Yowano 11
11
Kufwa chaLazalu
1Jino kwapwile lunga umwe nakuviza, ikiye Lazalu wakuMbetane, kwimbo lyaMaliya nandumbwenyi Malita.
2(Ou Maliya ikiye uze awavishile#11:2 Chihande chakuwavisa Mwata maji vachisoneka 12:3-8. Yowano achivulukile ha11:2 nakulumbununa usoko wavo. Mwata maji alivumba lyamwaza nakuhunda vikamba vyamahinji enyi najikambu jenyi, ikiye ukwechi ndumbwenyi Lazalu apwile nakuviza).
3Shikaho vandumbwenyi vamapwevo vamutuminyine mazu ngwavo, Ove Mwata, ou wazanga ali nakuviza.
4Oloze Yesu hakuchivwa ambile ngwenyi, Echi kuviza kana kacheshi chakutwala kukufwako, oloze chakusolola upahu waKalunga mangana valishileho MwanaKalunga haupahu wenyi.
5Jino Yesu avazangile, naMalita nandumbwenyi wapwevo naLazalu.
6Chipwe ngocho, omu evwile ngwavo Lazalu ali nakuviza, ashimbwile makumbi avali kuze ápwile,
7numba himwamba tumbaji twenyi ngwenyi, Tuyenu cheka kuYuleya.
8Tumbaji vamwambile ngwavo, Ove Lapi, linwomu vene vaYuleya vasakanga kukwasa malolwa, kaha nauyako cheka?
9Yesu akumbulwile ngwenyi, Kumana mulikumbi limwe kamweshi jiola likumi najivaliko (12) numba? Nge mutu mwatambuka namusana, keshi kuhukanako, mwomwo namono musana wahakaye.
10Oloze nge mutu mwatambuka naufuku, mwahukana, mwomwo musana kaweshi muli ikiyeko.
11Hakukumisa kuhanjika mazu awa, himwavalweza ngwenyi, Sepa lyetu Lazalu nasavala tulo, oloze nanguya mangana ngukamutonese.
12Kaha tumbaji vamwambile ngwavo, Ove Mwata, nge nasavala tulo, kaha mwahinduka.
13 Yesu avulukile kufwa chenyi, oloze vakiko vashinganyekele ngwavo navuluka kusavala chakunòka.
14Haze vene Yesu avalumbunwinyine kanawa ngwenyi, Lazalu nafu.
15Kaha hali enu, ngunawahilila mwomwo kangwapwile kuzeko, mangana mufwelele. Shikaho tuyenu kuli ikiye.
16Jino Tomase, uze pasa, ambile vakwavo tumbaji ngwenyi, Tuyenu nayetu nawa mangana tukafwe nenyi hamwe.
Yesu Ikiye Kusanguka, Ikiye Mwono
17Kaha omu ahetele Yesu, awanyine Lazalu napu lyehi muchimbumbe makumbi awana.
18 Mbetane yapwile kwakamwihi naYelusalema, kafwe nge jikilomita jitatu#11:18 MuchiHelase ngwavo, Tando yamaSatela likumi naatanu..
19VaYuleya vavavulu vejile kuli Malita naMaliya nakuvavendejeka hakufwa chandumbwavo.
20Jino omu Malita evwile ngwavo Yesu ali nakwiza, ayile nakumusesa, oloze Maliya asalile hanga natwamina muzuvo.
21Malita ambile Yesu ngwenyi, Ove Mwata, nge wapwanga kuno kachi ndumbwami kafwileko.
22Oloze ngunatachikiza ngwami, Chipwe oholili, vyeshovyo naulomba Kalunga, Kalunga mwakuhana.
23Yesu amulwezele ngwenyi, Ndumbwove mwasanguka.
24Malita amwambile ngwenyi, Ngunatachikiza ngwami, mwakasanguka hakusanguka chahalikumbi lyakukuminyina.
25Yesu amwambile ngwenyi, Ami yami Kusanguka, yami Mwono. Ou mwangufwelela, chipwe nafu, mwakayoya,
26kaha weshowo nayoyo, angufwelela, keshi kukafwako. Unafwelelamo, tahi?
27 Malita amukumbulwile ngwenyi, Eyo Mwata, ami ngunafwelela ngwami, Ove yove Kulishitu, MwanaKalunga, Ou vavuluka kwiza hakaye.
Yesu mwalila hakufwa chaLazalu
28Omu ahanjikile ngocho, ayile nakulweza ndumbwenyi Maliya, himwamuyevetela ngwenyi, Muka-kunangula neza, ali nakukusanyika.
29Kaha ikiye hakwivwa ngocho, akatukile washi nakuya kuli Ikiye.
30Jino Yesu apwile kanda achihete mwimbo, oloze apwile achili kuze amuhumanganyine Malita.
31Jino vaYuleya vaze vapwile nenyi muzuvo nakumuvendejeka, hakumona Maliya mwakatuka washi nakulovoka, vamukavile, vashinganyekele ngwavo pamo mwaya kuchimbumbe nakulililako.
