Panagnaan 27
27
Supaat para si Esaw lay takoleꞌ si Yaꞌkub
1Na kuwan si Isahak siꞌ tu, toa na sampay agon yaꞌ na ga ya ngita. Luu disu llaw, lay sohoꞌ na kinaddoꞌ anak na ma siyaka, yana si Esaw. Luu jaꞌ siꞌ si Esaw, yuk si Isahak, “Tu doꞌ ko Toꞌ.”
Yuk si Esaw, “Oy lay siꞌ Maꞌ?”
2Yuk mmaꞌ na, “Aku itu toa na Toꞌ. Batiꞌ nu, matoy na ku sumawung sumilan. 3Bong anu, kaddoun na panaꞌ nu boꞌ nu pa jawom tawun manaan aku usa. 4Pag lupus, patahakun paayad meꞌ ndang ilooy ma kaharipan ku, boꞌ boonun pitu. Paddus ku mangan, pasayin ku na supaat Tuhan ma luu njataꞌ ku pa mman nu padpad ku yaꞌ gi bay matoy.”
5Sasang si Isahak siꞌ tu mitsala ni si Esaw, kuwan si Ribeka, luu na pin ndooy nundung sila. Dari likutan si Esaw njawom tawun, 6yuk si Ribeka ni si Yaꞌkub, “Lay siꞌ la Toꞌ tasundung ku mmaꞌ nu mitsala ni si Esaw. 7Lay siꞌ ya sohoꞌ mmaꞌ nu pa jawom tawun manaan iya usa. Pag-anu, boꞌ nohoꞌ pinatahak niiya meꞌ karuha ilooy ma ndang kaharipan na. Yuk mmaꞌ nu siꞌ, pus na mangan, padpad yaꞌ gi ya bay matoy, pasayin na na supaat ma luu njataꞌ na pa mman kakaꞌ nu ni awpan Tuhan. 8Sangkon batnaa Toꞌ, pakale doꞌ ko niyaku, boꞌ bean nu jaꞌ sohoꞌ ku ningkau. 9Ngaddoꞌ ko kambing baddung ma lammok duwa. Boonun pitu, boꞌ patahakan ku mmaꞌ nu lawuk ayad ma ndang kaharipan na banahan. 10Pag tahak jaꞌ mintu, kau na ngangkatan iya mari ya manganna kau na si Esaw. Dari kau ya sina koleꞌ supaat Tuhan njataꞌ mmaꞌ nu padpad yaꞌ gi ya bay matoy.”
11Sugaꞌ yuk si Yaꞌkub baw, “Uy Neꞌ, awod bina la! Si Esaw bilay lalla būhan, boꞌ aku tu, ngannoꞌ jaꞌ kuwit ku. 12Taggahaꞌ pag purut Simmaꞌ, meꞌ na mista aku jama pangandupang. Bong meꞌ looy, saꞌ ga supaat takoleꞌ ku, gam pin sumpaꞌ!”
13Iya tampung nneꞌ na baw siꞌ tu, “Ē, pilayun jaꞌ ba Toꞌ. Bean nu jaꞌ ku. Kaddoan nu na ku pilay. Bong hati ko bay sinumpaan, uwan ku sa ni jataꞌ ku.”
14Dari ilooy ma lay na pilay si Yaꞌkub ngaddoꞌ ga kambing looy binoo pa mman nneꞌ na. Sampay lay na patahak na paayad meꞌ ilooy ma ndang kaharipan si Isahak. 15Pag-anu, lay ngaddoꞌ nneꞌ na badjuꞌ si Esaw ma mahap banahan ma bay inannaꞌ-nnaꞌ, boꞌ bay pinapatukan si Yaꞌkub. 16Pag lupus, lay ya ngaddoꞌ kuwit kambing boꞌ pinalakkop ni bukut tangan si Yaꞌkub ka langngon na sampay ni kallong na. 17Pag-anu, lay na songan si Ribeka ni si Yaꞌkub lawuk looy siꞌ ma tabaan ka ga tinapay ma bahau jaꞌ bay patahak na.
18Dari lay na pilay si Yaꞌkub ngangkatan mmaꞌ na sambayan na ngingan, yuk na, “Maꞌ.”
Pag tampung mmaꞌ na, “Oy Toꞌ? Anak ku mamooy ko ina?”
