Genesis 37
37
1Bhodïrï mui umigikïdï go Jakobo dibia ïpamu Kanaanïrï xako oidakatadai ogakarudï dai ami oidatu. Ami bua ïgai bïï maakoba go oki ix makïdï ïmadï daja ïgai ïmadï maamaradï. 2Idi ojai aagai aaduñdï go Jakobo.
Ïmadutai go oki ix makïdï Jakobo ïmadï dakatadai Bhilka tïgidu dai ïmai Silpa. Maamaradï go Bhilka ïmadï Silpa nukadakana Jakobo sosoigadï kañiñiru dai Jose soikïiña. Go Jose ïr maradï go oki Rakel tïgidukïdï ix makïdï ïmadï dajatadai go Jakobo ïpï. Aidï go Jose biakatadai bhaibuxtama dan kubarakami umigi. Dai xudu mai kïï buadana xixïgidï sai Jose mïï aagidiña ogadï.
3Kaxi ïr kïrhiodamikatadai go Jakobo aidïxi maara ïgai go Jose kaxkïdï bamioma oigïdaiña ïgai go Jose xi bhai xixïgidï dai idui ïmo basaragai kïï tiodikami dai maa go Jose. Go Jakobo Israel tïgidukana ïpï. 4Dai Jose xixïgidï kïïdaiña Jose nïiditai xi bamioma oigïdaiña ogadï. Dai tomarhi mai biaturhiña ïgai xako tïïgiagi go Jose.
5Ïmo imidagai tïïtïkimi Jose dai aagidi xixïgidï ix tuma tïïtïkimi ïgai xi gokïdï apia bamioma kïïdaiña ïgai.
6—Tïïtïkimi aanï dai gïn aagida in ïrhidi ix tuma tïïtïkimi aanï— itïtïdai go Jose. 7—Tïïtïkimi aanï sai guikomai aatïmï tïrhigi. Sïïrhi kïkiba ïraana ix makïdï buu aanï dai ix makïdï guikomai aapimï bïï xikorhi mos koidamu kuikïskïdan buayi dai xadutuadan dukai ibuayi buidïrï ix makïdï buu aanï— itïtïdai.
8Dai xixïgidï Jose itïtïdai,
—Aapi ix tudu daidi ïr Rey ka agai dai gïr tïanïda agai— itïtïdai.
Xi gokïdï apia bamioma kïïdaimi ïgai Jose kaïkatai aatagidï ix dukai aagai ïgai aagaitai tïïtïkidï.
9Bhodïrï ïpïpï tïïtïkimi go Jose dai aagidi xixïgidï,
—Ïpamu tïïtïkimi aanï— itïtïdai. —Tïïtïkimi aanï go tasai ïmadï masadai dai bhaibuxtama dan ïmo xixabugai gin buidïrï kuiki— itïtïdai.
10Jose aagidi ogadï ïpï ix tïïtïkimi ïgai xi ogadï bhagaidi daidi potïtïdai,
—Maiti gï agai ix podukai ñokada aapi— itïtïdai. —Aanï ix tudu kuikïskïda iñagai gï buidïrï ïmadï gï daada dai gï xixïgi dai gï xadutuadamu— itïtïdai ogadï.
11Dai go xixïgi ïgamu buidïrï go Jose. Dïï ogadï gia mos tïgito aimïraiña tïïtïkidï ïgai,
—Maatï xi buaboi busiagi gobai ïpï— gï ïrhidi ïgai.
12Ïmo imidagai iji xixïgidï Jose Xikemamu. Gaaga agai xako tïigia ogadï sosoigadï kañiru. 13Dai ogadï go Jose gokadu tïtiaradï, Jakobo dai Israel. Daidi itïtïdai ïgai go Jose,
—Imiñi gamo Xikemamu nïida gï xixïgi bako nukadai ïgai kañiñiru— itïtïdai Israel.
—Ïjï imimu aanï— itïtïdai Jose.
14—Kïïgadu— itïtïdai Israel. —Mïïka nïnïaba gï xixïgi sa dukatai daraja dai dibiakai gin aagida— itïtïdai ogadï go Jose.
Dai go Israel, go ogadï Jose, dïjoana dajatadai xako Hebronïrï tïgidu oidigi aidï dai abhiadïrï otoi ïgai Jose. Dai sikemïrï ukami ayi go Jose dai bhodïrï xibhï bua boi.
15Dai ïmo kïïrhi tïï no xibhï oidigana daidi potïtïdai,
—Pïx tuma gaagaimi— itïtïdai go gïmai kïïrhi.
16—Gaagaimi aanï gin xixïgi— itïtïdai Jose. —Maiti pïx nïidi xako nukadai ïgai kañiñiru— itïtïdai.
17—Kaxi ti iji— itïtïdai go kïïrhi. —Dotanamu imiadan kaiti— itïtïdai.
Dai Jose mïï Dotanamu gaagamu xixïgidï dai tïï.
18Mai kia ayi go Jose amïka xako daraja xixïgidï dai xixïgidï ka mïkaxdïrï tïï dai bhai dui ñoki xi gïbiña agai.