32Jino omu ahetele Maliya kuze apwile Yesu, hakumumona alimbilile kumahinji enyi nakwamba ngwenyi, Ove Mwata, nge wapwanga kuno, kachi ndumbwami kafwileko.
33Yesu hakumumona ali nakulila, navaze vaYuleya véjile nenyi nawa vali nakulila, alishishimwine mushipilitu yenyi nakulinyenga chikuma.
34Kaha avahulishile ngwenyi, Munamusavalika kulihi? Vamukumbulwile ngwavo, Ove Mwata, twaya utale.
35Yesu alilile.
36Shikaho vaYuleya vamwe vambile ngwavo, Talenu omu amuzangile!
37Oloze vakwavo vambile ngwavo, Ou atonesanga meso akapuputa, kumana kachi kahashile kuhonesa kufwa chayouko?
Yesu mwayoyesa Lazalu
38Jino Yesu hakulishishimuna cheka, ahetele kuchimbumbe. Chapwile wina waunene wakutota mulilolwa, kaha vambanjikileko lilolwa.
39Yesu avambile ngwenyi, Fumisenuko lilolwa. Malita, ndumbu yauze afwile, ambile ngwenyi, Ove Mwata, oholyapwa nanuku lyehi, mwomwo munahichi makumbi awana.
40Yesu himwamwamba ngwenyi, Kangwakulwezangako ngwami, Nge unafwelela naumona upahu waKalunga?
41Ngocho vafumishileko lilolwa. Kaha Yesu andwile meso enyi nakwamba ngwenyi, Ove Tata, ngunakusakwilila omu unangwivu.
42Ami ngwatachikiza ngwami weji kungwivwanga lika, oloze halizavu eli linemana kuno hakiko ngunahanjikila ngocho, mangana vafwelele ngwavo Ove wangutumine.
43Hakuhanjika ngocho, atambakanyine nalizu lyakukanguka ngwenyi, Ove Lazalu, lovokamo!
44Uze apwile mufu alovokelemo wakujinga mahina kufuma kumahinji mbwe nakumavoko, nalilesu lyakujingila kumeso enyi. Yesu avambile ngwenyi, Mukasununenu, mwechenu ayenga.
Punga yakujiha Yesu
(Mat 26:1-5; Mako 14:1-2; Luka 22:1-2)
45Kaha vávavulu vamuli vaYuleya vaze vejile kuli Maliya, hakumona vize alingile Yesu, vamufwelelele.
46Oloze vakwavo vamwe vayile kuli vaFwaliseu nakuvalweza vize alingile Yesu.
47Shikaho vapilishitu vavalemu navaFwaliseu vakungulwile zango yavaYuleya#11:47 MuchiHelase ngwavo, Sunendeline, yikiko zango yavakulwane vakuyula lifuchi lyavaYuleya., nakwamba ngwavo, Tuli nakulinga ika? Mwomwo Mutu Ou ali nakulinga vinjikizo vyavivulu.
48Nge natumwechelela tuhu ngana, vosena navamufwelela, kaha vaLoma naveza nakututambula chihela#11:48 Vapwile nakuzakamina nganda yavo naTembele yavo. chetu chajila nalifuchi lyetu.
49Oloze umwe wavo, Kayafwase, uze apwile kapilishitu wakulitulaho hamwaka uze, avambile ngwenyi, Enu kamwatachikiza chuma nachimweko,
50kaha nawa kachamilumbunukilako omu chinamiwahila Mutu umwe kufwila vatu, kuchina muyachi wavatu wosena kunonga.
51Kalihanjikilile tuhu iveneko, oloze hakupwa kapilishitu wakulitulaho hamwaka uze, apolofwetele ngwenyi Yesu mweza kukavafwila vaka-lifuchi lyavo,
52kaha keshi vaka-lifuchi lyavo kahako, oloze mangana vana vaKalunga vaze valimwangila kwosena akavakungulule kupwa umwe.
53Ngocho kufuma halikumbi lize vakwachile punga yakumujiha.
54Shikaho Yesu katambukilenga cheka hatoma muli vaYuleyako, oloze afumine kuze nakuya kungalila yapwile kwakamwihi napambo, kulimbo lyakembwe vavuluka ngwavo Efwalime. Kaha atwamine kuze natumbaji hamwe.
55Jino likumbi lyachiwanyino chaKuzomboka chavaYuleya lyapwile nakupandama hakamwihi, kaha vavavulu mumembo vakandukile kuYelusalema vakalitomese shimbu kanda chiwanyino chaKuzomboka.
56Kaha omu vemanyine muTembele, vapwile nakutonda-tonda Yesu nakulihwojola mwavo mwavo ngwavo, Enu munashinganyeka muka, keshi kwiza kuchiwanyinoko tahi?
57Jino vapilishitu vavalemu navaFwaliseu vambile ngwavo, Weshowo natachikiza oku ali, kuvanga ambulule mangana tumukwate.
Atualmente selecionado:
Yowano 11: LUE
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible Society of Zambia