Ijɔ̍ɔn 3
3
Iji̍sɔ̄ɔsi ba̍la Inikode̍mūusi
1Ɔngrɔ̄ɔ ɔha̍ hɔ̄ abɔ̍ɔ re̍ka Inikode̍mūusi. Ɔlɛhu̍ yī āchɛ yī Iju̍u nɛ. O̍ tū ribi yī Āchɛ yī Ifa̍rasīi. 2I̍chi̍chɛ ɔha̍ la otu̍, o̍ wā dikpo̍ba̍ Iji̍sɔ̄ɔsi ge̍ de ɔ̍ hīka, “Ira̍bāayi be̍e! Alɔ jo̍ōkū hīka awɔ - ɔ̄chɛ ongū āchɛ lɛlā nīi Ɔwɔ de tɛ̄rɔ̄ ma̍ a̍nɛ. Ɔ̄chɔ̄chɛ i̍ ge̍ē yɛ̍ɛ̄lā ɔlɛbɛ̍bi̍ nūma̍ wa̍a̍ nīi a yɛ ma̍ ē ya̍ ma̍ ē mɛ ni̍, ɔ̍chi̍kpa̍kpa̍ Ɔwɔ hɔ̄ ba̍la ɔlɔjā.”
3Iji̍sɔ̄ɔsi hīya anu̍ ɔkɔ hīka, “Lēchi̍-lēchi̍, n koko̍o de wɔ! Ɔ̍chi̍kpa̍kpa̍, e̍ gbla̍a ɔ̄chɛ ma o̍bū, nɛ̄ni̍ o̍ i̍ ge̍ē ma̍ ɔpiyɛ yī Ɔchwɔ̄lɛ̍ oro̍ōre̍ yī Ɔwɔ ni̍!”
4Inikode̍mūusi chikpo̍ bɛ̍ɛ̄nɛ̄ hīka, “Kana̍ nīi e̍ ge̍ē gbla̍a ɔ̄chɛ nīi de jɛ̄ ma̍ ē ma we̍ ma̍? O̍ i̍ chī ge̍ē ku̍chē chɛ̄ ga lipu̍ yī ɛ̍nɛ̍ yī nū nīi o̍ ē gbla̍a anu̍ ē ma igbɛpa ē mɛ ni̍!”
5Iji̍sɔ̄ɔsi gba̍a ka de ɔ̍ hīka, “Lēchi̍-lēchi̍, n ā koko̍o de wɔ! Ɔ̍chi̍kpa̍kpa̍, e̍ gbla̍a ɔ̄chɛ ma la yenyi ba̍la Uhu Ɔnɛ̄ɛhɛhi yī Ɔwɔ, nɛ̄ni̍ o̍ i̍ ge̍ē tū la ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ ni̍. 6Lɔkɔ nīi ɛ̍nɛ̍ ba̍la a̍dā yī ɔ̄chɛ ē ma ɔ̍ gala ɔgɔgu yī āchɛ̄ɛchɛ ma̍, i̍ngi̍ngɔ̍ɔ nīi Uhu Ɔnɛ̄ɛhɛhi yī Ɔwɔ titi ē ma ɔ̄chɛ ē gala ɔgɔgu yī uhu a̍nɛ. 7O̍ ge̍ e̍e lɛ wɔ lɛbɛ̍bi̍ wu̍chē lɔkɔ nīi n ka hīka e̍ ge̍ē gbla̍a awɔ ē ma ma̍ ni̍. 8Ahuhu ē gwō gāa ɛbɛ nīi hi ɔ̍ ɔtū ma̍. A ē po̍ ojiya yī nū; a i̍ ē chī je̍ ɛbɛ nīi o̍ bū, kɛ̄ɛ ɛbɛ nīi o̍ yɛ gāa ma̍ ni̍. I̍ngi̍ngɔ̍ɔ nīi lɛlā yī ɔ̄chɛ nīi Uhu Ɔnɛ̄ɛhɛhi yī Ɔwɔ ma ɔ̍ gɔgu la ɔpɔ̄pū yī uhu ma̍ lɛ a̍nɛ.”
9Inikode̍mūusi chikpo̍ du̍mɔ̍ hīka, kana̍ nīi lɛlā nūma̍ ɔ̍lɔ chī ge̍ē ngmɛ̍rɛ̍ ē mɛ ma̍?
10Iji̍sɔ̄ɔsi hīya anu̍ ɔkɔ hīka, “Awɔ nīi - ɔ̄chɛ ɔnɔ̄kɔ̄kū ē ngū āchɛ lɛlā la I̍sɛ̄rɛli ma̍ i̍ gba̍a jo̍ōkū yī lɛlā nūma̍ ni̍? 11Lēchi̍-lēchi̍, n ā koko̍o de wɔ! Ɔjā nīi alɔ je̍ ma̍ nīi alɔ ē kɛlā yī nū a̍nɛ. A i̍ chī chikpo̍ ge̍ē nāa lɛlā nīi alɔ ka ma̍ ni̍. 12N ē kɛlā yī yɛchɛ nūma̍ ē de wɔ, a i̍ chɛ̄ku u mɛ ni̍ ma̍; n ge̍ kɛlā yī ichō ma̍, kana̍ nīi a ge̍ē chɛ̄ku u ē mɛ̍ ge̍ē gbo̍ ma̍? 13Ɔ̄chɔ̄chɛ i̍ chī ga abɔ̍ɔ ga ichō je̍ ni̍; ɔ̍chi̍kpa̍kpa̍ Ɔyi̍ yī Ɔngrɔ̄ɔ nīi bū abɔ̍ɔ la ichō wā ma̍.”
14Lɔkɔ nīi Imo̍sīisi nāa yɛgwā ɔha̍ nīi e̍ ya̍ la oje ɔnɔ̄a̍ ma̍ pla la ichō yī u̍kpɔ̍chi̍ ɔha̍ i̍chɔ̍lɔ lipu̍ yī a̍chi̍ ma̍, i̍ngi̍ngɔ̍ɔ nīi e̍ ge̍ē de Ɔyi̍ yī Ɔngrɔ̄ɔ ē pla ē gāa ichō a̍nɛ. 15Hɛ̄ɛbɛ nīi āchaha̍-āchaha̍ nīi ge̍ chɛ̄ku ɔ̍ ma̍ ge̍ē lɛ ɔhɔ̄leyī i̍mɔ̄mɛni̍. 16Wu̍chē oji̍ nɛ, Ɔwɔ yɔ̍ɔhɔtū yī āchɛ yī yɛchɛ kpɛ̍ɛ nīi o̍ de Ɔyi̍ yī nū ūkpo̍he kpo̍kpo̍ nāa de, hɛ̄ɛbɛ nīi ɔ̄chaha̍-ɔ̄chaha̍ nīi ge̍ chɛ̄ku ɔ̍ ma̍ i̍ ge̍ē pīyēku̍ ni̍, nīi ɔlɔjā ge̍ē lɛ ɔhɔ̄leyī i̍mɔ̄mɛni̍. 17Wu̍chē oji̍ nɛ, Ɔwɔ i̍ de Ɔyi̍ yī nū tɛ̄rɔ̄ wā la yɛchɛ hɛ̄ɛbɛ ge̍ē de pīya olihiyo yī nū ni̍; o̍ de ɔ̍ tɛ̄rɔ̄ wā ge̍ē hɛ̍ yɛchɛ ē ta̍.
