Luka 24
24
Isa k'i wuli ka bɔ saya lɔ teme
Matiyu 28.1-10; Malɛkɛ 16.1-8; Yohana 20.1-10
1Lailon sɔɔmadanina, mosolu vɛ taala kabulu ma tulu sumadiyanin ni latikɔlɔn ne, ai na minu lɔbɛnna. 2Ai do k'a ye ko kawa ba wo ma vɛ kulukulu ka bɔ kabulu da la. 3Ai ka don a kɔnɔ, kɛɛ ai ma mɔ Kuntii Isa fuleni ye. 4Ai ka to wo kɔnɔlɔfili lɔ, telemanin kɛ́ fila ka bɔ gbɛ la k'i lɔ ai dafɛ, faani gbɛ pepe vɛ ai kanna. 5Mosolu ka siyan bubale, k'ai ten bilin duu ma. Kɛ́ fila wolu k'a fɔ ai yɛ, ai vɛɛ: «Mindɛ lɔ ài yi niima ɲininna fulenilu tɛma? 6#Matiyu 16.21; 17.22, 23; 20.18, 19; Malɛkɛ 8.31; 9.31; 10.33, 34; Luka 9.22; 18.31-33.A tɛ jan. A v'i wuli! Ài y'ài hangili to a kumakan nɔ, a na min fɔla ài yɛ, a tɛɛ ài tɛma waate min Galile, 7ko ale Mɔɔnivin Tanin ka kan ka don julumbutɔlu bolo fɔsa ai y'a gbaan kɔlɔman ma k'a faa. Kɛɛ tele fila a sawana, a wulitɔ ka bɔ saya lɔ.» 8Wo fɔ, mosolu hangili ka bila Isa kumakan nɔ.
9Ai do vɛ seikɔla ka bɔ kabulu dala ka taa ko wo bɛ ɲafɔ Isa ya keladen mɔɔ tan ni kelen (11) yɛ, ani mɔɔ tɔ bɛ. 10Moso minu ka dandɛɛli kɛ Isa ya keladennu yɛ, wolu le tɛɛ Mɔyamu Magidalaka ni Yohani ni Janguba ba Mɔyamu, ani moso dɔgbɛlɛlu. 11Kɛɛ keladennu k'ai kumakan jate kuma fuun ne le, ai do ma la ai la feu. 12Kɛɛ wo bɛ n'a kɛ, Piyɛli v'i wulila ka bɔli ka taa kabulu dala. A do k'i majii ka kabulu lɔfɛlɛn, kɛɛ a ma foi ye a lɔ, fɔ kasange dein. A do ka seikɔ luu ma kawakoya boloma ka bɛn ko min kɛnin.
Isa ni a kɔbiladen fila k'i ɲɔɔmɛn teme Emayusi siya la
Malɛkɛ 16.12-13
13Wo lon kelen, Isa kɔbiladen fila tɛɛ taala soni dɔ la, min tɔɔ yi ko Emayusi. Ka bɔ Jelusalɛmu ka se je, wo yi lɛlɛ fila jate taama ne le. 14Ko min bɛ timinnin tele fila wo lɔ, ai tɛɛ balola wo kan. 15Ai ka to balo ni sɔsɔyalila, Isa gbu k'i madon ai la ka taama ai fɛ. 16Ai ka a ye ai ɲa la, kɛɛ Ala k'a kɛ ai ɲanɔ ma to a ma.
17Isa do vɛɛ ai yɛ: «Ài yi mindɛ balola yi ne siya kɔkan?»
Ai do k'i lɔ, ai ɲakɔlɔ silinin vɛ. 18Ai lɔ kelen, min tɔɔ tɛɛ ko Kilopasi, wo k'a javi, a vɛɛ: «Jalasa ile kelen ne lona le Jelusalɛmu, min m'a lɔn ko minu timinnin tele fila min nɔ?»
19A k'ai maɲininga, a vɛɛ: «Ko mindɛlu?»
Ai do vɛɛ a yɛ: «Ko minu kɛnin Nazalɛtika Isa la, min tɛɛ kumala ani ka kawanankolu kɛ seetiiya boloma, k'a jiya Ala ni mɔɔlu bɛ ɲakɔlɔ ko kela le tɛɛ a le. 20Maa salakalase kuntiibalu ni ɲamɔɔlu na a donna Lɔmukalu bolo, ko ai y'a jobaliya k'a faa. Wo le k'a kɛ, ai k'a gbaan kɔlɔman ma. 21Mɔ jei siinin tɛɛ ale le la Bani Isilankalu kunmakako lɔ, kɛɛ ko wolu kɛnin vɛ, a tele sawana le ne. 22Wo bɛ n'a kɛ, moso dɔlu yi mɔ tɛma minu na mɔ kɔnɔlɔfilila bubale. Ai vɛɛ ko ai taanin kabulu dala bi sɔɔmadanina, 23kɛɛ ai ma a fuleni ye je. Ai do k'ai kɔsei k'a fɔ mɔ yɛ ko ai na mɛlɛka dɔlu yena, minu n'a fɔla ai yɛ ko Isa y'a nii la. 24Wo le n'a kɛla, mɔ taamaɲɔɔ dɔlu fana ka taa kabulu dala ka kolu bɛ ye iwo mosolu n'a fɔla teme. Kɛɛ ai do ma Isa ye.»
25Wo fɔ ai bolo, Isa do vɛɛ ai yɛ: «Àilu hangilindannu! Ài lasumayine limaniyala kelalu ya kumakan fɔnin bɛ ma! 26Jalasa kelalu m'a sɛvɛ ko Masa Tɔɔmasenin ka kan ka tɔlɔya minu masɔlɔn kunfɔlɔ le, jani a yi don aa magbiliyali lɔ?» 27Wo kɔ, kuma minu sɛvɛnin kitabulu kɔnɔ ka bɛn a ma, Isa vɛ wo bɛ ɲafɔla ài yɛ, ka damina Nabi Musa ya Taulati ma ka sii kela dɔgbɛlɛlu ya kitabulu bɛ la.
