TĨĨGI WERE 2
2
1Diŋ doo kay no so no ga, joŋre ngel ma ciŋ wo de ma gesiŋ joŋ wo nen leʼ jag go de fẽẽre ma ɓil ɓaaran wo ɓuy. 2Wur naw ma de renamn mokay joŋre maga Baa hay joŋn leʼ jag go wur seno, á kal hayge iggi wur naw ma de renamn de joŋre ɓe maga se hay joŋn mo ɓuy. 3Baa kaŋ bosaʼ ne naw ma de renamn ti, fããn go, werga wursen, Baa hay iggi de joŋre fẽẽre ɓe maga se hay joŋ ra go mo ɓuy no.
TĨĨGI WER TAMSIR DE JAR TEBERE WORA
4Mokay diŋ tĩĩgi wer ngel ma ciŋ wo de ma gesiŋ, ti wur maga à joŋ ra mono.
Pay sug nee ma Eden no
De maga Manwuri, Baa joŋ ngel ma ciŋ wo de ma gesiŋ lam no, 5Koo po hay bay de tĩĩgi mbásga gesiŋ la jẽd wa ɗa, fíi po hay bay de tĩĩgi mbásga wa ɗa lay. Werga Manwuri, Baa hay bay de ra baa gesiŋ la wa ɗa, day je táabay hay bay gesiŋ ma jee sir wa ɗa lay. 6Ama bii po hay le go ndarge gesiŋ la, day hay rayge ne sir ti.
7Manwuri, Baa joŋ je táabay de beɗef siri, á kal fug egre tenen ne hẽn hũy, je táabay kal kolge diŋ je ma tenen caw.
8Blam ɓe Manwuri, Baa kal kaŋ pay sug nee Eden, wo nen ɓaŋ were, á kal kaŋ je táabay maga se hay joŋn ni. 9Manwuri, Baa kal tĩĩ wer koore wo le ti sir wer sar sar de ele, de woore ma rege. Koo ma tenenn ti gisiɗgi pay sug neen ni lay, de koo ma ko de el wo de ɓlagge no.
10Blam ɓe maarog hay kalge wo go Eden ma jwedge ne pay sug neen ti. Ti ngel ni, se ɓrew jag doo go naa. 11Á ɗe jag doo ɓe ma taŋgun ga Pison. Sen diŋ maga kii ti sir Hafila go ɓuy, à daʼ boo biŋni nen ɓe ni. 12Diŋ boo biŋni ma de woore, de fen fõõre bdeliyum, de húulì onikse. 13Ɗúu jag doo ɓe ma de ɓogn ga, Gihon. Sen diŋ maga kii ti sir Kus go ɓuy mo lay no. 14Ɗúu maarog ma de swaʼn ga Hiddekel. Sen diŋ maga yuu Asiri nen ɓaŋ wer ɓe no kay mono. Ma de naan diŋ Efrade.
15Manwuri, Baa kal maŋ je táabay kaŋn ɓil pay sug nee Eden, maga á mo je ne, day mo gor ne. 16Manwuri, Baa kal hã jag liŋgi ma kay ne je táabay : Ga ndo joŋ ge mbo nen re leʼge koore ma ɓil pay sug neen wo ɓuy, 17Ama, ma leʼge koo ma ko de eln wo de ɓlaggen mo kaʼ no, ndo reen ge gà. Werga wur maga ndo reen we no, ndo huu gi go.
18Manwuri, Baa day ga : Á bay de el maga je táabay mo hay boŋ wa, ndi joŋ je kayge ɓe ge yaŋ ne hẽn maga á mo hay wo jar kããra. 19Manwuri, Baa kneʼ nàyre ma mbásga wo de dweere ma ciŋ wo ɓuy de siri. Á kal age de ɓaara ne je táabay pele ma koge ga á kaŋ ge ɗúu ne hara gahãyla, nen maga maysela caw ɓuy mo hay diŋ de ɗúu maga je táabay kaŋn ge ne hẽn mono. 20Je táabay kal kaŋ ɗúu go ne nàyren wo ɓuy, ne dweere ma ciŋ wo ɓuy, ne horog ma mbásga wo ɓuy, ama ma je táabay mokay á laa daʼ je kayge ɓe maga saara nen lagge de kããra lay yoo ɓaara ni gà. 21Doo kay, Manwuri, Baa kal ɓoʼ naa ma de hãã ne je táabay ti, se raw leʼ naa. Á raw naa hm yoo ɓe boŋ, fer nàyn ti ngel ɓe ni.
22Manwuri, Baa kal kneʼ wãy de hm maga se naan le see je twar no, kal age de ɓe ne je twar no. 23Je twarn day ga :
Ma sen la diŋ hm hm ɓi lay so,
Diŋ hõõgese hõõgese ɓi lay so,
À ɗe ge ga wãy nà diŋ se lay so.
Werga à daʼn le diŋ ɓiŋ je tware.
24Diŋ wersen ga je twar men pan ɓe wo le go de man ɓe wo, ma saʼge de wãy ɓe, á kol wo go diŋ ti hõõgese po boŋ.
25Je twarn hay wo mbaara de wãy ɓen glog koɗ jag ɓaara lagge, sõõre hay bay joŋ rage wa.
Atualmente selecionado:
TĨĨGI WERE 2: TUP
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Tupuri Bible © Bible Society of Cameroon, 2016. All rights reserved.