Panagnaan 43
43
Ga danganakan si Yusup pabeleng pa Ejip ka si Benjamin
1Na gotom looy siꞌ magsasōng na pin. 2Pag katis jaꞌ mimon balanjaꞌ ma bay binalli meꞌ siga anak si Yaꞌkub ni Ejip, yuk si Yaꞌkub ninsila, “Pabeleng na kam pilay balik malli balanjaꞌ san lasa dangkitiꞌ.”
3Yuk si Juda niiya, “Gubnul looy baw ba la managgahi na mandaan kami yaꞌ nohoꞌ magpakita bong yaꞌ luu siyali kami bay taboo pa mman na. 4Bong siꞌ ko kuhi, boo kami na doꞌ si Benjamin pilay malli balanjaꞌ. 5Sugaꞌ bong baw ko yaꞌ matugut, malaingkan yaꞌ na kami la kuhi pabeleng pilay. Halling lalla looy yaꞌ na kami dari magpakita niiya bong yaꞌ du luu bay taboo kami siyali kami.”
6Pag-anu, yuk si Yaꞌkub, “Pasoyahan bi jaꞌ bitu pamiki ku. Subay siꞌ yaꞌ na kam bay māꞌ ga luu gi danganakan bi sarī.”
7Yuk da, “Maꞌ, dak yaꞌ na du baw bilay kami bay māꞌ. Sugaꞌ lay baw kami pinipitan meꞌ lalla looy bong llum gi mmaꞌ kami atawa bong luu gi danganakan kami sarī. Dari lay kami kapamāꞌ sabap yaꞌ san taingat kami subay ga sohoꞌ na lagi binoo ningkami siyali kami pilay.”
8Pag-anu, yuk si Juda ni mmaꞌ na, “Sōn na ba Sittoꞌ mmeꞌ ningkami mari kami kapilay na deꞌ-dēꞌ malli balanjaꞌ. Bong ina lantan nu lagi, mastiꞌ matoy kabobowan na situ kitabi sampay ga mpu nu sikamimon. 9Aku sa Maꞌ bahalaꞌ niiya. Janjiꞌ ku baw ningkau bong ya yaꞌ bay salamat pinabalik meꞌ ku pitu pa mman nu, atas ku na labuꞌ pa jataꞌ ku mimon susun halloman ku llum. 10Bong siꞌ kami yaꞌ na bay lantan nu, batnaa ga min duwa na kami bay kapagbeleng.”
11Dari yuk mmaꞌ da ninsila, “Bong tud talpaksaꞌ subay ya mmeꞌ, boonun bi na, sugaꞌ subay kam moo pilay barang ma mahap banahan mantuu. Isihan bi ga karut bi ka insallan hamut ka gowaꞌ buwani sampay lampa-lampahan, batung pistasiyu ka batung almon, boꞌ deanun bi gubnul looy. 12Maka sīn ma bay tatammu bi njawom karut bi, lipatun bi lagi min duwa taggahaꞌ lay sila magsāꞌ ngisi. 13Sigi, boonun bi na ariꞌ bi pilay pa mman gubnul looy. 14Kamura-murahan pinaluuy du lalla looy ningkaam meꞌ Tuhan Sangat Kawasa supaya pinapoleꞌ du si Simiyun sampay si Benjamin. Pasal aku, bong sipais bay kongoy-kongoy anak ku, san biddaꞌ na kasusahan ku, pooy-pooy na.”
15Dari lay na sila manyap boonan da man da masampang gubnul looy haboyan pilak ma bay lipat da min duwa. Pag-anu siꞌ, lay na sila pilay pa Ejip sampay na si Benjamin. Takka jaꞌ siꞌ sila, lay na sila patiluꞌ pa mman si Yusup. 16Pag ndaꞌ si Yusup luu na bay mmeꞌ si Benjamin, yuk na ni tindog na ma magpandoy ni lumaꞌ na, “Boonun na ga lalla naa pilay pa lumaꞌ. Numbaliꞌ ko hayop boꞌ patahakun deꞌ-dēꞌ mari tahan kami mangan tangngaꞌ llaw.” 17Dari siꞌ, lay na jaꞌ du inasip meꞌ tindog looy sampay lay na boo na ga lalla looy pa lumaꞌ.
18Lān da siꞌ binoo pa lumaꞌ na, tud bay tawu sila sampay yuk da padangan-padangan, “Marean ta la kon tabi binoo pilay sabapan pilak looy na ma bay tumabeꞌ ni jawom karut balanjaꞌ tabi. Batiꞌ ta, sinungkuban na kitabi, boꞌ kaddoꞌ da lagi siga kuraꞌ tabi sampay pinahata na kitabi.”
