यूहना 18
18
यीसू गो पकड़ायो जाणो
(मत्ती 26:47-56; मरकुस 14:43-50; लूका 22:47-53)
1यीसू बिनती करण गै बाद आपगै चेला गै सागै छोटी नेहर किद्रोन गै दूसरै पासै एक बगीचै में उड़ग्यो।
2धोखै ऊं बिनै पकड़वाण आळो यहुदा बिं जिग्यां नै जाणै हो क्यूंकै यीसू आपगै चेलां सागै बठै जाया करतो हो। 3जद यहूदा रोमी सिपाहियां गी टुकड़ी अर महा याजकां अर फरीसियां गी ओर ऊं भेजेड़ा मिन्दर गै पहरेदारां नै लेगे लालटेण अर संसारी मसालां अर हथियार नै लेगे बठै आयो।
4यीसू आपगै उपर के होवैगो ओ सारो कीं जाणतां होया बी बानै पूछयो, “थे किनै ढूंढो?”
5बां बिनै उतर दियो नासरत में रेण आळै यीसू नै। यीसू बानै केयो मैं हूं। बठै धोखै ऊं पकड़वाण आळो यहूदा बी खड़यो हो। 6जद यीसू केयो कै, “मैं हूं,” तो बे लारै हटग्या अर धरती पर पड़ ग्या। 7जद बण फेर बानै पूछयो, “थे किनै ढूंढो हो,” बे बोल्या, “नासरत गै रेण आळै यीसू नै।”
8यीसू उतर दियो, “मैं थानै केयो है बो मैं ई हूं जे थे मनै ढूंढो हो तो आं लोगां नै जाण दैयो।” 9ओ बो ईंखातर केयो कै झिको कीं बण केयो हो बो पूरो होवै मैं बामूं किनै कोनी गमाया झिका नै मनै दिया हा।
10जद समौन पतरस आपगी तलवार काढी अर महा याजक गै दास गो दाहिणो कान बाड दियो। बिं दास गो नाम मलखुस हो। 11जद यीसू पतरस नै केयो, “आपगी तलवार म्यान में राख। परमेसर मनै झिको दुख गो कटोरो दियो है बिमुं मनै पीणो ई पड़सी।”
12जद सिपाईयां अर बांगा सुबेदार यहुदियां गै मिन्दर गै पहरेदारां यीसू नै पकड़गे बिंगा हात बांध लिया। 13अर पेलां बिनै बिं साल गै महा याजक कैफा गै सुसरै हना कनै लेगे गेया। 14ओ बो ई कैफा हो झिकै यहुदी अधिकारियां नै राय दी आपणै लोगां खातर एक आदमी गो मरणो आच्छो है।
पतरस गो इनकार
(मत्ती 26:69,70; मरकुस 14:66-68; लूका 22:55-57)
15जद यीसू नै ले जाण लागरया हा जद समौन पतरस अर यीसू गो एक ओर चेलो बी यीसू गै लारै चाल पड़यो क्यूंकै ओ चेलो महा याजक नै जाणतो हो ईंखातर बो यीसू गै सागै महा याजक गै आंगणै में उड़ग्यो। 16पण पतरस बारै दरवाजै कनै खड़ ग्यो, फेर महा याजक नै जाणन आळो चेलो बारै आयो अर चोकिदारणी नै केगे पतरस नै मा ल्यायो।
17चोकिदारणी पतरस नै केयो, हो सकै है तूं बी मसी गो ई चेलो है। पतरस बोल्यो नई मैं कोनी। 18जद भोत ठंड ही। ईंखातर नोकर अर मिन्दर गा पेरेदार कोयला जगा गे खड़या तपण लागरया हा। जद पतरस बी बांगै सागै खड़यो खड़यो तपण लागरयो हो।
महा याजक गी यीसू कनूं पूछताछ
(मत्ती 26:59-66; मरकुस 14:55-64; लूका 22:66-71)
19फेर पेलां आळो महा याजक हना यीसू ऊं बिंगै चेला गै बारै में अर बिंगै उपदेस गै बारै में पूछताछ करी। 20यीसू बिनै उतर दियो, “मैं सदां लोगां गै सामणै बाता करी। मैं सतसंग घर अर मिन्दर में जठै यहुदी कठा होवंता बठै उपदेस दियो, मैं लुकगे कीं कोनी करयो। 21फेर तूं मनै क्यूं पूछै है, बानै पूछ झिका मनै सुण्यो है, साची बानै पतो है।”
