M. Mattayo 5
5
1LOMBA yeve pechiŵaŵona maumba ekwera pa lupiri ulo: nipo akankale pansi emzila asambili ŵake: 2naye ezula pakanwa eŵasambizya echiti,
3Ŵopewa shuko okavuka mu mzimu: pakuti waŵo ni ufumu wa kumulu.
4Ŵopewa shuko olila: pakuti ŵeve apuzishiwe.
5Ŵopewa shuko osisikanya: pakuti ŵeve apyane charo cha pansi.
6Ŵopewa shuko akumvwa njala na njota yosakira vyolungama: pakuti ŵeve akute.
7Ŵopewa shuko ochita chifundo: pakuti ŵeve achitiwe chifundo.
8Ŵopewa shuko atuŵa mitima: pakuti ŵeve amuŵone Mlungu.
9Ŵopewa shuko ochitisya mtendere: pakuti ŵeve aitiwe ŵana a Mlungu.
10Ŵopewa shuko osulushiwa chikomo cha chilungamo: pakuti waŵo ni ufumu wa kumulu. 11Mwina shuko mweo akaifyomtotofyani nomsulusyani nomnenelani viipa viri vyonse koŵepezya chifukwa cha neo. 12Sangalalani nosekera kwene kantu: pakuti chilambu chanu ni chikuru kumulu: chikomo eŵasulusya tetila aŵirizi aŵo ŵoyamba ŵanu.
13Mwe nimwe munyu wa charo cha pansi: sembe ukakukuluka munyu uyo ukondeshewe nanji? lomba sungafwe na kantu konse sembe kuliko ni kutaiwa kunja nokandiwa na ŵantu. 14Mwe nimwe msaniko wa charo cha pansi. Sungafisame munzi womangiwa pamulu pa lupiri. 15Soti paliye okozya muyasyo nouvwinikilapo chitundu, sembe pa chikalo cha wine nipo, nawo uŵasanika ŵonse ali mng'anda. 16Tetyo namwe kuŵala kwanu nakusanika pa menso pa ŵantu, kuti aŵone milimo yanu iweme, amchinzike Ausu wanu ali kumulu.
17Msalinga kuti neo nichizocheneka dango kano aŵirizi: ntenichizocheneka sembe kukumanizya. 18Pakuti lezee numnenelani neo, Kuza na paviti vipitiletu charo cha kumulu na cha pansi, kalembo katonto kamo kano kansongo kamo sikangapitiletu pa dango peka patonto, kuza na paviti visilizike vyonse. 19Chikomo choteti ali wonse ati atyole limo la matetulo aŵa atontoatonto, nosambizya ŵantu tetyo, uyo akaitiwe mtontomtonto ngako mu ufumu wa kumulu: sembe ali wonse ati aŵoŵachita noŵasambizya, uyo akaitiwe mkuru mu ufumu wa kumulu. 20Pakuti numnenelani kuti chilungamo chanu chikakanopula cha alembi na Afarisayo, ntemti mkaloŵe mu ufumu wa kumulu peka patonto.
21Mwichimvwa kuti kwinenewa kwa ŵala a machezo, Usapaya; ali wonse opaya azapalamule mlandu; 22sembe neo numnenelani kuti ali wonse omkalipizya mkwaŵo azapalamule mlandu; soti ali wonse akuti ku mkwaŵo, Raka, azapalamule mlandu kwa ansaka; ali wonse akuti, Chipuŵa weo, azapalamule mlandu wa gehenna ya mulilo. 23Nipo kati popupa nsembe yako popupila ukalukana palapa kuti mkwanu ali na kantu pali weo, 24usiye nsembe yako pala pantanzi popupila, ufume tangaukayane na mkwanu, ni pauti uzopupe nsembe yako. 25Puvyoyanjana na muyako wa mlandu apo pauli naye pa njira; kaya muyako wa mlandu angakusokolole kwa chipingula, na chipingula angakusokololere ku linjolinjoli, nawe upozewe mkambolimboli. 26Lezee nukunenera, Nteuti ufumemo mulamwa peka patonto, mpaka pauti usilolipa kakobiri kosililila.
27Mwichimvwa kuti kwinenewa, Usachita uchende; 28sembe neo numnenelani, Ali wonse ololesya mwanakazi komkumbwila wasilochita naye uchende mu mtima mwake. 29Kati liso lako la kwendi likakupilingisya ulikoloŵole nolitaya: pakuti ni chiweme kwako kuti chimo cha vizo vyako chichenekewe, nte muŵili wako wamsuma kupozewa mgehenna. 30Soti kati chanzanza chako chendi chikakupilingisya uchitende nochitaya: pakuti ni chiweme kwako kuti chimo cha vizo vyako chichenekewe, nte muŵili wako wamsuma kuloŵa mgehenna. 31Kwinenewa soti, Ali wonse omsuzula mkazi wake nampe yeve kalata kolekelana: 32sembe neo nikuti kuli mweo kuti ali wonse omsuzula mkazi wake, kosati ni chifukwa cha kayense, omchisya wochende: naye ali wonse ati amlingule uyo akasuzuliwa ochita uchende.
33Soti mwichimvwa kuti kwinenewa kwa ŵala a machezo, Usalapa koŵepa, lomba womchitira Asikuru vilapo vyako: 34sembe neo numnenelani, Usalapizya peka patonto; kano pa charo cha kumulu, chikomo ni mpando wa Mlungu; 35kano pa charo cha pansi pano, chikomo ni msamilo wa malwayo ŵake; kano pa Yerusalemi, chikomo ni mzinda wa Mfumu ikuru. 36Usalapizya chukanga mutu wako, chikomo suziŵa sisi limo kulituvya tuu kano kulififya bii. 37Sembe kulaŵira kwanu nakuŵe, Inde, inde; Yai, yai: chiri chonse chupula aŵa chufumila kwa uyo nyaluŵifya.
38Mwichimvwa kuti kwinenewa, Liso kulipa liso, na lino kulipa lino: 39sembe neo numnenelani, Msamsusya uyo ali muŵipa: sembe ali wonse ati akunyate lupi pa mbovu yako ya kwendi, umyaruzizye iyakwene soti. 40Muntu ali wonse opangwa kukupa mlandu noula mwinjira wako, na chovwinikila chako kumo naaŵe nacho. 41Ali wonse ati akuyumilizye kuya naye kamsinzo kamo, uyende naye tuŵiri. 42Uyo okusenga umpeko; uyo naye opangwa kuyapula kwako usamfutatira.
43Mwichimvwa kuti kwinenewa, Womtemwa mwanansi wako nomtinka wokupata: 44sembe neo numnenelani, Atemweni ŵompatani, nosengera aŵo omzuzyani, 45kuti muŵe ŵana a Ausu wanu ali kumulu: pakuti okwereka zuŵa lake pa aipa na pa aweme, nolokwesya mvula pa ŵolungama na pa ŵosalungama kumo. 46Chifukwa kati mkaŵatemwa ŵala omtemwani mweo chilambu chanji chimuli nacho? kansi chukanga amsonko naŵo sochita teti? 47Namwe mkaŵalonjera akwanu ŵekaŵeka muchita chinji chopula ŵambi? kansi chukanga Mitundu nayo siyuchita teti? 48Chifukwa choteti mwakuingakuŵa ŵoterama mtima, nga ni mwalili Ausu wanu ali kumulu woterama.
Atualmente selecionado:
M. Mattayo 5: MA23
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Mapangano Alomba © Bible Society of Zambia, 1923.