Matej 7
7
O Isus sikaj te na sudina averen
1I o Isus phenđa: “Ma sudinen hem naka sudini pe tumenđe! 2Adalese so, sar sudinena averenđe, ađahar hem o Devel ka sudini tumenđe; hem sava meraja merinena, esavkaja ka merini tumenđe. 3A sose dikheja i trunka ani jakh te phralesiri, a i greda ani ti jakh na primetineja? 4Sar šaj te phene te phralese: ‘Aš te ikalavtar i trunka oti jakh’, a tut isi greda ani jakh? 5Dujemujengereja, najangle ikal i greda te jakhatar, i tegani šukar ka dikhe te ikale i trunka te phralesere jakhatar.
6Ma den e đuklenđe okova soi sveto hem ma frden tumare biserja anglo bale. Adalese so o bale ka gazinen len, a o đukle ka irinen pe hem ka pharaven tumen ko kotora.”
O Devel dela okolenđe kola rodena lestar
7“Mangen hem ka del pe tumenđe! Roden hem ka arakhen! Khuven hem ka phravel pe tumenđe! 8Adalese so đijekh kova mangela, primini; hem kova rodela, arakhi; hem kova khuvela, ka ovel lese phravdo.
9Ko tumendar pe čhavese, kad ka rodel lestar ine maro, ka del le bar? 10Ili kad ka rodel lestar ine maćhe, ka del le sape? 11Kad tumen, kola injen bišukar, džanen te den šukar darija tumare čhavenđe, kobor više tumaro Dad kovai ano nebo ka del šukar darija okolenđe kola rodena olestar.
12Adalese, sar so mangena avera te ćeren tumenđe, ađahar ćeren tumen olenđe, adalese soi adava okova so sikaj o Zakoni e Mojsijasoro hem o Proroci.”
Pharoi o drom savo legari ko nebo
13I o Isus phenđa: “Đerdinen maškaro tesno udar. Adalese so o bulo udar hem o bulo drom legarena ani propast, a isi but džene so džana oleja. 14Buti tesno o udar hem o drom savo legari ano dživdipe, a isi hari džene kola arakhena le.”
E hovavne prorokonen nane šukar plodija
15I phenđa: “Arakhen tumen e hovavne prorokonendar. On avena kora tumende urjavde sar bakre, a andrali divlja ruva. 16Palo lengere plodija ka pendžaren len. Na čedena pe o drakha oto kare, ni o smokve oto čičke. 17Ađahar, đijekh šukar kaš dela šukar plodija, a o bišukar kaš dela bišukar plodija. 18O šukar kaš našti del bišukar plodija, ni o bišukar kaš našti del šukar plodija. 19Đijekh kaš savo na dela šukar plodija, čhinela pe hem frdela pe ani jag. 20Adalese, e hovavne prorokonen ka pendžaren palo lengere plodija.”
O carstvo e nebosoroi zako poslušna učenici
21“Ano carstvo e nebosoro naka đerdinen sare kola vaćerena maje ‘Gospode, Gospode’, nego samo okola kola ćerena i volja mle Dadesiri kovai ano nebo. 22Ko adava dive kad ka ovel o sudo, but džene ka vaćeren maje: ‘Gospode, Gospode, na li amen tuće ano anav prorokujinđam, ispudinđam e demonen hem ćerđam bare čudesija?’ 23Tegani phravde ka phenav lenđe: ‘Nikad na pendžarđum tumen. Džan mandar, tumen kola phagena e Devlesoro zakoni!’ ”
O mudra manušai poslušna e Isusesere sikavibnase
24“Adalese, đijekh kova šunela akala mle lafija hem ćerela len, ovi mudro sar o manuš kova ćerela plo čher upro temelji oto bar. 25I pelo o bršin, ale o panja, phudinde o barvalja hem khuvde adava čher, ali o čher na pelo, adalese soi ćerdo upro temelji oto bar. 26Đijekh kova šunela akala mle lafija, a na ćerela len, ovi sar o dilino manuš kova ćerela plo čher upri pošik. 27I pelo o bršin, ale o panja, phudinde o barvalja hem khuvde adava čher, i adava čher pelo hem ulo bari ruševina.”
28Kad o Isus završinđa ple vaćeribnaja, o narodo inele zadivime lesere sikavibnaja, 29adalese so sikavđa sar okova kole isi autoritet, a na sar lengere učitelja e Zakonestar.
Atualmente selecionado:
Matej 7: RAB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão