Chan 18
18
Chisʋs ʋt osapushi yo̱ ont chukowa, 1; 6 Chutas ʋt Chisʋs a̱ isha chi̱ hosh ai ʋla na, Chisʋs ʋt anumpuli ma, falamʋt obʋlhpelʋt aka ont fohopa; 10 Pita yʋt Malkʋs haksobish a̱ chanlit hokofi. 12 Chisʋs a̱ okla takchi cha isht ia mʋt, Annas ak o̱ isht im ona tuk osh achakalinchi mʋt, Kaiafas ak o̱ okla isht im ona; 15 mihma Pita yʋt Chisʋs a̱ ik ithano miha. 29 Chisʋs a̱ Pailat ak o̱ okla isht im ona ma, Pailat ash osh achukmalit nan im a ponaklo̱.
1Chisʋs ʋt ilʋppa puta ka ahanchit in taiyaha mʋt, nan im ai ithʋna ʋhleha pehlinchit Kitlon bokushi a̱ pit tanʋblit osapushi ʋt yʋmma talaia tuk o̱, nan im ai ithʋna ʋhleha hash ai it api̱hʋt ont chukowa tok.
2Yohmi ka Chisʋs ʋt nan im ai ithʋna ʋhleha ha̱ pehlichit yʋmma ai ona fehna chatuk a̱ ishit inla im issa tok Chutas ak kia yʋmma pit ai ithana tok.
3Yohmi hatuk osh Chutas ash ot hatak ai‐itapeha achʋfa, i̱ kʋpitʋni ʋhleha aiena ka na‐holitompa isht a̱sha pehlichi ʋhleha, mikmʋt Falisi ʋhleha aiena ka ai im ai ishi mʋt, pʋla afohka, mikmʋt na shimahli pʋla, micha na halupa aiena ka sholi hosh yʋmmak ash ai ʋla tok.
4Yohmi ma Chisʋs ʋt nana hosh ilapa̱ ai onʋtuyula chi̱ puta moma ka ithana hatuk okʋt, iʋt ont afamʋt, Kʋta ho̱ hʋsh hoyo cho? im achi tok.
5Mihma, Chisʋs Nasalet minti ak oke, okla im achi ma, Chisʋs ash osh, ʋno ak osh mih sia mak oke, im achi tok. Mihma ishit inla im issa tok Chutas ash kia yʋmma ta̱kla hiki̱a tok.
6Atuk o̱, Ʋno ak osh mih sia mak oke, im achi makinli ho̱, okla obʋlhpelʋt iʋt aka ont kaha tok.
7Mihma atuklanchit i̱ ponaklot, Kʋta hak o̱ hʋsh hoyo cho? achi tok. Mihma, Chisʋs Nasalet minti ak oke, okla achi tok.
8Chisʋs ʋt afalaminchi mʋt, Ʋno ak osh mih sia hatuk ʋt hʋchim anoli li kʋno; yohmi hoka ʋno ak o̱ hʋs sa hoyo hatuk okmʋt, ilʋppak okʋno a̱sht ik itʋnowá, hʋsh im ahnashke.
9Yohmi na yʋmmak o̱ isht anumpuli hosh, Is sʋma tok ʋhleha hokʋt achʋfa kia ik sa̱ kʋnioshke, ahanchi tok a̱ ont ai a̱hlashke, achi tok.
10Yohmi ma Saimon Pita yʋt bʋshpo falaia shanli tuk osh halʋllit shu̱fi mʋt, na holitompa isht a̱sha pehlichi i̱ shahli in tishu ho̱ isht fahamʋt, haksobish isht impak imma ya̱ chanlit hokofi tok. Tishu hohchifo hʋt Malkʋs a tok.
11Mihma Chisʋs ʋt Pita yash o̱, Chi̱ bʋshpo falaia ya̱ i̱ shukcha pit fohkí; isht ishko A̱ki ʋt auet ʋma tok a̱ ak ai ishko ka hinla cho? im achi tok.
12Yohmi ma hatak a̱ya achʋfa, micha kʋpitʋni, mikmʋt Chu okla nan ʋlhtoka ʋhleha aiena kash ot Chisʋs ash ishi cha, takchi tok.
