Lukas 18
18
Salig-salig suat nu balu om
moongobisara' oraai
1Nopupus iri, musolig-soligo yo si Yisus montuduk nu mompomaid Niyo ri su' dadan mogdu'a om dai otopodan nu, 2“Kuwai moongobisara' so ido bandar. Moongobisara' oono dai lumaa' nu Kinoringan, om dai mongorumat nu sondad una'. 3Om kuwai ya ido balu, dadan lumoga' so moongobisara' ri mokitabang nu mokiimbonaan. 4Olaid-o moongobisara' oono dai moingin monabang nu balu oono, nga pagka muuli'-uli' ya mokitabang, koo sono so inawo nu moongobisara' oono, ‘Dai pona su lumaa' nu Kinoringan intawa mongorumat nu sondad una', 5nga owarong tobangon ku yo balu iitu nu kosimpitan niyo no, su' dai obulit iyo muloga'-loga' mongaagut so aku,’ koo,” koo si Yisus.
6Mutongaro po si Yisus so nosiro nu, “Orotio muyu ya sono tinangar nu moongobisara' oraai akal iiri! 7Bang lobuw oraai-o nga tumolunda' ya so koworongan, makin po Kinoringan nga monabang-a nu lobuw songapan Niyo, ono mindamo so Iyo awi runat-o, om dai ya Iyo monuput po nu iya monabang so nosiro. 8Mongaabar Aku so kou nu, tobangon-a osikap nu Kinoringan lobuw pinili' yo Niyo no. Nga bang lumoga' Aku koimbagu, Anak nu Riniba so wonuo tu mongobisara' nu lobuw, owako ya sono lobuw so wonuo tu poimaid so Aku,” koo si Yisus.
Salig-salig suat nu lobuw Parisi om moomumpung nu sukai
9Musolig-soligo yo si Yisus montuduk nu lobuw, iri monokod nu nosiro yo su obana om mongobisig nu lobuw wokon-i nu, 10“Duo koyuwan minian so natad nu Waloi Maayo nu Kinoringan mogdu'a. Ido ri lobuw Parisi, om koduo ri moomumpung nu sukai. 11Lobuw Parisi ri tinumondiang nu inundiian om minogdu'a nu, ‘Oo su Kinoringan, munsopot aku so Ikau, so' dai ya su monginroradan, mongaakal, intawa monongkowoinoyan soko lobuw wokon-o. Munsopot aku so' okon-a ko soko moomumpung nu sukai oono. 12Induo aku mupuasa nu koturuan, om monaak aku ya so Ikau sombaagi' opulu nu onu-onu ya songapan ku,’ koo lobuw Parisi ri. 13Nga moomumpung nu sukai-i minundii so dirawu' ri, om dai kooku' tumingaa so langit. Musiduntungo yo iyo mususun nu koraayan niyo ri om mutongaro yo nu, ‘Oo, su Kinoringan, luluudi aku yo, so' osuang koraayan ku!’ koo. 14Mutangar Aku so kou, muli' nosiro so waloi, iri ya moomumpung nu sukai-i su owarong so ponokodan nu Kinoringan, okon-a ko lobuw Parisi ri, so' isai musingkaayo-ayo, iyo yo su poboba'on, nga isai musimbaba', iyo yo su popongkaton nu Kinoringan,” koo si Yisus.#Mat 23:12; Luk 14:11
Minongoborakat si Yisus nu kololaingan
(Mat 19:13-15; Mrk 10:13-16)
15Osuang lobuw minongowit nu inonakan dii si Yisus su' otopop Niyo ulu nosiro ri mongoborakat. Nosiou-o po nu mompomaid ni Yisus kololaingan iiri, ungoti yo nosiro lobuw-i, 16nga paawo nai' ni Yisus kololaingan iiri om mutongaro yo so mompomaid Niyo ri nu, “Posimaidi muyu ya lumoga' kololaingan iitu tuui so Aku. Kodi muyu yo pogoso, so' lobuw soko kololaingan iitu yo su songopanon nu Kinoringan. 17Ondomo muyu yo, isai dai musimbaba' monorima' nu pontudukan Ku no soko kololaingan iitu, dai osongapan nu Kinoringan,” koo.
Lobuw doyaan orogon masuw so surga
(Mat 19:16-30; Mrk 10:17-31)
18Ido wowaidon nu lobuw Yaudi minongoduat so si Yisus nu, “Oo Guru owarong, onu ka otoop waalon ku su' kikowiawan aku musingkolaid?” koo.
19Sumombuto yo si Yisus nu, “Nokuro su pokoworongon mu Aku? D'ado ido owarong sondiang ko Kinoringan. 20Tantu oilaan mu yo ongo ponuu'an nu Kinoringan nu, ‘Adang lumapa', adang momatoi, adang monakou, adang momudut, om orumaton-o ino amo,’ koo ri,” koo si Yisus.#Kin 20:12-16; Pom 5:16-20
21Sumombuto yo wowaidon-i nu, “Kiat nu oworos aku po winaid ku yo ponuu'an oono,” koo.
