মথি 10
10
তিছি ন্হৈয়ক তিবিগু রুওয়েচা
(মার্ক ৩:১৩-১৯; ৬:৭-১৩; লূক ৯:১-৬)
1যীশুচা কোঃ তিছি ন্হৈয়ক তিবিগু খঃলিইরি অর মকং নেঃ কৈংচাগু আকং প্যাংফু অর আলুং রঃগাগু আকং প্যাংফু ক্ষেমতা পিইরো য়াংসুউরোগু রুওয়েলৈতি। 2য়াং তিছিন্হৈয়ক তিবিরো নাঃমিচা ফ্রইতি: পাথামা শিমোন যাসুউগু পিতর খঃরি, য়াংনক য়াংসুউমা ঞিং আন্দ্রিয়; সিবদিয়মা সাঃ যাকোব অর য়াংসুউমা ঞিং যোহন; ফিলিপনা বর্থলয়; 3থোমানা ফেংদা ককসা মথি; আলফেয়েমা সাঃ যাকোবনা থদ্দেয়; 4কুঃজেকো খ্যসা শিমোননা যীশুগো যাসু রেংসুরো আলাকমা তিঃ পিইলৈতি য়াং যিহূদা ইস্কারিয়োৎ।
5যীশুচা য়াং তিছিন্হৈয়ক তিবিরোগু দিঃ আঃনা পিইরো রুওয়েলৈতি, নাংরো যিহুদীমুহুক লুঃউম্যেরুনা শমরীয়রো রুওয়াদুঃ মাঃলাগি, 6প্রফুছুগি ইস্রায়েল লুঃউম্যেমা প্যকচা সাংরোদুঃ লাঃগেলিই। 7নাংরো লাঃরি লেংমা দিঃ চাঃগাগু তাঃরা হঃগেলি, গংখাং নেংঙাইংদচা আপামা রকব্যা। 8দিঃচা মুহুকপ্রি নাংরো আনিংমকং লুঃউরোগু আকং প্যাংগেলি, আসিইরোগু আহ্রাং প্যাংগেলি, আনুংসিরোগু আকং প্যাংগেলি অর মকং নেঃরোগু ঙাং থুঃউকেলি। নাংরো দিঃচা আফু পিইরো মাঃরালি য়জংকিজু আফু ময়ুব্রি লুককেলি। 9নাংরো খাঃমা রুই, মুইং অর তামা পৈয়স্যা মুয়ুগেকি। 10লেংমা কিজু ওয়িই, আঙ্গি ন্হৈথি, ফেনেং অর দুকলি মুয়ুগি, আক্রংগা যাসু অলুক লুকতিলি য়াংসুউ আঃচা-আসক রাঃফু থঃতেংরি।
11“নাংরো যা রুওয়াদুঃ অর ম্রুঃদুঃ লাঃরি য়াংদেমা থঃতেংরি লুঃউ তয়ককো হ্রা থুক্কেলিই অর আখ্রা তেরেতুঃ মাঃলাসাগ্রা য়াংসুউ ইংমা নিংগেলিই।” 12য়াং ইংদুঃ ওয়ংরিখা য়াংসুউরোগু মাঙ্গালাবা প্রগেলিই। 13য়াং ইংরা থঃতেংরিছুগি, নাংরো ইখেংচা য়াং ইংমা ক্যালিফিই। ছুগি য়াং ইংরা থঃমেতেংছুগি, নাংরো ইখেংচা নাংরোদুঃ হিকলিইফিক। 14খ্যাংসুউমুছু নাংরোগু লাক মেখেংছুগি অর নাংরো চাঃগাগু নাঃমথংছুগি, য়াং ইংগা মুহুককিলি রুওয়াগা লাঃফু আখিংখা নাংরোমা খুম্যুয়িংগো খাঃ বৈকেলি। 15ঙা নাংরোগু আম্হেং প্ররি, সিইরো লাঃগি য়াং রুওয়াচা যা ফ্রফুলিছুগি, সদোম অর ঘমোরা ম্রুঃথাক পাং আম্যা ক্রিফুয়িই মিহিক ফ্রইফু।
তিবিগু অওয়াদা পিইচা
(মার্ক ৯:৪১; ১৩:৯-১৩; ১৪:২৬,২৭)
