Mag 13
13
Yeso ya ghà imbə̀ʼ icheg ne mbi biri buʼ Mbàn Ŋwiye
(Mat 24:1-2; Lug 21:5-6)
1Anyumə̀ ne Yeso yaya dùwə̀ inga mbàn Ŋwiye, àmə̀nənùg məd mɔ̀ʼɔ ya ghà ibo gha, “Àchwitìnùg, Nḛ ateg chɔm chɔm, bə̀ nḛ nəb chɔm chɔm!” 2Yeso ya ghà ibo gha, “Àghò bàd nəb kyen kyen ìto̰? Chəyi iteg mɔ̀ʼɔ imɔʼ ne biri chughi igun ìwi ndəŋ. Mbi biri sàkì ateg ze ajìm aseg.”
Mə̀mə̀nənùg Yeso biri zə̰ ngəʼ, mbi bə̀ chɔʼ ìmbɔb ibɔʼì ighog
(Mat 24:3-14; Lug 21:7-19)
3Anyumə̀ ne Yeso ya chughi aseg ikaŋ iwum mə̀Olìf, ane aba ze ne nḛ̀ ane mbàn Ŋwiye, Pità tì Jem tì Jɔn fɔrɔ Andrò ya biri ibo məyi məd tèzìʼì gha, 4“Gha ina, anug azo̰ kə ghum dù anyumə̀ weg? Aneni ze ne biri chwi gha nyùmə̀ fə kòʼ ne inug mbo̰ biri dù àkə aghə?”
5Yeso ya ghà inɔb gha, “Mbə̀ we awən imbə̀ʼ wə̀d mɔ̀ʼɔ ghì mbə̰ fèbè. 6Bəd nɔʼ nɔʼ biri yeʼe niŋ ìmə ikum yḛ̀ nè gha, ‹Mo ya Wə̀d we ne Ŋwiye zɔ̀ʼi!› Mbi biri ghà ane fèbrì bəd nɔʼ nɔʼ. 7Anyumə̀ ne mbə̀ zughi gha iben mbe màʼà ibid, bə̀ zug inug imbə̀ʼ icheg ne bəd mbe kə̀b màʼ ibid, imbə̀ʼ mbə̰ bɔ awən. Inug mbo̰ beri dù, si ya gha kayi kiri nyumə̀ ne isəg biri nwḭ̀yḛ̀ we. 8Iben biri màʼ ibid tì iben ndəŋ. Iben ne məfɔn mbe tùmbə̀ bə̀ màʼ ibid tì iben ndəŋ ne məfɔn mbe tùmbə̀. Ìseg biri ghùd isiŋi isiŋi, njèg ka ka bə̀ nyi. Inug mbo̰ ya icheg ne àyi ko ni zug tibuʼ anyumə̀ ne we nɔ̀mbɔ.”
9“Si ya gha, mbə̀ we awən. Mbi biri gwi awən nàʼ abə itog bəd ne sàʼa aben. Mbi biri sɔm awən inga məchamì Ŋwiye. Mbə̰ biri təm imbìghè mə̀gɔbnà bə̀ təm imbìghè məfɔn ane ìmə ikum ni ghà ikən chɔm inɔb. 10Mbə̀ kyeri gha mbi biri bi ghà ikən chɔm inga iben ijìm bɔŋ ìnwḭ se yèʼe. 11Anyumə̀ ne mbi gwi awən ghò imbìghè itog bəd ne sàʼa aben, imbə̀ʼ mbə̰ nwìʼè awən nyɔd imbə̀ʼ anug ne mbə̀ biri ghà. Mbə̀ gha məyi anug ze ne Ŋwiye gha inən ane nyùmə̀ we imbə̀ʼ icheg ne à ya Azwighi Ŋwiye ghàmà, kayi mbə̰. 12Ifi biri fḛ ìwi ifi gha mbe zweti, mbaʼ bə̀ fèn ìwi ŋwan gha mbe zweti. Bɔn biri bəŋi atog abɔ̀ʼ ìmbɔb mə̀mbaʼ bə̀ bəŋi abɔ̀ʼ mbɔb mbi ngɔb, ane ghì gha mbe zweti awɔb. 13Bəd məjìm biri bàn awən imbə̀ʼ amə, si ya gha, wə̀d we ne nyìʼi ghò pè ane ìnwḭ, Ŋwiye biri chì aməd inga ngəʼ.”
Aghi ze ne ghì gha bəd buʼ Mbàn Ŋwiye
(Mat 24:15-28; Lug 21:20-24)
14Yeso ya gha, “Anyumə̀ ne mbə bàrà ‹Aghi ze ne ghìyə̀ gha bəd wèghè mbàn Ŋwiye›, ne mbi nɔŋi abɔ̀ʼ àze ne chəyi mbi kə̀ beri ni nɔ̀ŋì angu (atog abə wə̀d we ne fɔ̀ŋɔ ze zen), bəd mbe ne yaʼi a Jùdeyà mbe nòrò kɔʼ ikaŋ tiwum. 15Imbə̀ʼ wə̀d we ne yaʼi igun idɔm nəb swìʼe yi, kə̀ bì nyi inga nəb ni niŋ ighi mɔ̀ʼɔ. 16Imbə̀ʼ wə̀d we ne yaʼi a mben ywiri bə̀ndə yi ni ghò niŋ ìzi ndwi màʼi. 17Ngəʼ biri nyi igun mə̀yi mbe ne yaʼi tì ibum, bə̀ nyi igun mbe ne nyɔ̀ŋɔ bɔn inga ineg mbe! 18Mbə̀ chaʼra Ŋwiye gha imbə̀ʼ inug mbo̰ yaʼ yi ane nyùmə̀ we ne ifə taŋ ko, 19imbə̀ʼ icheg ne ngəʼ ze ne biri dù inga ineg mbe biri chè ngəʼ ijìm ze ne kweʼì dù ko ane Ŋwiye ya tangi isəg yèʼe pè tèchɔ̀ŋ. Chəyi iku ngəʼ ndəŋ biri ywiri nɔʼ dù icheg izo̰. 20Àkə aghi ne chəyi Anɔŋisəg ya fə sɔbri inun ineg mbe, nji chəyi wə̀d mɔ̀ʼɔ biri pum. Wì ya sɔbri imbə̀ʼ bəd mbe ne məd chɔʼi.
