ዮሃንሳ ምሽራቹዋ 6
6
የሱስ 5,000 አሳ ምዜዳ
(ማቶሳ 14:13-21፤ ማር. 6:30-44፤ ሉቃሳ 9:10-17)
1ሄዋፐ ጉይያን፥ የሱስ ጋሊላ አባፐ ዎይ ጽብርያዶሳ አባፐ ሄፍን ፕኔዳ። 2እ ሀርጋንቻቱዋ ቦላ ኦዳ ዎልቃማ ማላታ በኤዳ ድራዉ፥ ጮራ አሳይ አ ካሌዳ። 3የሱስ ደርያ ከሲደ፥ ያን ባረና ካልያዋንቱና እትፐ ኡቴዳ። 4አይሁዳቱ ቦንችያ ፓስጋ ጋላሳይ ጋኬዳ። 5የሱስ ስንኮ ጼሊደ፥ ጮራ አሳይ ባረኮ ይያዋ በኢደ ፕልጶሳ፥ “ሀ አሳ ኡባ ምዛናዉ ግድያ ቁማ ሀቃፐ ሻማኔ?” ያጌዳ። 6እ ሄዋ ፕልጶሳ ፓጫናዉ ጌዳ፤ አያዉ ጎፐ፥ እ ባረ ሁጰዉ አያ ኦና በስንቶ ኦናባ ኤሬ።
7ፕልጶስ ዛሪደ የሱሳ፥ “ሁጲያን ሁጲያን፥ ሀራይ አቶ እት እት ባርሱዋ ጋናዉ፥ ላኡ ጼቱ ድናርያን ሻሜዳ ኡክይካ ግደና” ያጌዳ።
8ቃይ የሱሳ ካልያዋንቱፐ እቱ፥ ስሞን ጰጽሮሳ እሻይ እንድራስ፥ 9“ባንጋ ኡክ እቼሹነ ላኡ ሞሊ ደእያ እት ናአይ ሀዋን ደኤ፤ ሽን ሀ አሳ ኡባዉ ሄዌ ዎት ግዳኔ?” ያጌዳ።
10የሱስ ባረና ካልያዋንታ፥ “አሳይ ኡታናዳን ኦተ” ያጌዳ። ሄ ሳኣን ዳሮ ማታይ ደኤ። አሳይ ኡባይ ኡቴዳ፤ አቱማ አሳይ እቼሹ ሻኣ ግድያዋ። 11የሱስ ኡክ አኬዳ፤ ጾሳ ጋላቲደ፥ ሄዋን ኡቴዳ አሳዉ ግሼዳ። ሞልያካ ሄዋዳን ኦና አሳይ ባረ ኮዬዳዋ ኬና ሜዳ። 12ኡንቱንቱ ኡባይ ካሌዳዋፐ ጉይያን፥ የሱስ ባረና ካልያዋንታ “እትባይካ ጮ ባየና ማላ፥ አቴዳ ዶካ ሺሽተ” ያጌዳ። 13ሄዋ ድራዉ፥ ኡንቱንቱ ኡባካ ሺሼድኖ፤ አሳይ ካልና አቴዳ ባንጋ ኡክ ዶካ ሺሺደ፥ ታማነ ላኡ ዛምቤልያ ኩንድኖ።
14አሳይ የሱስ ኦዳ ዎልቃማ ማላታ በኤዳ ዎደ፥ “ሀዌ ቱሙዋፐ ሀ ሳኣ ያና ጌዳ ናብያ” ያጌድኖ። 15ኡንቱንቱ ዪደ ባረና ዎልቃን ኦይቂ ካትያ ኦናዉ ሀንያዋ የሱስ ኤሪደ፥ ባረካ ደርያ ቦላ ሽረቲደ ከሴዳ።
የሱስ አባ ቦላን ሀመቲደ ቤዳ
(ማቶሳ 14:22-33፤ ማር. 6:45-52)
16ሳአይ ኦማርሴዳ ዎደ፥ የሱሳ ካልያዋንቱ አባኮ ቤድኖ፤ 17ሳአይ ቃሜዳ፤ ሽን የሱስ ኡንቱንቱኮ ሄ ሳቲ ጋካናዉ ይቤና፤ ሄዎ ኡንቱንቱ ዎንግርያን ገሊደ፥ አባ ፕን ሄፍን ቅፍርናሆማ ቤድኖ። 18ዎልቃማ ጫርኩ ጫርኬዳ ድራዉ፥ አባይ ቃጼዳ፤ 19እት ሳትያ ኬና ኡንቱንቱ አባ ሻጎዋፐ ጉይያን፥ የሱስ አባ ቦላና ሀመቲደ ይያዋ በኢደ ያዬድኖ። 20ሽን እ፥ “ያዮፕተ፤ ታናቴ!” ያጌዳ። 21ኡንቱንቱ ዎንግርያን አ ገልሳናዉ ኮዬድኖ፤ ዎንግሪ ኡንቱንቱ ብያሳ አባ ጋጻ ኤለካ ጋክ አጌዳ።