16“ক্রি, ঙা নাংরোগু ক্যাগুরুক রুইমা সাংফছুয়িইঞ্যং রুওয়েতি। য়াংচা কিজু মৃংঞ্যং সিঃধিরেঃ অর খঃঞ্যং ফ্রইকে।” 17সিদিনা নিংগে, আক্রংগা লুঃউরোচা নাংরোগু তাঃরা চৈসারো আলাকমা তিঃ পিইলিমি অর য়াংসুউরো তাঃরা চেরেঃমা নাংরোগু দুঃনা সেঃলিমি। 18ঙা কিজু নাংরোগু ওকখ্যুকসু অর মাং হ্রিইগা য়ুঃ লাঃলিমি, যাফুলিছুগি নাংরো য়াংসুউরোবামা অর যিহূদী মুহুক লুঃউবামা সাকসি পিইনৈংঅং। 19যাখা লুঃউ নাংরোগু তিঃ পিইমি য়াংখা যা প্যাংরাফু যা প্ররাফু য়াংসুউগু য়ুউরো মেচেংজালিগি। যা প্ররাফুলি য়াংচা য়াং আখিংমা নাংরোগু প্রঃ পিইমি। 20নাংরো প্রঃমি য়াংচা মুহুক, প্রফুছুগি নাংরো ফাখাং থাওরা ফোরা ঈ নেংঙাইংদচা নাংরোগা নিংরো চাঃগা প্রঃলিইমি।
21“ঞিংচা কোঃ ঞিংগো অর ফাখাংচা কোঃ সাঃগো সেঃফু কিজু তিঃ পিইলিমি। সাঃ-সিঃমিংরোচা মিঃখাং-ফাখাংগু ছেংগ্যাংফাক লুকরো য়াংসুউরোগু সেঃ বৈলিমি।” 22ঙা কিজু আলুংসো নাংরোগু মুংলিমি, য়িগিলি আছুংরকঅং যাসু আম্রিঃ হিকফুলি য়াংসুউরা ক্যুওয়েফু। 23যা রুওয়ামা নাংরোগু লুঃউরো আঞ্যচি প্যাংরিলি, য়াং রুওয়াগা থুওয়করো অরতুরুওয়াদুঃ লাঃলিইগে। ঙা নাংরোগু আম্হেং প্ররি, ইস্রায়েল প্রিঃমা হিকচা ম্রুঃ অর রুওয়ামা নাংরো অলুক মিব্রিই হ্রিইগা মনুসুওয়া সাঃচা লাঃফু।
24“ছারা থাক তিবি মিক্রিই অর ইংস্যাং থাক ক্যুয়েং মিক্রিই।” 25তিবিচা ছারাশ্যিঞ্যং অর ক্যুয়েংচা ইংস্যাংঞ্যং ফ্রইচারা আকংছুংব্যা। যাখা য়াংসুউরো ইংস্যাংগু বেলসবূল প্রগেলিরি য়াংখা ইংমা হিকচা অর লুঃউরোগু অর মন্হকতয়ং আম্যা বেলসবূল প্রফুলি ক্রি।
26“য়িগিলি য়াংসুউরোগু নাংরো মক্রককেলিইগি, আক্রংগা খুঃরো হিকচা আলুংগু ম্রাংরাংমি অর স্যুওরো থাঃচা আলুংগু সিকরামি।” 27ঙা নাংরোবামা যাচা মৈমৈমা প্ররি, য়াংচাগু নাংরো লালাংমা প্রগেলৈই। নাংরো যাচাগু নাঃমা নাঃমা ক্রাগেরি, য়াংচাগু নাংরো ইংখংগা তাকরো হঃ প্রাগেলি। 28যাসুউরো কেইংথাগুরা সেঃবৈনৈংরি য়িগিলি ওয়িঞেংগু সেঃমবৈনৈং য়াংসুউরোগু ক্রকফুমিহিক। যাসুউ কেইংথানা ওয়িইঞেং নৈইখুগু ঙারি দুওয়ংমা খ্যানৈংরি, প্রফুছুগি য়াংসুউগুরা ক্রককে। 29চাঃবৈশ্যি ন্হইকং কংগং আঃফু আনৈংনা আরং মাক্যা লঃ? য়িগিলি নাংরো ফাখাং থাওরা ফোরা খুওয়ং মুরুওয়েপ্রি য়াংসুউরো তগংলি কেইংফামা মাক্যা; 30প্রফুছুগি, নাংরো আগংমা ছেংবাং তয়ং রুইরো হিকরি। 31ছুগি নাংরো মক্রককেকি। আম্যাগ্রি আম্যা চাঃবৈশ্যি থাক নাংরো আঃফুচা আম্যা।