21Wə̀d mɔ̀ʼɔ mə̀ ghà inən ane nyùmə̀ we gha, ‹Mbə̀ Nḛ, aŋa ya Wə̀d we ne Ŋwiye zɔ̀ʼi.› Kə̀ gha, ‹Mbə̀ Nḛ, à ya məd we!› Imbə̀ʼ mbə̰ bḛ awən. 22Mə̀kristo ako ne biri gha mbɔb ya bəd ne Ŋwiye zɔ̀ʼi, tì bədkə̀n ne ghà inug ako biri dù, ane ghì ineni inug bə̀ ghì inug yeti, imbə̀ʼ fèbrì bəd. Ze mə̀ chwi, mbi fèbrì bəd mbe ne Ŋwiye chɔ̀ʼi. 23Ane, mbə̀ we awən. Mə fə ghà inug ijìm inən bɔŋ nyùmə̀ we se kòʼò.”
Ŋwan Wə̀d biri ywiri yeʼe
(Mat 24:29-31; Lug 21:25-28)
24Yeso ya ghà abə ìmbi mə̀mə̀nənùg gha,
“Inga ineg mbe, ane ngəʼ ze fə che yi,
‹nyùmə̀ biri fin,
chəyi iməg biri bə zuʼ
25titəm biri nɔ̀ʼ ikaŋ fendi aseg.
Ŋwiye bə chì izwighi ijìm mbe ne yaʼi ikaŋ.›
26Ane nyùmə̀ we, bəd biri bàd Ŋwan Wə̀d ne yèʼe inga pàʼ, bàd ika kyen we ne wì beri bə̀ bàd ighumni we ne wì bə bèri. 27Wì biri tɔm ìmbi mbè angirə̀ gha mbe feti bəd məd mbe ne wì chɔʼi ane tibug isəg te tikwè. Mbi biri ko feti ane ìnwḭ iseg ghò pè ìnwḭ ikaŋ.”
Anug ne tì bəd nani ane azed fig
(Mat 24:32-35; Lug 21:29-33)
28“Mbə̀ nani anug mɔ̀ʼɔ ane azed fig. Itog bɔd mə̀ dù se chə̀ʼrə̀, mbə̀ kyeri gha ichi fə tinde. 29À ya bə̀ ane ne mbə̰ mə̀ bàd icheg ne inug mbo̰ ghiyə, mbə̀ kyeri gha nyùmə̀ we ne Ŋwan Wə̀d biri ywiri yeʼe fə tinde, ane wì fə si yi ichug ikam. 30Mə gha tesiʼ inən gha, Chəyi ìwaŋ bəd gho̰ biri chè ne chəyi inug mbo̰ ijìm du. 31Ikaŋ fɔrɔ ìseg biri chè, si ya gha chəyi ìmə ìngam biri nɔ̀ chè atog ako.”
Chəyi wə̀d mɔ̀ʼɔ kyeri aneg ze kə̀ nyùmə̀ we ne inug mbo̰ biri dù
(Mat 24:36-44)
32Yeso ya chè imbìghè ghà inɔn gha, “Chəyi wə̀d mɔ̀ʼɔ kyeri aneg ze kə̀ nyùmə̀ we ne inug mbo̰ biri dù, ka bèyi mbè angirə̀ mbe ne yaʼi ikaŋ kə̀ bə̀ Ŋwan. À ya məyi Mbaʼ tèzìʼì wì kyèri. 33Ane mbə̀ we awən, chughi ikyèʼi imbə̀ʼ icheg ne chəyi mbə̀ kyeri nyùmə̀ we ne Ŋwan Wə̀d biri ywiri yeʼe. 34A ze icheg ne wə̀d ghò ŋa yḛ̀ yi. Bɔŋ wì se dù inga nəb, wì biri fə nàʼ àfàʼì abə ìmbi bəd àfàʼì, wə̀d tì àze àfàʼì, ìwi ndəŋ tì àzin. Wì biri bi ghà abə wə̀d ne kyèʼè achan gha wì chughi ikyèʼi. 35Ane, mbə̀ chughi ikyèʼi imbə̀ʼ icheg ne chəyi mbə̀ kyeri nyùmə̀ ne wə̀d nəb biri yeʼe. Wə̀dnəb we tì wì yèʼe ikwikwiri, kə̀ izimi ka, kə̀ ane inɔm ngub we tɔ̀ŋɔ, kə̀ isusu. 36Imbə̀ʼ wì sàʼa yèʼe yi pè bàd awən ne mbə gwḛ awən. 37Ane, anug ne mə ghà inən, ya anug ne mə̀ bə̀ ghà abə bəd məjìm. Anug ze ya gha, ‹Mbə̀ chughi ikyèʼi.›”
Atualmente selecionado:
Mag 13: MBTP
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2019 CABTAL