19Yuk si Yaꞌkub, “Aku na si Esaw. Atu na lawuk ma bay sohoꞌ nu siꞌ. Bong anu Maꞌ, bangun na ko mangan, boꞌ ku supaatan nu na.”
20Yuk si Isahak, “Uy Toꞌ, pooy meꞌ nu bay koleꞌ deꞌ-dēꞌ?”
Pag tampung si Yaꞌkub, “Papuꞌ nu Tuhan Maꞌ, bay nabangan aku.”
21Yuk si Isahak, “Tu teꞌ ko Toꞌ. Purut ta teꞌ ko bong tud kau na si Esaw.”
22Pag-anu, lay na patapit si Yaꞌkub pa mman mmaꞌ na. Lay jaꞌ siꞌ ya pinurut, yuk si Isahak, “Uy la, tangan nu baw bitu, tud tangan si Esaw na, sugaꞌ halling nu siꞌ, subay ga si Yaꞌkub.” 23Dari yaꞌ san bay tasilang na ga ilooy na si Yaꞌkub sabap tangan na meꞌ ni si Esaw du, būhan.
Na yaꞌ gi siꞌ si Isahak bay nupaatan iya, 24nilaw na baw ya pabalik, yuk na, “Tud bana kina kau na si Esaw?”
Pag tampung na baw siꞌ tu, “Ohoꞌ Maꞌ, aku na bitu.”
25Dari yuk si Isahak, “Bōn pitu na lawuk naa. Pus ku mangan, boꞌ nu supaatan ku na.” Dari ilooy ma lay na songan si Yaꞌkub lawuk looy ni mmaꞌ na sampay lay gi ya tinunggangan tubaꞌ anggul. Pus si Isahak nginum-mangan, 26yuk na, “Tu na ko Toꞌ. Ukun na ku.”
27Pag ūk si Yaꞌkub mmaꞌ na, ilooy ma taūk na meꞌ mmaꞌ na pamakoy na meꞌ bawu si Esaw. Dari lay na si Yaꞌkub sinupaatan meꞌ mmaꞌ na, yuk na, “Tud mahap la bawu anak ku, subay ga bawu huma ma bay na sinupaatan meꞌ Tuhan. 28Na Toꞌ, kamura-murahan wā pinaambunan meꞌ Tuhan huma nu supaya meka banahan takattom nu, maka supaya kalap na balanjaꞌ nu ka tubaꞌ anggul nu. 29Kamura-murahan meka du bangsa dari raayat nu sampay pakokoꞌ ningkau. Maka kamura-murahan binuwat du ko panghuluꞌ lūng-kampung nu sampay pakokoꞌ na du sila ningkau. Kamura-murahan sagannap ma numpaan kau, pinapoleꞌ du meꞌ Tuhan sumpaꞌ da pa jataꞌ da. Kuwan sagannap ma makuhan kau supaat, kamura-murahan sinupaatan du sila meꞌ Tuhan.”
Si Esaw maku supaat
30Na lupus na pin siꞌ si Yaꞌkub sinupaatan meꞌ si Isahak sampay bahau jaꞌ ya bay palakka, takka na si Esaw bay manaꞌ usa. 31Pus na buwat lawuk tabaan, lay du boo na pa mman mmaꞌ na. Yuk na, “Maꞌ, bong anu, bangun na ko. Atu na lawuk tabaan bay boonan ku kau. Mangan na ko. Pag lupus, bong dari ningkau, supaatan nu na ku.”
32Yuk si Isahak, “Soy doꞌ ko ina?” Yuk si Esaw, “Aku na bitu si Esaw, anak nu ma siyaka.”
33Si Isahak siꞌ tu, mipig na saꞌ alang-alang sambayan na nilaw, yuk na, “Bong meꞌ naa, soy baw lay siꞌ ilooy ma bay moonan aku lawuk nsiniꞌ? Bohoꞌ ku bitu lupus mangan! Boꞌ lai na kalanduꞌ supaat ku ni jataꞌ na. Yaꞌ na silay tabawiꞌ ta, mastiꞌ kinabbul na jaꞌ silay labbasakayi!”
34Pag takale si Esaw meꞌ looy, ilooy ma killahap na ya pahaddo sambayan na halling ni mmaꞌ na, “Alaneꞌ! Yaꞌ na kina luu takapin supaat para niyaku?”