የሱስ ደኡዋ ኡክ
22ዎንተ ጋላስ፥ አባፐ ሄፍንና አቴዳ ጮራ አሳይ አባ ቦላ እት ዎንግርያ ጻላላይ ደእያዋ በኤድኖ፤ የሱስ ባረና ካልያዋንቱና ዎንግርያን ገሊደ፥ ኡንቱንቱና ቤናን፥ ኡንቱንቱ ባረካ ቤዳዋ አኬኬድኖ። 23ሽን ጽብርያዶሳፐ ሀራ ዎንግራቱ የሱስ ጾሳ ጋላትና፥ አሳይ ኡክ ሜዳሳ ማታ ዬድኖ። 24አሳይ የሱስ ዎይ አ ካልያዋንቱ ሄዋን ባይናዋ በኢደ፥ የሱሳ ኮያናዉ ዎንግርያን ገሊደ፥ ቅፍርናሆማ ቤድኖ።
25አሳይ የሱሳ አባፐ ሄፍንን ደሜዳ ዎደ፥ “ታማርስያዎ፥ ሀዋ አዉደ ያዲ?” ያጌድኖ።
26የሱስ ዛሪደ፥ “ታን ህንተንቶ ቱሙዋ ኦዳይ፤ ህንተንቱ ታና ኮይያዌ ኡክ ሜዳ ድራሳነ ካሌዳ ድራሳ ግድያዋፐ አትን፥ ዎልቃማ ማላታ በኤዳ ድራሳ ግደና። 27መና ደኡዋ ቁማዉ፥ ታን አሳ ናአይ ህንተንቶ እማናዎ፥ ኦተፐ አትን፥ ሳምያ ቁማዉ ኦፕተ፤ አያዉ ጎፐ፥ አዉ ጾሳይ ሄዋ ሽሳናዉ ማታፋ አታም ዎዳ” ያጌዳ።
28ሄዋፐ ጉይያን ኡንቱንቱ፥ “ኑን ጾሳ ኦሱዋ ኦናዉ አያ ኦናዉ በሲ?” ያጊደ የሱሳ ኦቼድኖ።
29የሱስ ዛሪደ፥ “ህንተንቱ ኦና ማላ፥ ጾሳይ ኮይያ ኪታይ ሀዋ፤ እ ኪቴዳዋን አማንተ” ያጌዳ።
30ኡንቱንቱ ዛሪደ፥ “ኑን በኢደ፥ ኔናን አማናና ማላ፥ አይ ዎልቃማ ማላታ ኦኒ? አያ ኪተታኒ? 31ጾሳ ማጻፋን፥ ‘ኡንቱንቱ ማና#6:31 ማና፦ እስራኤልያ አሳይ ግብጼ ጋድያፐ ከስ ካናነ ቢደ መላ ቢታን ሀመቲደ ብያ ዎደ፥ ኡንቱንቱ ማናዳን ጾሳይ እሜዳ ማልእያ ቁማ። ማና ጉሳይ እብራይስጽያ ቃላን “ሀዌ አዬ?” ግያዋ። ማላ ሳሉዋፐ ኡክ እሜዳ’ ያገት ጻፈቶዋዳን፥ ኑ አዎቱ መላ ቢታን ማና ሜድኖ” ያጌድኖ።#ከሳ 16:4፣ 15፤ ማዝ. 78:24
32የሱስ፥ “ታን ህንተንቶ ቱሙዋ ኦዳይ፤ ህንተንቶ ሳሉዋፐ ቱሙ ኡክ እምያዌ ታ አባፐ አትን፥ ህንተንቶ ሳሉዋፐ ኡክ እሜዳዌ ሙሳ ግደና። 33አያዉ ጎፐ፥ ቱማ ግዴዳ ጾሳ ኡክይ፥ ሳሉዋፐ ዎያዌ ሀ አላምያ አሳዉ ደኡዋ እሜ” ያጌዳ።
34ኡንቱንቱ ዛሪደ፥ “ጎዳዉ፥ ኑካ ሄ ኡክ ኡባ ዎደ እማ” ያጌድኖ።
