Panagnaan 26
26
Gotom lahat
1Na song hallom, gotom na baw lahat meꞌ karuha gotom ma bay lumingkaꞌ jaman llum gi si Ibrahim. Dari lay ga si Isahak pilay pa Geral, lahat Sultan Abimalik, yana sultan bangsa Pilistin. 2Ndooy siꞌ, lay si Isahak tinammuhan meꞌ Tuhan, yuk na, “Daa na ko pawus pa Ejip. Nnoy-nnoy man nu sohoꞌ ku, nnaa na jaꞌ ko maglahat. 3Batnaa, ntuu na jaꞌ doꞌ ko maglahat. Unungan ta du sina ko maka supaatan ta sa ko. Dean ku sa kau sampay ga panubuꞌ nu lahat tuu labbasakayi. Batan bay janjiꞌ ku ma bay sapahan ku ni mmaꞌ nu labuꞌ pa kau na sina. 4Buwanan ta sa ko panubuꞌ meꞌ eka potean taꞌ langit. Maka dean ku sa sila mimon paglahat tuu. Bbos-bbos ina mimon kabangsa-bangsahan sinupaatan man sabapan panubuꞌ nu. 5Supaatan ta ko meꞌ looy sabap mmaꞌ nu lay jaꞌ mmeꞌ ni kahandak ku sampay ngasip ni mimon panohoan ku ka saraꞌ ku.” 6Dari lay na ga si Isahak maglahat ndooy ni Geral.
7Na nda si Isahak ilay, yana si Ribeka, tud mahap danda. Sangkon pag bay tinilaw si Isahak meꞌ jama Geral bong soy danda looy soheꞌ na, baꞌ-bāꞌ na, danganakan na. Tawu ya māꞌ si Ribeka yana nda na, taggahaꞌ lay na baw ya pinapatoy sampay kinaddoꞌ nda na.
8Hallom-hallom jaꞌ siꞌ ndooy ga si Isahak, luu disu llaw pag tandaw Sultan Abimalik, lay tasundung na si Isahak muus-muus nda na si Ribeka. 9Dari ilooy ma tinawag meꞌ na si Isahak. Luu jaꞌ siꞌ, yuk Sultan Abimalik niiya, “Nda nu bilay hati danda looy! Ongoy taggahaꞌ yuk nu danganakan nu ya?”
Pag tampung si Isahak, “Ilooy baw ba la kahanggawan ku taggahaꞌ pinapatoy ku leꞌ jama pin takoleꞌ da jaꞌ nda ku sabap mahap ya danda.”
10Pag-anu yuk Sultan Abimalik, “Tud yaꞌ mahap bay pabuwat nu ningkami. Bong ilay siꞌ bay luu lalla ntuu ngubay nda nu, dusa mehe silay ningkami man sabapan nu.”
11Pag-anu, ilooy ma lay binandaan meꞌ Sultan Abimalik siga raayat na, yuk na, “Soysoy mintu bay sarī meꞌ na ka lalla tuu atawa pun nda na, mastiꞌ kalabuan hukuman kapatoy.”
12Na si Isahak siꞌ tu, bbuwatan na ni lahat looy, lay bay huma. Boꞌ ni taun looy du, lipat min dahatus lagi bay takattom na man bani ma bay saburan na batan mehe supaat Tuhan njataꞌ na. 13Dari halloman na ndooy, lay na ya magkadayahan sampay tamba-manamba na pin altaꞌ na. 14Salla na, song hallom, sabap meka na baanan hayop na, boꞌ meka lagi tindog na, kinadangkian na ga ya meꞌ bangsa Pilistin. 15Dari lay llapat meꞌ da mimon tagaꞌ si Isahak, yana tagaꞌ ma bay kinalihan meꞌ siga tindog mmaꞌ na si Ibrahim jaman na lagi llum. 16Pag-anu, yuk Sultan Abimalik ni si Isahak, “Lakka na kam man paglahat kami sabap ni lilingan ku umangkat na kam labi man kami.” 17Dari ilooy ma lay na lakka ga si Isahak mandooy boꞌ da lay jaꞌ paenseg pa Labbak Geral. Dari ndooy na sila bay matangge lumaꞌ luna da.
18Na ndooy siꞌ, luu na du siga tagaꞌ bay sohoꞌ mmaꞌ na si Ibrahim kinalihan bay jaman na masi llum. Sugaꞌ pag patoy si Ibrahim, bay na llapat siga tagaꞌ looy meꞌ ga bangsa Pilistin. Dari lay na baw sohoꞌ si Isahak pinakalluman ga tagaꞌ looy pabalik. Boꞌ lay du awnan na balik ka ndang siga awon man mmaꞌ na bay ngawon. 19Maka lay gi ngali siga tindog si Isahak tagaꞌ bahau ni labbak looy, boꞌ landos mata na. 20Sugaꞌ yaꞌ hallom, takka na baw siga tukang ngipat hayop man Geral sampay sasaꞌ na baw sila ka siga tukang ngipat hayop si Isahak, yuk da, “Boheꞌ tuu bitu, kami dapu.” Dari sabap wā sila sasaꞌ ka ga tindog si Isahak, lay na awnan si Isahak tagaꞌ looy Esek, hatiyan na, “sasaꞌ.”