22जद बण ओ केयो तो मिन्दर गै एक पहरेदार झिको बठै खड़यो, यीसू नै थपड़ मारयो अर बिनै केयो तेरी आ हिम्मत कै तूं महा याजक नै इंया केवै? 23यीसू बिनै उतर दियो, “जे मैं कीं गळत केयो है तो साबित कर अर बता मैं के गळत करयो है, अर जे मैं ठीक केयो तो मेरै थपड़ क्यूं मारयो?” 24फेर हना बिनै बांदेडै़ नै महा याजक कैफा कनै घाल दियो।
पतरस गो फेर इनकार
(मत्ती 26:71-75; मरकुस 14:69-72; लूका 22:58-62)
25जद समौन पतरस खड़यो होयो जठै तपण लागरयो तो बठै खड़या लोग बिनै केयो, “तूं बी बिंगै चेला माऊं एक चेलो है कै जद बण मना कर'गे बोल्यो मैं कोनी।” 26महा याजक गै एक सेवक झिको बिं आदमी गो रिस्तेदार हो झिकैगो कान पतरस बाडयो हो बिनै पूछयो, “बता मैं तनै बिंगै सागै बाग में कोनी देख्यो हो?” 27पतरस फेर इनकार कर दियो अर बिं टेम कुकड़ बांग दे दी।
पिलातुस गै सामै यीसू
(मत्ती 27:1,2,11-14; मरकुस 15:1-5; लूका 23:1-5)
28फेर यीसू नै कैफा कनूं रोमी राजपाल गै किलै में दिनगै दिनगै गै टेम लेग्या। यहुदी लोग किलै गै मा कोनी गेया क्यूंकै बे अपवितर ना होवै अर फसह गै त्यूंहार गी रोटी खा सकै। 29पिलातुस बारै आ'गे बानै केयो, “ईं आदमी पर थे के गुनाह लगावो हो?”
30बां बिनै उतर दियो ओ गुनेहगार है। ईं कारण म्हे इनै थारै कनै लेगे आया हां।
31पिलातुस बानै केयो इनै थे ले जाओ अर आपगै नेम विधान में जिंया है बिंया ई फेंसलो करो। यहुदी अधिकारियां बिनै केयो म्हारै कनै किनैई जान ऊं मारण गो अधिकार कोनी है। 32यीसू झिकी बात बताई ही बिंऊं सिद्ध हो ग्यो कै बिनै किंया गी मोत मिलैगी#यूहना 12:32,33#12:32; मत्ती 20:18,19; मरकुस 10:33-34; लूका 18:32,33। 33जद पिलातुस किलै गै मा गेयो अर यीसू नै पूछयो, “के तूं यहुदियां गो राजा है?” 34यीसू उतर दियो कै, “आ बात तूं आपगै कनै ऊं केवै या दूसरा झिका मेरै बारै में तनै केयो है।” 35पिलातुस बिनै उतर दियो, “मैं यहुदी कोनी हूं। तेरी जाती गा लोग अर मुख्य याजकां तनै मेरै कनै ल्याया है। अर पूछयो कै तूं के करयो है?” 36यीसू उतर दियो, “मेरो राज ईं संसार गो कोनी है जे मेरो राज ईं संसार गो होवंतो तो मेरी प्रजा मनै यहुदियां नै देण ऊं बचाण खातर लड़ाई झगड़ो करती। पण सच्च मैं मेरो राज अठै गो कोनी।” 37फेर पिलातुस यीसू नै केयो, “तूं राजा है के?” यीसू उतर दियो कै, “मनै राजा तूं ई केण लागरयो है। मैं ईंखातर दुनिया में आयो कै सच्चाई गै बारै में बोलूं। झिको कोई सच्चाई पर चालै है तो बो मेरी बात सुणै है।”
मारण गी आग्या
(मत्ती 27:15-31; मरकुस 15:6-20; लूका 23:13-25)
38पिलातुस बिनै पूछयो कै, “सच्चाई के है?” इंया केगे यहुदियां कनै उड़ग्यो अर बानै केयो, “मनै तो इमै कोई गुनाह कोनी लाग्यो।” 39अर थारी आ रीति रिवाज है कै फसह गै त्यूंहार पर मैं थारै खातर कोई एक केदी नै छोड़ दैयूं। के थे चावो हो कै मैं थारै खातर यहुदियां गै राजा नै छोड़ दैयूं? 40जद बां ईं बात पर रोळो मचायो इनै कोनी पण बरअबा नै छोड़ दे। बो एक डाकू हो।
Atualmente selecionado:
यूहना 18: BGQ
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2023 (Active), Wycliffe Bible Translators, Inc. All rights reserved. © WIn Publishing Trust