Matthew 9
9
Yesuusi Bollay Gunddeedda Bitaniyaa Patheedda
(Mar 2:1-12; Luq 5:17-26)
1Hawaappe kaalla Yesuusi wonggiriyaan geliide, abbaa pinniide, bare katamaa yeedda. 2Amareedda asay bollay gunddeeddda itti bitaniyaa shanchchamaan tookkiide, Yesuusakko aheeddino; Yesuusi unttunttu ammanuwaa be7iide, bollay gunddeeddda bitaniyaa, <<Ta na7aw, yayyoppa; ne nagaray atto geetetteedda>> yaageedda.
3Higgiyaa tamaarissiyaawanttuppe ittu ittu barenttu wozanaan, <<Laa ha bitani Xoossaa bolla iitabaa haasayeettee!>> yaagi qoppeeddino.
4Yesuusi unttunttu qofaa eriide, unttuntta hawadaan yaageedda; <<Hinttenttu hintte wozanaan hawa mala iitabaa ayissi qoppiitee? 5<Ne nagaray atto geetetteedda> yaagiyaawe mateeyee? Woy, <Dendda eqqaade hametta> yaagiyaawe matee? 6Shin sa7aa bollan nagaraa atto gaanaw taw, Asaa Na7aw, maatay de7iyaawaa taani hinttena erissana>> yaagiide, hewaappe guyye I he bollay gunddeedda bitaniyaa, <<Dendda eqqa; yaataade ne shanchchamaa tookkaade, ne golle ba>> yaageedda.
7Gunddeedda bitaniikka denddi eqqiide, bare golle beedda. 8Shin daro asay hewaa be7iide yayyeeddino; asaw hawaa mala maataa immeedda Xoossaa galateeddino.
Yesuusi Leewiyaa Maatoossa Xeeseedda
(Mar 2:13-17; Luq 5:27-32)
9Yesuusi hewaanna aadhdhiidde, Maatoossa yaagiyaawe qaraxaa qanxxiyaa saan utteeddawaa demmiide A, <<Taana kaalla>> yaageedda.
Maatoossikka denddi eqqiide, A kaalleedda.
10Yesuusi Maatoossa gollen qumaa maanaw utti de7ishshin, qaraxaa akkiya cora asaynne nagaranchchatuu yiide, aanannanne A kaalliyaawanttunna ittippe gayitaan utteeddino. 11Itti itti Parisaawatuu hewaa be7iide, Yesuusa kaalliyawantta, <<Hinttena tamaarissiyaawe qaraxaa qanxxiyaawanttunnanne nagaranchchatuwanna qumaa ayissi ittippe mii?>> yaageeddino.
12Shin Yesuusi unttunttu yaagiyaawaa sisiide, <<Hargganchchatuwaassappe attin, paxatuwaassi aakimii koshshenna. 13Shin hinttenttu biide, Xoossaa Maxaafay, <Taani maarotethaa koyyayppe attin, yarshshuwaa koyyikke> yaagiyaawe waagiyaawentto erite; ayissi gooppe, taani nagaranchchatuwaa xeesanaw yeeddawaappe attin, xillatuwaa xeesanaw yabeykke>> yaageedda.
Xoomaabaa Oochcheedda Ooshaa
(Mar 2:18-22; Luq 5:33-39)
14He wode Yohaannisa kaalliyawanttu Yesuusakko yiide, <<Nuuninne Parisaawatuu ubba wode xoomeetto; shin neena kaalliyawanttu ayissi xoomikkinoo?>> yaagiide A oochcheeddino.
15Yesuusi unttuntta, <<Bullachchaa yeedda asay machchatto akkiyawe barenttunna de7ishshin, kayyottanaw danddayiinoo? Danddayikkino; shin machchatto akkiyawaa unttunttu matappe afana wodii yaana; unttunttu he wode xoomanawantta>> yaageedda.
16<<Eca mayuwaa bolla ooratha dhefiyaa wothiide sikkiyaa asay baawa; ayissi gooppe, ooratha dhefii eca mayuwaa peedhereethana; peedhethaykka kasewaappe daranawaa. 17Ho77o woyiniyaa eessaa eca ogoruwan naa77iyaa asay baawa. Shin naa77ooppe, he woyiniyaa eessay ogoruwaa daakkana; barewukka woofettana; ogoruukka bayanawaa. Shin, ho77o woyiniyaa eessaa ooratha ogoruwaan naa77anaw bessee; laa77uukka baykkino>> yaageedda.
