18a Wakin runakunaqa cargakurmi niyanmi. surinkunatawan warminkunata camëlluman loqarkasir#31.17-18b Wakin runakunaqa muntarkasir niyan. Padan-aramcho arupakur tarishqan uywakunatapis qatikurkur kutikurqan. 19Sayno kutikurqan milwa rutuq Labán aywashqanyaqmi. Raquelnami papäninpa ïdulunkunata suwaypa apakurqan. 20Saynömi Labánta mana wilapaylapa Arampita Jacob kutikurqan. 21Lapan kikinpa kaqta apakurkurmi qeshpikurqan. Saymi Éufrates mayuta simpaskir Galaad jalqakunaläpa aywarqan.
Jacobta Labán qatipashqan
22Saypita kimsa junaqtaraqmi Labán musyarqan Jacob qeshpir aywakushqanta. 23Saymi ayllunkunata minkakuykur Jacobpa qepanta aywayarqan. Qanchis junaqtaraqmi taripäyarqan Galaad jalqakunacho. 24Taripänanpaq kaq sakaymi sueñuynincho Labánta Tayta Dios nirqan: <<Cuidädu ayaq shimikipa Jacobta imatapis nikankiman>>.
25Galaad jalqakunacho Jacob posädakush kaykaptinmi Labán tariparqan. Saychömi Labánpis ayllunkunawan posädakuyarqan. 26Jacobwan tinkurkurmi Labán nirqan: <<¿Imatataq rurashkanki? ¿Imanirtaq mana wilamaylapa shakamushkanki? ¿Imanirtaq guërrapita prësu apaqno surïkunata apakamushkanki? 27¿Imanirtaq upälala qeshpir shakamushkanki? Shakamunaykipaq wilamaptikiqa fiestata rurar panderëtakunatapis arpakunatapis tukar kushishqami despachamüman karqan. 28Surïkunata ni wilkäkunata musar despidikunaläpaqpis manami wilaykamashkankisu. ¡Sayno rurar upajinami ruraykushkanki! 29Sayno rabyanäsimashqaykipita imatapis ruraykümanmi karqan. Sayno kaptinpis papäniki yärakushqan Diosmi nimash: <Cuidädu ayaq shimikipa Jacobta imatapis nikankiman>. 30Papänikipa wayinman kutikurpis ¿imapaqtaq diosnïkunata suwakamushkanki?>>
31Sayno niptinmi Jacob nirqan: <<Surikikunata qechumänaykita mansarirmi mana wilapaylapa qeshpikamushkä. 32Diosnikikunataqa manami suwakamushkäsu. Mayqanpis diosnikita sararaq kaqqa wanusish kasun. Ayllunsikuna rikaykaptin ashikuy. Qampa kaqta imatapis tarirqa lapanta kutisikuy>>.
Jacob manami musyarqansu diosninkunata Raquel suwamushqanta.
33Sayno niptinmi Jacobpa toldun rurinman Labán yaykurqan diosninkunata ashinanpaq. Saycho mana tarirmi surin Leapa toldunmanpis ashiq yaykurqan. Saynölami yaykurqan ishkan ashmay warmikunapa toldunkunamanpis. Mayqanchöpis diosninkunata mana tarirmi Raquelpa toldunmanna ashiq aywarqan. 34Raquelnami say dioskunata camëllupa sillan rurinman pakaykur say jananman jamakuykurqan. Saymi toldu rurinta kuchu kuchu ashirpis Labán tarirqansu.
35Saymi papäninta Raquel nirqan: <<Papä, kay jamaraykashqäpita mana sharkuptï ama rabyakunkisu. Killa qeshyäwanmi kaykä>>.
Saymi mayjina ashirpis ïdulunkunata Labán tarirqansu.
36Sayno ashirpis mana tariptinmi Jacob rabyakushpan Labánta nirqan: <<¿Imatataq lutanta rurashkä? ¿Imatataq jusalikushkä sayjinanpa rabyash qatipaykamänaykipaq? 37Lapan imaykätapis teqwipa teqwirmi ashishkanki. Sayno ashirpis ¿imatataq qampa kaqta tarishkanki? Tarish karqa kayman churamuy ayllunsikuna rikayänanpaq. Paykunami nimäshun mayqansipis rasun kaqta parlaykashqansita.