13Mihmʋt yʋmmak osh Kaiafas ʋt afʋmmi yʋmma fehna ka na holitompa isht a̱sha pehlichi i̱ shahli yatuk o̱, yʋmma ipochi yatuk oka Annas ak o̱ ti̱kba okla isht im ona tok.
14Kaiafas ilʋppak osh hatak achʋfa hosh okla hoka ʋlhlobʋt illa he ak o̱ ai ʋlhpiesa ka, Chu okla ha̱ it im apesa tuk a tok.
15Mihma Saimon Pita yʋt Chisʋs a̱ pit iakaiyʋt a̱ya ma, anonti nan im ai ithʋna achʋfa yʋmmak oka na‐holitompa isht a̱sha pehlichi i̱ shahli hʋt ithana hatuk o̱, Chisʋs a̱ awant na‐holitompa isht a̱sha pehlichi i̱ shahli i̱ nan‐ai‐apesa ya̱ ont chukowa tok.
16Amba Pita ʋto okhissa kocha yak o̱ hikia tok. Yohmi ma nan im ai ithʋna achʋfa na‐holitompa isht a̱sha pehlichi i̱ shahli hʋt ithana hatuk, yʋmmak ash ot kohchʋt iʋt, ohoyo okhissa apesʋchi yash ont im anoli cha, Pita ya̱ ilauelit chukowa tok.
17Mihma ohoyo himita okhissa apesʋchi yash ot Pita ya̱, Chishno ak kia hatak ilʋppa nan im ai ithʋna chia keyu̱? im achi ma, Mih sia keyushke, im achi tok.
18Mihma kapʋssʋchi hatuk o̱, ilhtohno ʋhleha, micha nan ʋlhtoka ʋhleha aiena kash ot tobaksi yo̱ oti cha, libisha hosh hiohma̱ya tok; mihma Pita yʋt takla hiki̱ʋt libisha tok.
19Na‐holitompa isht a̱sha pehlichi i̱ shahli ash ot Chisʋs a̱ nan im ai ithʋna ʋhleha, mikmʋt nan isht im abʋchi aiena ka ai im asilhhʋchi tok.
20Chisʋs ʋt afalaminchi mʋt, okla puta ka ai im otʋni achukma hosh anumpohonli li hatuk; Chu okla hʋt ai itʋnaha bilia sinakak, micha tempel aiena yʋmmak o̱ nana ai ithʋnanchi li chatuk; yohmi kʋt luma chohmi hokʋto nana ak achoshke.
21Na katihmi ho̱ ʋno ak o̱ is sʋma ponaklo cho? nana im achi li ka ha̱klo chatuk ʋhleha hak o̱ ish i̱ ponaklashke: yakeh! yʋmmak osh nana achi li chatuk a̱ okla ithana hoke, achi tok.
22Ilʋppa yakohmichit anumpuli ma, nan‐ʋlhtoka ʋhleha hʋt achʋfʋt bili̱kasi hikia tuk osh, Chisʋs ash ibbak isht pasalichi mʋt, Na holitompa isht a̱sha pehlichi i̱ shahli ya̱ yakohmichi hosh ish im anumpuli cho? achi tok.
23Chisʋs ʋt afalaminchi mʋt, Ik ʋlhpeso ho̱ anumpuli li hokma, nan ik ʋlhpeso mak o̱ isht ish atokolashke: amba ʋlhpesa tuk mʋno, katiohmi ho̱ is sʋsso cho? achi tok.
24Yʋmmak ash ot tala̱kchi na Annas ʋt na holitompa isht a̱sha pehlichi i̱ shahli Kaiafas a̱ pit pila tuk a tok.
25Mihma Saimon Pita yʋt libisha hosh hiki̱a tok: yoh mi ma, Chishno ʋt yʋmma nan im ai ithʋna ʋhleha ha̱ ish ibai achʋfa tuk keyu̱? okla im achi ma, ik a̱hlo mihʋt, Ʋno yokʋt mih sia keyushke, achi tok.
26Na holitompa isht a̱sha pehlichi i̱ shahli im ilhtohno ʋhleha achʋfʋt Pita yʋt haksobish tʋbli tuk ash i̱ kanomi hosh, Chishno ak osh yʋmma awant osapushi a̱ ish anta ho̱, chi pisa li tuk keyu̱? achi tok.
27Mihma Pita yʋt ik a̱hlo kash inli ho̱ miha tok: mihma chekosi fehna aka̱ka yʋt ola tok.
28Yohmi ma Chisʋs ash Kaiafas a̱ im ai ishit iʋt, nan ai apesa yo̱ okla isht ona tok: yʋmmʋt onnahinli ha tok; yohmi kʋt nan‐ʋbanʋblit ont ia ya̱ ai impa he tuk ʋt, im ai okpuloka hinla hatuk osh ilapo ak okʋto nan ai‐apesa ya̱ okla pit ik chukowo ki tok.
29Mihma Pailat ʋt kohchʋt ona mʋt, Hatak ilʋppa anumpa nanta mak o̱ hʋsh ai ikbichi cho? achi tok.
30Mihma okla afalaminchi mʋt, Ilʋppʋt nanokpʋni keyu hatuk okma, chibbak oka ant e chi̱ fohka he tuk keyu hoke, okla im achi tok.
31Mihma Pailat ʋt, Isht oh ia cha, hʋchi̱ nan‐ʋlhpisa mak o̱ isht oh ai im apesá, im achi tok. Yohmi hatuk o̱ Chu okla hash osh, Hatak nana kia illa he il im apesa he ʋt a pim ʋlhpesa keyu hoke, okla im achi tok.
32Yohmi ka Chisʋs ʋt kaniohmit ai‐illi yo̱ ai illa hi ʋt anumpohonli tok a̱, ont ai a̱hla he mak a tok.
33Mihma Pailat ʋt atuklanchit nan‐ai‐apesa yash ont chukowa cha, Chisʋs a̱ i̱ howa mʋt, Chishno ak osh Chu okla i̱ mi̱ko chia mak oh cho? im achi tok.
34Mihma Chisʋs ʋt afalaminchi mʋt, Chishno akinli hosh, keyukmʋt, inla yak osh ʋno a̱ isht a chim anolikmá, nanta tuk o̱ ilʋppa ish achi cho? im achi tok.
35Pailat ʋt afalaminchit, Ʋno ʋt Chu sia ho̱? chishno chim okla ash inli, mikmʋt na holitompa isht a̱sha pehlichi ʋhleha aiena kak osh chishit sʋbbak a̱ fohki tuk oke. Nanta mak o̱ ish katiohmi tuk oh cho? achi tok.
36Chisʋs ʋt afalaminchi mʋt, Apehlichi li ka yʋt yakni ilʋppak inli keyushke. Apehlichi li ka yʋt yakni ilʋppak inli hatuk okma, Chu okla ibbak ak a fohko ka chi̱ ka, an tishu ʋhleha hʋt itihimba he tuk: amba himak okʋno apehlichi li ka yʋt ilʋppak inli ho̱ keyushke, achi tok.
37Yohmi hatuk o̱ Pailat ash osh, Mih kʋto mi̱ko chia akinli hotuma? im achi ma, Chisʋs ʋt afalaminchit, Mi̱ko sia mak atuk o̱ ish mihʋshke. Nan ai a̱hlika atokolit anoli la he ilʋppak osh sa toba cha, anonti ilʋppa pulla hatuk mak o̱ a̱yʋt yakni a̱ ʋla li tuk oke. Nan ai a̱hlika yo̱ anukfoyuka aiyukali hokʋto, ʋm anumpa ha̱ haponaklo bano hoke, achi tok.
38Pailat ash osh, Nan‐ai a̱hlika yak osh nanta ho? im achi tok. Mihmʋt ilʋppa achi mʋt, falamʋt kohchʋt Chu okla hash im ona mʋt, Nan ik ai‐ʋlhpeso nana kia a takali ka ak im akostinincho kʋmohmishke.
39Yohmi kia nan‐ʋbanʋbli ont ia isht a̱sha hokʋno, achʋfalichit a hʋchim i̱ hotofi la he ai ʋlhpesa chatuk ʋt a̱shʋshke: yohmi hoka Chu okla i̱ mi̱ko ak o̱ a hʋchim i̱ hotofi la hi a̱ hʋsh ahni cho? im achi tok.
40Mihma anonti momʋt chitoli hosh, Hatak ilʋppʋno keyu ho̱, amba Balabbas ak ashke, okla achi tok. Yohmi ka Balabbas ʋt hatak hu̱kopa ya tok.
Atualmente selecionado:
Chan 18: CHH
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Published by the American Bible Society 1848-1886, reprinted 1913