35የሱስ፥ “ታን ደኡዋ ኡክ፤ ታኮ ይያ ኡራይ ኡባካ ኮሻተና። ቃይ ታና አማንያ ኡራይ አይነ ሳመተና። 36ሽን ታን ህንተንቶ ኦዴዳዋዳን፥ ህንተንቱ ታና በኤድታ፤ ሽን አማንክታ። 37ታ አቡ ታዉ እምያ ኡባይ ታኮ ያናዋ፤ ቃይ ታኮ ይያ ኦናነ ኡባካ ታን ካረ የድከ። 38አያዉ ጎፐ፥ ታን ታና ኪቴዳዋ ሸንያ ፖላናዉ ሳሉዋፐ ያድፐ አትን፥ ታ ሸንያ ፖላናዉ ያበይከ። 39ታና ኪቴዳዌ ኮይያዌ ሀዋ፤ ታን እ ታዉ እሜዳ ኡባቱዋካ ዉርሰ ጋላስ ደንናፐ አትን፥ እቱዋካ ባይዛና ማላ ኮየና። 40አያዉ ጎፐ፥ ታ አቡ ኮይያዌ ሀዋ፤ ታና ናኣ በኢደ፥ አማንያ ኡባቱ መና ደኡዋ አካናዋንታ፤ ታንካ ሄ ኡባቱዋ ዉርሰ ጋላስ ደንና” ያጌዳ።
41የሱስ፥ “ታን ሳሉዋፐ ዎዳ ኡክ” ጌዳ ድራዉ፥ አይሁዳቱ አ ቦላ ዙዙሜድኖ። 42ኡንቱንቱ፥ “ሀዌ ኑን አ አዉዋነ አ አቶ ኤርያ ዮሴፎ ናኣ የሱሳ ግደኔ? ያትና፥ እ ዋጊደ፥ ‘ታን ሳሉዋፐ ዎድ’ ጋናዉ ዳንዳዪ?” ያጌድኖ።
43የሱስ ዛሪደ፥ “እቱ እቱዋና ዙዙምያዋ አግተ። 44ታና ኪቴዳ ታ አቡ ታኮ አሄዳ አሳፐ አትን፥ ታኮ ያናዉ ዳንዳይያ አሳይ ባዋ፤ ታንካ ዉርሰ ጋላስ አ ደንና። 45ናባቱ ‘ጾሳይ አሳ ኡባ ታማርሳና’ ያጊደ ጻፌድኖ፤ አዉ ግያዋ ስስያዌነ አዉዋፐ ታማርያዌ ኦንነ ታኮ ዬ።#ኢሳ. 54:13 46ጾሳ ማታፐ ዬዳዋፐ አትን፥ ጾሳ በኤዳ አሳይ ባዋ፤ አ ጻላላይ ጾሳ በኤዳ።
47“ታን ህንተንቶ ቱሙዋ ኦዳይ፤ ታና አማንያ ኡራዉ መና ደኡ ደኤ። 48ታን ደኡዋ ኡክ። 49ህንተንቱ አዎቱ መላ ቢታን ማና ሜድኖ፤ ሽን ሀይቄድኖ። 50አሳይ አፐ ሚደ ሀይቀና ኡክይ ሳሉዋፐ ይያዌ ሀዋ። 51ሳሉዋፐ ዎዳ ደኡዋ ኡክይ ታና፤ ኦንነ ሀ ኡክፐ ሞፐ፥ መናዉ ደአናዋ፤ ቃይ ሀ አላምያ አሳዉ ደኦ ግዳና ማላ፥ ታን እማና ኡክይ ታ አሹዋ” ያጌዳ።
52አይሁዳቱ፥ “ሀ ብታኒ ባረ አሹዋ ኑን ማና ማላ፥ ኑዉ ዎቲደ እማናዉ ዳንዳዪ?” ያጊደ ባረንቱ ግዱዋን ፓሉመቴድኖ።
