Wepélisiananu 2
2
1’Bɛ zo lé la valé é gifɛnu koo, tɛrɛ valé é tafɛnu koo, wo kɛlɛle lɛ sɔɔ. 2Kazambale élé nyanama lɛ sɔɔ a yi suiɛdozan nya; yé a yi sɔrafiézan nya é flin élé nyanama faa lé é a pa bɛ, a ma. 3Kazambale yi sɔrafiézan drɔɔ vo, yé é a pa é yɛrama; yi ’ko nya lé é flin élé nyanama faa lé é a pa fɛ faa kɛlɛle nya bɛ, a ma, ’bɛzama.
4La valé tɛrɛ pélisia fɛan zo, ’té Kazambale wo kɛlɛ fɛan zo, yee lé ke bɛ.
Bléyian va lé Bale, Gakelebale tɛrɛ valé lanu kɛlɛ, 5’té féifɛ do kpen ’ka tan tɛrɛ la lo, yé zian do kpen gɔn ’ka tan bɔ lɛ féi lo; Bale, Gakelebale ’ka tan lɛɛ vinin da lɛ tɛrɛ la lo, yé mi do kpen ’ka ana yé ’bɛ féi pa lo, azama. 6Naa, lolu éé sié tɛrɛ gi bélé tɛrɛ ta goi sile zo, ’té éé kɛla tɛrɛ la fɛfaana, ’té tɛrɛ éé kɛla a nya drɔɔdrɔɔ.
Édɛn féi
(Wg 22:1, 2; 2:7)
7Bale, Gakelebale vun si yé é a kɛlɛ mi nya; é mibélifu fɛɛ a nyé ’léé yé mi kinin mi yuɛmale nya.
8’Bɛ zuo Bale, Gakelebale zianféi do pa yirinwanazia, fɛ lé wana laama Édɛn, ana, yé mi lé é a kɛlɛ bɛ, é ’bɛ nyana ’bɛna. 9Yé Bale, Gakelebale yili gɔnɔ faa si tɛrɛ gi; yili nɔnɔmi lé wo poro ke blefɛ zimanu nya, wo gɔnɔ faa lé; mibéliyili a féi méléna, yé wezin valé wenyané vasiyili ana é ziin. 10Yuu do lé a ’wuo si Édɛn, éé féi kɛla drɔɔdrɔɔ; dé é féi kini a blan si ziɛn. 11Wa blan vininzan laama Pisɔn; éé giéan Avila tɛrɛ faa zi; kyan a ’bɛna. 12Tɛrɛ ’ko la kyan a kyan tegele nya; délium gɔlɛ valé ɔnisigɔlɛ a ’bɛna é ziin. 13Wa blan fiézan laama Giɔn; yee ɛ giéan Kus tɛrɛ faa zi. 14Wa blan yaazan laama Idékɛl; éé yoroan Asiri tɛrɛ la yirinwanazia. A blan ziɛnzan lé ke Yufrat nya.
15Bale, Gakelebale mi si yé é a nyana Édɛn féi, yuɛpale a va valé féi pale we gi. 16Bale, Gakelebale é sɔnné gɔɔn mi lɛ ’ko zo: maa zi nɔ i lɛ léé, i féi yilinu faa poro ble; 17naa, wezin valé wenyané vasiyili bɛ, té bé poro ble lo; dé bé ble yian ma, i gaan.
Le kɛlɛle
(Éf 5:22, 23; Mt 19:3–9; 1 Tim 2:11–13)
18Bale, Gakelebale léé: Gɔné vole é do ’ka é zima lo; maa dan azozan do kɛlɛ lɛ a bɔavazan nya. 19Gakelebale tɛrɛ si yé é a kɛlɛ tɛrɛlawinu valé lagi mianénu nya, yé é da wo faa nya gɔnézan va, dé é dan wo laa lɛ fɛan zo, yé é a gi dɔɔ, yé tɔ lé gɔnézan a pa fɛ yuɛmale faa ma, yé é vo wo tɔ nya. 20Flawinu koo, lagi mianénu koo, bwiiwinu koo, gɔnézan wo faa tɔ pa; naa, mi lé ke bélé yeebozen zo, a bɔavazan nya, é ’ka a ye lɛ ’bɛnu va lo. 21Yé Bale, Gakelebale yi vɔ gɔnézan yuɛ la, yé yi go a nya baa; Gakelebale gɔnézan sɛewɔlɛ do si, yé é ana lɛ tan. 22A sɛewɔlɛ lé Bale, Gakelebale a si gɔné gi bɛ, é a kɛlɛ le nya yé é goan gɔnézan va. 23Yé gɔnézan léé: U‐uun! Sin, mi ’ko wɔlɛ si an wɔlɛ va yé a nɛ si an nɛ va; é si gɔné gi amalé wo dan a laa lɛ, le. 24Bɛwemalé gɔné é dan si lɛ é ti valé é bu va, yé é dan péli vɔ lɛ é na va, yé wo fiénu é dan kɛlɛ lɛ mi do kpen nya.
25Gɔnézan valé é na a é porole, yé yara do kpen ’ka wo ’wuo ma ’bɛ we ma lo.
Atualmente selecionado:
Wepélisiananu 2: GOURU
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Alliance Biblique de Cote d'Ivoire 1979