19—Bhodïrï imïi ix makïdï bïïxkïrï tïïtïkiïrï gïr tïanïda agai— ikaiti xixïgidï. 20—Tïtai gïbiña dai mïï daituda xako gïï dïïga oidigi dai tïdagi sai ïmo kïixi ïgai dai mua. Aidï gia ka nïidamu aatïmï sa bhai buaboi busakïi tïïtïkidï— ikaiti ïgai.
21Dïï ïmo xïgidï Jose ix makïdï Rubén tïgidu kaïkatadai aatagidï ix kaiti go gaa dai soiña ïrhidi go Jose. Dai itïtïdai ïgai go gaa,
—Maitï aagai mïx gïbiñagi— itïtïdai. 22—Bhaiyoma adukai duakakami abïr dïgakana baasa no oidigana dai mai xu soi doada—itïtïdai.
Ipïrhiditadai ïgai ix soiñagi Jose dai ïpamu mïï tïïgiadagi ogadï dai pokaiti.
23Bhodïrï ayi Jose amïka xako darajatadai xixïgidï dai xixïgidï bopoji baasaradï ix makïdï gï aadatugai go Jose. 24Dai bhïkai ïgai go Jose dai mïï gïï dïgakïrï daitu. Mai tipukatadai sudagi ami dïgakïrï.
25Dai bhodïrï xixïgidï darakatai gakuayi dai tïï chïki gaagaradami ix no gukigi. Ejipto amakoga iimïdami ïgai dai mïïkaxdïrï iji xako Galad tïgidu oidigi. Dai sosoigadï kamemeyo gïï kusu iimïi kïï bïïñakan ubaikami kuadagai ïmadï perfume dai duduadigami maaxi.
26Dai Juda potïtïdai go gaa,
—Tumaxi ïr soiñi ix gïbiñagi aatïmï gïr sukurhi daidi ïxtoagi tukugadï— itïtïdai. 27—Maitï aagai ix gïbiñagi aatïmï. Bhaiyoma gagaldamudai aatïmï go gaagaradami dai mai xu ix gïbiñagi aatïmï. Gïr sukurhi gobai di— itïtïdai.
Dai go gaa xixïgi bhai aa podukai ïpï. 28Bhodïrï xixïgidï busaitu go Jose ïpamu dïgakaiñdïrï aidïxi ka dïgabusai go gaagaradami dai gagalda agai. Ïmokobhai tuminxikïdï plata gagara ïgai. Dai go gaagaradami bhïkai go Jose dai gamo Ejiptuamu gagaara agai ïpamu.
29Dai go Rubén no xibhïkai aimïraitadai aidï dai mai maatïkatadai mïx ka gagara go Jose. Dai ïpamu dibia ïgai dïgakana dai amïï nïnïaba dai ka mai tipu go Jose. Xi go Rubén ïï saasarai yukuxidï soi gï ïrhiditai.
30Dai ami dibia ïgai xako darajatadai susukurhidï daidi potïtïdai,
—Ka mai tipu go gïrhi. Xibi dukatai duñimu aanï— itïtïdai.
31-32Dai go xixïgidï Jose mua ïmo xibato dai ïgaikïdï ïramagi baasaradï Jose dai mïï tïïgi ogadï.
—¿Idi ix tudu ïr baasaradï gï maara?— itïtïdai.
33Dai oton máí ïgai daidi itïtïdai,
—Ïjï ïgai aba— itïtïdai. —Aaji, ka kuuku kïixi. Ka bïï naato laalachi dáí tukugadï gin maara— ikaiti.
34Daidi saasarai Jakobo ïïgi yukuxidï soi gï ïrhiditai dai gï aa kostarhikïdï duñixikami yukuxi. Bhai tïbïpi daja ïgai gï aadaitai kostarhi yukuxi dai mos tïïtïitoiña maradï. (Odami ïkioma saasasaiña yukuxidï dai gïn aadaiña kostarhi duñixikami yukuxi podukai xuduku kabami soi gïn ïrhiadagi. Podukai maaxtugaiña xi kabami soi gïn ïrhidi ïgai.)
35Dai dada Jakobo maamaradï modukai kïkïïrhi ïmadï oki soiña ïrhiditai ix mai gobai imiagi soi ïrhiaradï. Dïï apia dukai soi gï ïrhidi ïgai. Daidi ikaiti go Jakobo,
—Ix xïï tïbïpi daja aanï tami oidigi dama mos apia soi gin ïrhiadamu aanï tïïtïitoitai gin maara dai bhodïrï nïidamu aanï ïpamu ka imïdakai tabhiadïrï— ikaiti ïgai.
36Dai go Madianitas ix makïdï ïr gaagaradami dai gasabïrhitadai baidaja go Jose gamo Ejiptuamu. Dai ami gagarhi ïgai ïmo dunukami Potifara tïgidukami. Kapitañigadï ïgai go nunukadakami kiidïrï go gïï Rey ami Ejipituana.
Atualmente selecionado:
Genesis 37: NTP
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Copyright: Ethnos360 Sanford, Florida