Camba 2
2
1Eel ci na kehƴi, na in ci ñimniɗ ci tumu nga, reehoh feru ɗaa.
2Ŋ mbeha yasna-kanakɗoh, Kooh iɗsiɗukka, raak ɗe mitɗiɗ pangkaŋ ɗe. 3Weɗ tah po Kooh barke'iɗta mbehi yasna-kanakɗoh, a hooliɗtaa wuu ce, laam a iɗsiɗuk nga, wi a ƴut fer in ci jen. 4Naandsukiŋ feriŋ eel ci na kehƴi weɗi weem.
Feruukiŋ ɓo'
Wa Nikiɗi Kooh feree kehƴi na eel ci, 5ali kidig raakeeɗi paaɗ ŋ bilaf fi, te ali paangi puleeɗi ndoom, laam raak Nikiɗi Kooh toɓɗi ŋ kehƴi, te ɓo' raakeeɗi ne a guur merhey mi. 6Hondohɗi masuɓ puleeɗa ŋ kehƴi te wa iiri'ɗeeɗa kehƴi jen.
7Ŋ jamanoonaam, Nikiɗi Kooh mahha ɓo' na merhey miŋ kehƴi, a fuuɗissa ngaŋ kiñin kaŋ ɗe iik kipes, jaarra a nikka pesoh. 8Raak, Nikiɗi Kooh haɓɗeen nguuk, ŋ pulohaaɗ-noh, ngaŋ Eden, a ɓekka ɓoya a mahee nga. 9A paariɗta kidig nu nik ŋ merhey ma, ca moɗta ŋ has, ca neɓpa ñamu, te ngaŋ leernaŋ nguuka, a paariɗta kidgaŋ kipes ki na kidgaŋ inhisoh baahiɗ na baahaaɗi.
10Cul puleeɗa ŋ Eden, wa iiri'ɗeeɗa nguuka, wa pulohee ndeem, wa salla sal nikiis. 11Sala ɗeɓ teeksee Pison, wa wileen ŋ kur kaŋ Hawiilaa jen, ɗiska urus raake ; 12ursaŋ kur keem, wa nikee koceet, ndeem raakee makndi eeñɗohaani na woyse badoolah na pemeeni na woyse sooham#2:12 sooham : wa atoh peme ruumind ; marka "pemeeciŋ efoodi" ŋ toksiŋ tiik ci inhassaaɗiici.. 13Sala kanakɗoha teeksee Gihon, wa wilee wil kur kaŋ Kuus jen. 14Sala kaahayɗoha teeksee Tigar, wa nupɗee ŋ pulohaaɗ-nohaŋ Assuur. Sala nikiisɗoha nikka Ewfaraat.
15Ŋ ineem, Nikiɗi Kooh ɓayya ɓoya, a tummba ɗe guuroh na niiɗohaŋ nguukaŋ Eden. 16A huflukka ɗe ne : « Fu miniɗ ñam rim ciŋ kidig ciŋ nguuki jen. 17Waaye kidgiŋ inhisoh baahiɗ na baahaaɗi, fu heyɗi ñame nga, laam mbaɗna fu ñaman nga ɗah, fu hey kaane fut ! »
18Wa weem coot, Nikiɗi Kooh woosa ne : « Ɗaay kiik ce baahɗi ngaŋ ɓo'. Ŋ hey ɗe haɓɗiɗe ɓaatɗohoh yi min kerhiɗoh na ɗe. » 19Ŋ ineem, raak Nikiɗi Kooh maheen na merhey ɗoopaat ci jen, na sel ci pundoh ci jen, a kommba ɓoya ca, ne a kerah findi yeem teekan ca ; yaa nu nik hey ɓeeɗkasse findi ƴaara na hee ɗe teeke. 20Wa a kom ɓoya ca, ɓoya feriɗta ca tiik jen, ɗoopaat ciŋ kahan ci, sel ci pundoh ci, na ɗoopaat ciŋ nduufi. Waaye a yi, a hotiɗɗi haf ce ɓaatɗohoh yi min kerhiɗoh na ɗe.
21Ŋ ineem, Nikiɗi Kooh pani'iɗta ɓoya, a neehha neeh nooɗiɗ. A nihissa ƴoh yino ngaŋ lah-fisaaraŋ ɗe, a rannga ɗiska na neh. 22Nikiɗi Kooh ɓayya ƴoha a nihsoh ŋ ɓoya weem, a mahha ɓitiɓ naa, a kommba ɓoya ɗe.
23Wa ɓoya hot ɗe, a ƴeella, a woosa ne :
« Waasii,
yii a ƴohiŋ ƴoh ciŋ ngo
na nehiŋ nehiŋ ngo !
Ɓoyii teeksan ɓo' ɓitiɓ,
laam a kooɗohu ŋ ɓo' ƴaar. »
24Wa taamboh ɗaa po, ƴaar hey saɓsukohe na yaay na baab, a ŋoɗ ŋ ɓitiice, ɓa nik faan yino. 25Te wa nikka ne ɓeɗ ɓi kanak ceem, ƴaara na ɓitiice, ɓa nikee faan ɓarang te ɓa supkeeɗi nga.
Atualmente selecionado:
Camba 2: YM
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© Wycliffe Bible Translators, Inc