19Dari luu jaꞌ siꞌ sila ni lawang lumaꞌ si Yusup, yuk da ni tindog looy ma magpandoy, 20“Tuwan, bong dari, luu situ siꞌ bitsala kami ningkau. Jaman kami bay pitu malli balanjaꞌ, 21lān kami moleꞌ, lay doꞌ kami patagong sabap sangom na lahat. Sasang kami ndooy, lay ungkad kami karut kami. Boꞌ tud bay takurat kami pag ndaꞌ kami masi luu njawom karut kami pilak man kami bay mayad. Sugaꞌ batnaa, luu na du sīn looy bay boo kami pitu pabalik. 22Sarī man ilooy, lay gi kami moo halliꞌ man kami malli balanjaꞌ balik. Dari papiha-piha na pin kami bong soy bay ngannaꞌ sīn looy balik pa jawom karut kami.”
23Yuk tindog looy baw siꞌ tu, “Daa kam ba susa. Maka daa na kam tawu. Bay bayad bi ilay llaw looy lay na kaddoꞌ ku. Tuhan ma sinumba meꞌ bi ka mmaꞌ bi, iya na silay bay ngannaꞌ njawom karut bi yana ladjikiꞌ ningkaam.” Na pus meꞌ looy, lay na du boo tindog looy si Simiyun pa mman da.
24Pag-anu siꞌ, lay na sila binuwanan boheꞌ man da ngosoan battis da sampay lay na pinakan kuraꞌ da. Pag lupus, lay na sila binoo meꞌ tindog looy paasok. 25Maka yuk tindog looy ninsila, “Ngkon itu siꞌ kam bay binoo pitu, batan ntuu na kam sohoꞌ gubnul mangan tangngaꞌ llaw.” Dari siꞌ, lay na kaddoꞌ da barang man da masampang gubnul mari tahan da nong pag takka na.
26Takka jaꞌ siꞌ si Yusup, lay na songan da ga barang looy niiya, boꞌ da sujud ni awpan na. 27Pag-anu siꞌ, tilaw si Yusup, “Mag-inoy na kam? Maka pooy na kahalan mmaꞌ bi meꞌ looy na toa na? Masi gi kilay llum?”
28Pag tampung da, “Mmaꞌ kami Tuwan Gubnul, yaꞌ luu oy-oy na. Masi mahap parasahan na.” Pag-anu, lay na baw sila pakokoꞌ ni awpan na.
29Sasang si Yusup maimanan sila, takita na na si Benjamin, danganakan na langgung. Dari tilaw na, “Ituu na kitu danganakan bi, ilooy ma yuk bi llaw looy kabungsuhan?”
Tampung da, “Ohoꞌ, Tuwan.”
Pag-anu yuk na ni si Benjamin, “Kamura-murahan luu na pin barakat man Tuhan ni jataꞌ nu Toꞌ.” 30Pus meꞌ looy, lay doꞌ lakka si Yusup deꞌ-dēꞌ sabap yaꞌ tasaggaꞌ na luuy na ni ariꞌ na. Sampay lay na doꞌ ya paasok pa jawom bilik ngahuwasan tangis na. 31Pag lupus, lay na ya kuwaup, boꞌ na pōꞌ sambayan na naggaan tangis na. Pag-anu, lay na ya nohoꞌ ga tindog na motang kinakan.
32Na si Yusup siꞌ tu, lay binotangan ni disu lamisahan dangan-dangan na du. Kuwan ga danganakan na, lay binotangan ni disu lamisahan. Kuwan siga bangsa Ejip ma mmeꞌ mangan ndooy siꞌ tu, sarī du lamisahan da sabap nipin sila paharung mangan ni siga bangsa Hibrani.
33Na ga danganakan si Yusup siꞌ tu tud bay jayip pag taabut da pinatingkōꞌ ni lamisahan. Batan pag ndaꞌ da, lay sila bay tinalitib lakka man siyaka lūd pa siyali. 34Pag-anu siꞌ, lay na sila binotangan makanan lakka man lamisahan si Yusup. Sugaꞌ makanan ma bay binotang ni si Benjamin, lipat min lima man ni ga siyaka na. Pag-anu, lay na sila magpakaruwan nginum-mangan sampay sso na sila.
Atualmente selecionado:
Panagnaan 43: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.