Matiu 7
7
Tatilovosi'a tamenexinge so tato'ome'axu susu noxi'a uasi
1Ioxe, Iesua musolonu aloxo 'ola, “Ngingi ngatilovosi'a tamenexinge so ngato'oto'ome'axu susu noxi'a uasi, xo loxo 'o io tilovo no anu susu noxinge uto'omenge u'isalili axone. 2Xo Mosinge utilovosinge no anu vote'i iou vilesisi aloxo nga'oxo noxi'a leviani ne. Mo lasixeli axova so ngalosi'a la lasixeli so lakolisou ulivu noxinge ili'i ne a iou vilesisi. 3Xe loxova so ngasaxisou lapipia utuxu se uai noxou vivine iou ia ovu alelaxu tatila e uai no ieni ne la naxavutalanu uasisi? 4Loxo ovu alelaxu uai no iengi ne laso axova so ngavikalanu vivine lexe, 'Ai vivilo, eni axexenu lapipia utuxu se emaisou uai no ieni ne.” 5Uo kalavoi, nini naxexenu ovu alelaxu tatila to e uai no ieni teio. Mo so axone la nini nasaxi laixe so naxexenu lapipia utuxu se uai no iou vivine ne.
6Xe mamu so ngano'u mi ane Mosinge mukalipalanu lexe noxou u'isalili so nalosi'a ta'a'a. Xo masi ixiu la ingangasingesi ane. Mo mamu so ngapilixinu xapomenge lailaixe no laxune'i tameme. Xo loxo 'o io imalomaloxo'u usu'a vitanisi no tava'asi.
Loxo nenge talingau mimi laixe so xoluxolunenge la Mosinge ulosingesi
7La muvikala aloxo 'ola, “Eni avikalangengi lexe ngalinga noxou Mosinge laso anu ukolingengi. Xe mi ma'ia ngakamulinu la upalasinoxu noxinge. Mo loxo ngapolopolo no aitenga aneva la anu ukisinu noxinge ane. 8Xo anu ane ulinga la uxalisou lakolisou xe anu ane ukakamuli la mimi upalasi noxou xe anu ane upolopolo la aitenga ukisi noxousi. 9Loxo vile noxinge olu ulingau pileti noxou momu la axova, ulosou lavo'o, ne? 10O loxo olu ulingau sinana la momu ulosou milalako, ne? Uasi ane! 11Ioxe, ngingi tamitema so susu 'o, ngaxavutalane'i ta'ilinga so nga'itixa'a mimi lailaixe, laso axova noxou Maminge uxolu no tualasou lailaixe? Anu u'osa manina so ulosi'a mimi lailaixe so xoluxoluxa'a ane'i ane itatali'i noxou.
12No anu vote'i axova namasaxau lexe tamitema i'oxoneni la na'oxone'i axonesi. Xo anene temanu manina lo xe vaikalai'a tapolopeti.”
Iesua mulemolu aitenga kitua so ta'unalai no anu
13Xe muvikalala lexe, “Ngingi xavingengi so nga'unalai no anu aitenga ane kitua sesi. Xo aitenga e ulai no anu mamulo la tatila musuku laso maixene tavu'alo ipolo no anu vote'isou xo ixaxasi so imulinu. 14Ia aitenga e ulai no anu mauli la isusu'a sesi. Laso maixene tamitema ane ixalisou vote'isou mo imulinu la tata'ei mososi.”
Mupelototosi'a lexe ilaxa'i laixe noxi'a tapolopeti kalavoi
15La Iesua musolonu aloxo 'ola, “Ngingi ngalaxa'i laixe noxi'a tapolopeti kalavoi. Xo ane'i ilavusou ilemolu vaikala laixe so ixilisingengisi mo so ngakalavoi lexe ane'i tami talaixe loxo tasipisipi 'o. Ia uasi, a so i'oxo lolongengesi ane, xo loxo manina la imolo mamulosinge a loxo ta'a'a tavovasi. 16Laso vote'i so ngatongone'i aloxo 'o, ngatilovosou nene'axu xoluxoluxa'a. Xo tamitema ilai i'elesou uaini ngiaxu no anu ovu kitukitu loxo makole 'o uasi. Xe itaxusou viki ngiaxu no anu lamota ana'anaxu uasi. 17La anu axonesi, loxo ovu laixe la uxalixu nene'axu laixe. Xe ovu masua la uxalixu nene'axu masuasi. 18Ovu laixe uxalixu nene'axu masua uasisi. Xe axone kalumo no anu ovu masua, umomomo so uxalixu nene'axu laixe to uasi. 19Laso ovu mukalusi aneva uxalixu nene'axu laixe uasi la uxeta usu'a no navusi. 20Ioxe, vote'i so ngatongone'i tapolopeti kalavoi axonesi, ngatilovosou nene'axu xoluxoluxa'asi.
21Tamitema tavu'alo manina ilavusou ivikala noxilo lexe, 'Tatananexi, Tatananexi,' Ia avikalangengi lexe no voxo so Mosinge molu u'uli laxune'i tamitemaou no tualasou la tavu'alo noxi'a ane mimoxo'ilo axone ixolu nonano to uasi. Xo ane'i ta'ei ane imulinu masaxa noxou Mamilo e uxolu no tualasou, la ane'isisi i'unalai ixolu no voxo ne. 22Laso no voxo olele la tamitema latala ivikalaleli lexe, 'Tatananexi, Tatananexi. Nexi e te'oxonu xaixai so pela'a no anu ualasine a. Xe no anu ualasinesi tekusai'a ta'angelo tamasua mo te'oxonu sosovo so xavi a no anu ualasine nesi.” 23Ia no voxo anenesi eni avikalane'i lamana lexe, 'Eni alavusinge sevile uasisi. Ngingi tamitema so ilixo ane muxolaxola'u losi. Ngalai va'axu noxilo.'”
Latilovo so tani utulu no anu mi ma'ia
24Iesua musolonu mo mu'oxonu latilovo aloxo 'o, “Ioxe, loxo itema ulomusou vaikalaxeli 'o mo ulomuxu la anu itema so lavulavu mu'asi'asi. Anu loxo itema so utulusou tasou mo u'asou tanixu so tava'u utulu no lavo'osi. 25Utulusou xo xe ukalui la anipa toxoxu uxali. Uxali la la'avexu utuvusou tani ia umamulo uasi xo tava'u mutulu pumuxu no anu lavo'osi. 26Ia loxo itema ulomusou vaikalaxeli 'o xe ulomuxu uasi la uxovulaulau ane. Anu loxo itema utulusou tasou no anu io'isi. 27Utulusou xo xe ukalui la anipa toxoxu uxali. Uxali la la'avexu utuvusou tani sila tani ulume ka umamulo e lapilai uasisi.”
28Ioxe, Iesua mulanu vaikala anene xo xe a mukalusou 'oe laso tamitema latala mikulukemolu votovoto noxou. 29Mikuluke xo anu mulanu vaikala loxo tamitema so lavulavu no anu lavuloto uasi, anu votovoto noxou ne a no anu xavisi.
Atualmente selecionado:
Matiu 7: ATA
Destaque
Partilhar
Copiar
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fpt-PT.png&w=128&q=75)
Quer salvar os seus destaques em todos os seus dispositivos? Faça o seu registo ou inicie sessão
Copyright 1999 New Tribes Mission, Sanford, FL 32771-1487