32খ্যাংসুউমুছু লুঃউরো হ্রিইগা ঙাগো লাক খেংগি, ঙালি য়াংসুউগু ঙা গংখাং ফুং ফাখাং হ্রিইগা য়াংসুউগু লাক খেংফু। 33ছুগি খ্যাংসুউমুছু ঙাগো লুঃউরো হ্রিইথাকমা ঙাগো লাক মেখেংগি, ঙালি ঙা গংখাং ফুং ফাখাং হ্রিইগা য়াংসুউগু লাক মেখেং।
34ঙা কাবামা ঈখিয়েং পিইফু লাঃরিলো মেম্হেকি। ঙা ঈখিয়েং পিইফু লাঃচা মুহু প্রফুছুগি লুঃউগু লুঃউ ছেংগ্যাংফাক লুকচিইফু লাঃচা; 35সাঃগো ফাখাং ছেংগ্যাংফাক লুকফু, সিমিংগু ফাখাং ছেংগ্যাংফাক লুকফু, খাম্রাগু য়কখাঃমা ছেংগ্যাংফাক লুকফু লাঃচা। 36তয়ক লুঃউমা কোঃ ইংদুওয়ং লুঃউরা রেংসুউ ফ্রইফু। 37খ্যাংসুউমুছু ঙা থাকপাং মিখাং-ফাখাংগু খ্যইতিছুগি, য়াংসুউচা ঙা কিজু থঃমেতেং। অর খ্যাংসুউমুছু সাঃ মুহুককি সিঃমিংগু ঙা থাকপাং খ্যইতিছুগি, য়াংসুউচা ঙা কিজু থঃমেতেং। 38যাসু থুঃউখেচা তইংগো রুয়করো ঙা লেংমা মাঃলা য়াংসুউলি, ঙা কিজু থঃমেতেং। 39খ্যাংসুমুছু কোঃ আসাককো কিঃছিঃফু ক্রিরিছুগি, য়াংসুউ কোঃ বাওয়াগংগু মাঃরামুহুক; য়িগিলি খ্যাংসুউমুছু ঙা কিজু আসাক ছুংরিছুগি, য়াংসুউচা আম্হেং বাওয়াগু রাঃফু। 40“যাসুউ নাংরোগু লাক খেংরিলি, য়াংসুউ ঙাগুলি লাক খেংরি; অর যাসুউ ঙাগো লাক খেংরি, ঙাগো যাসুউ রুওয়েলৈতি য়াংসুউলি য়াংসুউগু লাক খেংরি। 41রিঃসি তয়ককো খ্যাংসুউমুছু রিঃসিকছুরো লাক খেংগি, য়াং রিঃসি যা ছুউক রাঃফু, য়াংসুউলি য়াং ছুউক রাঃফু। থাওরা ফোরা রুসিইসা তয়ককো, থাওরা ফোরা রুসিইসাছুরো লাক খেংগি, থুঃউ থাওরা ফোরা রুসিইসা যা ছুউক রাঃফু য়াংসুউলি য়াং ছুউক রাঃফু। 42খ্যাংসুউমুছু দিঃ লুঃউ আহ্নই আতুওয়ংগা তয়ককো ঙা তিবিছুরো, রিঃই তুখুওয়ক পিইগি ঙা নাংরোগু আম্হেং প্ররি, য়াংসুউ খ্যাংঞ্যংহিকলি য়াংসুউ ছুউকচা মপ্যকমুহুক।”
Atualmente selecionado:
মথি 10: BBSRMZ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão