Génesis 1
1
Cohamacʉ mʉanore, yahpa cʉ̃hʉre bajuamehneha
1Wahmanopʉre Cohamacʉ mʉano cjihto, yahpa cjihto cʉ̃hʉre bajuamehnea tiha. 2To bajuamehneri yahpa sehe cahno mahnoerari yahpa jisiniha. Nahitiano sahsero jisiniha. Tuhsʉ, to bajuamehneri yahpare dia wʉrʉ dihta ji biharʉcʉ sʉsiniha. Ne nohoi dia wʉrʉ ji bato tiro mariea tiha. Cohamacʉ Catia Macariro dihta ñuhmirucua tiha, tí dia wʉrʉ buire.
3Ã yoa tiro Cohamacʉ,
—Buhriajaro —ni, bajuamehneha.
To ã nichʉta, buhriaa wahaha. 4Buhriarore ñʉno, tiro ji coaha. Ã yoa tó buhriaro mehne nahitiano sahsero jimarirore tju waha. 5Tó buhriarore “dacho” wamoa, ã yoa nahitianore “ñami” ni, wamoaha tiro. Coã ji dʉcari dacho pihtiha.
6Pʉa dacho waharoi tiro niha:
—Wihno tahtia jijaro, tí dia wʉrʉ jimariro cjiro dacho macare to soro, soro tjuahto sehe —niha.
7Ã jiro tiro dia wʉrʉre tju waha, tí wihno tahtia mehne. Cʉ̃no mʉanopʉ tí wihno tahtia bui sehere co tjuaha. Paro yahpa sehe tjuaha. To nino seheta jiha. 8Tí wihno tahtiare “mʉano” wamoaha tiro. Pʉa dacho wahatjiãha.
9Tia dacho waharoi tiro õ sehe niha:
—Yahpare ji biharʉcʉ sʉri co witi borarʉcʉ sʉjaro, wʉari yahpa to noano bajuhto sehe —niha tiro.
To nino seheta wahaha. 10Ã yoaro, tiro wʉari yahpa to bajuachʉ yoarore “dihta” wamoaha. Ã yoa tí witi borarʉcʉ sʉa core tiro “pjiri ma” wamoaha. Noaa ti jichʉ ñʉno, tiro ji coaha.
11Baharo tiro õ sehe niha tjoa:
—Ahri dihta buire tja capa tia cjihtipe dujaro. Tuhsʉ, yucʉri dicha tihti cjihtipe dujaro. Ã yoa jipihtiro yahsaa pũri tia cʉ̃hʉ dujaro —niha tiro.
To nino seheta wahaha. 12Tí dihtapʉre jipihtiro tja capa tia cjihti, ã jichʉ yucʉri dicha tihti cjihti cʉ̃hʉ du mʉja taha. Noaa ti jichʉ ñʉno, tiro ji coaha. 13Tia dacho wahatjiãha.
14Ã yoa pititia dachori waharoi tiro õ sehe niha:
—Buhriahti poca mʉanopʉre jijaro. Dacho soro, ñami cʉ̃hʉre soro ti bajuchʉ yoahti poca jijaro. Ã yoa tí buhria poca sehe dachori, cʉhmari, puhiri quihõhti cjihti jijaro. 15Tuhsʉ, tí buhria poca mʉanoi jihti poca dihtapʉre buhriajaro —niha.
To nino seheta wahaha. 16Ã nino, tiro pʉaria, bʉjʉa poca bajuamehneha. Cʉ̃ria bui tuaria sehe dachore buhriahtia jiha. Ã yoa tia doca cure buhriaria sehe ñamine buhriahtia jiha. Ã jichʉ ñahpichoha poca cʉ̃hʉre tiro bajuamehneha. 17-18Tí pocare tiro mʉanopʉ dachorire, ñamirine yahpapʉre buhriahti cjihti cũha, dachore, ñamine soro bajuhto sehe. Noaa ti jichʉ ñʉno, tiro ji coaha. 19Pititia dachori wahatjiãha.
20Cinco dachori waharoi tiro õ sehe niha tjoa:
—Bajuajaro co puhichapʉ jihtinape. Ã yoa wʉhtina cʉ̃hʉ jipihtina bajuajaro. Mʉanopʉ wʉjaro —niha.
21To ã nino mehne, tiro bajuamehneha. Copʉ jihtina bʉjʉina, ã yoa jipihtina copʉ catiro cjʉahtina, tina curuaripe bajuamehneha. Ã jichʉ wʉhtina cʉ̃hʉre tina curuaripe bajuamehneha. Noaina ti jichʉ ñʉno, tiro ji coaha. 22Ã yoa Cohamacʉ tinare õ sehe niha:
—Diapʉ jiina payʉ masa puti jiga. Ã yoa jipihtina wʉina cʉ̃hʉ payʉ masa putiga ahri yahpapʉre —niha tiro.
To ã ni payoa mehne tinare noano wahachʉ yoaha. 23Cinco dachori wahatjiãha.
24Seis dachori waharoi tiro õ sehe ni namoha:
—Ahri yahpai jihtina, wahiquina bajuajaro. Bajuajaro nuina, nʉcʉ macaina, bʉaina, chihchõina —niha.
To nino seheta wahaha. 25Tiro jipihtina wahiquina nuina, nʉcʉ macaina, bʉaina, chihchõina, tina curuaripe bajuamehneha. Tinare noaina ti jichʉ ñʉno, tiro ji coaha.
26Ã yoa tuhsʉ, Cohamacʉ õ sehe niha jʉna:
—Masare mari yoaro seheta jia tihtinare bajuamehnejihna. Tuhsʉ, tinare wahiquina bui jihtina cjihti cũjihna. Jipihtina wahi, wʉina, bʉaina, chihchõina jipihtina ti cahmano sehe ti yoahtina jijaro —niha tiro.
27Ã yoa Cohamacʉ masare
to yoaro seheta jia tihtinare bajuamehneha.
Mʉnore, numino cʉ̃hʉre bajuamehneha.
28Ã yoa tiro tinare õ sehe niha:
—Payʉ masa putiga.
Ahri dihtare jipihtiropʉre ji sahserʉcʉ sʉga,
mʉsa coyea ji turiaina mehne.
à yoa mʉsare pʉhtoa cũi nija
wahi, wʉina, yahpa macaina jipihtina bui.
Mʉsa cahmano sehe yoaga tinare —niha.
To ã ni payoa mehne tinare noano wahachʉ yoaha. 29Noano wahachʉ yoa tuhsʉ, tinare õ sehe niha tjoa:
—Ñʉga mʉsa. Jipihti capa tia, nohoi ahri yahpa duare, ã yoa jipihtia yucʉ dichare mʉsa chʉhti cjihti cũja —niha tinare.
30Wiho mejeta wahiquina nʉcʉ macainare, ã jichʉ wʉinare, bʉainare, chihchõina sehere tiro õ sehe niha tjoa:
—Jipihtiro yahsaa pũri tiare ti chʉhti cjihti tinare cũja —niha.
To nino seheta wahaha. 31Tiro Cohamacʉ to bajuamehnerire ñʉno, tuaro ñʉ ji coaha. Seis dachori wahachʉ, tiro tuhsʉ dapoha.
Atualmente selecionado:
Génesis 1: GVC
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO