Lukas 9
9
Sinuu' ni Yisus ongo mompomaid Niyo ri
(Mat 10:5-15; Mrk 6:7-13)
1Paawo yo ni Yisus opulu om duo mompomaid Niyo ri, om taaki yo Niyo nu kopogboya'an monusub nu komoinatan, om momali' nu lobuw. 2Suuo yo Niyo nosiro mian momali' nu lobuw sumakit om potuturan nu gama' nu Kinoringan mogkuasa nu lobuw songapan Niyo. 3Kodawi yo Niyo nosiro nu, “Ikod kou yo pongowit nu onu-onu ya. Adang-o mongowit nu pomoromponan, baata', siin, susukud, intawa imoraan.
4Lobuw moingin polakan muyu, nai kou yo molak musingkologa' nu ungkoyasan muyu. 5Bang kosambat kou nu dai moingin loga'an, laiwi muyu ya nosiro om puyaso muyu koris so rompam muyu no pongilaan nu insaadan nosiro nu Kinoringan,” koo.#P'rapan 13:51 #Luk 10:4-11
6Monido yo sono mompomaid ni Yisus so kampung so wonuo nu Galilia, paabar nu Abar Owarong om momali' nu lobuw.
Nokotongong si Irudis
(Mat 14:1-12; Mrk 6:14-29)
7Norongou-o po ni Irudis, iri momogkuasa so Galilia ri, abar suat so si Yisus om mompomaid Niyo ri, nokotongong iyo, so' minutangar lobuw nu, “Noluli'an si Yuanis Moongodiu'!” koo. 8Nga wokon minutangar nu, “Minululi' si Ilia so wonuo tu,” koo. Om kuwai ya minutangar nu, “Ono yo po nga iri poo'abar nu Kinoringan gulu ri, noluli'an,” koo.#Mat 16:14; Mrk 8:28; Luk 9:19 9Mutongaro yo si Irudis nu, “Nipopunggol ku yo boto iri ulu ni Yuanis. Adi isai po ka ono? Osuang-o tuturan norongou ku suat nu lobuw oono,” koo. Mokisosambat sono iyo so si Yisus.
Nopookan si Yisus nu limo noribu lobuw
(Mat 14:13-21; Mrk 6:30-44; Yns 6:1-14)
10Nokouli' yo sono pinongoorapan ni Yisus om tuturani yo nosiro so Iyo kiawi' winaal nosiro ri. Owito yo sono Niyo nosiro tumondiang so lobuw suang-i, mian so kampung ingoranan nu Baitsaida. 11Norongou-o po nu lobuw suang-i nu dii si Yisus, minian sono nosiro dii so Iyo. Si Yisus nga nopologa' ya so nosiro. Monuturano yo sono Iyo so nosiro nu gama' nu Kinoringan mogkuasa soko raja, om polii yo Niyo nosiro.
12Pagka maawi yo, lumogaa yo opulu om duo mompomaid Niyo ri om mutongaro yo nu, “Poulio yo kolobuwan oono su' kopodium nosiro nu okanon om polakan, so' tontong iitu nga d'ado lobuw minolak,” koo.
13Sumombuto yo si Yisus so nosiro nu, “Kou yo su pookan so nosiro,” koo.
Mutongaro yo nosiro nu, “Ono yo su kuwai so kai limo nowatu baang-baang om duo nokayu pait. Suu'on Mu kai gaam momoli nu ingkookan muuma' nu sinampuw nu lobuw oono?” koo. 14Koosampuw nu lobuw oono kiro-kiro limo noribu sondiang po kowoinoyan om kololaingan.
Mutongaro yo si Yisus so mompomaid Niyo ri nu, “Suuo muyu nosiro popututumpuk-tumpuk mogom, kiro-kiro limo nopulu sampuw sotumpuk,” koo.
15Waido yo nosiro suu' ni Yisus, om suuo yo nosiro kolobuwan-i poogom. 16Olapo yo ni Yisus nowatu limo baang-baang-i om duo nokayu pait-i om tumingaa'o yo so langit mongunsopot so Kinoringan. Noopod iri, kobi-kobio yo Niyo baang-baang om pait-i, om taaki yo so mompomaid Niyo ri, nu ipotayad-tayad so lobuw suang-i. 17Mongokano yo sono lobuw-i sampai nowosugan. Noopod nosiro mongokan, impugo yo nu mompomaid ni Yisus olu'-olu' ri, opulu po om duo podaka noponu'.
Pongokunan ni Pitrus ong isai si Yisus
(Mat 16:13-19; Mrk 8:27-29)
18Ido runat minogdu'a si Yisus ido-ido. Lumogaa yo sono mompomaid Niyo ri dii so Iyo om duato yo Niyo nosiro nu, “Mongowaid nu tangar nu lobuw suang, isai Aku ka?” koo.
19Sumombuto yo nosiro nu, “Osuang lobuw mutangar nu, Ikau-o po si Yuanis Moongodiu' noluli'an. Kuwai ya mutangar nu, Ikau-o po si Ilia. Nga wokon mutangar nu, Ikau-o po ido poo'abar nu Kinoringan nu gulu ri, noluli'an,” koo.#Mat 14:1-2; Mrk 6:14-15; Luk 9:7-8
20“Nga bang kou, isai Aku ka?” koo si Yisus.#Yns 6:68-69
Sumombuto yo si Pitrus nu, “Ikau-o su Raja Nijanji nu Kinoringan, sinuu' Niyo mogkuasa,” koo. 21Oogot sono baanda ni Yisus so mompomaid Niyo ri nu dai nipaabar-abar iri.
Kosonsora'an om kopotoyan ni Yisus
(Mat 16:20-28; Mrk 8:30—9:1)
22Mutongaro po si Yisus nu, “Aku, Anak nu Riniba, subai osuang kosonsora'an. Tulakon Aku nu kotutuaan, wowaidon nu imam, om moomontuduk nu Ukum. Potoyon Aku, nga oluli'an Aku so kotolu no,” koo.
23Minutangar po Iyo so lobuw suang-i nu, “Bang moingin lobuw maid so Aku, subai poogol nu koinginan kondiri, om runat-runat soko monimban nu salib, orati maid so Aku sumonsara' musingkopatoi.#Mat 10:38; Luk 14:27 24So' isai yo po toroidoon-a momikir kowiawan so wonuo tu, d'ado kowiawan musingkolaid. Nga, isai poogol nu kowiawan so wonuo tu om sumonsara' musingkopatoi suat so Aku, kikowiawan musingkolaid.#Mat 10:39; Luk 17:33; Yns 12:25 25D'ado kosudaan nu lobuw kosongapan nu kiawi' so wonuo tu ong oraag-a kowiawan niyo no om ado kowiawan musingkolaid. 26Om isai oiyu'an nu mongowaid so Aku om pontudukan Ku no, Aku, Anak nu Riniba nga moiyu'an-a mongakun nu lobuw oono ong lumoga' Aku yo mogkuasa soko raja. Iya oono kibinaang kiat so Kinoringan om susuu'on Niyo maid so Aku kiat so surga ri. 27Ondomo muyu, kuwai lobuw nu ono sono tu dai po matoi ong dai po kosiou nu Kinoringan mogkuasa soko raja,” koo si Yisus.
