लुका 24
24
येसुजिक पुनरुत्थान
(मति २८:१-१०; मरकुस १६:१-११; युहन्ना २०:१-१०)
1यतोरवाक बिहनहिँ उअ जनिनियाह यापन तयार करलि बसानि तेलवा हसे जरिबुटि लेके येसुजिक चिन्डियामा गेलइ। 2जब हुनुका वहवाँ पुगलइ, तब चिन्डियाक दुवरियासे झपलि पत्थरावा होटावल पउलइ। 3बाकि हुनुका चिन्डिया भितरा पेसइकि प्रभु येसुजिक देहिया हइने पउलइ। 4जब हुनुका कथि भेलइ कहके यल्मलेलइ, तखनहिँ यरमरका धपधपउवा-चहकार लुगा पेहरल दु जन मरदाना मन्से हुनुकर पजरावामा देखा परलइ। 5तब उअ जनिनियाह खुभे डेराके ओन्हमुड गतलइ। बाकि उअ दु जन मन्सावाह कहलइ, “तोहरा जिउते मन्सेके केहके मरलिनक बिचा खोजइ बडह? 6येसुजि यहवाँ हइने बडसि, हुने मरलिसे जियल बडसि! तोहरा सम्झह त! येसुजि गालिलमा रहइकि कथि कहले रहलसि?#मति १६:२१; १७:२२-२३; २०:१८-१९; मरकुस ८:३१; ९:३१; १०:३३-३४; लुका ९:२२; १८:३१-३३ 7‘मुइ मन्सेक पुतर पापि मन्सेक हथवामा सपेबहिँ हसे क्रुसवामा टङेबहिँ तके तिसरि दिनवामा मरलिसे फेरि जियबहिँ’।” 8तब जनिनियाह येसुजिक कहलि बतवा सम्झलइ, 9हसे चिन्डियासे फिरके एगारह जन प्रेरित हसे याको चेलवानिके जम्मे बतवाह सुनोलइ। 10इअ बतवा सुनोलहरिह मधे मग्दलिनि मरियम, योअन्ना, याकुबक दाओ मरियम हसे याको जनिनियाह फेनि रहलइ। 11बाकि प्रेरितवाह हुनुकर कहलि बतवा बेकार हखइ कहके हइने पतियलइ। 12ताफेनि पतरुस भकदेरे उठके दगुरते चिन्डियावरि गेलिय। जब उअ ओन्हगातके चिन्डिया भितरा हेरलिय, वहवाँ दगहिया मतरे देखलिय। वकरपाछा पतरुस उअ देखके दङ परके घरवरि फिरलिय।
येसुजि इम्माउसक पइडावामा दु जन चेलासभके भेटलसि
(मरकुस १६:१२-१३)
13उहे दिनवामा येसुजिक दु जन चेलवाह यरुसलेमसे एगारह किलोमिटर जतुरा तनाउ इम्माउस गउँवरि जाइ रहलइ। 14हुनुका भरखे भेलि जम्मे घटनावाक बारेमा बात करइ रहलइ। 15जब हुनुका यसने बात करइ रहलइ, तब येसुजि हुनकरेसाङे याके बुले लगलसि। 16बाकि हुनुका येसुजिके चिने हइने सकलइ। 17तब येसुजि हुनुकाके कहलसि, “तोहरा कथिक बारेमा बात करते बुलइ बडह?” हुनुका ठप्पे रोकेलइ हसे हुनुकर मोहडवा उदास देखेलइ। 