Genesis 42
42
1Bhodïrï go Jakobo kajioma sai oidaga tïrhigi gamo Ejiptuamu. Daidi potïtïdai ïgai maamaradï,
—Tuixi mos aipako nïnïnai aapimï darajatai— itïtïdai. 2—Mïï Ejipituana as muidu tïrhigi. Mïïka abïr gasabïda tïtai mai koi aatïmï bhiugigaikïdï— itïtïdai.
3Bhodïrï bhaibuxtamatai iji xixïgidï Jose gamo Ejiptuamu dai mïïka gasabïdamu tïrhigi. 4Mosïka Benjamin mai oi go gaa. Ïgai ïr sukurhidï Jose dïïdïkïdï dai ogadïkïdï. Dai Jakobo ïbhïidi ix xïduñada ixtumaxi Kaxkïdï mai dagito ïgai xi imiagi. 5Dai mai xu mosïka Jose xixïgidï ïgai dai iji gamo Ejiptuamu. Ka toma xako imïitadai go bhiugigai ami Kanaanïrï xi kaxkïdï toma xajadïrï iimïitadai jaa saapïdadami ïpï tïrhigi.
6Dai go Jose ïgai Daidi ïr gatïanïdami ami Ejipituana go tïrhigi dai gaagarhiña ix makïdï xibhïadïrï daibuiña. Kaxkïdï dadakai xixïgidï Jose sai mos kuiki ïgai buidïrï Jose. 7Dai Jose oton máí xixïgidï bai xixïgidï mai máí. Dai go Jose bhagaididan dukai ñokidi daidi potïtïdai,
—Madïrï oidakami aapimï— itïtïdai.
—Kanaanañdïrï oidakami aatïmï. Mïïkadïrï dada aatïmï dai sabïda rïrhidi tïrhigi— itïtïdai xixïgidï.
8Dai go Jose gia kïï máí xixïgidï dai go xixïgidï ïgai gia maiti máí go Jose. 9Dai go Jose tïgito ix ïkioma tïïtïkimi ïgai sai xixïgidï buidïrï kuiki agaitadai. Daidi itïtïdai ïgai,
—Maiti ïr buaboi ix duu aagai aaimï— itïtïdai Jose. —Aanï kïï maatï sai bhai gobai gïn otoi gïn tïanïdamiga. Maatia ïrhidi ïgai ix xïï kïïga gïr nukadai aatïmï. Gïr bui surhigia ïrhidi aapimï ïmadï gïn aaduñi kaxkïdï. Mos nïida ïrhidi aapimï xajadïrï gïr aiyagi dai dada tudu— itïtïdai.
10—Cho dunukami— itïtïdai xixïgidï. —Aatïmï mos sabïda ïrhidi tïrhigi di dai dada— itïtïdai. 11—Ïmo xïgïmï aatïmï bïïxkatai dai kïï tutuiga. Xadïrï gïn bui surhigïna aatïmï— itïtïdai xixïgidï Jose.
12—Yaataboga aapimï— itïtïdai Jose. —Mos dada aapimï dai nïida ïrhidi xajadïrï kïï gïr buidïrï aiyagi aapimï ïmadï gïn aaduñi— itïtïdai.
13—Daiñi— itïtïdai xixïgidï. —Bhaibuxtama dan gokadukana aatïmï mos arhi ïmo xïgïmï— itïtïdai. —Dai mos arhi ïmaduga gïr oga. Ïmoko gïr sukurhi ka mai tipu dai ïmoko gïr sukurhi arhidukïdioma mïï kiiyïrï bii ïmadï gïr oga— itïtïdai.
14—Ïï kaxi ïr buaboi ix dukai aagai aanï. Gïr buidïrï surhigia ïrhidi aapimï ïmadï gïn aaduñi— itïtïdai Jose. 15-16—Adukai maatïkamu aatïmï xi bhai maiti ïr buaboi. Daiñi— itïtïdai. —Ka mai iimimu aapimï tabhiadïrï asta dibiakai gïn sukurhi— itïtïdai. —Otosamu aapimï ïmoko sai mïïkadïrï buapana gïn sukurhi dai go gaa maamaixamu aanï. Podukai nïidamu aatïmï sa bhai ïr buaboi sai bia aapimï ïmoko gïn sukurhi. Ix maiti ïr buaboika gobai aidï gia ïr buaboi sai gïr buidïrï surhigia ïrhidi aapimï— itïtïdai Jose. —Ka aagai aanï dai go Rey ïgai dai gin maa gubukadagai ix potïdagi— itïtïdai.
17Dai bhodïrï Jose mamaixa xixïgidï baika tasai. 18Daidi gokiïr itïtïdai ïgai,
—Aanï xadutudai Diuxi dai kaxkïdï gïn soiñamu aanï dai ix gin ïïgiadagi aapimï ka mai xïduñimu aapimï— itïtïdai. 19—Ka aagai aapimï saidi ïr kïï tutiakami aapimï dai nïidamu aatïmï sa bhai ïr buaboi. Tanaxi maixakaruana abïr bia ïmadutai aapimï daidi abïr bhïka kuadagai dai buapida gïn aaduñi— itïtïdai. 20—Bhodïrï abïr bhaigo buapa gïn sukurhi. Ix buapagi aapimï gïn sukurhi aidï gia kaxi gï maatïkamu xi kïïgakïrï buaboi aagai aapimï xi ïr kïï tutiakami aapimï. Dïï ix mai buapagi aapimï gïn sukurhi gïn kodamu aatïmï— itïtïdai Jose.
Dai xixïgidï bhai aa podukai. Dai iji ïgai Ejiptuañdïrï dai bhïkai kuadagai aaduñdï amïka Kanaanïrï. Dai ïmoko ïgai maixakaruana bii Ejipituana.
Atualmente selecionado:
Genesis 42: NTP
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Copyright: Ethnos360 Sanford, Florida