Mininda buatan ni Yisus
(Mat 17:1-8; Mrk 9:2-8)
28Kiro-kiro koturuan kiat nu pinontudukan ni Yisus iiri, ingoli yo Niyo si Pitrus, si Yuanis om si Yakubus tumidong so ido bulud mogdu'a. 29Laid ni Yisus mogdu'a ri, mininda sono buatan Niyo ri om pokakas Niyo ri nga milap-kilap nu kooputi'. 30Milok po om lumoga' si Musa om si Ilia maid nu binaang kiat so surga. 31Minutangar-tangar nosiro so si Yisus suat nu kopotoyan Niyo nu dai yo olaid so Yirusalim. 32Iya iiri, nokoturuw si Pitrus om kouna'an niyo ri. Norios nosiro, nosiou sono nosiro si Yisus kibinaang om duo koyuwan mundii-dii so obi' Niyo ri. 33Uyud mulaiw nu duo koyuwan iiri, mutongaro yo si Pitrus so si Yisus nu, “Oo Tuan, bana ko osanang toko tuui. Owarong momaal kai tuui tolu bosalag, ido Dikau, ido ni Musa om ido ni Ilia,” koo. (Nga tinangar ni Pitrus iiri dai oorotian niyo kondiri).
34Dai po nopupus si Pitrus mutangar, kuwai yo sono kawut tinumangkub dii so nosiro, om linumaa' nosiro. 35Soko iri po nokorongou-o nosiro nu bongut kiat so kawut iiri nu, “Itu yo su Anak Ku nu pinili' Ku. Rongowo muyu yo tangar Niyo no!” koo.#Yis 42:1; Mat 3:17; 12:18; Mrk 1:11; Luk 3:22 #2 Ptr 1:17-18
36Nopupus-o po bongut iiri, siowi nosiro su si Yisus po sono dii. Minukokop-a mompomaid Niyo ri nu nosiou nosiro iiri, om dai ya niabar so isai-isai ya.
Minomali' si Yisus nu lolaing sinorungan nu moinat
(Mat 17:14-18; Mrk 9:14-27)
37Susuab-i, tumaado yo si Yisus om tolu mompomaid Niyo ri so bulud-i, om osuang lobuw linumoga' dii so Iyo. 38Momaawo yo sono ido kusoi so isop nu kolobuwan-i nu, “Oo Tuhan, kokapo po anak ku ri, sinorungan nu moinat. Ido yo iyo anak ku. 39Koduung sumarung-o moinat so koyuwan niyo no, mongolungkasai-o om gumiak mikip-kikip, om muputa-puta su kobang. Moinat oono sobana ko mononsara' so iyo om dai mulaiw-laiw so koyuwan niyo no. 40Niposusub ku yo nu mompomaid Mu no, nga dai ya osusub,” koo.
41Sumombuto yo si Yisus nu, “Kou su lobuw kisala' dai poimaid. Komuro po kolaid Ku tumaan mido-ido so kou? Owito yo lolaing mu no tuui!” koo.
42Nokorani po lolaing iiri dii si Yisus, pogupolo yo sono iyo nu moinat-i so tana' ri, om mongolungkasai sono. Susubo yo ni Yisus moinat iiri, om nopoli'an-o sono lolaing-i, om tongguo yo poian so amo niyo ri. 43Kiawi' lobuw-i noiranan nu kuasa nu Kinoringan.
Minonuturan si Yisus koinduo
nu kopotoyan Niyo
(Mat 17:22-23; Mrk 9:30-32)
Laid nu lobuw-i oiranan nu pinuwaal ni Yisus iiri, mutongaro yo Iyo so mompomaid Niyo ri nu, 44“Orotion-o sobana om ondomo muyu yo totongaron Ku so kou iitu nu, Aku, Anak nu Riniba, ikomouli' so kopogboya'an nu lobuw,” koo. 45Dai noorotian nu mompomaid Niyo tinangar Niyo iiri, so' orogon so nosiro om dai po niintolang orati ri. Pokiduduatan Iyo nosiro, nga lumaa'.
Isai su oogot so tiningkuangon
nu Kinoringan?