38<<Ishkay chunka (20) watantin uywaykikunata rikaptï uyshaykikuna ni cabraykikuna manami ni juklaylapis shulushsu. Saynöpis manami ni juk carnilatapis pishtakurkushkäsu. 39Manami imaypis jirka uywakuna wanusishqanta apapämushkäsu. Saypa trukanqa kikïmi trukanta churaq kä. Uywaykikunata sakaypa o junaqpa suwa apayashqanpitapis lapanpitami manamashkanki.
40<<Uywaykikunata misir junaqpa shanaywan y sakaypana alaywan fiyupami nakashkä. Punuytapis manami tarishkäsu. 41Chunka chusku watami ishkan surikikunapaq arupashkä. Saynöpis soqta watami uywaykipaq rayku arupashkä. Saymi chämushqäpita pasa ishkay chunka (20) wata makikicho tashkä. Aska kutimi misipashqäpita arreglamänaykipaq parlashqansinöqa pägamashkankisu. 42Awilü Abrahamwan papänï Isaac yärakushqan Tayta Dios mana yanapämaptinqa jinaylatami qarqaramankiman karqan. Fiyupa nakar y lakikur aruptïmi Tayta Dios yanapämash. Saymi qanyan sakaypis sueñuynikicho olqutupäshushkanki>>.
Labánwan Jacob promitinakushqan
43Jacob sayno niptinmi Labán nirqan: <<Kay warmikunaqa surïkunami. Kay wamrakunapis wilkäkunami. Lapan uywakunapis uywäkunapa wawankunami kaykäyan. Lapan kaycho rikashqaykiqa noqalapami kaykan. Surïkuna y wilkäkunata manami imatapis rurämansu. 44Pactuta kanan rurashun qampis y noqapis mana qonqaypa cumplinansipaq>>.
45Sayno niptinmi juk wanka rumita señalpaq Jacob jawirqan. 46Nirkurmi lapan castankunata nirqan: <<Aska rumikunata shuntayämuy>>.
Sayno niptinmi juk muntun rumita shuntayarqan. Nirkurnami muntunayashqan rumi nawpancho mikuyarqan. 47Saypitami Labán kikinpa idiömancho say partita jutisirqan Jegar Sahaduta jutin kananpaq. Jacobnami kikinpa idiömancho jutisirqan Galaad jutin kananpaq.#31.47 Say jutikunaqa testïgu qotu ninanmi.
48Saymi Labán nirqan: <<Kanan kay muntunashqansi rumikunami señal kanqa promitinakushqansita imaypis yarpänansipaq>>.
Saypitami say partipa jutin karqan Galaad.
49Saynömi jukaq jutintapis churaparqan Mizpa jutin kananpaq.#31.49 Mizpa ninanqa rikachakuna törri ninanmi. Say jutita churaparqan Labán kayno nishqanpitami: <<Kananpita manana rikanakushqapis Tayta Diosmi rikamäshun imano kashqansitapis. 50Surïkunata maqaptiki o paykuna jananman juk warmita ashiptiki mana musyaptïpis Tayta Diosmi juzgashunki>>.
51Nirkurmi Labán nirqan: <<Kaychömi kaykan rumikunata muntunashqansiwan jawishqansi wanka rumipis. 52Saykunami señal kanqa kanan promitinakushqansita imaypis yarpänansipaq. Kananpitaqa qampis ni noqapis ama päsapänakushunsu ni imatapis ama yatapänakushunsu. 53Promitinakushqansita mana cumplishqaqa awiluyki Abraham y awilü Nacor yärakuyashqan Diosmi juzgamäshun>>.
Labán sayno niptinmi Jacobpis papänin Isaac mansapakushqan Tayta Diospa jutincho promitirqan imaypis cumplinanpaq.
54Saypitanami Jacob uywakunata pishtarkur wiranta Tayta Diospaq rupasirqan. Aysatawan tantatami lapan castankunawan mikuyarqan. Nirkurmi say jalqakunalacho punuyarqan.
55 55 (32.1) Saypita pasa wararkuptinnami Labán sharkurkur lapan wilkankunatawan surinkunata musarqan. Nirkur paykuna ali kawayänanpaq bendicionta qoykur markanpa kutikurqan.
Atualmente selecionado:
Génesis 31: qvhB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.