isizwur 3
3
taḍuri n‑adam d‑ḥuwa
1ig‑ulgʷmaḍ aḥili uggʷar n‑kullu luḥuš lli‑iskr sidi rbbi. yini‑ulgʷmaḍ i‑tmġart: «izd s‑ṣṣaḥt inna‑yawn rbbi ‹a‑ur‑tšttam zġ‑kullu iṣġarn n‑talɛrṣt›?» 2tini‑tmġart i‑ulgʷmaḍ: «lġllat n‑iṣġarn ġ‑talɛrṣt, izri‑aġ a‑zġ‑gisnt‑nštta, 3walaynni yuṣṣa‑yaġ rbbi: ‹a‑ur‑tššm zġ‑lġllt n‑tṣġart lli‑illan ġ‑tuẓẓunt n‑talɛrṣt ula tggrm‑as, ad‑ur‑tmmtm.› » 4yini‑ulgʷmaḍ i‑tmġart: «uhu, ur‑ra‑tmmtm. 5walaynni rbbi issn, iġ‑zġ‑gis‑tššam rad‑rẓmnt‑walln‑nun twrrim tgm zund rbbi, tissanm ma‑ifulkin ula ma‑yʷh̬šnn.» 6tẓr‑tmġart is‑tfulki‑tṣġart ġ‑iẓri ula i‑umššu, tẓr ula is‑tẓḍar ad‑asn‑tfk tafhimt. tkks‑d zġ‑lġllt tšš‑tt, tfk i‑urgaz‑ns ula nttan išš zġ‑gis. 7rẓmnt‑walln‑nsn ġakudan, issann is‑ur‑lsin yat. ddun gnun ifrawn n‑tazart dln igiwaln‑nsn.
8yan imikk sfldn i‑sidi rbbi ifta ġ‑talɛrṣt ġ‑uzuzwu n‑tdggʷat, irgs‑urgaz d‑tmġart‑ns f‑sidi rbbi ġ‑gr iṣġarn. 9iġr sidi rbbi ġakudan i‑urgaz yini‑as: «manza‑k.» 10yini‑as‑d: «sfldġ‑ak tftit ġ‑talɛrṣt iksaḍġ, ntalġ fllak ašku ur‑lsiġ yat.» 11yini‑as sidi rbbi: «ma‑yk‑innan ur‑tlsit yat? is‑tššit zġ‑tṣġart lli‑f‑k‑uṣṣaġ a‑ur‑zġ‑gis‑tššt?» 12yini‑as‑urgaz: «han tamġart lli‑yyi‑tskrt a‑didi‑tmun, nttat a‑yyi‑ifkan zġ‑lġllt n‑tṣġart, ššġ.» 13yini ilmma sidi rbbi i‑tmġart: «ma‑iga ġayd tskrt?» tini‑as‑tmġart: «han algʷmaḍ a‑stt‑gigi‑iskrn aylliġ‑zġ‑gis‑ššiġ.» 14isawl sidi rbbi s‑ulgʷmaḍ yini‑as: «lliġ tskrt ġayad, ha‑yyi h̬ziġ‑k f‑kullu lbhaym ula luḥuš n‑tagant. f‑udis‑nk a‑f‑ra‑ttidut, d‑ugdrur n‑wakal a‑zġ‑ra‑tšttat kullu ussan n‑tudrt‑nk. 15rad‑gġ tanuwwašt ġ‑grak d‑tmġart d‑gr‑warraw‑nk d‑warraw‑ns. ra‑ibri ih̬f‑nk, tbrit awurz‑ns.» 16yini sidi rbbi i‑tmġart: «rad‑am‑ssigtġ bahra angaẓ n‑tlalit. s‑ungaẓ a‑s‑ra‑ttarut. ra‑ttirit argaz‑nm, d‑nttan a‑ra‑gim‑iḥkam.» 17yini sidi rbbi i‑adam: «han tsfldt s‑wawal n‑tmġart‑nk, tššt zġ‑tṣġart lli‑f‑k‑uṣṣaġ a‑ur‑zġ‑gis‑tššt. hati h̬ziġ akal f‑ssibt‑nk. s‑tmmara a‑s‑ra‑zġ‑gis‑tšttat kullu ussan n‑tudrt‑nk. 18rad‑ak‑issmġay taskra d‑isnnann, tddut ar‑tšttat tuga n‑lh̬la. 19s‑lɛrg n‑uwdm‑nk a‑s‑ra‑di‑ttrarat ma‑tšttat, ard twrrit s‑wakal lli‑zġ‑ttyawskart. ašku agdrur a‑zġ‑tgit, d‑ugdrur a‑s‑ra‑twrrit.»
20ig adam i‑tmġart‑ns ism ‹ḥuwa›, ašku tga innas n‑kullu willi ddrnin. 21iskr sidi rbbi timlsa zġ‑ilm ġakudan, issls i‑adam d‑tmġart‑ns. 22yini ilmma sidi rbbi: «han argaz iwrri iga zund nkkʷni, yissan ma‑ifulkin ula ma‑yʷh̬šnn. a‑ur‑imil ig‑n afus‑ns s‑tṣġart n‑tudrt, ikks zġ‑lġllt‑ns išš‑tt, iwrri iddr bdda.» 23issufġ‑t sidi rbbi ġakudan zġ‑talɛrṣt n‑ɛadan baš a‑iddu ar‑ikkrz akal lli‑zġ‑ityawskar. 24ġmkan a‑s‑iṭṭay argaz. issbidd lmh̬luqat tjhhdnin ġ‑tsga n‑talɛrṣt n‑ɛadan lli‑iwalan asġlay n‑tafukt, iskr lɛafiyt zund uzzal isufun ar‑itgllab s‑tasga‑ya d‑h̬ta, iqqn srs aġaras lli‑itawin s‑tṣġart n‑tudrt.
Atualmente selecionado:
isizwur 3: SHILOT20
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Selected Old Testament in Tashelhayt (Latin script) © United Bible Societies, 2020.
Robert Bernard Dann.