Yaa7iroosa Naattibaanne Yesuusa Mayuwaa Bochcheedda Mishirattibaa
(Mar 5:21-43; Luq 8:40-56)
18Yesuusi unttunttoo hewaa odishshin, Ayihude Woosa Golle kaappatuwaappe ittuu aakko yi A sinthaan gulbbatiide, <<Ta naatta ha77i hayqqaaddu; shin neeni yaade ne kushiyaa izi bolla wothaarikkii; iza de7uwaan de7anawunnu>> yaageedda.
19Yesuusi denddiide, barena kaalliyawanttunna ittippe bitaniyaa kaalliide beedda. 20He wode tammanne laa77u laythaa kumenthaa, izi bollaappe suuthay goggiyaa itti mishiratta guyyenna shiiqaade, Yesuusa mayuwaa macaraa bochchaaddu. 21Hawaa iza udowe, iza bare wozanaan, <<Taani A mayuwaa xalalaa bochchantto paxana>> yaagaade qoppaaddu.
22Shin Yesuusi yuuyyi izo xeelliide, <<Ta naattee, yayyoppa; neena ne ammanuu patheedda>> yaageedda. He man77iyankka mishiratta paxaa aggaaddu.
23Yesuusi Ayihuda Woosa Golle kaappuwaa soy gakkeedda wode, yeekuwan dinkkaa punniyaa asaanne yeekkiyaa asaa be7iide, 24<<Kare kesite; guutha naatta gemi77ishaadduppe attin, hayqqabeykku>> yaageedda. Hewaappe guyyiyan asay A bolla darii miicceedda. 25Shin cora asaa kare I kesseeddawaappe guyyiyan, golle geliide, naatti kushiyaa oyqqeedda; naattakka dendda aggaaddu. 26He waarii, he man77iyankka he gadiyan ubbaan sisetteedda.
Yesuusi Laa77u Qooqatuwaa Patheedda
27Yesuusi hewaanna aadhdhiide biyaa wode, laa77u qooqatuu barenttu qaalaa dhoqqu udiide, <<Daawite na7aw, nuuna maaraarikki>> yaagiidde A kaalleeddino.
28Yesuusi golle geleedda wode, qooqatuu aakko yeeddino; Yesuusi unttuntta, <<Taani hawaa oothanaw danddayiyaawaa ammaniitee?>> yaageedda.
Unttunttu, <<E Godaw>> yaagi zaareeddino.
29Hewaappe guyyiyan, Yesuusi unttunttu ayfiyaa bare kushiyaan bochchiide unttuntta, <<Hinttew hinttenttu ammanuwaadan hano>> yaageedda. 30Unttunttu ayfii dooyetti aggeedda; Yesuusi unttunttoo, <<Hawaa oossinne odoppite>> yaagiide minissiide odeedda. 31Shin unttunttu biide, he gadiyaa ubbaan Yesuusabaa odeeddino.
Yesuusi Itti Duudiyaa Patheedda
32Unttunttu kesiide biya wode, amareedda asay iita ayyanay oyqqina duudeedda bitaniyaa Yesuusakko aheeddino. 33Yesuusi iita ayyaanaa kesseeddawaappe guyyiyan, duude bitani haasayeedda. Asay, <<Hawe oorathabaa; hawaa malabay Isra7eeliyaa gadiyaan ubbakka hanibeenna>> yaagi maalaletteeddino.
34Shin Parisaawatuu, <<I iita ayyaanatuwaa kaappuwaa wolqqaan xalahatuwaa kessee>> yaageeddino. #10:25; 12:24; Mar 3:22; Luq 11:15
Yesuusi Asaassi Qaretteedda
35Yesuusi unttuntta Ayihuda woosa golletuwan tamaarissiiddenne kawutethaa wonggalaa mishiraachchuwaa odiidde, qassi harggiyaa ubbaappenne sakuwaa ubbaappe asaa pathiidde, wogga katamatuwaninne qeeri katamatuwaa ubbaan yuuyyeedda. #Mat 4:23; Mar 1:39; Luq 4:44 36Cora asaa be7iide, heemmiyaa asay baynna dorssaadan asay hirggettiyaa dirawunne asaa maaddiyaabay baynna diraw, asaw qaretteedda. #Pay 27:17; 1Kat 22:17; 2Od 18:16; Hiz 34:5; Mar 6:34 37Yaatiide barena kaalliyaawantta, <<Qoychchaw gakka kathay dara; shin cakkiyaa asay guutha. 38Simmi kathaa Goday kathaa cakkanaw oosanchchatuwaa yeddana mala, A woossite>> yaageedda.
Atualmente selecionado:
Matthew 9: dwrNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2011, Wycliffe Bible Translators, Inc. All rights reserved.
Aprenda Mais Sobre Ooratha Caaquwaa