22Norongou-o po ni Yisus sambut nu lobuw iiri, mutongaro yo Iyo nu, “Ido po mupatut waalon mu, ono yo wolii yo kiawi' orata' mu no om toyad-toyado orogo no so lobuw omiskin. Bang waalon mu ono, kikowiawan ko musingkolaid maid so Kinoringan. Owaal mu ono om maid ko nai' so Aku,” koo si Yisus. 23Nga pogrongou nu lobuw iiri nu tinangar ni Yisus, inumogutan sono iyo so' landu osuang orata' niyo ri.
24Noilaan ni Yisus nu noogutan lobuw-i, mutongaro yo Iyo nu, “Orogon sobana lobuw doyaan masuw so Pogkuosaan nu Kinoringan. 25Oruoi po unta sumuluw so uang nu lawus ko' lobuw doyaan masuw so Pogkuosaan nu Kinoringan,” koo si Yisus.
26Mutongaro yo sono lobuw mongou-rongou nu tinangar Niyo ri nu, “Bang soko ono, d'ado ido pala kikowiawan musingkolaid maid so Kinoringan,” koo nosiro.
27Sumombuto yo si Yisus nu, “Onu yo po dai owaal nu lobuw, owaal-a nu Kinoringan,” koo.
28Mutongaro yo sono si Pitrus nu, “Na, niogol mai yo kiawi' songapan mai om waloi mai, om minaid so Ikau,” koo.
29Sumombuto yo si Yisus nu, “Obaran Ku kou nu isai yo po poogol nu waloi, anak sawo, kosusulodan intawa ino amo niyo, tayon ong kopugogoma'on nu niongosuu' nu Kinoringan, 30lobuw oono kaalap nu osuang po ko' ono nu ono sono tu, om bang ologa' Runat Pongukuman, kikowiawan iyo musingkolaid maid so Kinoringan,” koo si Yisus.
Ponuturanan kointolu ni Yisus
nu kopotoyan Niyo
(Mat 20:17-19; Mrk 10:32-34)
31Popuimpugo yo ni Yisus opulu om duo mompomaid Niyo ri om tongaro yo nu, “Rongowo muyu yo, sundur toko itu so Yirusalim, om onu yo po niongosurat nu poo'abar nu Kinoringan gulu ri suat so Aku, Anak nu Riniba, otuman kiawi' nai. 32Nikomouli' Aku so lobuw dai kotondu' nu Kinoringan, om nosiro yo su monoruru, mongusiba' om mongodura' so Aku. 33Sonsora'on Aku nosiro om potoyon, nga so kotolu no oluli'an Aku ya,” koo si Yisus.
34Kiawi' tinangar ni Yisus iiri dai noorotian nu mompomaid Niyo ri, so' osokakan orogon so nosiro. Dai po oorotian nosiro ong onu kuanon ni Yisus.
Minomali' si Yisus nu lobuw bolou
(Mat 20:29-34; Mrk 10:46-52)
35Mani-rani si Yisus so bandar Yiriku, kuwai ido bolou mogom-ogom so isan nu lalan-i mokisodaka. 36Norongou-o po niyo nu osuang lobuw tumalib, mongoduato yo iyo nu, “Onu ka ogalak oono?” koo.
37“Si Yisus bo ono tumalib, iri lobuw Najarit-i,” koo nosiro.
38Gumonsoko yo lobuw bolou iiri nu, “Oo Yisus, Mongkupu ni Raja Daud, luluudi aku yo!” koo.
39Ungoti yo iyo nu ongo lobuw nokopogulu ri om pinoukokop, nga sumangat nai' iyo gumonsok nu, “Oo Mongkupu ni Raja Daud, luluudi aku yo!” koo.
40Mintorono yo si Yisus om monuuo yo Iyo popongalap nu lobuw bolou iiri mian dii so Iyo. Nokologa' iyo oono, duato yo ni Yisus nu, 41“Onu ka pokitobangan mu so Aku?” koo.
Sumombuto yo iyo nu, “Oo Tuan, moingin aku kosiou po koimbagu,” koo.
42Mutongaro yo si Yisus nu, “Kosiou ko yo. Pagka nopoimaid ko so Aku, opoli'an ko,” koo si Yisus.
43Iya ya iiri kosiou-o sono iyo, om maido yo so si Yisus om minongorayou nu Kinoringan. Nosiou-o po iri nu lobuw suang-i, nosiro nga minongoroyou-a sono nu Kinoringan.
Atualmente selecionado:
Lukas 18: TomPWPgLgPn
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 (Active), Wycliffe Bible Translators, Inc. All rights reserved.