मर्कुस 9
9
1येसुइ उनहान्के कहिक्, “साच्चि, मइ ताहान्के कतिन, इथि ठेडाइलारमध्ये कुन्हुँ कुन्हुँ बाटाइ, जुनइ परमेस्वरको राज्ये सक्तिमा आइधार्लो नादेखुनज्यालसम्म नामर्तात्।”
येसुको रुप फेरेलो
(मति १७:१-१३; लुका ९:२८-३६)
2छ दिन पाछु येसु आफिसिन पतरुस, याकुब र युहन्नाके लिहिकनि एउटा अल्गो पाहाडमा जाइक्। उथि उनहान मात्रे रहाइ। अनि उनहान्के आघु येसुको रुप फेर्हिक्।#मति १७:१-२; लुका ९:२८-२९ 3ओख्रो भोटो जारे चम्किलो र उज्रो होखिक्, एस्नो कि धर्तिमा कुन्हुँइ पनि धोइकनि ओस्नो उज्रो बनाए नासक्ताइ। 4अनि उथि एलिया र मोसा देखा पर्वाइ। उनहान येसुसिन बोलि धार्लो रहाइ। 5पतरुसइ येसुके कहिक्, “गुरु, हामि इथि होख्लो नाम्रे होखिक! हामि इथि तिनटा छाप्रा बनाहुँ, एउटा तोरो लागि, एउटा मोसाको लागि र एउटा एलियाको लागि।” 6यस्के कहिक्, क्यारेकनि उ र ओख्रो साखाहान जारे ज डराइलो रहाइ, उसिगर्ते अरु क्या कुरा बोले पर्लार हो कहिकनि थाहा नाहोखिक।
7तब एउटा बद्रि आइकनि उनहान्के ढाकिक, र बद्रिभि एउटा आवाज आइक, “इ मोरो प्यारो छउना हो, ताहान्इ एख्रो बचन सुन्हेउ।”#मति ३:१७; मर्कुस १:११; लुका ३:२२ 8अनि उनहान्इ सुन्लारबितिके चारेउपट्टि चाहावाइ तर येसु बाहेक अरु कुन्हुँके नादेख्वाइ।
9उनहान पाहाडभि ओघ्रतिहि गर्ते येसुइ उनहान्के आग्या गरिक्, “मइ मानिसको छउना मर्लोभि जिउते नाहोखुनज्यालसम्म आज ताहान्इ ज्या देखो इ कुरा कुनुहुँके पनि झिन कहेउ।”
10उनहान्इ इ कुरा बाइर कुन्हुँके पनि नाकहाइ, तर मर्लोभि जिउते होखि उठ्लोको अर्थ क्या हो कहि एक आर्कोसिन छलफल गरे लाग्वाइ। 11अनि उनहान्इ येसुके सुध्यावाइ, “धर्म गुरुहान्इ क्यारे पहिलि एलिया आए पर्ताइ कहि कतात्?”#मलाकि ४:५; मति ११:१४
12येसुइ कहिक्, “साच्चि, पहिला एलिया आउताइ, र सभइ कुरा फेरि बनाताइ। तर मइ मानिसको छउनाइ धेरे दुख भोग्तिन र मर्हाइ अरुहान्इ नारुचातात् कहि क्यारे धर्मसास्त्रमा लेखेलाटि त? 13तर मइ ताहान्के कतिन, एलिया आइसक्लाटि, र ओख्रो बारेमा धर्मसास्त्रमा लेखेलो अनुसार मानिसहान्इ ओख्रोसिन ज्या मन परिक् ओस्ने गर्वाइ।”
भुत लाग्लो छउडा सन्चो होख्लो
(मति १७:१४-२१; लुका ९:३७-४३)
14जब येसु अरु चेलाहान्ठुँ फर्कि आउते उनहान्के एउटा बड्को भिडइ सभइभि घेरिधार्लो र उनहान्सिन धर्म गुरुहान भनाभन गरिधार्लो देख्वाइ। 15भिडइ येसुके देख्ले बितिके छक्क पर्वाइ, र दुगर्ले जाइकनि ओख्राइ ढोग गर्वाइ। 16ओइ उनहान्के सुध्याइक्, “ताहान क्याको बारेमा इनहान्सिन भनाभन गरिधार्लाटो?”
