Mateghusi 11
11
1Apa gha manine Jesusi kuragha yiragha yendi kwawakathishongero wendi dikumi nohawadi, ko kutunda po gha yende kumaghumbo ghawanu gha ka wa honge no kuwayawera.
Jesusi nomepwero ghaJohannesi ghoMukadiyoghero
(Luk 7:18–35)
2Johannesi gha yuvire mutorongo yoyiheya yi gha tendire Jesusi. Ko kutuma kwendi mushongwe nawakathishongero wendi ha ka mwipure eshi: 3“Yowe yu wa yuka eshi wa kwiye ndi, endi tu taterere ghumweya?”
4Jesusi ha wa hutha eshi: “Mu yende mu ka mu tongwere Johannesi eyi muna kuyuva no kumona. 5Hakunga kumona hana kumona karo, hakakukakatera maghuru kuyenda hana kuyenda, hakayin̂ondwe yi na wa kushuka, hayipurupuru kuyuva hana kuyuva, hafu kutumuka hana kutumuka, hahepwe kuna kuyuva mbudhi dhodhitowi. 6Ene mukafiyaghudhi mukakudhira kutamangera mumwange.”
7Apa ha tundire po hayitumi waJohannesi, ho gha tangire Jesusi kughamba nawanu yokwa Johannesi ghuninga eshi: “Nye yi mwa yenderire mu ka mone mumamboreya? Ku kambu kokupunga‐punga kumupepo ndi? 8Kadi kemo, ene nye yi mwa yenderire, mu ka mone? Murume ghokuvata yitere yodifuno ndi? Kadi kemo, murume ghokuvata yitere yoyirereya, mu mone, kumuwana mumarombe ghoghufumu. 9Ene nye ne keho yi mu nemanena kukumona? Muporofeta? Ghuhunga, shemwa na kumutongwera mwe, kupiterera muporofeta. 10Oyu yoyu ha tjangerire eshi:
‘Mone, na kukutumena mukamushongwe wange,
yo mbo gha kuroghithera ndhira kumwiyero ghoye.’
11“Shemwa na kumutongwera, mwawakapamuve, mbadiko yu ha shamuruka kupiterera Johannesi ghoMukadiyoghero. Ene yu gha mbirupa mughufumu ghodiwiru, yo mukakupiterera ye. 12Ene kutunda kumayuwa ghaJohannesi ghoMukadiyoghero kate pashadyarero, ghufumu ghodiwiru ghuna kuyandhwerera ndhira ghothinda, nawanu wa hana kughutumbura nongcamu, hana kughuwana mungcamu. 13Haporofeta waheya nomuragho ha yi pumberire paJohannesi. 14Ene nge shi ha mu yi tawa, Johannesi ne yoEliya yu mbo gheya. 15Mukamatwi gha tegherere.
16“Ene no nye sho wa ghanekerithe wa hanahoka? Awo ha pitura yira hanuke hokuhungumana pambandha ghukwithaghera eshi:
17‘Tuna mu shikera pakashiya,
ene mbadi muna kini.
Tu nembi dimbo dyokutokota,
ene mbadi muna diri.’
18“Yoyishi Johannesi gheyire, yipu gha dire no yipu gha nwine, awo ne ha ningire eshi: ‘Gha munyika shatani.’
19“Mwanamunu gheyire no ghana kudya no kunwa, awo ne pakuninga eshi: ‘Mu mone, mukadikarapashi, thinwi thovinyu, mushere wawaketethi nawayiharuri.’ Ene mayerekero ghoghuhunga gha kara moyu ghana kughatenda.”
Maghumbo ghokupira mapikero
(Luk 10:13–15)
20Ko kutanga Jesusi kukoghaghura maghumbo ghamweya omu gha tendangire rwingi yitetukitha, yoyishi ha shwenine kupiruka:
21“Yinyanda yina kutaterera we Gorasini! Yinyanda yina kutaterera we Betsayida! Ngo muTirusi no muSidoni ya hokokerire yitetukitho yi, ngo kare ha tawa no kupiruka. 22Ene na kumutongwera: KuTirusi no kuSidoni mbo yina redhupa kadi yira kukwenu. 23Nowe Kafarnaghumu, ghuna kughayara eshi,
‘mbana kununeka kate kudiwiru ndi?
Kadi kemo, mbo ghuna wera muditunga dyawafu.’ Yoyishi ngo muSodoma ya karerire yitetukitho yi ya hokokerire mumoye, ngo shime gha karera nodyarero dino. 24Ene na kumutongwera eshi: Kuditunga dyaSodoma, mbo yina kara ghuredhu mudiyuwa dyondhango, kadi yira kukoye.”
Maraghero ghaJesusi
(Luk 10:21–22)
25Munako dhi gha ningire Jesusi eshi: “Na kukukugha we Tate, Fumu ghodiwiru noghomuve, yoyishi wa horekire yinu yi kwawanyanyami no kwawakakukuhonga, no wa yi hokorire kwawanu vene. 26Kemo Tate, yoyishi ghomahimeno ghoye ghomawa muthin̂eke.
27“Tate gha ni pa yoyiheya yi, ene noyofotji temba gha dimuka Mwana, shimengwa Wihe, no karo eshi mbadiko yu gha dimuka Wihe, shimengwa Mwana, noyomuhe mbo ghana yi mu hokwera Mwana.
28“Mwiye kukwange mwahe mwakakutwama namwe ha dimbeka, ame ne mbo na mu pa maturumuthero. 29Mu kukambeke djoko dhange no mu kuhongere kukwange. Yoyishi ame ne nomukamutjima ghoghuporothi no ghokukufupipitha no mbo muna wana maturumuthero muyitenda yenu. 30Yoyishi djoko dhange ne dhotu, nomupango wange ne ghuredhu.”
Atualmente selecionado:
Mateghusi 11: MHW1986
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Mbunga dhoBayibili dhaNamibia (Bible Society of Namibia) 1986