Nau Ntơm 4
4
Y-Kain jêh ri Y-Abel
1Y-Ađam gŭ đah H'Êva, ur păng. H'Êva ntreo jêh ri deh Y-Kain. Păng lah: “Yor Brah Yêhôva kơl, gâp hŏ deh jêh#4:1 Nrn: njêng mro, dơi jêng, rhăk njêng; bâr ngơi tâm ban “Kain”. du huê bunuyh.” 2Păng deh tay Y-Abel, oh Y-Kain. Y-Abel rmăk biăp, bi Y-Kain ƀư mir.
3Jŏ djê̆ ma nây, Y-Kain sŏk play bơh neh ƀư ndơ nhhơr ma Brah Yêhôva. 4Bi Y-Abel nhhơr biăp deh dak bôk tâm mpôl păng jêng ndơ dŭt kah. Brah Yêhôva dơn Y-Abel jêh ri ndơ păng nhhơr,#Hêb 11:4. 5ƀiălah Brah Ndu mâu dơn Y-Kain jêh ri ndơ păng nhhơr. Yor ri, Y-Kain nuih ngăn jêh ri muh măt păng jâk. 6Brah Yêhôva ôp Y-Kain: “Mâm ƀư may nuih? Mâm ƀư muh măt may jâk? 7Tơlah may ƀư nau ueh mâu hĕ Gâp dơn ndơ may?#4:7 Mlr: ngă lah may mâu n'gơr măt klơ. Tơlah may mâu ƀư ôh nau ueh nau tih gŭ kâp may tanăp bôk mpông, păng ŭch may ngăn; ƀiălah ăn may mât uănh păng.”
8Y-Kain tâm ngơi đah Y-Abel, oh păng.#4:8 Geh đŏng nau rblang ơm geh ntop trong: Ăn he hăn luh ta mir. Nôk bar hê dôl gŭ tâm mir pôri Y-Kain rduh lơh Y-Abel jêh ri nkhĭt lơi păng.#Mat 23:35; Luk 11:51; I Yôh 3:12. 9Brah Yêhôva ôp Y-Kain: “Ntŭk gŭ oh may, Y-Abel?” Y-Kain ơh: “Gâp mâu gĭt ôh. Gâp hĕ jêng bunuyh mât oh gâp?” 10Brah Yêhôva ôp: “Moh nau may ƀư pônây? Nteh mham oh may tă bơh neh hŏ nter tât ma Gâp.#Hêb 12:24. 11Aƀaơ aơ, may geh nau rtăp rak luh bơh neh aơ, jêng neh hŏ hă mbung rhôp mham oh may hŭk bơh ti may. 12Tơlah may pah kan mir, neh mâu mra geh play âk ma may. May mra du krap jêh ri nsong mblêng ta klơ neh ntu.” 13Y-Kain ơh ma Brah Yêhôva: “Nau rmal aơ lĕ rlau ir ma gâp. 14Aƀaơ, nar aơ May mprơh gâp du luh bơh neh aơ, gâp mra pôn ndâp măt bơh May jêh ri du krap; nsong mblêng ta klơ neh; jêh nây, mbu moh mâp gâp, khân păng mra nkhĭt gâp.” 15Brah Yêhôva lah: “Mâu ôh! Ƀiălah tơlah mbu nkhĭt Y-Kain, nơm nây bu mra plơng bôk bar tơ̆ pơh.” Brah Yêhôva nchih ăn nau mbên ta săk Y-Kain gay ma mbu mâp Y-Kain mâu dơi nkhĭt păng ôh. 16Y-Kain du luh bơh nau mpơl muh măt Brah Yêhôva jêh ri gŭ tâm n'gor Nôt,#4:16 Nôt: nâm ntĭt jêng “nsong mblêng”. mpeh ma luh nar Êđen.
Noi deh Y-Kain
17Y-Kain gŭ đah ur păng, ur păng ntreo jêh ri deh Y-Ênŏk. Y-Kain mon du rplay ƀon toyh jêh ri amoh ƀon nây jêng Ênŏk, tĭng amoh kon bu klâu păng. 18Y-Ênŏk jêng mbơ̆ Y-Irat; Y-Irat jêng mbơ̆ Y-Mêhujaêl; Y-Mêhujaêl jêng mbơ̆ Y-Mêtusaêl; Y-Mêtusaêl jêng mbơ̆ Y-Lamek. 19Y-Lamek nđăp ur bar; du huê amoh H'Ada, du huê đŏng amoh H'Sila. 20H'Ada deh Y-Jabal; Y-Jabal jêng chô yau ma phung gŭ rêh tâm ngih bok jêh ri mât rong mpô mpa. 21Oh Y-Jubal jêng Y-Jubal, chô yau ma lĕ phung pâl kreh gong rêng jêh ri uh n'hôm. 22Bi H'Sila deh Y-Tubal-Kain, jêng bunuyh blau chiăr ăp ntil ma lĕ ndơ hơr#4:22 Du nau rblang ơm: chô yau lĕ phung gru loih. ma kông jêh ri loih. Oh bu ur Y-Tubal-Kain jêng H'Naama.
23Y-Lamek lah ma bar hê ur păng:
“Hơi H'Ada jêh ri H'Sila! Iăt hom bâr gâp;
Aơ, lĕ bar hê ur Y-Lamek, rkêng hom tôr iăt nau gâp lah:
Gâp hŏ nkhĭt du huê bunuyh yor păng ƀư ma gâp tât sôt,
Jêh ri du huê nơm mom yor păng dong gâp môr bŭr.
24Tơlah Y-Kain dơi plơng har pơh tơ̆,#Mat 18:22.
Ri mơ Y-Lamek mra dơi plơng pơh jât mpơh tơ̆.”
Deh Y-Set
25Y-Ađam gŭ tay đah ur păng, ur păng deh du huê kon bu klâu, kuăl amoh jêng Y-Set,#4:25 Set: Tâm nau ngơi Hêbrơ, rplay ngơi aơ geh bâr nau ngơi tâm ban rplay ngơi nâm ntĭt jêng “hŏ ăn jêh”. yor păng lah: “Brah Ndu hŏ ăn đŏng ma gâp du huê kon bu klâu êng ntrok Y-Abel nơm Y-Kain hŏ nkhĭt lơi jêh.” 26Y-Set bă tay du huê kon bu klâu, amoh Y-Ênôs. Bơh nây, bu ntơm kuăl mbơh sơm amoh Brah Yêhôva.
Atualmente selecionado:
Nau Ntơm 4: CMO2023
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 United Bible Societies. All rights reserved.