17भिडभि एक जनाइ ओख्राइ कहिक्, “गुरु, मोरो छउनाके लटाहा बनालार भुत लाग्लाटि, र मइ ओख्राइ तोरोठुँ आन्लाटिन। 18जब मोरो छउनाके भुत लाग्ताइ तब भुइमा पछारताइ, मुखभि गाज निस्काताइ र दाँत किट्ताइ अनि मुर्छा पर्ताइ। मइ तोरो चेलाहान्के भुत निस्काइ दे कहिकनि बिन्ति गरिन् तर उनहान्इ नासक्वाइ।”
19तब येसुइ उनहान्के कहिक्, “ए बिस्वास नाहोख्लो पुस्ताको मानिसहान हो, मइ ताहान्सिन कन्हासम्म रहुँ? ताहान्के कत्का सहे? उ छउडाके मोरोठुँ आनो।” 20अनि उनहान्इ छउडाके ओख्रोठुँ आन्वाइ। येसुके देख्लार बितिके भुतइ छउडाके लछारपछार पारिक् र भुइमा उन्डिकनि गाज निस्काले ढनमने लागिक।
21येसुइ छउडाको बुबाके सुध्याइक्, “कन्हाभि एख्राइ एस्नो होख्लो हो?” ओइ कहिक्, “बच्चाभि ज।
22“भुतइ ओख्राइ मारेके लागि धेरे पल्ट आगिमा र पानिमा हुर्याइ देतरहिक्। यदि तइ केइ गरे सक्तेर कनि दया गरिकनि हाम्राइ साहेता गर्हइ।”
23येसुइ ओख्राइ कहिक्, “तइ सक्तेर, कहि क्या कलो? परमेस्वरके बिस्वास गर्लारको लागि त सभइ कुरा सम्भब बाटि।”
24अनि तुरुन्ते छउडाको बुबाइ चिच्याइले कहिक्, “मइ बिस्वास गर्तिन। मोरो कमजोर बिस्वासके बलियो बनाइ दे!”
25येसुइ भिडके दुगर्ले आइधार्लो देखिकनि उ भुतके एस्के कहिकनि हप्काइक, “ए लटहा र बहिरा बनालार भुत, मइ तोर्हाइ आग्या गर्तिन, ओख्रोभि निस्कि र ओख्रोमा फेरि कन्हुँ झिन पिस्।”
26अनि भुत चिच्याइले छउडाके लछारपछार पारिकनि निस्किक्, र उ छउडा मर्लो जस्ने होखिक, र धेरे मानिसहान्इ उ त मरिक कि क्या हो कहि ठान्वाइ। 27तर येसुइ ओख्रो हात छोपिकनि उठाइक अनि उ जुरुक्क उठिक।
28जब येसु घरभित्र जाइक् तब ओख्रो चेलाहान्इ खुसुक्क ओख्राइ सुध्यावाइ, “हामि भुतके क्यारे निस्काए नासक्हुँ?”
29येसुइ उनहान्के कहिक्, “इ किसिमको भुतके पर्थनाइ मात्रे निस्काए सक्ताइ।”
येसुइ फेरि आफि मर्लारको बारेमा कताइ
(मति १७:२२-२३; लुका ९:४३-४५)
30अनि येसु र ओख्रो चेलाहान उथिभि निस्किकनि गालिल इलाकाको बाट होख्ले जावाइ। इ कुरा कुन्हुँके थाहा झिन होखुस् कलार ओख्रो इच्छा रहिक्, 31क्यारेकनिसिन येसु आफ्नो चेलाहान्के सिखातिहि कहिक्, “मइ मानिसको छउना मानिसहान्को हातमा छोपेतिन, उनहान्इ मर्हाइ मार्तात्, र मइ मर्लो तिन दिन पाछु फेरि जिउते होख्तिन।”
32तर चेलाहान्इ इ कुराको अर्थ बुझे नासक्वाइ र ओख्रोसिन सुध्याए पनि डरावाइ।
सभइ कते बड्को कुन्को हो?
(मति १८:१-५; लुका ९:४६-४८)
33जब येसु र उनहान कफर्नहुम सहरमा आवाइ तब घरभित्र जाइकनि। उथि येसुइ उनहान्के सुध्याइक्, “बाटमा ताहान क्या बोलिधार्लो रहो?”
