Génesis 29
29
Haránman Jacob chashqan
1Sayno aywarmi Jacob charqan inti jeqamunan kaqlächo taq runakuna kayashqanman. 2Say jirkachömi pözuta rikarqan. Say pözupa lädunchömi kimsa majäda uyshakuna y cabrakuna kaykäyarqan. Lapan uywakunapis say pözupitaraqmi yakuta upuyaq. Say pözutaqa jatunkaray läja rumimi saparaykarqan. 3Say läjataqa lapan misikuqkuna chaykurraqmi kichayaq uyshankuna y cabrankuna yakuta upuyänanpaq. Yakuta upuskiyaptinnami yapay läja rumiwan saparkuyaq. 4Saycho kaykaq runakunawan tinkurmi Jacob tapurqan: <<Taytakuna, ¿maypitataq kayanki?>>
Saymi niyarqan: <<Haránpitami kayä>>.
5Saymi Jacob nirqan: <<Qamkuna paqta reqiyanki Nacorpa wilkan Labánta>>.
Sayno niptinmi niyarqan: <<Aw, reqiyämi>>.
6Yapaypis Jacob tapurqan: <<¿Alisuraq kaykälan?>>
Saymi misikuqkuna niyarqan: <<Aw, Labán alimi kaykan. Taqay uyshankuna y cabrankuna qatish shamuykaq jipashqa Labánpa surin Raquelmi>>.
7Saymi Jacob nirqan: <<Inti jatunraq kaykaptin ¿imanirtaq uyshakunatapis cabrakunatapis aylluraykäsiyanki? Yakuskasir jukla misikuq aywayay>>.
8Saymi niyarqan: <<Misikuq mayïkuna chäyämushqanyaqraqmi shuyänakuyä. Lapä shuntakaskirraqmi pözu saparaq rumita witisiyä>>.
9Sayno parlaykäyaptinmi papäninpa uyshankunatawan cabrankunata qatish Raquel charqan. Uyshakunatawan cabrakunata misikuqmi Raquel karqan. 10Uywankunata qatish prïman Raquel chaykaqta rikarmi jinan höra pözuman aywar saparaykaq rumita Jacob witirasirqan. Nirkurmi uyshakunatawan cabrakunata yakusirqan. 11Saypitanami Raquelta winchikushpan musarqan.#29.11 Paykunapa costumbrinchöqa imaypis winchinakur qaqlancho musanakuyaqmi. Saycho reqinakurmi kushikuypita Jacob waqarqan. 12Nirkurmi Jacob wilarqan Rebecapa wawan y Labánpa sobrinun kashqanta. Sayta musyarmi Raquel cörrila aywarqan papänin Labánta wilaq.
13Paninpa wawanwan tinkushqanta wilaykuptinmi Labán cörrila tinkuq aywarqan. Tinkurkurnami kushikushpan makalakurkur musarqan. Wayinman pushaykuptinnami Jacob wilarqan imayka päsashqantapis. 14Sayno wilapaptinmi Labán nirqan: <<¡Rasunpaypa ayllümi qam kaykanki!>>
Raquelpaqwan Leapaq kash Jacob arupashqan
Juk killana Jacob arupar täparaykaptinnami 15Labán nirqan: <<Ayllü karpis manami dembaldilaqa arupämankimansu. Wilamay arushqaykipita aykata päganäpaqpis>>.
16Labánpami ishkay jipash surinkuna kayarqan. Qechpa kaqpa jutinmi karqan Lea. Shulka kaqpa jutinnami karqan Raquel. 17Lea kuyaylapaq nawiyuq kaptinpis Raquelmi mas kuyaylapaqqa karqan. 18Raquelta kuyarmi Labánta Jacob nirqan: <<Papä, shulka kaq suriki Raquelpaq ari qanchis wata arupäshayki>>.
19Saymi Labán nirqan: <<Jäpa runata awnikunäpa trukanqa alimi kanqa qamta awnikuptï. Sayno kaptinqa kaychöna täshun>>.
20Saymi tiyun Labánta Raquelpaq rayku qanchis wata Jacob aruparqan. Raquelta pasaypa kuyaptinmi qanchis watapis juk ishkay junaqnöla päsarirqan. 21Qanchis wata arupaskirnami Labánta Jacob nirqan: <<Arunäpaq parlashqansita cumplishkänami, taytay. Kananqa surikiwan täsimayna>>.
22Sayno niptinmi lapan reqinakushqan runakunata Labán qayasirqan majasakay fiestaman. 23Say sakaymi surin Leata pushaykur Jacobta mana musyasiylapa oqlaparkurqan. Saymi Leawan Jacob punurqan. 24Leapa ashmaynin kananpaqmi Zilpa jutiyuq jipashta Labán entregaykurqan.
25Pasa wararkuptinnami Jacob tantiyarqan Leawan punushqanta. Saymi Labánta nirqan: <<¿Imanirtaq kayta ruramashkanki? Raquelpaq rayku arupaykaptïqa ¿imanirtaq Leata oqlaparkamashkanki?>>
26Sayno niptinmi Labán nirqan: <<Kaychöqa qechpa kaqta manaraq despacharqa shulka kaqtaqa manami despachayäsu. 27Majasakashqaykipita juk semänayaqraq Leawan tay. Qanchis wata mas arupämänayki kaptinqa Raqueltapis entregashaykimi>>.
28Sayno niptinmi qanchis wata mas arupänanpaq Jacob awnirqan. Leawan tashqan semänarkuptinnami surin Raquelwanpis Labán täsirqan. 29Raquelpapis ashmaynin kananpaqmi Bilha jutiyuq jipashta qoykurqan. 30Saypitanami Raquelwanpis Jacob punurqan. Leata kuyashqanpita Raquelta mas kuyarmi tiyun Labán nishqannöla qanchis wata mas aruparqan.
Jacobpa surinkuna yuriyashqan
31Jacob mana kuyashqanta rikarmi Tayta Dios destinarqan Lea wawayuq kananpaq. Raqueltami isanqa qoluqyäsirqan. 32Lea qeshyaq rikakurmi olqu wamrata qeshyakurqan. Yuriykuptinmi nirqan: <<Lakikuptïmi Tayta Dios kuyapämash wawayuq kanäpaq. Kananmi isanqa runä kuyamanqa>>.
Saymi wamranta jutisirqan Rubén#29.32 Rubén ninanqa olqu wawäta rikay ninanmi. Saynöpis nakashqätami rikamash ninanmi. jutin kananpaq.
33Saypita yapay juknami Leapa wawan yurirqan. Saymi nirqan: <<Tayta Diosmi rikamash runä mana kuyamashqanta. Saymi yanapämash yapay wawayuq kanäpaq>>.
Sayno nirmi wamranta jutisirqan Simeón#29.33 Simeón ninanqa Tayta Diosmi rikash ninanmi. jutin kananpaq.
34Saypita yapaypis Leapa olqu wawan yurirqanmi. Saymi nirqan: <<Kimsatana surinta wachaykaptïqa noqalatanami runä kuyamanqa>>.
Sayno nirmi wamranta jutisirqan Leví#29.34 Leví ninanqa kuyan ninanmi. jutin kananpaq.
35Saypita mas jukpis Leapa wawan karqanraqmi. Yuriptinmi nirqan: <<Kananqa Tayta Diostami alabashaq>>.
Sayno nirmi wamranta jutisirqan Judá#29.35 Judá ninanqa alabanza ninanmi. jutin kananpaq. Saypitami isanqa wawata tarirqannasu.
Atualmente selecionado:
Génesis 29: qvhB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.