(Mat 18:1-5; Mrk 9:33-37)
46Nopupus iri, musosagka' sono mompomaid ni Yisus ong isai su oogot so nosiro.#Luk 22:24 47Pagka noilaan-a ni Yisus pikiran nosiro ri, monoginaa yo Iyo nu ido lolaing iundii so obi' Niyo ri, 48om mutongaro yo nu, “Isai monorima' nu lolaing iitu so' poimaid so Aku, monorima' ya so Aku. Om isai monorima' so Aku, monorima' ya so Iyo, ono minonuu' so Aku no. Isai so kou obaba' inawo, iyo yo su oogot,” koo si Yisus.#Mat 10:40; Luk 10:16; Yns 13:20
Isai dai lumawan so kou, nosiro yo su kouna'an muyu
(Mrk 9:38-40)
49Mutongaro yo si Yuanis so si Yisus nu, “Oo Tuan, nokosiou kai nu ido koyuwan minonusub nu moinat mongorait nu ngaran Mu. Pinogos mai iyo, so' okon-a ko moongowaid so toko,” koo.
50Sumombuto yo si Yisus so si Yuanis om mompomaid Niyo wokon-i nu, “Kodi muyu ya pogoso iyo, so' isai dai lumawan so kou, nosiro yo su kouna'an muyu,” koo.
Lobuw Samaria monulak so si Yisus
51Mani-rani koindokodan ni Yisus so surga, topuso yo sono Niyo nu mian so Yirusalim. 52Suuo yo Niyo tinu-tinu koyuwan mogulu so ido kampung so Samaria. Nokologa' yo po sinuu' Niyo iiri, monodiaa yo sono nosiro nu loga'an ni Yisus. 53Nga ongo lobuw so kampung iiri dai monorima' so Iyo, so' sundur-a Niyo so Yirusalim. 54Noilaan-o po iri ni Yakubus om ni Yuanis, mutongaro yo nosiro nu, “Oo Tuhan, moingin Ko ka ong mindamo kai so Kinoringan nu apui muntiba kiat so langit mongoompu' nu ongo lobuw oono?”#9:54: Tinu-tinu solinan noporuang nu, soko winaal ni Ilia. koo nosiro.#2 Raj 1:9-16
55Nga kumowiio yo si Yisus om ungoti yo Niyo nosiro. 56Soko iri po, miano yo sono nosiro so kampung wokon.
Subai otoroido inawo maid so si Yisus
(Mat 8:19-22)
57Manou-panou si Yisus om mompomaid Niyo ri, lumogaa yo sono ido koyuwan om mutongaro yo so si Yisus nu, “Maid aku so Ikau, siombo-ombo ya ianan Mu!” koo.
58Sumombuto yo si Yisus nu, “Kulos-kulos om bombolog kuwai ya ogolan, nga bang Aku, Anak nu Riniba, d'ado,” koo.
59Mutongaro yo si Yisus so ido koyuwan wokon nu, “Waid-o so Aku,” koo.
Nga mutongaro yo lobuw iiri nu, “Oo, nga muli' aku po. Bang matoi-o si amo ku om kolobong ku iyo, maid aku nai' so Ikau,” koo.
60Sumombuto yo si Yisus nu, “Isai yo po dai po nokotorima' nu kowiawan musingkolaid, iyo yo su polobong nu lobuw minatoi-o. Nga, ikau-o po, panou-o so siombo-ombo ya potuturan nu gama' nu Kinoringan mogkuasa nu lobuw songapan Niyo,” koo si Yisus.
61Ido po koyuwan minutangar nu, “Maid aku so Ikau, nga muli' aku po laid mokisompiatag so suku-sakat ku,” koo.#1 Raj 19:20
62Mutongaro yo si Yisus so lobuw iiri nu, “Bang mukowii-wii po lobuw mongoradu nu suanan, d'ado ya koompusan. Soko ono ya pudi lobuw mokiwowaid so Kinoringan, ong dai otoroido inawo, dai ya kowaid so Pogkuosaan nu Kinoringan,” koo si Yisus.
Atualmente selecionado:
Lukas 9: TomPWPgLgPn
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 (Active), Wycliffe Bible Translators, Inc. All rights reserved.