Panagnaan 32
32
Hanggaw si Yaꞌkub sitammu ka si Esaw
1Na ga si Yaꞌkub pun, lay na du pawus moleꞌ. Lān na pilay, lay ya sinampang meꞌ siga malaikat Tuhan. 2Pag takita na sila, yuk na, “Uy la, lahat tuu bitu subay ga kampu Tuhan!” Dari lay awnan na lahat looy Mahanayim.#(32.2) Hatiyan Mahanayim yana “duwa kampu.” Marean ta kon na inawnan duwa kampu batan luu ndooy kampu si Yaꞌkub maka meꞌ ga luu sa ndooy kampu siga malaikat Tuhan.
3Pag palanja ga si Yaꞌkub mandooy, lay doꞌ pamikihan na bong oy pabuwat na pag mintu sila sitammu ka kakaꞌ na si Esaw. Dari siꞌ katappakan pamiki na, lay doꞌ ya maduhuꞌ ga sosohoan na pilay pa mman si Esaw ndooy ni Seyil, yana lahat ma inawnan du Edom. 4Tugun si Yaꞌkub ninsila, “Baan bi Kaꞌ Esaw, masa hallom tuu, lay ku ndooy man Paꞌ Laban subay ga jama sampi. Pag batnaa, bohoꞌ ku kapoleꞌ. 5Maka baan bi ya, batnaa luu na du ku dambuli ka ga baanan sapiꞌ ku, ga kuraꞌ ku, ga bili-bili ka ga kambing sampay ga ata ku, danda-lalla. Baan bi ya tugun ku, kamura-murahan kinahopan du ku meꞌ na.”
6Na pag beleng ga sosohoan looy siꞌ, yuk da, “Lay na kami la sitammu ka si Esaw, boꞌ luu na ya dambuli ka jama na, mpat hatus.”
7Si Yaꞌkub siꞌ tu, tud bay tawu sampay susa na ya banahan. Dari siga anak-nda na ka ga tindog na sampay ga bili-bili na, kambing na, sapiꞌ na ka untaꞌ na lay pabuwat na duwam baanan. 8Honaꞌ-honaꞌ na, bong mintu binonoꞌ meꞌ si Esaw baanan looy ma duhuꞌ, balangkali kapatangkaw gi ilooy ma dambuli.
9Pus meꞌ looy, lay na baw maku duwaa si Yaꞌkub, yuk na, “Papuꞌ, meꞌ kau Tuhan Boꞌ Ibrahim ka Simmaꞌ, masi taintom ku kau bay nohoꞌ aku pabeleng pa lahat ku pa jawom lūng-kampung ku. Maka lay gi ko nganjanjiꞌ ngunungan aku. 10Kamasaꞌ meꞌ aku disu ata nu, yaꞌ san ku tawop kaasean nu sampay sigi-sigi tinabang meꞌ nu. Lān ku bay lakka man lahat ku sampay bay ngalintas Sōng Juldan, yaꞌ san luu bay boo ku oy maka oy na sarī man tungkud. Pag poleꞌ ku, itu na ku bay dari duwam baanan mehe. 11Batnaa, itu na baw ku nganjunjung ningkau, tabangun doꞌ ku mari ku yaꞌ binatōy-batōy meꞌ Kaꞌ Esaw. Ilooy kagawahan ku taggahaꞌ binonoꞌ na baw kami mintu sampay ga anak-nda ku. 12Bong anu, intomun doꞌ bay janjiꞌ nu niyaku nampulnaꞌ aku sampay muwanan aku panubuꞌ paeka gantaꞌ yaꞌ taitung, meꞌ kadari ungus ni tapiyan.”