18Ɔ̄chɛmɔ̄chɛ nīi ge̍ chɛ̄ku Ɔyi̍ yī Ɔwɔ, Ɔwɔ i̍ ge̍ē hɛ̍ ɔlɔjā lɛpɔ̄ ni̍. Ɔ̄chɛ nīi i̍ ge̍ chī chɛ̄ku Ɔyi̍ yī Ɔwɔ ni̍, Ɔwɔ hɛ̍ ɔlɔjā lɛpɔ̄ lɔ̄lā mɛ̍. Wu̍chē oji̍ nɛ, o̍ i̍ chɛ̄ku Ɔyi̍ yī Ɔwɔ nīi lɛ ūkpo̍he kpo̍kpo̍ ma̍ ni̍. 19I̍ngɛ̍ɛ̄nɛ̄ nīi lɛpɔ̄ ɔhɔ̍ɔ̄hɛ̍ ɔla̍ā ya̍ u̍ku̍rɔ̍ ga a̍nɛ: Ɛbɛ ɔlɛgēdēgēdē wā lipu̍ yī yɛchɛ. Āchɛ chōo̍chē ywɔ̍ɔnyɛ yī ɛbɛ odobū hī ɛbɛ ɔlɛgēdēgēdē, wu̍chē lɔkɔ nīi lɛlā ɔdwɔ̄bi̍ lɛ wa̍ wɔnyɛ la ɔyɔ̍ɔ̄ya̍ ma̍. 20Ɔ̄chɛ nīi ē yɛ̍ɛ̄lā abi̍ ma̍, ɛbɛ ɔlɛgēdēgēdē i̍ ē hi ɔ̍ ɔtū ni̍. O̍ i̍ ē chɛ̄ wā la ɛbɛ ɔlɛgēdēgēdē ɔla̍ā ni̍. Wu̍chē oji̍ nɛ, o̍ i̍ chikpo̍ nīi lɛlā abi̍ ɔyɔ̍ɔ̄ya̍ yī nū ge̍ hi̍yɛchɛ ni̍. 21Ɔ̄chɛ nīi ē yɛ̍ɛ̄lā olēchi̍ lēchi̍ ma̍, anu̍ ē wā la ɛbɛ ɔlɛgēdēgēdē ɔla̍ā a̍nɛ. Bū la ɛbɛ ɔla̍ā, ɛbɛ ɔlɛgēdēgēdē ɔla̍ā ē de lɛlā yī ɔlɔjā wa̍a̍ nīi o̍ ē ya̍ la otūlichō yī Ɔwɔ ma̍ ē chabɔ̄ ke̍e̍.
Iji̍sɔ̄ɔsi ba̍la Ijɔ̍ɔn Ohuyenyi
22La okwi̍ihi yī ɔla̍ā, Iji̍sɔ̄ɔsi ba̍la a̍chi̍kpo̍ yī nū wā ge̍ pīya ga ajɛ yī Ijudi̍ya. O̍ nāa yɛ̄grāa hɔ̄ abɔ̍ɔ ba̍la aa̍ yɛ ē hu āchɛ yenyi. 23Ijɔ̍ɔn titi hɔ̄ abɔ̍ɔ la E̍nɔ̄ɔn yɛ ē hu āchɛ yenyi. Ɛbɛ ɔla̍ā lɛ kurɛkurɛ ga Isali̍im. Yenyi dɔ̄da abɔ̍ɔ. Āchɛ ē pɔ̍ɔ̄pɛ̍ gāa abɔ̍ɔ nīi o̍ ge̍ē hu wa̍ yenyi. 24Yɛ̄grāa ɔla̍ā, e̍ i̍ ku̍ Ijɔ̍ɔn tū la igbakɔbɔ we̍ ni̍.
25A̍chi̍kpo̍ yī Ijɔ̍ɔn ɛha̍ ba̍la ɔngrɔ̄ɔ yī Iju̍u ɔha̍ gblāa abɔ̍ɔ ē ta̍ahu̍ yī lɛlā yī lɛbi̍ ɔgwɔ̄gwā lɔkɔ nīi Iju̍u ē ya̍ la ɔchɔ̍ɔwɔ yī wā ma̍. 26E̍ pīya dikpo̍ba̍ Ijɔ̍ɔn ge̍ koko̍o de ɔ̍ hīka, “Ɔngūlɛ̄lā be̍e! Je̍ka aa̍ a je̍ ɔngrɔ̄ɔ ɔla̍ā nīi hɔ̄ aa̍ i̍krɔ̍ɔ ba̍la awɔ la oe̍ ɔla̍nū yī Ɔkpa̍ yī Ijɔ̍dan ma̍? Ɔngrɔ̄ɔ ɔla̍ā nīi a kɛlā yī nū de āchɛ ma̍! U̍ma̍ama, o̍ yɛ amu ē hu āchɛ yenyi mɛ̍. Āchɛ wa̍a̍ yɛ amu pɔ̍ɔ̄pɛ̍ ē gāa dikpo̍ ē ba̍ ɔ̄ bɛ̍ɛ̄nɛ̄.”