18उअ दु जन चेलवामधे क्लेओपास नाउँक मन्सावा येसुजिके पुछलिय, “कथि यपनहुँ यरुसलेममा एक मतरे परदेसि हखहुँ, जकरेके इअ दिनवाहमा घटलि घटनावाक बारेमा किहो फेनि हइने थाह बडइ?” 19येसुजि हुनुकाके पुछलसि, “कथिक बारेमा?” हुनुका कहलइ, “नासरतक येसुजिक बारेमा।” हुने एक जन अगमवक्ता रहलसि। हुने यापन वचन हसे काममा परमेस्वर हसे जम्मे मन्सावानिक लजरियामा सक्तिसालि रहलसि। 20बाकि हमार मुख्य पुजेरियाह हसे यगुवाह येसुजिके मृत्यु दन्ड देके क्रुसवामा टङलइ। 21हमरा त येसुजि मतरे इस्राएलियानिके छुटकारा देबसि कहके यसरा करले रहलहुँ, बाकि उअ घटनावा घटलिक याजु तिसरि दिन हखइ, 22हसे हमार मधेसे कतेक जन जनियानिसभ फेनि हमराके छक पारलइ। हुनुका बिहनहिँ चिन्डियामा गेल रहलइ, 23बाकि वहवाँ येसुजिक देहिया हइने पउलइ। तब हुनुका हमार लघिना याके यसके कहलइ, वहवाँ दु जन स्वरगदुत हमार लघिना परकट हखके हमराके कहलइ “येसुजि त जिउते भेल बडसि।” 24तब इअ सुनके हमार याको जन फेनि दगुरते चिन्डियावरि गेलइ हसे हुनुका फेनि उअ जनियानिसभक कहलि नहिँया पउलइ, बाकि हुनुका येसुजिके हइने देखलइ।
25तब येसुजि हुनुकाके कहलसि, “तोहरा कस्नुक यबुझ मन्से हखह जे, अगमवक्तावानिक कहलि बतवामा फेनि विस्वास करेके यसनुक गारह भेलइ। 26कथि यादर हसे महिमा पावेकेसे यागा ख्रिस्टके इअ दुःखसभ नाहिँ भोगे परतइ त?” 27तब येसुजि मोसासे सुरु करके जम्मे अगमवक्तावानिक धरमसास्तरवामा यापन बारेमा लिखइलि बतवानिक यरथ हुनुकाके खोल देलसि।
28जब हुनुका इम्माउस गउँवाक लजिके पुगे लगलइ, तब येसुजि वहवाँसे यगाहे जाइकि नहिँया करलसि। 29बाकि हुनुका दु जन येसुजिके गहनि बिन्ति करके कहलइ, “याजु यपनहुँ हमरेसाङे रहहुँ, केहकेकि यन्हार हखहि लगलइ।” उहेसे येसुजि हुनुकरसाङे रहे गेलसि। 30जब येसुजि हुनुकरसाङे जेउना करे बइठलसि, हुने रोटिया लेके धन्यवाद देलसि हसे वकरपाछा खाडा बनाके हुनुकाके देलसि। 31तखनहिँ हुनुकर यखिया खुललइ हसे तहिँयहिँ येसुजिके चिने सकलइ। बाकि येसुजि हुनुकर यागासे बिलेलसि। 32तब हुनुका एक-दोसरि जनसाङे यसके बात करे लगलइ, “कथि येसुजि हमारसाङे पइडावामा धरमसास्तरवाक यरथ बुझोइकि हमार हृदय गहनि खुसि हइने भेल रहलइ त!”
33वकरपाछा उअ दु जन चेलवाह वइघरहिँ उठके यरुसलेम सहरवावरि गेलइ। हुनुका वहवाँ एगारह जन चेलवाह हसे बटियइलि याको मन्सावानिके भेटलइ। 34हुनुका यसके बात करइ रहलइ, “सदियो प्रभु जिउते भेल बडसि हसे सिमोन लघिना परकट भेल बडसि!” 35तब उअ दु जन चेलवाह हुनुकाके इम्माउसक पइडावामा घटलि घटनावा हसे येसुजि रोटिया खडाके देइखुनि येसुजिके कस्के चिनलइ, कहके उअ जम्मे बतवा कहलइ।
येसुजि चेलवानिक लघिना परकट भेलसि
(मति २८:१६-२०; मरकुस १६:१४-१८; युहन्ना २०:१९-२३; प्रेरित १:४-८)
36जब हुनुका इअ बतवा कहइ रहलइ, तखनहिँ येसुजि हुनुकर बिचा परकट भेलसि हसे हुनुकाके कहलसि, “तोहारसाङे परमेस्वरक सान्ति हखइ।” 37बाकि हुनुका भुत देखलहुँ कहके यतियाके गहनि डेरेलइ। 38उहेसे येसुजि हुनुकाके कहलसि, “तोहरा केहके डेराइ हसे मनवामा संका करइबडह? 39तोहरा मोर हथवा हसे गोडवा डउलसे हेरह। मोहिँ हखहि! मोरके टो-छुके हेरह, इअ मोर हाड हसे मासुक देहि हखइ। केहकेकि भुतवाक त हाड हसे मासुक देहि हइने रहसइ!” 40येसुजि इअ कहलि पाछा हुनुकाके यापन हथवा हसे गोडवा देखोलसि। 41हुनुका खुभे खुसिसे पत्याए हइने सकलइ, तखनहिँ येसुजि हुनुकाके कहलसि, “कथि तोहारसाङे यहवाँ किहो खइना चिजु बडइ?” 42हुनुका येसुजिके एक गेडरि पकावल माछरि देलइ। 43येसुजि उअ मछरिया लेलसि हसे हुनुकरे यागा खेलसि। 44तब येसुजि हुनुकाके कहलसि, “मरलिसे यागा मुइ तोहारसाङे रहइकि तोहराके कहले रहलहि कि, मोसाक व्यवस्था, अगमवक्तावानिक हसे भजनक कितबवामा मोर बारेमा लिखलि जम्मे बतवाह पुरा हखहि परतइ।”
45तब येसुजि हुनुकाके धरमसास्तरवामा लिखइलि बतवा बुझेके सक्ति देके, 46हुनुकाके कहलसि, “धरमसास्तरवामा मोर बारेमा यसके लिखाइल बडइ कि, मुक्ति देलाहर ख्रिस्ट दुःख भोगके तिसरि दिनवामा मरके फेरि जिउते हखे परतइ,#होसे ६:२ 47हसे ‘पाप मानके छडलाहरानिके परमेस्वर छमा देबसि’ कहके यरुसलेमक सहरवासे सुरु करके संसारक जम्मे जतियाक मन्सावानिके ख्रिस्टक नाउँमा सुसमाचार सुनोहि परतइ। 48तोहराहिँ इअ जम्मे घटनावाक साछि हखह। 49बाकि सुनह, मोर पिता जाकर बारेमा प्रतिग्या करले बडसि, वकरेके मुइ तोहार लघिना पठोबहि। उहेसे जखनिलइ तोहरा वपरासे परमेस्वरक सक्ति नाहिँ पउबह, तखनिलइ इहे सहरवामा इसियाइ रहिह।”#प्रेरित १:४
येसुजि स्वरग गेलसि
(मरकुस १६:१९-२०; प्रेरित १:९-११)
50तब येसुजि यापन चेलवानिके यरुसलेमसे बेथानिया गाउँवरि लिगलसि। वहवाँ पुगके येसुजि यापन हथवा उठाके हुनुकाके यासिरवाद देलसि। 51येसुजि हुनुकाके यासिरवाद देइखुनि हुनुकरसे बेगरेलसि हसे स्वरगमा लिगेलसि। 52उहेसे चेलवाह येसुजिके उपासना करते यगरे खुसि भके यरुसलेमवरि फिरलइ। 53तखनहिँसे हुनुका सबदिन मन्दिरवामा जामा भके परमेस्वरक स्तुति-गान करे लगलइ।
Atualmente selecionado:
लुका 24: CTHR
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023, Wycliffe Bible Translators, Inc. and Nepal Bible Society