Génesis 5
5
Adánnën rëbúnkikama ꞌiá bana
(1 Cr 1.1-4)
1Ënëx ka Adánnën rëbúnkinën anëkama kuënëokë ꞌikën. Uni uniokin ka Nukën ꞌIbu Diosan, asaribi ꞌitánun ꞌakëxa; 2ꞌakin ka bëbu ꞌimainun xanu ꞌakëxa, ꞌatankëxun ka upíokin sinánxukin kakëxa. A nëtë́an uni uniokë, a nëtën ka Dios kiakëxa: Ënëx ka uni kakin anëkë ꞌikën.
3Adán axa ciento treinta baritiañu ꞌain ka aín bëchikë Set a iskësabi ax bakë́ankëxa. 4Usakin ꞌatankëxun ka Adán ochocientos baritia tsókin ka bëbu ꞌimainun xanu okin bakë bëchipakëxa; 5usokin bakë bëchipatankëx ka novecientos treinta baritia sënë́mi tsóakëxa. Tsótankëx ka a bari ꞌiruax ñuakëxa.
6Set ax ciento cinco baritiañu ꞌain ka aín rëkuën bakë bëchikë Enós kakë ax bakë́ankëxa. 7Usakin ꞌatankëx ka Set ochocientos siete baritia, ꞌimi tsóakëxa, tsókin ka bëbu ꞌimainun xanuribiokin bakë bëchipatëkëankëxa; 8usakin bakë bëchipatankëx ka novecientos doce baritia sënë́mi tsóakëxa. Tsótankëx ka a bari sënënkëbë ñuakëxa.
9Enós ax noventa baritiañu ꞌain ka aín bëchikë Cainán bakë́ankëxa. 10Usakin ꞌatankëx ka Enós ochocientos quince baritia ꞌimikin ka bëbu ꞌimainun xanuribiokin bakë bëchipatëkëankëxa; 11usokin bakë bëchipatankëx ka novecientos cinco baritia sënë́mi tsóakëxa. Tsótankëx ka a bari sënënkëbë ñuakëxa.
12Cainán ax setenta baritiañu ꞌain ka aín bëchikë Mahalalel bakë́ankëxa. 13Usakin ꞌatankëx ka Cainán ochocientos cuarenta baritia sënë́mi tsóakëxa; tsókin ka bëbu ꞌimainun xanuribiokin bakë bëchipatëkëankëxa; 14usokin bakë bëchipatankëx ka novecientos diez baritia sënë́mi tsóakëxa. Tsótankëx ka a bari sënënkëbë ñuakëxa.
15Mahalalel ax sesenta ꞌimainun cinco baritiañu ꞌain ka aín bëchikë Jéred bakë́ankëxa. 16Usakin ꞌatankëx ka Mahalalel ochocientos treinta baritia ꞌimi tsóakëxa; tsókin ka bëbu ꞌimainun xanuribiokin bakë bëchipatëkëankëxa; 17usokin bakë bëchipatankëx ka ochocientos noventa ꞌimainun cinco bari sënë́mi tsóakëxa. Tsótankëx ka a bari sënënkëbë ñuakëxa.
18Jéred ax ciento sesenta ꞌimainun rabë́ baritiañu ꞌain ka aín bëchikë Henoc bakë́ankëxa. 19Usakin ꞌatankëx ka Jéred ochocientos baritia ꞌimi tsóakëxa; tsókin ka bëbu ꞌimainun xanuribiokin bakë bëchipatëkëankëxa; 20usokin bakë bëchipatankëx ka novecientos sesenta ꞌimainun rabë́ baritia sënë́mi tsóakëxa. Tsótankëx ka a bari sënënkëbë ñuakëxa.
21Henoc ax sesenta ꞌimainun cinco baritiañu ꞌain ka ain bëchikë Matusalén bakë́ankëxa. 22Henoc ax ka Nukën ꞌIbu Dios kuëënkësabi oi tsóakëxa. Usa ꞌain ka aín rëkuën bëchikë Matusalén bëchitankëx, Henoc ax tsóakëxa trescientos baritia, ꞌimikin ka bëbu ꞌimainun xanuribiokin bakë bëchipatëkëankëxa; 23usa ꞌaish ka Henoc kamabi aín baritia tsókë ꞌiakëxa trescientos sesenta ꞌimainun cinco baritia tsóakëxa. 24Henoc ax ka Nukën ꞌIbu Dios kuëënkësabi oi tsókë uni ꞌiakëxa, usa ꞌikë ka achúshi nëtë ꞌikëbëtan Nukën ꞌIbu Diosan bikëx nëtë́akëxa.
25Matusalén axa ciento ochenta ꞌimainun siete baritia ꞌain ka aín bëchikë bakë́ankëxa. 26Usa ꞌain ka Matusalén setecientos ochenta ꞌimainun rabë́ baritia tsoakëxa; tsókin ka bëbu ꞌimainun xanuribiokin bëchipatëkëankëxa; 27usa ꞌain ka novecientos sesenta ꞌimainun nueve baritia sënë́mi tsóakëxa. Tsótankëx ka a bari sënënkëbë ñuakëxa.
28Lámec ax ciento ochenta ꞌimainun rabë́ baritia ꞌain ka aín bëchikë achúshi bakë́ankëxa, 29a ka Noé kakin anëakëxa, ësai kikin: Nukën ꞌIbun ka me ꞌaisama oxa, usa ꞌain kananuna ꞌitsaira ñu mëi tëmëranuxun ꞌain; usa ꞌaínbi ka ënë tuákën nu tantiminuxun ꞌaia. 30Noé bëchitankëx, ka Lámec quinientos noventa ꞌimainun cinco baritia, tsóakëxa, tsókin ka bëbu ꞌimainun xanuribi bëchipatëkëankëxa; 31usa ꞌain ka setecientos setenta ꞌimainun siete baritia sënë́mi tsóakëxa. Tsótankëx a bari sënënkëbë ñuakëxa. 32Noé ax quinientos baritiañu ꞌain ka aín bëchikë bëbukama bakë́ankëxa, aín anë ka ꞌiakëxa Sem, Cam ꞌimainun Jafet, akamax ka Noénën bëchikë ꞌiakëxa.
Atualmente selecionado:
Génesis 5: cbrPB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 1978, 1995, 2008, 2022 Wycliffe Bible Translators, Inc. All rights reserved.