27Ijɔ̍ɔn hīyɔkɔ bɛ̍ɛ̄nɛ̄ hīka, “Ala̍ ma̍ ko̍ō! Ɔ̄chɔ̄chɛ i̍ ē lɛ ɔjā ji ē mɛ ni̍, ɔ̍chi̍kpa̍kpa̍ Ɔwɔ de de ɔ̍ o̍bū. 28Ala̍ ɛlɛjā - itɛ̍ɛhi̍yɛ̍ yī u lɛlā nīi n ka ma̍ nɛ. N hīka, ‘I̍ ami - Ɔhɔ̍ɔnyɛta̍ Nīi Ɔwɔ Hōhu Ma̍ a̍ni̍. E̍ de u tɛ̄rɔ̄ otōtū yɔbū de ɔ̍.’ 29Ɔ̄chɛ nīi - ɔbɔ̍ɔ̄ngrɛ̄ba̍ ma̍, anu̍ lɛ ɔngrɛ̄ba̍ a̍nɛ. Ɔya yī ɔbɔ̍ɔ̄ngrɛ̄ba̍ ma̍ ē hɛ̍ ē rɛ ji ē de arɔ̄ lā. O̍ ge̍ po̍ ɔkɔlɛ̄lā yī ɔbɔ̍ɔ̄ngrɛ̄ba̍ ma̍, o̍ ē lɛ ɔwɔ̄wīyā. I̍ngɔ̍ɔ - ohu̍ nīi ɔwɔ̄wīyā yī ami de gɔ̄grāa ke̍e̍ a̍nɛ. 30Anu̍ ma̍ ge̍ē pīya ɔ̄chɛ ɔnɔ̄kɔ̄kū gāa iyɔ̄bū iyɔ̄bū; Iyī ami ma̍ n ge̍ē ti̍ihihi ē gāa okwi̍ihi-okwi̍ihi.”
Ɔ̄chɛ nīi bū la ichō ma̍
31Ɔ̄chɛ nīi bū la ichō ma̍, anu̍ gɔ̄ga wa̍a̍ a̍nɛ. Ɔ̄chɛ nīi e̍ mɔ̄ma amu la ajɛ ma̍ - ɔ̄chɛ yī ajɛ nūma̍ nɛ. Lɛlā nīi - iyī ajɛyɛ̄ɛchɛ ma̍ nīi o̍ ē ka a̍nɛ. Ɔ̄chɛ nīi bū la ichō ma̍, anu̍ gɔ̄ga wa̍a̍ a̍nɛ. 32Lɛlā nīi o̍ ma̍ la eyī gba̍a̍ po̍ la arɔ̄ ma̍ nīi o̍ ē ka ē de āchɛ a̍nɛ. Ɔ̄chɔ̄chɛ i̍ chī chɛ̄ku ɛrɔ̄ yī nū nīi n yɛ ē ka ma̍ ni̍. 33Ɔ̄chɛ nīi ge̍ chī nāa lɛlā yī nū po̍, ɔla̍ā ya̍ ochi̍chi̍ hīka Ɔwɔ - Ɔwɔ lēchi̍ lēchi̍ nɛ. 34Ɔ̄chɛ nīi Ɔwɔ de tɛ̄rɔ̄ ma̍ ē kɛlā nīi - iyī Ɔwɔ ma̍. Wu̍chē oji̍ nɛ, Ɔwɔ de Uhu yī nū mōmu gɔ̄grāa de ɔ̍. 35Ɔwɔ A̍dā yɔ̍ɔhɔtū yī Ɔyi̍ yī nū gba̍a̍! O̍ de ɔjāha̍-ɔjāha̍ wa̍a̍ kpo̍ tū ɔ̄ la abɔ̄. 36Ɔ̄chɛmɔ̄chɛ nīi ge̍ chɛ̄ku Ɔyi̍ yī Ɔwɔ, ɔlɔjā ge̍ē lɛ ɔhɔ̄leyī i̍mɔ̄mɛni̍. Ɔ̄chɛ nīi ge̍ chī tɔ̍ɔkɔ yī Ɔyi̍ yī Ɔwɔ, ɔlɔjā i̍ ge̍ē lɛ ɔhɔ̄leyī ge̍ē gbo̍ ni̍. Ɔlɔjā ge̍ē de ē jī lipu̍ yī ichi̍ ɔnɔ̄kɔ̄kū nīi Ɔwɔ ge̍ē de ē de ɔ̍ kpɛɛ ku yɛ̄grāa ɔha̍lɔha̍ ma̍.
Atualmente selecionado:
Ijɔ̍ɔn 3: YBASR
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2020 Bible Society of Nigeria (second edition)