Matta 3
3
Yuuẖanna al Maⓐmadaan a dhuŋun dhina dhabiŋwu
1A ŋwamun ibiŋwe a Yuuẖanna al Maⓐmadaan ila, ŋwodaijo lijo gi leba la Yahuudiiya, 2ŋwarnu, Urlul dugore galo dalo ŋidi ŋina ŋike; ŋinena jo gidhila ga Sama githo. 3Ŋeda gwiro ibigwa gwina gwabiŋadhina Ishaⓐya gwina gwiro nebi, ŋwarnu, Gwulo gwa kwiji gweta gwina gwa gwuro gwula gi leba, ŋwarnu, Jarimudhul Kwelenya dhai, nyadhuneye dai galo duŋun. 4Yuuẖanna gwathigena jola ja kamila, ŋwugena gash gina giro kurna kwiriny; athuŋw eny jama a lai. 5A liji peth la Urushaliim a la Yahuudiiya ela dugun, a liji peth lina lijo githigitho Urdun. 6Ŋwulⓐamidhiye gi dhibirtha ganu dhina dhan Urdun, lina lathi teje ŋida galo ŋegen ŋina ŋike. 7Abi dina muŋwaŋa Farriisiyiin a S̱adduugiyiin deladha dugun di maⓐmuudiiya, ŋwulabiŋaijo, ŋwulaici, Nyaŋa lina liro ŋinena keleŋa ga juma, eibi gwimajolajo dabire gi kadhugore gwina gwaji gwila? 8Apul fruuta gwina gwaudhi gwa dhurle dugore galo ŋidi ŋina ŋike. 9Athathanya abiŋinu gi dugor ganu dalo, nyalarnu, Anaŋa lai uthi Ibraahiimuŋw gwina gwiro babo gwuri no; abi nyi gwa gwacaijinu, Kalo guthi ŋoma gamidinijo Ibraahiimuŋw nyolya ibinya keleŋa. 10A ŋinena ŋure ŋa ŋijalo duwa nono da jari; a jari peth jina jati jathirire fruuta gwina gwiŋir no jaji jurtudhini galo, a ja guthini kiga. 11Titiganu nyi gwathaji ⓐamidhiye ŋau ŋai durle dugore galo ŋidi ŋina ŋike; abi gwina gwa gwigwujiny gidon gwinunu diginy, a nyi gwati gwiŋir diny wala caudhe ja ŋwora ŋwuŋun no. Ŋeda gwaji gwajiⓐamidhiye Dhigirim dhai dhina Dhiŋir a iga yai. 12Gwuthi gwatagira gi dhoi dhuŋun gwa dhiwureje ŋwona ŋwuŋun liduŋw, a gwaji gwabuluje ŋwona ŋwina ŋwiŋir ŋiluŋw ganu ŋuŋun, abi gwaduni dhirda iga yai ina yati yathai no.
Maⓐmuudiiya gwa Yasuuⓐ
13A Yasuuⓐ ila Jaliil di Yuuẖanna Urdun, ŋwari gwal ⓐamidhiye. 14Abi Yuuẖanna ari gwuŋw wure, ŋwaicinu, Nyi gwiro gwina gwibupaŋa dari ŋa gwinyi ⓐamidhiye, ŋa beladha diginy a? 15Abi Yasuuⓐ abiŋaijo, ŋwaici, Abrico ŋwuthi je ganu ŋinena; minoŋ gwiŋiranu dada meaje dhuŋuna peth dhina dhiŋir. A Yuuẖanna ⓐamidhiye. 16Dina ma Yasuuⓐ apai maⓐmuudiiya, ŋwun tudhadha ganu ŋau ganu; a Samawaat igiyini, ŋwaŋa Dhigirima dha Kalo dula, ŋwunje alaŋ dhiro ŋinena kiridhir. 17Aldiŋini gwula Samawaat, ŋwarnu, Ŋari ŋiny ŋiro ibiŋa ŋina ŋuminyiny, ŋina ŋathiny iŋiriye dhugore.
Atualmente selecionado:
Matta 3: HBN
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
First published by the British and Foreign Bible Society in 1966.