34तर उनहान लाभि बिस्वाइ, क्यारेकनि उनहान “हामिमध्य सभइ कते बड्को कुन्को हो?” कहि एक आर्कोसिन छलफल गर्लो रहाइ।#लुका २२:२४ 35अनि येसु बिसिक, र बारे जना चेलाहान्के बोलाइकनि कहिक्, “जुन्को सभइकते बड्को होखे इच्छा गर्ताइ, उ सभइकते बिर्झिन होखेपर्ताइ र सभइको सेबक होखेपर्ताइ।”#मति २०:२६-२७; २३:११; मर्कुस १०:४३-४४; लुका २२:२६ 36अनि ओइ एउटा बच्चाके लिहिकनि उनहान्को माझोमा धारिक, र कोरामा लिहिकनि उनहान्के कहिक्, 37“मोरो नाउँमा बिर्झिन बच्चाहानमध्यको एक जनाके स्वागत गर्लारइ मर्हाइ स्वागत गर्ताइ, अनि मर्हाइ स्वागत गर्लारइ मर्हाइ पठालारके स्वागत गर्ताइ।”#मति १०:४०; लुका १०:१६; युहन्ना १३:२०
जुन्को हाम्रो बिरुधमा नाटि उ हाम्रो पछमा होख्ताइ
(लुका ९:४९-५०)
38तब युहन्नाइ ओख्राइ कहिक्, “गुरु, एउटा मानिसके तोरो नाउँ लिहिकनि भुत निस्काइधार्लो हामिइ देख्हुँ। उ हाम्रो समुहको नारहिक् उसिगर्ते हामिइ ओख्राइ रोक्हुँ।”
39तर येसुइ कहिक्, “ओख्राइ झिन रोक्हेउ, क्यारेकनिसिन जुनइ मोरो नाउँ लिहिकनि अचम्मको धन्दा गर्ताइ ओइ मोरो बिरुधमा तुरुन्ते ननाम्रो नाबोल्ताइ। 40क्यारेकनिसिन जुन्को हाम्रो बिरुधमा नाटि उ हाम्रो पछमा होख्ताइ।#मति १२:३०; लुका ११:२३ 41साच्चि मइ ताहान्के कतिन, मोरो नाउँ लिहिकनि#९:४१ मोरो नाउँ लिहिकनि मोरो नाउँ लिहिकनि कलार सब्द भर्पर्लार मुल भासामा नाटि। ताहान्के जुनइ खिरिस्टको हो कहिकनि एक बोट्को पानि खाए देताइ कनि ओइ साच्चि इनाम पाउताइ।”#मति १०:४२
पापको बारेमा येसुइ सिखाइक्
(मति १८:६-९; लुका १७:१-२)
42जुनइ मइउप्रो बिस्वास गर्लार इ बिर्झिनहानमध्य एउटाके पाप गरे लगाताइ, ओख्राइ त बरु घेच्रोमा एउटा बड्को झातोको पाता झुन्डयाइकनि समुन्द्रमा हुर्याइदेनि नाम्रो होख्ताइ। 43यदि तोरो हातइ पाप गरे लगाताइ कनि ओख्राइ काटिकनि हुर्याइदिहि। दुइटा हात होखिकनि नरकको कन्हुँ नाबुताइलार आगिमा जाएकते बरु डुडो होखिकनि कन्हुँ नासकेलार जिबनमा जाए नाम्रो होख्ताइ।#मति ५:३० 44[नरकमा न त किराहान मर्ताइ, न त आगि बुताइताइ।] 45तोरो गोडइ पाप गरे लगाताइ कनि ओख्राइ काटिकनि हुर्याइदिहि। दुइटा गोड लिहिकनि नरकमा परेकते बरु लङ्डा होखिकनि कन्हुँ नासकेलार जिबनमा घुस्टे पाउलो नाम्रो हो। 46[नरकमा न त किराहान मर्ताइ, न त आगि बुताइताइ।] 47तोरो आँखिइ पाप गरे लगाताइ कनि ओख्राइ निस्काइकनि हुर्याइदिहि। दुइटा आँखि लिहिकनि नरकमा पिसेकते बरु अन्ध्रा होखिकनि परमेस्वरको राज्येमा घुस्टे नाम्रो हो।#मति ५:२९ 48नरकमा न त किराहान मर्ताइ, न त आगि बुताइताइ।#यसइया ६६:२४
49क्यारेकनि नुनइ भोग देलो थोकके सुद्द बनालो जस्ने मानिसहान्के दुखकस्टको आगिइ ज सुद्द बनाताइ।
50नुन नाम्रो चिज हो, तर नुनको स्वाद अलिन होख्नि फेरि क्याइ नुनिलो बनाए?
“ताहान आफिमा नुनको स्वाद जस्ने होख्हेउ र एक आर्कोसिन मिलिकनि बिस्हेउ।”#मति ५:१३; लुका १४:३४-३५
Atualmente selecionado:
मर्कुस 9: BOTE
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2024 (Active), Mother Tongue Translators Society and Wycliffe Bible Translators, Inc. All rights reserved.