Popodalaina 1
1
Na Popodalaina
1Pa popodalaina na Tamasa sa vapodakia sa na oka beto na abana. 2Ego na abana sa na nyararana beto na ivuluna, beto na rodomo sa sa sado vailivutainia sa na arena kolo lilisina beto ko na Gagalana na Tamasa sa alea na arena na kolo.
3Beto sa paranga sa na Tamasa, <<Mi kabere tu>>, Sau poni sa sa kabereona tu. 4Ego ko na Tamasa sa sa dogoria sa na kabere sa sa vavagua, poni sa vaipikatainiria na Tamasa sa na kabere beto na rodomo. 5Beto na Tamasa sa vaisongonia na Rane sa na kabere goto na rodomo sa vaisongonia na Bongi. Ego sa gore sa na vevelu beto sa sae sa na vuvugei- isa sa na rane momoe.
6Beto sa paranga sa na Tamasa, <<Mi votu kai voloso vavagalo eqa pa vaikorapaina na kolo ko mi pikataruai na kolo pa narena beto pa kauruna>>, sau. 7Ko sa roitinia na Tamasa sa kai voloso vavagalo eqa ko sa vaipikatainiria sa na kolo pa kauruna na voloso vavagalo eqa beto na kolo pa narena na voloso vavagalo eqa. Ko sa gore votu sisa. 8Beto na Tamasa sa vaisongonia na <<Oka>> sa na voloso vavagalo eqa. Ego sa gore sa na vevelu beto sa sae sa na vuvugei- isa sa na rane vinarua.
9Beto sa paranga sa na Tamasa, <<Mai boko vaikamu pa kai ia sa na kolo pa kauruna na oka ko mi podaka votu na peso pidilina>>, sau. Poni sa gore votu sisa. 10Beto na Tamasa sa vaisongonia na <<Abana>> sa na peso pidilina beto na kolo vaikamuna sa vaisongonia na <<Kolo>>. Ego sa dogoria na Tamasa sa vavagua sisa.
11Beto sa paranga sa na Tamasa, <<Mi toaia na umuma sa na abana: ira na okokoto umuma qai vua kiko beto ira na gogou vuvua qai vuaniria na vua sa pore kikodi sa mai toa pa abana>>, sau. Poni sa gore votu sisa. 12Ko sa vapidokoria na abana sa na umuma: ira na okokoto umuma qai vua kiko beto ira na okokoto gogou qai vuaniria na vua sa pore kikodi. Ego sa dogoria na Tamasa sa vavagua sisa. 13Ego sa gore sa na vevelu beto sa sae sa na vuvugei- isa sa na rane vinaue.
14Beto sa paranga sa na Tamasa, <<Mai kole tu na kabere pa voloso vavagalo eqa pa oka ko mi vaipikatainiria na rane beto na bongi. Ko ira sa mai uleniria sira na vinagigila, ira na okokoto totoso, ira na rane beto ira na aoro, 15beto ira sa mai kabere pa voloso vavagalo eqa pa oka ko mi vania na kabere na abana>>, sau. Poni sa gore votu sisa. 16Ko na Tamasa sa roitiniria karu kabere lavata- na kabere lavatana ko mina kuta uanania na rane beto na kabere iketena ko mina kuta uanania na bongi, beto na Tamasa sa roitiniria tugu vei sira na seru. 17Ko na Tamasa sa vakoleria pa voloso vavagalo eqa pa oka sa aipira ko mai vania na kabere na abana, 18beto ko mai lalaeniria na rane beto na bongi, beto ko mai vaipikatainiria na kabere beto na rodomo sau. Ego sa dogoria na Tamasa sa vavagua sisa. 19Ego sa gore sa na vevelu beto sa sae sa na vuvugei- isa sa na rane vinamade.
20Beto sa paranga na Tamasa, <<Na kolo sa mai miminete vapodakaria na minete manugu toadi, beto na mamanugu mai tatava podaka votu pa narena na abana beto pa vavagalo eqa kauruna na voloso vavagalo eqa na oka>>, sau. 21Ko sa vapodakaria na Tamasa sira na mamanugu lalavata pa ivere, doru okokoto sakasa toadi qai rijo kanoko ira qai miminete vapodakaria na kolo, beto doru okokoto mamanugu tatava. Ego sa dogoria na Tamasa sa vavagua sisa. 22Na Tamasa sa mananiria sira, pira sau, <<Mu vua, mu soku, beto mu pugelia na kolo pa ivere, beto na mamanugu tatava mai soku pa abana>>, sau 23Ego sa gore sa na vevelu beto sa sae sa na vuvugei- isa sa na rane vinalima.
24Beto sa paranga sa na Tamasa, <<Na abana mi vapidoko voturia na okokoto mamanugu toadi: na okokoto mamanugu papausu, na mamanugu qai gavere pa peso, beto na mamanugu pirudi pa abana>>, sau. Poni sa gore votu sisa. 25Ko sa roitiniria na Tamasa sira na okokoto mamanugu pirudi pa abana, na okokoto mamanugu papausu beto doru okokoto mamanugu qai gavere pa peso. Ego sa dogoria na Tamasa sa vavagua sisa.
26Beto sa paranga sa na Tamasa, <<Aria ko ta roitinia na tinoni tutia na kireda, mai vevei puputa gita, beto mai kopuniria na igigana pa ivere, na mamanugu tatava pa vavagalo eqa, ira na mamanugu papausu, na abana doruna, beto doru mamanugu qai gavere pa peso>>, sau.
27Ko na Tamasa sa vapodaka tutinia na kirena mekana sa na tinoni,
Pa kirena na Tamasa sa vapodakania sisa;
Sa vapodakaniria na marene beto na rereko.
28Na Tamasa sa mananiria beto pira sauniria na Tamasa, <<Mu vua, mu soku, beto mu pugelia na abana, beto mu vakaurairia beto mu kuta uananiria sira na igana pa ivere, na mamanugu tatava pa vavagalo eqa beto doru mamanugu qai gavere pa peso>>, sau.
29Beto sa paranga na Tamasa, <<Inana, qa vanigou sira doru umuma qai vua kiko pa doru ia pa abana beto ira doru gogou qai vua pore kikodi, ko ira sa mai tetekudi tamugou sira. 30Goto ira doru mamanugu pirudi pa abana beto ira doru mamanugu tatava pa vavagalo eqa beto doru mamanugu qai rijo kanoko pa peso, ira doru sakasa qai singonia na toa, ira sa qa vaniria na umuma eqequru ko mina dia tetekuna>>, sau. Poni sa gore votu sisa.
31Ego na Tamasa sa doria doru sakasava sa roitiniria sa sa vavagua jola sisa. Ego sa gore sa na vevelu beto sa sae sa na vuvugei- isa sa na rane vinavonomo.
Atualmente selecionado:
Popodalaina 1: LGA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2024, Islands Bible Ministries. All rights reserved.