13Na paddus jaꞌ siꞌ dambahangi halloman da bay ndooy, lay si Yaꞌkub meneꞌ kahayop-hayopan man na masampang kakaꞌ na. 14Lay ya masarī duwa hatus kambing danda, duwampūꞌ kambing lalla, duwa hatus bili-bili danda, duwampūꞌ bili-bili lalla, 15tallumpūꞌ untaꞌ danda ddas ka anak da, mpatpūꞌ sapiꞌ danda, sapū sapiꞌ lalla, duwampūꞌ kuraꞌ danda ka sapū kuraꞌ lalla. 16Pag-anu, lay na pina-ntan ni siga tindog na, boꞌ na halling, “Duhuꞌ na kam, sugaꞌ subay sikalawak-kalawak jinisan baanan hayop naa.” 17Tugun na ni tindog na ma duhuꞌ, “Bong ko mintu sitammu ka Kaꞌ Esaw, boꞌ nu tinilaw bong soy tuwan nu ka song paninggai ko, atawa soy dapu baanan hayop naa ni duhuan nu, 18pag tampung nu, ‘Ituu tu ni siyali nu si Yaꞌkub. Lay sohoꞌ na binoo duhuꞌ man masampang kau. Luu na du sina ya dambuli.’ ”
19Maka yuk si Yaꞌkub ni siga tindog na ni kaduwa ka ni katallu sampay mimon ma bay sinohoꞌ malān ga baanan hayop looy siꞌ, “Kaam pun, pag taabut bi sitammu ka Kaꞌ Esaw, subay meꞌ naa du tampung bi. 20Maka daa takupan bi māꞌ luu na du ku dambuli.”
Ngkon si Yaꞌkub buwat meꞌ looy, batan honaꞌ-honaꞌ na, pagka lay na paruhuan na kakaꞌ na tasampang na balangkali kaulian na lasu kakaꞌ na niiya. Maka balangkali buwanan na na ya kaampunan pag taabut da sitammu. 21Dari meꞌ looy na siꞌ, lay na doꞌ paruhuꞌ na tasampang kakaꞌ na. Kuwan iya, lay na doꞌ tamban sangom looy ndooy ni kampu da.
Si Yaꞌkub sibogod ka malaikat Tuhan
22Na lawom gi siꞌ bahangi, lay na si Yaꞌkub bangun boꞌ na nuhiyan ga nda na sikaduwa ka ga nda na ma ata sikaduwa sampay ga anak na sikasapu-dambuwaꞌ palintas pa dambilaꞌ Sōng Jabbok. 23Pag-anu, lay na baw ya pabeleng balik, boꞌ lay na sohoꞌ na pinatuhut mimon pangaltaꞌ na. 24Kuwan iya, lay na doꞌ patamban ndooy ni bay kampu da. Sasang na ndooy dangan-dangan na, luu na takka disu lalla. Ndooy siꞌ, lay sila sibogod ngabut sampay deꞌ sayu. 25Pag tabista meꞌ lalla looy katohasan ya meꞌ si Yaꞌkub, ilooy ma lay purut na sambungan paa si Yaꞌkub sampay lay na ga magsalisi. 26Pag-anu yuk na ni si Yaꞌkub, “Labbahan nu na ku ba. Llaw na lahat.”
Iya tampung si Yaꞌkub baw siꞌ tu, “Yaꞌ ko labbahan ku bong ku yaꞌ bay doꞌ duhuꞌ supaatan nu.”
27Tilaw lalla looy, “Soy awon nu?” Tampung na, “Si Yaꞌkub.”
28Yuk lalla looy, “Labba man batnaa saꞌ na si Yaꞌkub meꞌ ngawnan kau, si Israil na. Hatiyan na, ‘magbasag-basagan ka Tuhan.’ Batan yaꞌ ko bay kuhi banti magbasag-basagan ka manusiyaꞌ sampay na Tuhan ngkod-ngkoran yaꞌ bay takoleꞌ nu ma puhung nu, boꞌ lay jaꞌ du ko tumanjataꞌ.”
29Yuk si Yaꞌkub baw siꞌ tu, “Bong anu, aku doꞌ baw baan nu bong soy awon nu.”
Iya tampung na, “Ongoy ko nilaw bong soy awon ku?” Pus meꞌ looy, lay na ya nupaatan si Yaꞌkub boꞌ na lakka.
30Yuk si Yaꞌkub, “Uy la, bay ku sitammu ka Tuhan balharapan, boꞌ masi gi ku bitu llum!” Dari lay awnan na lahat looy Peniyel, hatiyan na, “luwa Tuhan.”
31Pag dantaꞌ jaꞌ llaw, lay na si Yaꞌkub palakka man Peniyel. Iya siꞌ tu tongkaꞌ na sabap sambungan paa na lay na magsalisi. 32Dari ngabut sampay batnaa, sagannap panubuꞌ si Israil yaꞌ mangan isi sumbalian ni tagan sambungan paa da. Kon meꞌ looy sabapan sambungan paa si Yaꞌkub bay pinurut meꞌ Tuhan.
Atualmente selecionado:
Panagnaan 32: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.