मत्ती 6
6
दान
1“सावधान रोयू, तुमु माणसो काजे देखाळने कोरीन तुमरा धोरमोन काम मा कोरु, नीती तुमरा सोरगो मायला बासो जुव गोथो काय फोव नि जुळे.” 2इनान कोरता कि जेतार तू दान कोरे, ती आपने ओगोव पावी मा वाजवाळे, जोसा कोपट्या प्रार्थना घोरमा एने गोल्यामा कोरतेला छे, काहाकि माणसे इंदरी महिमा कोरे. मे तुमु काजे छाचलीन कोय कि चे आपना प्रतीफोव ली लेदला छे. 3बाकीन जेतार तू दान कोरे, ती जू तारू जेवळ्यु हात कोरे, ती तिनाक तारा डाखऱ्या हात काजे नि मालूम पोळनो जुवे. 4काहाकि तारो दान एखलामा रोये, एने तारु बास एखलामा देखे, तुसे प्रतीफोव आपसे.
प्रार्थना
(लुका 11:1-4)
5“एने जेतार तू प्रार्थना कोरे, ती कोपट्या सारखी नि जुवे, काहाकि माणसो काजे देखाळनेण कोरीन प्रार्थना घोरोमा एने सोळकोन मुंडोपोर उभा रोयीण प्रार्थना कोरनो तीनु काजे वारू लागतलो छे मे तुमु काजे छाचलीन कोय कि चे आपना प्रतीफोव ली लेदला”. 6बाकीन जेतार तू प्रार्थना कोरे, ती आपना खुलीमा जा; एने झोपलु बोंद कोरीन आपना बासो पुठी जो एखलामा छे प्रार्थना कोर तेत्यार तारू बास जो एखलामा देखतलु छे, तुसेक प्रतीफोव आपसे. 7प्रार्थना कोरनेन टेमे दिसरा जाती सारखो बोक-बोक मा कोरे, काहाकि चे सोमजतला छे कि तिंदरा जादा बुलनेसी तिंदरो सोमवाय जासे. 8इनान कोरता तुमु तिंदरे सारखा मा बोनु, काहाकि तुमरू बास तुमरा मांगनेसी पेहेले जानतलु छे कि तुमुक काय जुवतलो छे.
9“इनान कोरता तुमु इना रितीसी प्रार्थना कोऱ्या कोरजू
‘हे आमरा बासो, तू जु सोरगोमा छे; तारो नाव चुखो मानाय जाय.
10तारो राज आवे तारी मोर्जी जोसी सोरगोमा पुरी होयतेली,
तोसी धोरती पोर भी होये.
11आमरा आखा दाहळा भोरीन रुटू आज आमुक आप.
12एने जिना रितीसी आमु आमरा गुणावावा काजे माफ कोरला छे,
तोसुत तू बी आमरा गुणा काजे माफ कोर.
13एने आमु काजे परीक्षामा मा लावे, बाकीन बुराईसी वाचाड;
काहाकि राज एने पराक्रम एने महिमा हमेशा तारीत छे’ आमेन.”
14“इनान कोरता कोबी तुमु माणसोन गुणू माफ कोरसू, ती तुमरू सोरगो मायलु बास बी तुमु काजे माफ कोरसे, 15एने ओगर तुमु माणसोन गुणू माफ नि कोरे, ती तुमरू बास बी तुमरो पाप माफ नी कोरे”.
उपवास
16“जेतार तुमु उपास कोरसु, ती दोगावा सारखो तुमरा मुयो पोर उदासी नी आवनो जुवे, काहाकि चे आपना मूय उतार रोयतला छे, काहाकि माणसे तीनुक उपवासी जाणे, मे तुमु काजे छाचलीन कोय कि चे आपना प्रतीफोव ली लेदला.” 17बाकीन जेतार तू उपवास कोरे ती आपना मुंडका पोर तेल लागाळ एने मूय धुव, 18काहाकि माणसे नी बाकीन तारू बास जू गुप्त मा छे तुसेक उपवासी जाणे इना हालतमा तारू बास जू एखलामा मा देखतलु छे, तुसेक प्रतीफोव आपसे.