35Pag halling si Isahak, “San na ko Toꞌ; karuhung lai na kalanduꞌ. Tud lay jaꞌ bilay hati ku inakkahan meꞌ ariꞌ nu! Boꞌ lai na silay takoleꞌ na supaat para ningkau.”
36Yuk si Esaw, “Uy la, tud pataꞌ na du ya inawnan si Yaꞌkub#(27.36) Ni pallun Hibrani hatiyan Yaꞌkub, “pagantiꞌ.” batan min duwa na ya bay ngulihal meꞌ na pagantiꞌ niyaku. Sibuwa, lay na takoleꞌ na kapatut ku bilang anak siyaka. Pag batnaa, lay na baw takoleꞌ na supaat ma subay siꞌ niyaku.” Pag-anu siꞌ, lay na baw ya nilaw pabalik, yuk na, “Maꞌ, tud yaꞌ na kina luu samasakali supaat para niyaku?”
37Pag tampung si Isahak, “San na ko Toꞌ. Lai na silay siꞌ pupusan ku mimon supaat ku njataꞌ ariꞌ nu. Lay na ya sinukuꞌ meꞌ ku magtakōk ningkau. Maka lay na du ya supaatan ku supaya mimon lūng-kampung na magpadiyoꞌ niiya buwat dī da tindog na bbos-bbos. Boꞌ lay gi ya supaatan ku supaya kalap balanjaꞌ na ka tubaꞌ anggul na. Mimon kaayaran lay na nnaꞌ ku njataꞌ na. Yaꞌ na luu tapabuwat ku ningkau Toꞌ.”
38Kuwan si Esaw siꞌ tu, amu-amu nganjunjung ni mmaꞌ na, yuk na, “Yaꞌ na kina Maꞌ luu san lasa disu supaat para niyaku? Bong siꞌ luu gi, nnaun na pa jataꞌ ku Maꞌ.” Pus na siꞌ mitsala, ilooy ma yaꞌ na ya paagak nangis pahaddo.
39Pag-anu yuk si Isahak niiya, “San na ko Toꞌ. Tanaꞌ man nu ina mintu maglahat, yaꞌ na luu masa na kadarihan, boꞌ jalangan gi tuwaꞌ uwan. 40Inaa sa asahan nu man nu llum yana kataliꞌ nu. Lagiꞌ na, sinukuꞌ ningkau pinagbayaan meꞌ siyali nu. Sugaꞌ bbos-bbos naggaꞌ du sina ko sampay kapaddus du ko man jawom kawasa-kapatut na.”
41Dari labba man llaw looy na siꞌ, lammis na si Esaw ni si Yaꞌkub sabap supaat man mmaꞌ na para niiya, lay na takoleꞌ meꞌ si Yaꞌkub. Dari siꞌ jawom atay si Esaw, “Biyahun na, yaꞌ na du situ hallom, matoy na du Simmaꞌ. Pag mintu lay na ya limbu, papatoy ku sa si Yaꞌkub.” 42Sugaꞌ pag lay jaꞌ siꞌ katuntutan si Ribeka bay sanggup si Esaw ni si Yaꞌkub, lay du sohoꞌ na kinaddoꞌ si Yaꞌkub. Luu jaꞌ siꞌ, yuk nneꞌ na, “Si Esaw ilay, kahuwasan du paddi inansong na ningkau bong ko lay na tapapatoy na. 43Sangkon batnaa Toꞌ, amay-amay asipun jaꞌ ku. Deꞌ-dēꞌ na ko lahi pilay pa paglahat danganakan ku, yana Paꞌ nu Laban ndooy ni Haran. 44Maka ndooy na doꞌ ko ni lahat looy halloman yaꞌ gi bay kaulian lasu kakaꞌ nu. 45Pag mintu tanne na kōk na maka lungay na duga na ningkau, boꞌ nu sa tugun ku. Batan yaꞌ ku doman lungay kam sikaduwa man diyoꞌ dakan ku njawom dangallaw du.”
46Pag-anu, yuk si Ribeka ni si Isahak, “Paddi la kōk ku meꞌ siga nda si Esaw, ga bangsa Hīt looy! Bong mintu bay lagi kapahanda si Yaꞌkub ni bangsa Hīt du, basta gam na ku matoy.”
Atualmente selecionado:
Panagnaan 27: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.