21Pag-anu, lay na baw balik siga tindog si Isahak ngali tagaꞌ, sugaꞌ damikiyan, luu du ga jama looy man Geral bay patuhut mōꞌ pagsaggaan. Dari lay na awnan si Isahak tagaꞌ looy, Sitna, hatiyan na, “pagsaggaan.”
22Pag-anu siꞌ, lay na baw ga si Isahak pasihaꞌ-sihaꞌ mandooy boꞌ da ngali na baw sarī. Ndooy siꞌ, bohoꞌ yaꞌ na luu nasaan sila. Dari lay na awnan si Isahak tagaꞌ looy Rehobot, hatiyan na, “lugar haluhaya,” maka yuk na, “Batnaa, bohoꞌ tabi lay na kabuwanan lugar haluhaya leꞌ Tuhan. Luu na situ dapat man tabi magkamadjuwan ni lahat tuu.”
23Na hallom maka hallom na, lay na baw ga si Isahak maglayin pa bay limpaꞌ da maruhuꞌ ndooy ni Beel-Siba. 24Pag takka da ndooy, sangom na. Maka sangom looy du, lay na baw si Isahak tinammuhan meꞌ Papuꞌ, yuk na, “Aku na situ Tuhan mmaꞌ nu si Ibrahim. Daa na ko tawu ni oy maka oy na. Itu du ku ngunungan kau. Supaatan ta sa ko maka buwanan ta ko panubuꞌ paeka sabapan bay janjiꞌ ku ni ata ku si Ibrahim.” 25Dari ilooy ma lay si Isahak nambak batu binuwat pangulbanan ndooy, boꞌ na numba Tuhan. Maka ndooy na du man ga si Isahak bay matangge siga lumaꞌ luna da. Sampay ndooy na du man siga tindog na bay ngali tagaꞌ bahau.
Sultan Abimalik ka si Isahak buwat pagsulutan
26Yaꞌ gi siꞌ sila bay hallom ndooy, luu na baw takka pilay Sultan Abimalik man Geral ka kunsihal na si Ahusat. Maka luu du bay boo na panghuluꞌ sundalu na, yana Komandel Pikol. 27Dari tilaw si Isahak ninsila, “Ampun Sultan, oy siꞌ tu la maksud bi pitu pa mman ku? Agaꞌ ku masi kam la gigitan niyaku batan llaw looy lay gi ku palahi bi man lahat bi.”
28Pag tampung da baw siꞌ tu, “Tahati nu Tuwan, tumatandaꞌ na ningkami tattap inunungan ko meꞌ Tuhan. Dari talangga piki kami, gam na kitabi miha kasalassayan. Bong anu, napa kita saliꞌ-saliꞌ, 29basta yaꞌ kitabi dari sikaaku-kaaku. San baw jaman bi ndooy ni lahat kami, yaꞌ du kam bay pingkaꞌ lingog kami. Mahap jaꞌ du meꞌ kami ka kaam. Labba man kalakka bi ngabut sampay batnaa, yaꞌ du kam bay binatōy-batōy meꞌ kami. Pag batnaa, tumatandaꞌ na ningkami basta sinupaatan ko meꞌ Tuhan.”
30Dari siꞌ, lay du kuhi si Isahak sampay lay na sohoꞌ na ga tindog na manyap man da ballang. Tahak jaꞌ siꞌ mimon makanan, lay na sila siharung-harung nginum-mangan.
31Pag sayu, awwal lagi, saliꞌ-saliꞌ na sila napa basta yaꞌ sila sikaaku sipakaat-pakaat. Pag poleꞌ ga Sultan Abimalik, sannang na atay da saliꞌ-saliꞌ.
32Pus meꞌ looy, ni llaw looy du, luu na baw takka ga tindog si Isahak maan iya, yuk da, “Bohean na la tagaꞌ looy ma bahau jaꞌ bay kalihan kami!” 33Dari ilooy ma lay awnan si Isahak tagaꞌ looy Siba, hatiyan na, “sapa.” Maka ilooy na poonan daira ni tagan lahat looy inawnan Beel-Siba. Sampay batnaa, masi luu.
Anak si Isahak ma siyaka ndahan na
34Na kuwan si Esaw siꞌ tu, pag taabut mpatpūꞌ taun umu na, lay na ya handa ni bangsa Hīt duwa. Nda na ma duhuꞌ yana si Jurit, anak si Beri. Kuwan ilooy ni kaduwa na yana si Basemat, anak si Elon. 35Na ga danda looy ilay siꞌ sikaduwa sarī arat-tabiat da. Sangkon tud kapaddi kōk sila ni si Isahak ka si Ribeka.
Atualmente selecionado:
Panagnaan 26: sjm
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc. All rights reserved.