सोरगो मायलो धोन
(लुका 12:33-34; 11:34-36; 16:13)
19“आपनेन कोरीन धोरती पोर धोन एखठो मा कोरु, जां किडा एने कुदु बिगाडतला छे, एने जां चुटा घोर फुळीन चुरी कोरतेला छे.” 20बाकीन आपनेन कोरता सोरगोमा धोन एखठा कोरु, जा नि ते किडू एने नी कुदु बिगाडतलो छे, एने चा चुटू नी घोर फूळतलु एने नी चूरी कोरतेलू छे. 21“काहाकि जा तारो धोन छे चा तारो मोन बी लागलो रोयसे.”
डीलोन विजावो
(लुका 11:34-36)
22डीलोन दिवू डूवू छे इनान कोरता ओगर तारू डूवू चुखलु छे, ती तारो आखो डील बी विजावो रोयसे. 23बाकीन ओगर तारु डूवू भुंडू होसे, ती तारो आखो डील बी आंदारलो होयसे; इनान वोजेसी चो विजावो जो तारेमा छे ओगर आंदारलो होय जाय ती आंदारलो कोतरो मोटो होसे.
परमेश्वर एने धोन
(लुका 12:22-34)
24“काहनलु माणूस दुय मालक्यान सेवा नि कोर सोकतलु, काहाकि चू एक पोर दुष्मोनी एने दिसरा पोर मोंग कोरसे, नि ती एक पुठी साते रोयसे एने दिसरा काजे विटेवलु माणसे तुमु परमेश्वरोन एने धोन दुयोन सेवा नी कोर सोकतला”. 25इनान कोरता मी तुमु काजे कोयो कि आपना जीवन कोरता जी चिंता घोन कोरता कि आमु काय खासु एने काय पिसू; एने नि आपना डीलोन कोरता कि काय पेहेरसू काय जीव खाणासी, एने डील छिंदरासी बोळीन नी होय? 26वादवा मायला चिल्ला काजे देखू! चे नी वेरतेला, चे नी काटतेला छे, एने नि कुठामा एकठा कोरतला; ते बी तुमरू सोरगो मायलु बास हिनु काजे खावाळतेलु छे, काय तुमु हीनु गोथा जादा किमतीवान नि राखतला? 27तुमरेमा कून छे, जो चिंता कोरीन आपना जीवाय मा एक घोळी बी बोढाय सोकतलु छे?
28“एने तुमु छिंदरान कोरीन काहा चिंता कोरतेला? जोंगली फुलोपोर ध्यान कोरु कि चे कोसा बोढतला छे; चे ते नी मेहनत कोरतेला, नि काटतेला छे”. 29ते बी मे तुमु काजे कोयो कि सुलेमान बी, आपना आखा कला मा हीनुमा गोथो कुदा सारखा छिंदरा पेहेरलु नी होतु. 30इनान कोरता जेतार परमेश्वर धोरतीन खोडा काजे, जो आज छे एने वाहने भट्टीमा घालाय जासे, होसला छिंदरा पेरावतलु छे, ती हे कोम भुरस्या, तुमु काजे चू इंदरेसी बोढाविन काहा नि पेरावे?
31“इनान कोरता तुमु चिंता कोरीन यो झुन कोयता कि आमु काय खासु, कोबी काय पिसू, कोबी काय पेहेरसू”. 32काहाकि दिसरा जात्या इना आखा चीजोन हेरेमा रोयतलु छे, बाकीन तुमरू सोरगो मायलु बास जानतलु छे कि तुमुक इना आखा चीजोन जरूरत छे. 33इनान कोरता पेहेले तुमु परमेश्वरोन राजोन एने तेरा धोरमोन हेरे कोरु ती जे आखा चीजे बी तुमुक जोळ जासे. 34एरेन कोरता वाहनेन चिंता मा कोरु, काहाकि वाहनेन दाहळू आपनी चिंता खुद कोर लेसे; आजून कोरता आजून दुख सोवटो छे.
Atualmente selecionado:
मत्ती 6: BFBNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.