53ሄዋ ድራዉ፥ የሱስ ኡንቱንታ፥ “ታን ህንተንቶ ቱሙዋ ኦዳይ፤ ታ አሹዋ፥ አሳ ናኣ አሹዋ፥ ህንተንቱ ማና ዮፐ፥ ቃይ ታ ሱካ ኡሻና ዮፐ፥ ህንተዉ ደኡ ባዋ። 54ታ አሹዋ ምያ ኡራዉነ፥ ታ ሱ ኡሽያ ኡራዉ መና ደኡ ደኤ። ታን ዉርሰ ጋላስ ኡንቱንታ ደንና። 55አያዉ ጎፐ፥ ታ አሹ ቱሙ ቁማ፤ ታ ሱይካ ቱሙ ኡሻ። 56ታ አሹዋ ምያ ኡራይነ ታ ሱ ኡሽያ ኡራይ ታናን ደኤ፤ ታንካ አናን ደአይ። 57ደኡዋ አዉ ታና ኪትና፥ ታን አ ጋሱዋን ደእያዋዳን፥ ታና ምያ ኡራይካ ታ ጋሱዋን ደአና። 58ሳሉዋፐ ዎዳ ኡክይ ሀዋ፤ ህንተንቱ አዎቱ ሚደ ሀይቄዳ ማና ማላ ግደና፤ ሀ ኡክ ምያ ኡራይ መናዉ ደአና” ያጌዳ።
59የሱስ ቅፍርናሆማ ካታማን አይሁዳ ዎሳ ጎለን ታማርሲደ፥ ሀዋ ኦዴዳ።
መና ደኡዋ ቃላ
60የሱሳ ካልያዋንቱፐ ዳርያ ባጋይ ሄዋ ስሴዳ ዎደ፥ “ሀዌ ገለና ትምርትያ፤ ሀዋ ኦን አካናዌ?” ያጌድኖ።
61ሽን የሱስ ባረና ካልያዋንቱ ሄዎ ዙዙሜዳዋ ኤሪደ፥ “ሀዌ ህንተንታ ቢ? 62ስም ታን፥ አሳ ናአይ፥ ካሰ ደኢያሳ ፑደ ከስሽን በእንቶ አያ ጋንቴ? 63ጌሻ አያናይ ደኡዋ እሜ፤ አሳ ምኖታይ አይነ ጎኤና። ታን ህንተንቶ ኦዴዳ ቃላይ አያናነ ደኡዋ። 64ሽን ህንተንቱ ግዱዋን አማነናዋንቱ ደኢኖ” ያጌዳ፤ አያዉ ጎፐ፥ አማነናዋንቱ ሀቃዋንተንቶነ ባረና አ እማናዌ ኦነንቶ የሱስ ኮይሮፐ ዶሚደ ኤሬዳ። 65ቃይካ የሱስ፥ “ታ አቡፐ ግዳና ዮፐ ኦንነ ታኮ ያናዉ ዳንዳየና ያጋደ ታ ኦዴዳዌ ሄዋ ድራሳ” ያጌዳ።
66ሄዋ ጋሱዋን፥ የሱሳ ካልያዋንቱፐ ጮራቱ አ አጊደ፥ ጉየ ስሜድኖ፤ ላኤን አ ካልበይክኖ። 67የሱስ ቃይ ታማነ ላኡ ባረና ካልያዋንታ “ህንተካ አጊደ ባናዉ ኮዪቴ?” ያጌዳ።
68ስሞን ጰጽሮሰ ዛሪደ፥ “ጎዳዉ፥ ኑን ኦኮ ባኔ? ነዉ መና ደኡዋ ቃላይ ደኤ። 69ኔን ጾሳ ጌሻ ግድያዋ ኑን አማኔቶነ ኤሬቶ” ያጌዳ።
70የሱስ ኡንቱንታ፥ “ታን ህንተንታ ታማነ ላአቱዋ ዶራበይክታ? ቃይ ህንተፐ እቱ ጻላህያ” ያጌዳ። 71የሱስ ሄዋ ስሞና ናኣ ይሁዳ አስቆሮታ#6:71 አስቆሮታ፦ ሀ ቃላ ብለይ፥ “ዎረትያ ብታንያ” ዎይ “ሀይቆ አ እምያ ብታንያ” ግያዋ። ጌ፤ አያዉ ጎፐ፥ ይሁዳይ የሱሳ ካልያ ታማነ ላአቱዋፐ እቱዋ፤ እ የሱሳ አ እማናዋ።
Atualmente selecionado:
ዮሃንሳ ምሽራቹዋ 6: DFBE
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
The Word for the World Ethiopia