28Ai masulunyanin soni wo la, ai tɛɛ taala tɛɛminja, Isa k'a kɛ iwo a timintɔle. 29Kɛɛ ai k'a fɔ a yɛ k'a magbeleya, ai vɛɛ: «I jaani, i yi si mɔ fɛlɔ. Tele ma vɛ jii. Su kotɔle.» Wo kɛ, Isa ka don bon na ai fɛ ko a yi si je. 30Ai k'i sii dɔnnikɛya lɔ mingɛ, a ka bulu ta ka balika bɔ Ala yɛ, k'a lɔkalikali k'a di ai ma. 31Wo kɛ, ai ɲa la ka ka, k'a lɔn ko Isa le. Kɛɛ a ka tunun ai ma telemanin. 32Ai do k'a fɔ i ɲɔɔ yɛ, ai vɛɛ: «A tɛɛ kitabulu kɔlɔ ɲafɔla mɔ yɛ siya la waate min nɔ, mɔ kɔnɔlɔdiyanin tɛɛ, kɛlɛ?»
33Ai mɔɔ fila v'i wulila telemanin ka seikɔ Jelusalɛmu, ka keladen mɔɔ tan ni kelen (11) ladɛnnin talan je, ani ai taamaɲɔɔlu. 34Keladennu k'a fɔ mɔɔ fila wolu yɛ, ai vɛɛ: «Tuɲa le, mɔ Kuntii v'i wuli! A do v'a jɛlɛ jiya Simɔn na.»
35Wo kɛ, kɛ́ fila wolu k'a ɲafɔ ai yɛ min kɛnin ai la siya la, ani ai ɲanɔ ka to Isa ma teme bulu lɔkali waate.
Isa k'a jɛlɛ jiya a kɔbiladennu la teme
Matiyu 28.16-20; Malɛkɛ 16.14-18; Yohana 20.19-23
36Ai ka to ko wolu ɲafɔla, Isa gbu ka na k'i lɔ ai tɛma, k'a fɔ ai yɛ, a vɛɛ: «Hɛlɛ yi kɛ ài yɛ.»
37Ai bɛ joso ka bɔ ka siyan bubale. A tɛɛ ai kɔnɔ ko sugboloni le. 38Isa do vɛɛ ai yɛ: «Mindɛ kɛnin ài yi siyanna? A yi di vɛ ài yi sikala ài josokun nɔ? 39Ài yi m̀ bolo ni ǹ sennu lasaa, fɔsa ài y'a lɔn ko ǹe gbugbu le! Ài y'ài bolo tuu ǹ na ka ǹ lasaa, kamasɔlɔn bu tɛ sugboloni ma ani kolo tɛ a lɔ, iwo ài yi ǹ yena teme.» 40Wo fɔ Isa bolo, a k'a bololu ni a sennu jiya ai la.
41Ai ka to sikala sawa boloma k'ai kawakoya, a vɛɛ ai yɛ: «Dɔnnifen dɔ y'ài bolo jan?» 42Wo fɔ, ai ka jɛɛ mɔnnin dɔ di a ma. 43A do ka wo ta k'a dɔn ai bɛ ɲakɔlɔ.
44Wo kɔ, a vɛɛ ai yɛ: «Ǹ tɛɛ ko minu le fɔla ài yɛ mɔ tɛɛ i ɲɔɔ fɛ waate min nɔ, ǹ ko, kuma minu bɛ sɛvɛnin ka bɛn m̀ ma Nabi Musa ya Taulati ni Zabuli lɔ, ani kela dɔgbɛlɛlu ya kitabulu lɔ, fɔ wolu bɛ ma yi fa.» 45A do k'ai hangili laka, fɔsa ai tɛɛ se kitabulu kɔlɔ ɲayena. 46A k'a fɔ ai yɛ kɔtunun, a vɛɛ: «A sɛvɛnin ten ne ko Masa Tɔɔmasenin kɛtɔ tɔlɔyala, kɛɛ a tele sawana lon, a wulitɔ ka bɔ saya lɔ, 47ani aa samakan ka bɛn mɔɔlu dajoo mafalinko ma aiya julumbulu lɔkotoko lɔ, wo la ka kan ka se siboloma bɛ ma a tɔɔ lɔ, ka damina Jelusalɛmu ma. 48Àilu gbu le ko minu masele le. 49#Kɛkolu 1.4.Ǹ Fa na min lahedi tala ài yɛ, ǹ kɛtɔ wo lanala ài ma. Kɛɛ fɔ ài yi to Jelusalɛmu jan haan fɔɔ seetiiya wo la yi jii ài kɔkan ka bɔ haijɛnɛ.»
Isa kɔlɔtako ka taa haijɛnɛ
Malɛkɛ 16.19-20
50 #
Kɛkolu 1.9-11. Wo kɔ, a ka bɔ so kɔnɔ ai le ka taa se haan fɔɔ Betani fannɔ. A do k'a bolo fila kɔlɔta ka duwawu kɛ ai yɛ. 51A ka to duwawu kɛla ai yɛ, a kɔlɔ ka ta ka bɔ ai tɛma ka jɛlɛ sangbolo lɔ. 52Ai do ka a bato ka ban ka seikɔ Jelusalɛmu sawa boloma.
53Ai do tɛɛ taala lɔhɔlɔmabonba la ka Ala tanu waate bɛ.
Atualmente selecionado:
Luka 24: MBT2023
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Manya Bible Translation, © SIM International, 2023